Kuttuar ni ngeia rin ruang chhar

Aizawl : February 13, 2025 khan Lalfakmawia (59) Bungthuam (Mamit District) chu Bungthuam atanga Kanhmun lam km 3 vel a hla, leilawn hnuaiah thia hmuh a ni.

   Fakmawia hian VC inthlanah pawh vote thlakin, chumi hnuah vote chhiarnaah reilote a awm a, chumi hnu atangin hmuh zui a ni lo a, zanah a haw loh avangin a tukah chhungkhat laina ten an zawng a, nimin tlai dar 3 vel khan Bungthuam High School class-IX zirlai ten leilawn hnuai luia awm an hmu a ni.

   Fakmawia hi mi kuttuar niin alanga, a nghawngah gamchha nghet takin a invet/ suih a, a tukhum lamah hmun nga velah hliam a awm. A bike bullet chu Thinghlun thlen hma Kalaghat, Assam pengah hmuh a ni.

   Ningani zing khan Kawrthah CHC ah postmortem neih a nih hnuah an in pui awmna Zawlnuam vengpuiah vuiliam nghal a ni.

VC leh LC inthlanah Mamit District-ah Vote tla tha ber

Aizawl : Mizoram District pakua-a Village Council leh Local Council inthlan February 12, 2025-a neih-ah Mamit District chu vote tlak thatna ber niin 77.1%-in vote an thlak a, mihring tamna ber Aizawl district-ah Local Council ah vote tla zat 63.87% niin, Village Council ah 50.83% a ni.

   Mamit District chhungah hian Village Council 92-a awm a, Voters 63613 awmah hian mipa Voters 24679 leh hmeichhia 24293 a vaiin Vote 49158 tla-in 77.1% a ni. Village Council Seats hi General 310, Reserved 98 a vaiin seats 408 a awm a ni.

   Aizawl district-a Local Council/ Village Council Inthlanah vote thlak Local Council ah 63.87% niin, Village Council ah 50.83% a ni.

   Lunglei District chhunga village council (VC) 85 leh Lunglei Municipal Council (LMC) huam chhunga local council (LC) 24-ah a pum puia vote awm zawng zawng 92,669 atangin vote 70,513 (76.09%) a tla.

   Champhai District chhunga Village Council 61-ah vote za zela 71.73% a tla a, Champhai District-ah hian Village Council 62 a awm a, Vangchhia-ah inthlan huaihawt ngai lovin, chuhtu awm lovin Candidate 5 te tling ah puan an ni tawh a, Buangah Reserved Seat-ah MNF Candidate chu tling a puan a ni a, Melbukah Reserved Seat-ah chuhtu awm lovin ZPM Candidate chu tling a puan a ni bawk.

   Kolasib District chhunga Village Council 60-ah te inthlan buatsaih a ni a. Ballot a vote tla zawng zawng hi za zela 72.27% a ni a, PED vote chhiar telin za zela 72.66% tun tum VC inthlanpuiah hian a tla a thung a ni. Kolasib District-ah hian Village Council 60 a awm a, Kawnpui IV VC-ah chuhtu an awmlo a ni.

   Serchhip District khaw hrang hrangah khaikhawmin vote 75.87% a tla. Serchhip District ah hian Village Council 56 awmin voter 50,594 a awm a. Heng zinga mi 37,187, hmeichhia 18,801, mipa 18,386 ten vote an thlak a. Chuhtu awm loa tling 7 an awm bawk a ni.

   Saitual District-ah mi 28,645 in vote thlakin, vote tla zat chu 100 zela 72.03% a ni. VC Inthlanpui 2025-ah hian Saitual District chhungah candidate 513 awmin, heng zingah hian General Candidate mi 395 an awm a, Reserved Candidate hi 118 an awm bawk a ni. Hrianghmun Village Council-ah member pathumte chu uncontested-a tlinga puan an ni.

   Hnahthial District-ah uncontested VC voters tel lovin vote hi 22,936 awmin Village Council zawng zawngah vote 16,904 a tla a. Vote tla (Voter turnout) hi 100 zelah 73.7 (73.7%) a ni. ZPM chiah dinna, Uncontested VC pahnih, Lungpuitlang leh New Kawnpui awmin heng VC-ah hian ZPM candidates te chu tlinga puan an ni.

   Khawzawl district-a vote tla zat chu 73.93% a a ni.   Khawzawl district-ah hian village council 38 a awm a, polling station 63-ah then hran an ni. Tualpui hi chuhtu awm lovin ZPM candidate pathum an chak.

Myanmar ramri thleng rail kawng siam rawt

Aizawl : Thawhtanni khan Parliament Committee Room ah Parliamentary Committee on Railway meeting neih a ni a. Meeting-ah hian Rajya Sabha MP K. Vanlalvena chuan rawtna leh ngenna chi hnih a thlen.

   K. Vena chuan Bairabi to Sairang Rel kawng siam mek chu zawh a nih dawn hnaih thu report pe in Sihhmui Rel Station chu Myanmar ramri thleng a siam ngei a tul thu leh Economic hmasawnna atan leh ram venhimna atana thil pawimawh a nih thu a sawi chhuak.

Ralthuam tawlhruk thahnem tak man

Aizawl : Lunglei Police leh Excise te chuan ruihhlo vaia an duty na lamah February 12, 2025 zing khan motor pakhat ringhlelin Bazar Veng, Lunglei thlen dawn Lungchhe ngaw chhukah an ti ding a, he lirthei Maruti Alto LXI (Silky silver color) Regn. No. MZ01 S 3210 atang hian ralthuam thahnem tak an man.

1. AK 47-2 Nos.

2. M4 Carbine - 5 Nos

3. Magazines - 20 Nos

4. Live Amns of 7.62MM - 504 Nos.

5. Live Amns of 5.56MM - 4675 Nos.

6. Pawisa fai Rs. 49,550/- leh ID cards, ATM Cards, Sim Card and Mobile phone pang an man. He mi kaihnawih-ah hian mi pathum an man nghal a ni.

Zo rimawi fanu duhawm Feli Fanai a thi

Aizawl : Zo rimawi khawvel fanu hrin ropui ber zinga mi, Feli Fanai tia hriat lar, Lalnunfeli Fanai chu Nilaini zing dar 2:15 khan a thi. Kum 32 mi a ni.

   Feli Fanai hi Ebenezar Hospital-ah a thi a. Natna neuh neuh nei niin, damdawi in a awm chhung hian a hun tam zawk chu ICU-ah enkawl a ni.

   Feli Fanai ruang hi, Ramhlun North Industry Mual-a a pute inah chawlhpui a nih hnuah, ambulance hmangin Champhai panpui a ni.

Accident vangin nula kum 29 mi boral

Aizawl : February 10, 2025 khan T Lalawmpuii (29), Lunglei Venglai chu accident vangin a boral.

   Lunglei Venglai Branch YMA hruaitute hnen atanga ZALEN thudawn danin, Nl T Lalawmpuii d/o T Lalmuanawma (L) hi February 10 zan dar 10 rik hma deuh khan an in chhuah lam varandah-ah chesualin a tla palh a, a tlakna hi a sang ang reng viau a, rang takin Civil Hospital, Lunglei panpui nimah se, damdawiin thlenpui a nih chuan a boral tawh a ni.

NH-54 kawng laizauh hna thawh mek tlawh

Aizawl : February 11, 2025 khan H Lalengmawia, IAS Chairman, Empowered committee hovin Mizorama kawngpui pawimawh tak, Mizoram District 5 paltlang, Km 381-a thui, Mizoram leh Assam thlun zawmtu ni bawk National Highway (NH)-54 kawng laizauh hna thawh mek a, Tuirial khaw huam chhunga a harsatna hrang hrang te a hmuna kal in enfiah a ni.

   Tuiriala NH-54 enfiahnaah hian Forest Department, Land Revenue & Settlement Department, DC Office Aizawl, NHIDCL leh Shivalaya Co.Ltd aiawh te an tel bawk. Helai kawng dung bika buaina awmte en ho niin, chenna in thiah ngai te pawh a neitute ho nen sawi fel niin, tun thla chhunga thiah vek tura inrem a ni.

Central Sponsored Scheme hmalaknate thlirho

Aizawl : Mizoram Governor Gen (Dr) Vijay Kumar Singh, PVSM, AVSM, YSM (Retd) chuan Department pali; Rural Development, Agriculture, Animal Husbandry & Veterinary leh Fisheries Department hotute chu February 11, 2025 khan Raj Bhavan-ah a hran theuha kawmin Sawrkar laipui scheme pawimawh tak tak hnuaia an hmalaknate leh harsatna tawhte a sawipui a ni.

   Governor chuan hmasawnna kawnga pawimawh tak, Sawrkar laipui scheme hrang hrang hnuaia Mizorama hmalaknate hriat chian mai bakah, harsatna tawhte Sawrkar laipuia bawhzui thuai a nih theih nana meeting koh a nih thu a sawi a. Mipuite'n an tana ruahman hamthatna te an hriat chiana an chhawr tangkai theih nan scheme chungchang a pawimawh hrilhhriat leh chhawmdawl kawnga theihtawp chhuah zel turin department hotute a chah a ni.

Mizoram Lokayukta Fifth Annual Report thehlut

Aizawl : Mizoram Lokayukta Act, 2014 chhunga Section 47 in a phut angin Lalmalsawma, Chairperson, Mizoram Lokayukta chuan Governor Gen (Dr) Vijay Kumar Singh, PVSM, AVSM, YSM (Retd) hnenah Mizoram Lokayukta Fifth Annual Report 2023-2024 chu February 11, 2025 khan Raj Bhavan-ah a hlan. Annual report hian April ni 1, 2023 leh March ni 31, 2024 inkar a huam a, Mizoram Legislative Assembly-ah pharh a ni dawn a ni.

   Annual report-in a tarlan dan chuan kum 2023-2024 chhung khan Mizoram Lokayukta hnuaiah eirukna thubuai case 8 ziahluh a ni a; heng case 8 te hi preliminary inquiry tura tih niin, heng zinga case 7 te report hi dawn tawh a ni. March 2019 a Mizoram Lokayukta din a nih atanga nimin February ni 10, 2025 thleng khan Mizoram Lokayukta hnuaiah case 71 ziahluh tawh niin, heng zinga case 46 te hi chhuizui tlaka ngaih a ni a. Case hearing tum 38 neih tawh a ni a, thiamloh chantir 4 leh thiam chantir 1 an awm tawh a. Department proceeding tura tih case 3 a awm tawh bawk.

MSPMC in hnathawhna hmunhma tlawh

Aizawl : Mizoram State Project Monitoring Committee (MSPMC) chuan February 10, 2025 khan an Secretary Er. Lalthanzuala Ralte hovin Serchhip-a GNM School Building leh khum 100 awmna tur District Hospital Serchhip Building sak hna thawh tan mek chu tlawhin a dinhmun leh ruahmanna te an thlir.

   Khum 100 awmna tura ruahman District Hospital Serchhip hi Power Grid Corporation of India Ltd. (PGCIL) in CSR Fund an pek cheng vbc. 21 hmanga sak tum mek a ni a, 24.3.2024 khan hna hi thawh tan a ni a, tunah hian a hmun tur lai tawhin a ban khur 12 laiin ban 8 phun a ni tawh a. Hospital Building hi Block, A, B leh C-ah then niin CSR Fund hmang hian Block A sak tura ruahman phawt a ni.

General Nursing and Midwifery (GNM) School Serchhip Building hi kum 2010-2011 a sum hmuh Rs. 675,75,000/- hmanga sak a ni a, Administrative cum Teaching Building leh Hostel Building sak niin 1.4.2013 ah sak tan a ni a, 3.1.2018 khan sak zawh ni mah se luah lo a hun rei tak a awm tawh avangin tunah hian a Building hi a chhe nasa leh tawh hle a ni.