Synod Inkhawmpui 2004 tan

Aizawl : Mizoram Presbyterian inkhawmpui lian ber, Synod Inkhawmpui 2024 chu December 4, 2024 khan tan a nih hnuah Nilaini atang khan rorel tan a ni a. Palai hi 1,757 an ni a, zanin hian a tiak ang.

   Chawhma dar 9:30-a rorel inkhawm tanah palai lawmna, inchhiarna, Synod pawn palai lawmna leh inkhawmpui chibai bukna neih a nih hnuah moderator tang lai, Rev. R. Vanlalnghaka’n Rev. R.C. Lalnghakliana hnenah nihna hlanin rorel zui a ni.

   Nomination thu ngaihthlain kum 2025 Synod Inkhawmpui programme leh puipa turte an pawm a. Kum 2025, 2026 leh 2027 inkhawmpui thlengtu tur tihfel sa bakah Synod Inkhawmpui 2028 chu Republic Veng Pastor Bialin College Veng Kohhran Biak Ina thleng turin an ti.

Kawngpuia motor lum-ah a chuang pakhat thi

Aizawl : December 4, 2024 khan Saitual kal tur Santro MZ-02 B 6724 Lalnunmawia (Mawia) khalh chu Bungbangla thlang kawngah chesualin a hmunah a mi phurh Lalrintluanga, Tuikual North-a cheng a hmunah a boral.

   ZALEN thu dawnna motor hi brake a free (fail) a, kawngpuiah hian a lum niin a sawi a, a lumna lamah hian driver bula chuang Rintluanga chu vawrh chhuakin a lu lam a delh ta niin a sawi. Motor khalhtu hi Saitual khua a ni a, an khua kal tur nia thu dawn a ni.

Current man vangin tlangval kum 34 mi boral

Aizawl : MZ Ramthlengliana (34) chu a hnathawhna-ah December 2, 2024 khan current man vangin a boral.

   Thudawn danin, MZ Ramthlengliana s/o Vanlalchhunga, Champhai Zotlang hian December 2 hian welding hna a thawk a, tlai lama an hnathawh an senghawina lamah current-in manin, rang takin Med Aim Hospital, Champhai panpui ni mah se, chhan theih a ni ta lo a ni.

Hmun danga la pho chhuah loh lemziak leh tuk 97 pho chhuahna nei

Aizawl : Hmun danga la pho chhuah ngai loh lemziak leh lemtuk 97 pho chhuahna, Mizoram Art Development Society (MADS) buatsaih Annual Art Exhibition chu December 3, 2024 khan Lianchhiari Rûn, Treasury Square-ah tan a ni a, Zirtawpni thleng khan a awh.

   MADS hi November, 6, 2012-a din kha niin member 106 (member puitling 99 leh associatiate member pasarih) an awm mek a, member ni tur hian a tui apiang, zir thiamna nei lo tan pawh a dil theih tih an hruaitute chuan an sawi.

   Exhibition hi kum tin kum 2014 atang khan an huaihawt thin a. Kumin hi Information & Public Relations Department (IPR) nena an buatsaih a ni.

Cheng Vaibelchhe 68 chuang man Meth man

Aizawl : Ramria drugs che vel an dapna lamah Police Department, Zokhawthar leh Assam Rifles te chuan December 2, 2024 khan Balu Kai, Zokhawthar-ah Methamphetamine Kg 22.676 a rit cheng Vaibelchhe 68.03 man hu an an man.

   Thu an dawn bawhzuia team pahnih ten chet an lak lai hian Tiau lui kana rawn phurh thleng bag buang chu an ringhlel a. Myanmar lamah heng ruihhlo kengtute hi rang takin an tlanchhia a, heng Kg 22.676 a rit Meth mum te hi man a ni ta a ni. Zokhawthar Police Department, Champhai District te hian dan anga hmalak an nih zui theih nan an kawl zui nghal a ni.

Taitea leh RS-a ten Krismas pual thisen pe te tlawh

Aizawl : Kumin 2024 December thla chhungin Mizorama blood bank hrang hrangah 'Krismas puala thisen pek' kalpui leh tan a ni a, December 3, 2024 khan Civil Hospital, Aizawl Blood Bank-ah Senior Medical Superintendent Dr ST Lalruatfela'n a hawng.

   Krismas puala thisen pek hawn ní-ah hian Civil Hospital Blood Bank-ah Mizo Higher Secondary School zirlaite'n tun hnaia zawh tak Mizoram HSS Games 2024-a an champion lawm nan thisen an pe nghal a ni. Thisen petute hi Youth Icon 2024 star pahnih Lalsangliana leh J Lalrosanga ten an tlawh.

Dr. Vanlalthlana'n Union Education hmu

Aizawl : 5.12.2024 khan School Education Minister Dr Vanlalthlana chuan Union Education Minister Dharmendra Pradhan chu a pisa-ah a hmu a, School Education leh Higher & Technical Education Department kaihhnawiha Mizoram sawrkar hma lakna hrang hrang leh mamawhte a sawipui.

   Mizoram Education Minister leh Union Education Minister inkawmna azarah hian Corporate Social Responsibilty (CSR) kaltlangin Mizoram school thenkhatah Science, Technology, Engineering and Mathematics (STEM) Lab neih a ni dawn a, hei hi academic session thar atanga hman tan theih tura beisei a ni.

Tourism Minister-in Sialsuk lawmman dawn lawmna hmanpui

Aizawl : 05 December 2024 khan Sialsuk khua chuan India ram pum huapa - Best Tourism Village, Community Based, 2024 lawmman an dawn chu khawtlangin ruai nen an lawm a. He hun hi Tourism Minister Lalrinpuii chuan khuallian niin a hmanpui a, Aizawl South 3 bialtu MLA, Baryl Vanneihsangi chu khualzahawm a ni.

   Khawtlang huapa hun hman hi Sialsuk VCP Pu R. Lalruatkima chuan a kaihruai a. Dr Lalrozama, IAS Secretary, Tourism Department pawhin Department aiawhin lawmpuina thu a sawi nghal bawk a. Zai thiamte zai ngaihthlak niin, Sialsuk khuaa sikul hrang hranga Zirlai naupang ten hnam lam leh zai te entirin hun an hmang a ni.

MF&AS Service Association General Conference hmanpui

Aizawl : Chief Minister Lalduhoma, Finance Minister ni bawk chuan December 5, 2024 khan Aijal Club Conference Hall-ah Mizoram Finance & Account Service Association te 29th Annual General Conference 2024 a hmanpui a. Thu a sawinaah "Kalphung thar sawrkarah officer te eirukna lakah an fihlim ngei tur a ni" a ti.

   Chief Minister chuan, MFASA te duhsakna hlanin, hunpui lo thleng mai tur Christmas leh Kumthar chibai a buk a. Finance leh Planning lam a that loh chuan sawrkar sum kalphung leh hmalakna a kal dik thei thin lo va, an pahniha an chak hi a ngai thin. Chuvang chuan sawrkar hian a ngai pawimawh a, hun reilote chhungin Finance leh Planning lamah hian thil inthlakthleng duhawm tak tak an hmu tawh thu a hrilh.

EFFA bultumin Chhamb-71 indona cham pual hmang

Aizawl : December 5, 2024 khan Ex Fighting Fifth Association (EFFA) bultumin kum 1971, December ni 3-a Chhamb khawpui a India leh Pakistan sipai inkah cham 53-na pualin ‘53rd Anniversary of Battle of Chhamb-71’ hman a ni.

   Lt. Gen. AS Pendharkar, G.O.C 3 Corps Hqrs. chu khuallian niin Lt. Gen. JR Mukherjee (Retd.) leh Maj Gen. PK Puri (Retd.) te chu Khualzahawm an ni a. Sub. Laltana (Retd.), President, EFFA chuan hun kaihruaiin Chhamb indona a 5th Assam Regiment atanga nunna chante sunna hun hman a ni.

Speaker-in Zo Indigenous Identity Card

Aizawl : Mizoram State Legislative Assembly Speaker Lalbiakzama chuan December 4, 2024 khan Speaker Room, Treasury Square, Aizawlah ZORO buatsaih Zo Indigenous Identity Card a tlangzarh.

   ZORO chuan, Zo Indigenous Indentity Card hian nihna a ti chiang dawn a, ID nei apiangte chu khawvel ramri khamin a then Zofate India, Burma leh Bangladesh a awmte zalen taka inkalpawh a ti awl sam thei ang an ti a, ZORO in Zo Indigenous ID a siam hi UNO hriattir a ni dawn a. Tin, India Sawrkar, Burma Sawrkar leh Bangladesh sawrkar hriattrir a ni ang. India sawrkar lehkha pek hi Mizoram, Manipur, Assam leh Tripura sawrkar a copy pek a ni bawk ang, an ti.

Health Minister Lalrinpuii’n MSCI ah inzaina leh ICU hawng

Aizawl : Health Minister Pi Lalrinpuii chuan December 4, 2024 khan Mizoram State Cancer Institute (MSCI) Zembawk-ah ngei cancer damlote tan inzai theihna ‘Surgical Services’ bultanna Operation Theatres Complex leh hemi in-a a ken tel damlo 7 dah theihna ICU-te a hawng.

   MSCI ah hian cancer zai thei doctor pathum (gynane onco surgeon, onco surgeon superspecialist leh head and neck onco surgeon) an awm awm tawh a, an mahni puitu anesthesiologist leh thawktu dang dah belhin surgery services hi tan a ni a, hemi in a mamawh leh keng tel ICU khum 7 awmna pawh hawng nghal a ni. Operation Theatres Complex hnuaiah hian Major OT 2 leh Minor OT 1 a awm a. Hengte hi Sawrkar Laipui Scheme ‘Tertiary Cancer Care Centre’ scheme hnuaia din leh sak a ni.

   MSCI ah hian tun dinhmun ah doctor 16 an thawk mek a, chung zing 13 chu nghet niin 3 chu contractual NHM hnuai ami te an ni.

APEX Bank-in Award an dawn lawmna hun a hmanpui

Aizawl : Cooperation Minister P.C. Vanlalruata chuan National Federation of State Co-operative Banks (NAFSCOB) Diamond Jubilee lawmna New Delhi - Bharat Mandapam, Pragati Maidan neih zawh taka Mizoram Cooperative Apex Bank Ltd.-in 'Annual Performance Award For Best Performing State Cooperative Bank II-Tier Structure 2023-2024' an dawn lawmna, Tourist Lodge, Chaltlanga buatsaih chu December 3, 2024 khan khuallian niin a hmanpui.

   Tun dinhmunah Apex Bank hian Deposit cheng vaibelchhe 1539.2 a dawn atangin loan cheng vaibelchhe 1206.1 pe chhuakin, deposit an dawn atanga loan an pek chhuah tehfung (CD Ratio) chu 78.8% niin, Mizorama Bank zingah pawisa dawn atanga teha loan pe chhuak tha ber an ni mek a ni.

National Pollution Control Day 2024 Hmang

Aizawl : December ni 2 (Thawhtanni) kha National Pollution Control Day a ni a, India ram pumah lawm niin faina leh thianghlimna kawnga inzirtirna leh a taka thawk chhuakin hun hman a ni. Mizoramah chuan Mizoram Pollution Control Board (MPCB) hmalâkna-in district hrang hrangah he hun hi hman a ni.

   Pollution Control Day denchhen hian Mizoram district hrang hrangah a rualin District Education Office (DEO) leh MPCB kaihhruainain School Eco-Club naupangte nen a huhoa kawngpui leh lui dung then fai hnatlâng rûnpui neih a ni a, mi 5000 chuang lai an thawkchhuak thei a ni.