Meidum-ah Gas hmuchhuak tawh
Aizawl : Parliament session neih mekah February 6, 2023 khan Mizoram Rajya Sabha MP K.Vanlalvena zawhna te Union Minister pahnihin ziakin an chhang. 
    Union Minister of Petroleum and Natural Gas Rameswar Teli chuan Kolasib District Meidum khuaah January ni 5, 2012 ah ONGC ten Natural Gas an hmuchhuak tih a sawi a. Amaherawh chu tun thlengin lak chhuah hna thawh a la ni lo, a ti. Petroleum and Natural Gas changtu Minister hian Vena zawhna dang chhangin Sihhmuiah Oil Depot siamna atana ram an en chu a hmun a tha tawk tih Indian Oil Corporation Ltd(IOCL) ten report an pek tawh thu a sawi.

G20 Business Meeting atana inbuatsaihna Core Team in thlirho
Aizawl: February 6, 2023 khan Home Commissioner H. Lalengmawia, IAS, G20 Core Committee Chairman ni bawk hovin March ni 2 a Aizawl-a G20 Business Meeting lo awm tur atana inpuahchahna leh inbuatsaihna hrang hrang te thlir hovin an thukhawm.
    Meeting ah hian January ni 27-a G20 Chief Coordinator Harsh Vardhan Shringla leh a hote lo kal tuma rawtna an siam leh duhdan an sawi te chu sawiho niin chumi dungzuia Sub-Committee ten hma an lak dan leh an inbuatsaih dante te ngaihthlak a ni. Lengpui Airport atanga mikhualte thlenna hotel leh an hotel atanga meeting neihna hmun tur MZU kawng dung te tihfai leh tihhnum chungchang leh hmalak tum dan te, MZU leh Lengpui Airport-a thil tul la tih ngai te pawh sawi a ni bawk.

Fire Prevention Week
Aizawl : February 6 khan Vanapa Hall-ah kangmei laka fimkhur inzirtirna kawng pakhat, kumtina kalpui thin 'Fire Prevention Week’ chu Home Minister Lalchamliana'n hawngin khuallian a ni a. EF&CC Minister Pu T.J Lalnuntluanga chu khualzahawm a ni.
    Khuallian chuan kum 20 chuang kalta khan Forest Department ah a tel ve thin thu sawiin thawhpui tam tak vawiin ni ah awm tawh lo mah se, upa in sahuai chu sahuaiin a thlak an tih angin thawktu fel leh Minister viak tha tak hnuaiah Forest Department in hma a sawn zel a ni a ti a. Khuallian chuan mei chu mihring te dam khawchhuahnan tangkai em em ni mah se, fimkhur loh chuan mihring te tana thil pawi thei thlentu a ni a ti. Fire Prevention Week hawnna hi district hrang hrangah hman a ni.

MLDB Office thar hawng
Aizawl : Mizo Language Development Board (MLDB) Office luah leh hlanna hun chu February 6, 2023 khan an Office atana buatsaih AIS Transit Building-2, MINECO, Aizawl-ah neih a ni.
    MLDB Office hawn leh hlanna hun hi Revd. Chuauthuama'n a hmang a, thu a sawiah Synod inkhawmpuiin Mizo tawng tihhmasawn leh hman chungchang a lo rel tawh dan leh hmalakna te, Mizo Language Development Board chu kohhranin din tul a lo tih tawh dan te a sawi.

NCC Cadet pahnih chawimawi
Aizawl: Governor Hari Babu Kambhampati chuan February 6, 2023 khan Raj Bhavan-ah 1 Mizo Air Squadron a mi, NCC Cadet pahnih chu kumin National Cadet Corps (NCC) Republic Day Camp (RDC) 2023 intihsiakna neih zawh takah an hlawhtlinna te avangin a chawimawi.
    Corporal Kenny Lalrinawma Singh, 4th Semester Dept of Chemistry, Pachhung University College leh Corporal Laltlansangi, 4th Semester, Dept of Geology, Pachhunga University College, 1 Mizo Air Squadron NCC Cadet te chu kumin RDC 2023 a tel tura thlan zingah lawman dawng thei awmchhun an ni a. RDC 2023-ah hian Corporal Kenny Lalrinawma Singh chuan Directorate General NCC Medal a dawn bakah Cultural (Group Song) intihsiaknaah pakhatna a hauh a. Corporal Laltlansangi pawh Prime Minister Rally(Cultural) leh NCC Cadet te tana Drill pawimawh ber zinga mi Line Area ah a tel phak bawk a ni.

Bilingual Text book tlangzarh
Aizawl : 6.2.2023 khan Human Resources Development (HRD) Board Vice Chairman Dr L.Thangmawia, MLA chuan MBSE Class IX Textbook thar, Science leh Mathematics zirlaibu mizo tawng leh sap tawnga dah kawp chu MBSE Conference Hall, Chaltlangah a tlangzarh.
    Dr L. Thangmawia chuan zirlaite tana Class IX Science leh Mathematics zirlaibu mizo tawnga chhawpchhuah a lo ni ta chu Zoram mai ni lo, India ram ang pawha zirna lama mel lung pawimawh tak a ni a ti a, he zirlaibu thar tihchhuah a nih theihnana ngaihtuahna sengtu School Education Minister Lalchhandama Ralte leh a hlawhtlin theih nana chak taka bawhzuitu Mizoram Board of School Education(MBSE) te, zirlaibu mizo tawnga lehlin hna hautak tak thawktu zirtirtu leh mithiam te chungah lawmthu a sawi a ni.

Ayush kaihnawiha Central hmalakna sawichhuak
Aizawl: Parliament session kal mêkah February 7, 2023 khan Union Minister of Ayush Sarbananda Sonowal chuan Ayush Department hmasawnna tura India sawrkarin Mizoram sawrkar a tanpuina a pek dan te Mizoram MP K.Vanlalvena zawhnate ziakin a chhang a.
     Sonowala chuan Aizawlah Ayush Hospital khum 50 awmna dinna turin First Instalment ah nikum ah nuai 69.609 pek a nih thu leh second instalment atan nuai 100 approved thar leh tawh a ni tih a sawi a. Saitualah Ayush hospital dinna turin nuai 100 approved a nih tawh thu a sawi bawk. Kum 2015 atanga 2021 chhungin Mizoram chhung hectare 373 a zauah Ramhmul damdawi (medicinal plant) chinna hmun siam a ni tih a tarlang.

CoMaCi-in hmalakdan tur rel
Aizawl: Coordination Committee on Management of Aizawl City (CoMaCi) chu February 7, 2023 khan Chairman Dr Lalhriatzuali Ralte, IAS, Deputy Commissioner, Aizawl District hovin an thukhawm.
    Thutkhawmah Aizawl mipui tui in tur tam zawk pekna tur Augmentation of Aizawl Water Supply Scheme hnuaia Water Treatment Plant for 37 MLD siam nana Hunthar peng atanga Chanmari West kawnga, SIPMIU-in Tui lakna tur Pipe phum dan tur an buaipui mek chungchang sawiho a ni, helai hmun hi lei che thin a nih avangin fimkhur taka hmalak ngai chi te a nih avangin zau zawka ngaihtuah a nih theih nan SDMA ah thlen ni se tiin rel a ni.

Deputy Speaker thar H.Biakzaua’n a pisa thar luah
Aizawl: Chuhtu awm loa thlan tlin Deputy Speaker thar Pu H.Biakzaua, Lawngtlai East bialtu MLA chuan February 8 chawhnu dar 1 khan Mizoram Legislative Assembly-a a pisa thar a luah a. 
    Mizoram Chief Minister Zoramthanga chuan H.Biakzaua Deputy Speaker thlan tlin a ni chu lawmawm a tih thu a sawi a. Deputy Speaker thar chu “politics ah tawnhriat ngah tawh tak a ni a, he hna hi a tlin pawh kan ring a, a lawmawm kan ti a, kan thinlung tak takin kan lawmpui a ni,” a ti. He hun hi Mizoram Chief Minister Zoramthanga, bakah Speaker Lalrinliana Sailo, Deputy Chief Minister Tawnluia, Minister leh MLA rualten an hmanpui a ni.

AR ram luah CYMA leh Revenue Minister ten sawiho
Aizawl: Aizawl khawpuia Assam Rifles ram luah chhunga mimal ram neite LSC cancel tura Guwahati High Court-a Public Interest Litigation (PIL) an thehluh chungchangah Central YMA hruaituten February 8 khan Revenue Minister Lalruatkima chu a pisa-ah an kawm.
    Central YMA hruaitute chuan Assam Rifles ram luah chhunga dan kalha LSC pekte cancel tura kum 2019 kumtir lama Cabinet Meeting-in hma lak a lo remti tawh chu lawmawm an tih thu an sawi a. Assam Rifles ten an chhuahsan tur ram hi mimal hnena pek leh sahthlak chu Central YMA chuan rem a ti ngai dawn lo tih sawiin, he ram hi Mizo mipuite tana thil tha leh rotling siam nan a tawp thlengin beih an tum tih an sawi.