Mobile phone bo hmuhlet a neitute hnenah hlan

Aizawl: February 12, 2026khan Aizawl Police Station in kumin January thla atanga CEIR (Central Equipment Identity Register) system hmang a Mobile Phone bo an hmuhlet 49 chu a neitute hnenah pekchhuah a ni.

  Mobile phone bo hmuhlet a neitu hnen a inpekletna hun hi Aizawl Police Station-ah neih a ni a. Aizawl PS hian nikum May 2025 atang a vawiin thleng hian CEIR hmangin mobile phone bo 332 an hmu let tawh a, mobile phone bo hmuh let zawng zawng hi Rs.43,16,000/- hu a ni.

IFAD Governing Council-ah Mizo nulain thu sawi

Aizawl: Rome, Italy-a International Fund for Agricultural Development (IFAD) Governing Council vawi 49-naah Mizo nula, Khumtunga Darei Banana Chips Manager Laltlandiki Fanai chu mahni kutkawih hmanga ei zawng thalai sawm bik pakua zingah telin thu a sawi.

  Darei Banana Chips hian Khumtunga balhla an thar chhuahte chu siam danglamin an thil siamte chu an hralh chhuak thin.

  Laltlandiki Fanai hi February 10 leh 11, 2026-a IFAD 49th Governing Council-ah India, Senegal, Donican Republic, Sri Lanka, Peru, Cameroon, Malawi, Algeria leh Kenya atanga Youth Entrepreneurs pakua sawm bik zingah a tel a ni.

Lui kalna-ah chesualin kum 54 mi a thi

Aizawl: H Hmangaihsanga (54), Nghalchawm chu an lui kalna-ah chesualin a thi.

  ZALEN thudawn danin H Hmangaihsanga leh a thiante hi nimin February 10, 2026 khan Sangha man tumin Tlawng luiah an kal a, zan lamah Sangha a chhuak duh zawk nia an hriat avangin zan lamah an che chhuak a ni.

  H Hmangaihsanga hi puk pakhatah lutin, puk chhungah hian a chesual palh a, a chhuah mai loh avangin a lui kalpuite hian an ngaihven a, an hmuh chuan a lo thi tawh a ni.

  Vanduaina tawka boral H Hmangaihsanga hi tui thiam tak niin, Tlawng lui a tui tla an awm a zawn a ngaih chang a hma hruai thin, pa tlawmngai tak a ni.

Bawngkawnah dawr pahnih a kang

Aizawl : February 9, 2026 khan Bawngkawn, Ramhlun road a dawr pahnih kangah Rs. Nuai 70 hu vel a kang chhia a, vanneihthlak takin mihring thi leh hliam an awm lo.

  ZALEN thudawn danin, Bawngkawn Ramhlun road a R. Lalawmpuia building, kawng an, mi pahnihin dawr atana an luah chu vawiin chawhma dar 10:50 vel khan a kang a, dawr te hi plastics items zawrhna leh Pui Pui Pharmacy te an ni.

  Platics items zawrh dawr neitu hi K Vanlalzuala niin, a bungrua Rs. Nuai 40 hu vel a kang chhia a, Lalhriatpuia te dawr, Pui Pui Pharmacy dawr bungrua, Rs. Nuai 30 hu vel a kang chhe bawk.

  Dawr kan chhan hi current kal sual vang nia hriat a ni a, fire & emergency services lam ten rang takin an thelh a, a bul vel a building te kang kai loin chhun dar 12 velah thelh mih a ni.

City Gas Distribution (CGD) inhrilhhriatna nei

Aizawl : Food, Civil Supplies & Consumer Affairs (FCS&CA) Minister B. Lalchhanzova, chuan February 12, 2026 khan ATI Auditorium, MINECO-ah Tripura Natural Gas Company Limited (TNGCL) leh FCS&CA tangkawp buatsaih, pipe hmanga gas semchhuah dan tur chungchang inhrilhhriatna, ‘Sensitization Workshop on City Gas Distribution (CGD)’ chu khuallian niin a hmanpui.

  Natural Gas Pipeline hi Panisagar Terminal, Tripura atanga intan niin Sihhmui, Mizoram-ah Receiving Terminal bun a ni dawn a. Panisagar leh Sihhmui (Mizoram) inkar pipe phum hna hi Indradhanush Gas Grid Limited (IGGL) ten thawkin, Sihhmui Terminal atanga Aizawl khawpui chhunga gas sem darh leh enkawlzui hna chu Tripura Natural Gas Company Limited (TNGCL) ten an chang ve thung dawn a ni. Aizawl khawpui bakah hian Mizoram hmun hrang hrangah a tahtawla la semdarh zel tura ruahman a ni.

  Tripura - Mizoram Gas Pipeline Project hi North East Natural Gas Pipeline Grid hnuaia mi niin, kum 2027 December thla velah thawh zawh hman beisei a ni a, tun dinhmunah 45% vel thawh zawh tawh a nih thu IGGL hotute chuan an sawi a ni.

North East Discovery Tour train-in Sairang rawn thleng

Aizawl : Tourism Department leh Indian Railway Catering and Tourism Corporation ten August, 2025 a MoU an sign bawhzuiin a vawikhatna atan Bharat Gaurav Train, India hmarchhak fang kual lai mek “North East Discovery Tour” chuan Sairang Railway Station February 12 khan a lo thleng a, Tourism Department atangin Rachel Lalrinhlui, Deputy Director leh staff ten an lo hmuak a ni.

  Bharat Gaurav Train hian Delhi atanga tanin February ni 3,2026 khan an rawn chhuak a, Manipur tih loh chu India hmarchhak state zawng zawng an tlawh ang a, February ni 18, 2026 ah Delhi khawpui an let leh dawn a ni.

  Bharat Gaurav Train hi khualzinte tana siam bik niin mi 150 a phur thei a, a chhungah restaurant pahnih leh spa te awmin rel dang nen a inang lo a ni. Kum khatah vawi khat India hmarchhak tan bik Indian Railway Catering and Tourism Corporation hian tour package an siam thin a, a duh apiang tan a tel theih a ni.

School Education Officer ten Minister hovin Review Meeting nei

Aizawl : School Education Minister Dr Vanlalthlana hovin February 12, 2026 khan School Education Department Officer ten Review Meeting vawi 7-na MINECO Secretariat Conference Hall-ah neih a ni.

  Minister hova Meeting-ah hian Zirtirtute zingah marksheet leh certificate nei felfai lo an awm thu report a ni a, hengte hi chhui zuia a tul anga action lak tura sawi a ni.

  Meeting-ah hian Zirlaibu thar buatsaih a nih dan te leh zirlaibu thar chu tuna hman lai nen a danglam dawn thu te tarlan a ni a, Class V & VIII ten tun promotion exam atang hian zawhna in ang an chhan dawn thu te leh School 770 ah he zawhna thar hi an exam dawn thu leh result hi SCERT ah lakkhawm a nih tur thu te sawi a ni.

  Minister hova Review Meeting-ah hian Education Consultant Rev Dr K.Thanzauva, Mizoram Education Reforms Committee Working Chairman Prof Lalbiakdiki Hnamte te, School Education Officer te, SCERT leh MBSE officer te an tel a ni.

Parliament-ah kawng pui pathum siam tul thu sawi

Aizawl: Parliament session neih mekah February ni 12, 2026 khan Rajya Sabha MP K.Vanlalvena chuan Zero Hour ah thu sawiin Mizorama kawngpui pawimawh pathum siam thuai a tul thu a au chhuah pui.

  Hnahthial atanga Myanmar ramri kawng pahnih, Hnahthial- Tarpho- Khawhri- Cherhlun- Thingsai- Bualpui H- Saisihchhuah kawngpui leh Hnahthial- Tuipui D- Darzo- S.Vanlaiphai- Sangau- Pangkhua- Saisihchhuah kawngpui te chu National Higway a puang ve ve turin sawrkar laipui a ngen a. 

  Kum 2020 ah Myanmar sorkar in Chin State khawpui Hakha atanga India leh Myanmar ramri Saisihchhuah thlenga Double Lane kawngpui an sial zawh tawh thu leh India sorkar a Ministry of Commerce and Industry in Saisihchhuah ah ramria insumdawn tawnna hmun tenau Border Haat a puang tawh chungin kawngpui in a la pawh loh thu a sawi chhuak.

  Aizawl leh Sairang inkar kawng National Higway No. 54 chu a zau tawk tawh loh thu leh a rang thei ang bera Four Lane kawngpuia siam a tul thu a sawi bawk a ni.

MSME te inchherna tur project hawng

Aizawl : Confederation of Indian Industry Centre for Excellence on Employment & Livelihood (CII CEL) leh Mizoram sawrkar tangkawp buatsaih Micro & Small Entrepreneurs Excellence Project in Mizoram leh Mizoram Entrepreneurs Development Forum chu February 12 khan a hawng. Heng hmalakna pahnihte hi Mizorama MSME neitu, hmasawn zel tumte intuaihriam nana buatsaih a ni.

  Chief Minister-in a hawn projects pahnihte hi Mizoram MSME neitu, an hnathawhna lama hmasawn zel duh, tunlai thiamna thar ber ber nena intuaihriam duhte tana buatsaih a ni a. Mithiam zawkte nena an mamawh sawihona (Forum) pawh siamsak an ni ang a. Kum khat chhung kalpui phawt tur niin, mi 70 te training tura thlan an ni.

Best Performing State zingah Mizoram tel

Aizawl: Sawrkar laipuia Ministry of AYUSH hnuaia National Medicinal Plants Board chuan kum 25 a tlin lawm nan February ni 11, 2026 khan New Delhi ah National Symposium- CHINTAN SHIVIR on Medicinal Plants chu a buatsaihin AYUSH Minister Prataprao Jadhav chuan a hawng a. State Medicinal Plants Board, Directorate of AYUSH, Government of Mizoram chu Best Performing State-ah Pathumna a thlan a ni.

  India ram State tin a State Medicinal Plants Board te hnathawh dan tehfung hrang hrang hmangin Best performing States lawmman hi hlan a ni a. Mizoram aiawhin State Medicinal Plants Board Mizoram Chief Executive Officer Dr. Lalkhawngaihi leh Consultant (SMPB) Dr. Lalrammuana Sailo ten lawmman hi a hmunah an dawng a ni. Pakhatna chu Madhya Pradesh niin Kerela chu pahnihna a ni.

National Muaythai Championship-a medal 12 lak lawm

Aizawl: Sports & Youth Services Minister Lalnghinglova Hmar chuan Fenbruary 11, 2026 khan 7th Senior National Muaythai Championship 2026 neih zawh taka Mizoram tana medal 12 late chu MINECO a a office-ah lawmpuina hun a hmanpui.

  India rama Muaythai inelna sang hi January 22-25, 2026 khan Hyderabad, Telangana-ah neih a ni a. Hetah hian Mizoram in player 11 tirin mi 10 in inelna hrang hrangah medal 12 - gold medal panga, silver medal pathum leh bronze medal pali an la a ni.

Lalrinpuii'n 'Women Icon Award 2026 dawng

Aizawl: Achievers’ World leh Indian Achiever Forum-te tangkawpin an buatsaih ‘National Summit 2026 - Vikshit Bharat 2047 through Comprehensive Socio-Economic Development’, Le’ Meridien Hotel, New Delhi-a February 12, 2026-a neihah Health & Family Welfare leh Social Welfare, Women & Child Development Minister ni bawk Lalrinpuii chuan chawimawina ‘Women Icon Award 2026’ a dawng.

  He hunah hian Shri Harsh Malhotra, Union Minister of State, Ministry of Corporate Affairs, Ministry of Road Transport and Highways, Government of India chu khuallian niin Lalrinpuii hi khualzahawm a ni.

  He hunah hian Lalrinpuii bakah kawng hrang hranga mi hlawhtlingte leh entawn tlak tak tak thlan chhuahte hnenah chawimawina hlan an ni a. Sponspor-tu TATA, SBI, Bharat Petroleum, THDC, Canara Bank, Indian Oil ten CSR kaltlanga an hnathawh hrang hrangte tarlanna hun an hmang bawk.

IPRP&S Minister-in MJA Delhi Press Tour vauliam

Aizawl: Information & Public Relations, Printing & Stationery Minister B. Lalchhanzova chuan I&PR Directorate buatsaih, ni sarih chhung (February ni 11, 2026 - February ni 17, 2026) Delhi-a Press Tour-a zin tur Mizoram Journalist Association (MJA) member 8 leh I&PR Directorate aiawh 2-te chu February 11 khan a vai liam.

Larsap-in LESDE Kût 2026 a hawng

Aizawl : Mizoram Larsap General (Dr) Vijay Kumar Singh chuan February 10, 2026 khan Labour, Employment, Skill Development & Entrepreneurship Department buatsaih, February ni 10-14 chhung awh tur 'LESDE Kût 2026 chu Khuallian niin Aizawl Lammualah a hawng. 

  Larsap chuan Mizoram Building and Other Construction Workers Welfare Board (MBOCWWB) hnuaia project kalpui tur 'Eizawnna Kailawn' leh 'Rahbi Chhertu' a tlangzarh bawk. He hunah hian LESDE Minister Lalnghinglova Hmar chu Khualzahawm a ni. 

   LESDE Kût hi Mizoram Sawrkar hmalakna niin, LESDE Department leh a kaihhnawih board leh institution hnuaia service, programme leh hlawhtlinnate phochhuah a ni a. Thalai, MSME, entrepreneur, hna zawng mek, hnathawktu leh anmahni kaihruai theitu turte chu a kaihhnawih peng te nen thlunzawmin, hna, thiamthil leh hamthatna dangte hre chiang turin hun tha a siam sak a ni. Made in India leh Atmanirbhar Bharat chawilarna niin, state leh regional level trade fair kaltlangin thil siam phochhuah a ni a. Micro and Small Enterprises (MSEs) nen tangkawpin Mizoram leh North Eastern Region-a entrepreneur-te Sawrkar laipui hnuaia Ministry leh Mizoram Sawrkar Department hrang hrangte nen a thlunzawm bawk. 

Ranvulhtute tan Animal Insurance a tlangzarh

Aizawl: AH & Vety Minister C Lalsawivunga chuan 10.02.2026 khan ranvulhtute tan Animal Insurance a tlangzarh. Hemi atan hian National Insurance Company Ltd. leh AH&Vety Department Secretary Lalsangliana ten Minister leh MSPCC Vice Chairman Dr. KC Lalmalsawmzauva hmaah thawhhona thuthlung an ziak a ni.

  He Animal Insurance hian ranvulh hrang hrang (vawk, bawng, sial, kel, berawm) a huap dawn a. Implementing agency atan National Insurance Company Ltd thlan an ni. Premium zaa sawmpanga (15%) hi ranvulhtu ten an tum ve tur a ni a, Handholding hnuaia progress partners te erawh chu handholding atanga tumsak vek an nih dawn thung. Vawk vulh insurance atan cheng 2000 chawi tur kha cheng 292 chauh farmer (Bana Kaih Scheme progress partner ni lo) ten an tum a ngai dawn a ni.

Sairang leh Silchar inkar Rel service thar hawng

Aizawl : Railway Minister Ashwini Vaishnaw chuan February 9, 2026 khan Gauhati atangin Sairang leh Silchar inkar Rel service thar leh Gauhati Rel Station-a Blended Hospitality Service hawnna a nei a, Sairang Rel Station-ah he mi pual hian inkhawm buatsaih niin Chief Minister Lalduhoma chuan a telpui a. Minister Prof Lalnilawma, Minister B. Lalchhanzova leh Adviser to CM TBC Lalvenchhunga bialtu MLA ni bawkten an tawiawm.

  Chief Minister leh Ashwini Vaishnaw te hian Sairang – Silchar Rel Service thar hi an vailiam a, kar khatah vawi nga a tlan thin dawn a ni.

  A hawnna inkhawm neih zawhah Chief Minister hian a ngenna anga Sairang rel Station, World Class Rel Station-a siam tura tih fel tak design a en a. Railways thawktute hian hnathawhna tur Rs. 97 Crore sanction a nih thute, tender an tihchhuah tawh thute leh tender hi thla thar March thlatir lama hawn an tum thu an hrilh a ni.

Fire Prevention Week 2026 hawng

Aizawl: Environment, Forest & Climate Change Department bultumin Kangmei Ven Hapta (Fire Prevention Week 2026) hawnna inkhawm chu February 9, 2026 khan ATI Auditorium, MINECO-ah buatsaih a ni a, EF&CC Minister Lalthansanga’n a hawng. 

  Kumin atana Kangmei Ven Hapta thupui chu ‘Nungcha tinreng chenna leh tui thianghlim min petu ramngawte, kangmei lakah venghim rawh’ tih niin vawiin vek hian District hrang hrangah pawh Kangmei Ven Hapta hi hman tan a ni bawk.

  Kangmei Ven Hapta 2026 hi February ni 9 atanga ni 13 thleng neih tura ruahman a ni a, kangmei venna kawnga hma la thazual khaw pathumte hnenah lawmman pek an ni ang a, khaw dang ti tha pathumte hnenah consolation prize pek an ni bawk ang. Huan emaw, leipui emaw tur atana mimal ram vatte chuan March ni 5 ral hmain an hal tur a ni a, khawtlang theh ram neitute chuan March ni 15 ral hmain an lote chu an hal tur a ni.