C&I Minister in Aizawl New Market building sak mek a tlawh

Aizawl : 13.02.2024 khan Commerce & Industries Minister F. Rodingliana chuan Aizawl New Market building thar sak mek chu tlawhin hnathawh a enfiah.

   New Market-ah hian building pahnih – Smart City Mission hnuaia ‘City Centre’ leh Commerce & Industries Department hnuaia sak City Centre Annexe te sak mek a ni a. City Centre Project hi cheng nuai 4035 man niin, he hmunah hian dawr 1105 awm tura ruahman niin Four wheeler 31 leh Two wheeler - 79 dah theih tura ruahman a ni. Cold storage, CCTV, Service lift leh Office te ruahman a ni. Ground Floor leh basement bakah floor 7 awm tura ruahman a ni.

   City Centre Annexe building sak mek hi cheng nuai 3641.59 man a ni a, dawr 135 awm a Hawkers 183 thu thei tura ruahman a ni. Two wheeler 219 leh Four wheeler 69 dahna bakah staff quarters engemawzat sak tur a ni bawk a ni.

India leh Japan Conclave-ah Tetea tel

Aizawl : February 12, 2024 khan Shillong, Meghalaya-ah 'India Japan Intellectual Conclave' neih a ni a, Mizoram LESDE Minister Lalnghinglova Hmar chu he hunah hian telin thu a sawi.

   He Conclave-ah hian khawvel insumdawn tawnna kawnga India-in khawchhak lam hawi a tum dan te, Japan-in investment lian tham a kalpui dan te, India Hmarchhak state-te pawh he hmasawnnaah hian an tel thu te sawilan a ni a, thawhho zel dan tur leh inpuih rawn dante zirho a ni.

Chief Minister-in Press Conference nei

Aizawl: Chief Minister Lalduhoma, Guwahati leh Delhi zin haw chuan February 13, 2024 Khan Chief Minister's Conference Hall-ah a zinna chanchin kimchang ram mipuite hnena hrilhriatna Press Conference kaltlangin a nei zui.

   Chief Minister hian Media mite zawhna te pawh a chhang a. Press Conference ah tha taka an rawn kal thin avanga lawmthu hrilhin, hun dangah pawh telsak zui zel thin turin a sawm a ni.

   Chanchinbumite pawhin, Chief Minister-in a ngaihpawimawhzia Press Conference hmanga a tilang thin chu lawmthu an sawi a. State pawna a zinchhuah apiangin, in lama hahchawlh pawh nei hmasa mumal lova Press mite tana hun a buatsaihsak thin hi a hlu kan ti hle a ni, tiin lawmthu an hrilh a ni.

CM leh World bank inkawm

Aizawl : Chief Minister Lalduhoma chuan February 14, 2024 khan a office-ah Rajni Bajpai, Senior Public Sector Specialist & Economist, World Bank a kawm a. Mizorama World Bank sum hmanga hmasawnna hnathawh theih chi thilte an sawi dun.

   Rajni Bajpai hian Chief Secretary Dr. Renu Sharma hova Mizoram sawrkar official te nena Mizorama hmalak theihna tur thil an sawi te Chief Minister hi a hrilh a. Heng ruahmanna te hi World Bank Management thuneitu sang lamah zu thlenin annin an rawn tihhlawhtlinsak theih chin an rawn tichiang ang a. Chu chu Chief Minister ho hian la thlirho leh tur a ni ang.

Valentines Day pual thisen pe

Aizawl : February 14, 2024 khan Sports & Youth Services (SYS) Minister Lalnghinglova Hmar chuan Valentine’s Day puala Association for Voluntary Blood Donation (AVBD), Mizoram State AIDS Control Society (MSACS), Blood Center - Civil Hospital, Aizawl leh Music Domain Mizoram (MDM) tangkawpte buatsaih thisen pek runpui, ‘Valentine’s Day Blood Donation Camp' chu Dawrpui Multipurpose Hall-ah a hmanpui.

   Valentine's Day pual thisen pek runpui hi kum 2010 khan Chuauzikpuii'n thian thate sawmin Civil Hospital Aizawl Blood Bank-ah buatsaihin bul a tan a. He programme hi MSACS, NHM, Civil Hospital RKS, Bank leh mithahnemngaite'n an sponsor tlangpui a. A bul tan tirh 2010 khan Unit 146 pea bultan niin nikum 2023 khan Unit 1113 pek a ni a, kum 2010-2023 chhunga Valentine's Day programme bika thisen pek tawh zat hi Unit 9853 a tling a ni.

Union Minister of State-in Siaha tlawh

Aizawl : February 14, 2024 khan ni hnih cham turin Union Minister of State, Health & Family Welfare changtu Professor S.P. Singh Baghel chuan thlawhtheihna hmangin Siaha a thleng.

   Prof. S.P. Singh Baghel hi M. Laikaw, CEM, MADC, Siaha District MLA pahnih Dr K. Beichhua leh K. Hrahmo, bakah Lalhmunsanga Hnamte, District Bawrhsap, K.L Vulmawia, Superintendent of Police- ten Helipad- ah hian an lo hmuak a ni.

   Prof. S.P. Singh Baghel hian Circuit House- a pan nghal a, Siaha District chhunga sawrkar Official leh party hruaituten an lo hmuak a ni. Prof. S.P. Singh Baghel hian sawrkar Official- te thutkhawm a neih pui nghal a. Lalhmunsanga Hnamte chuan meeting hi a kaihruai a, Lalnunmawii Addl.DC chuan lawmna thu a sawi.

No Tolerance Drive

Aizawl : February 12, 2024 atangin Aizawl ah ngaihnathiamna awm lovin, lirthei document fello endik (No Tolerance Drive) tan a ni.

   Traffic duty te hnen atanga thudawn danin, document fello endik hi engtiang a rei nge kalpui tur tih sawi theih a ni lo a, Aizawl khawpui chhung hmun hrang hrangah duty an awm thin a.

Document fello te chu ngaihnathiamna awmlo in pawisa chawitir an ni a, pawisa chawi tur neilo/keng remchanglo te chu an document hrensak zel an ni.

Live video vangin pathum man

Aizawl : February 12, 2024 khan Mizoram police in $ex live video phochhuah chungchangah mi pathum an man tawh a, social media hman dan a fimkhur turin mipui an chah nawn.

   Police in vawiin a thuchhuah an siam a an tarlan danin, 8.2.2024 khan Mizo sex video thenkhat chu social media ah nasa takin a darh tih hriat a ni a, Cyber Crime Police Station chuan he thil hi chhui zui nghalin, heng video te hi Instagram user pakhatin man chawia video en theihna app ah Instagram user dang pakhat account hmangin live in a phochhuak tih hriat a ni.

CBCUSA ten CYMA te Ruihhlo do nan sum hlan leh

Aizawl : February 13, 2024 khan Chin Baptist Council, Women Deptt. USA te chuan nikum lam atang tawha an lo tih thin danin Central YMA ten Ruihhlo an dona kawnga tangkaia an hman turin thlatin US $ 1000/- chu Central YMA hnenah an hlan thin a. June thla thleng daih tur account-ah an thun leh a ni.

   CBCUSA Women Deptt te hian January - June, 2024 (thla 6 chhung) atan US $ 6000/- (Indian Rupees ?5,04,000/-) chu Central YMA account ah an thun a ni.

   CBCUSA hi Kohhran 115 lai awmna niin tunah hian Kohhran member mi 350000 chuang an ni. Mizoram chunga chhiatna thleng hrang hrangah te leh tun hnaia Myanmar Raltlante tan pawh tanpuina pawisa engemawzat an lo thawn tawh thin a ni.

Damdawi zuartu pawlin raltlante tanpuina CYMA-ah hlan

Aizawl : February 13, 2024 khan Mizoram-a damdawi zuartu pawl, Mizoram Chemist and Druggist Association (MCDA) te chuan Manipur tualchhung buaina avanga raltlante chhawmdawlnan Central YMA-ah Rs.2,12,160/- an hlan. Thilpek hi Central YMA aiawhin Lalhmachhuana, President in a dawng a, OB dangte an tel bawk.

   MCDA lam atangin an President Lalhruailiana Sailo leh hruaitu dangte an tel a, MCDA President chuan, “Manipura kan unau ten harsatna nasa tak an tawh hi kan theih anga puih ve kan duh a, a hma lamah pawh kan lo pui ve tawh a. Tun tumah hian kan member te thawhkhawm atangin tanpuina tur kan hlan pe leh thei hi a lawmawm kan ti a, tangkai taka an hman kan beisei” a ti.

MZP-in Chakma hel pawl Camp ti tawp turin hriattir

Aizawl : February 14, 2024 MZP General Headquarters chuan Borapansury CADC chhung, Lawngtlai District-a Zofate Chawlhbuk a tlawh a. Chawlhbuk leh a chhehvel sam fai niin, Central Young Chakma Association hruaitute nen inkawmna hun an nei a, Chakma hel pawl camp titawp turin an hriattir.

   MZP hruaitute chuan Bangladesh atanga Chakma foreigner dan loa lo lut tam lutuk dang turin CYCA-in hmala turin a hrilh a, Chakma Mizoram chunga awmsate tan pawh thil pawi tak a la nih dawn avangin Chakma illegal Immigrant-te chak taka dang turin CYCA hrilh an ni. MZP chuan, Central Young Chakma Association hruaitute chu, Mizoram chhunga Chakma hel pawl (PCJSS) te training camp Lunglei leh Mamit district chhung hmun 8 a awmte titawp tura hmala turin a hriattîr nghal a ni.

Yoga Subject telh duh loh vanga lungawilohna titawp rih

Aizawl : Mizoram Hindi Training College (MHTC) chuan kum 2023-2024 Hindi Shikshan Praveen (D.El.Ed) leh Hindi Shikshan Parangat (B.Ed) zirlai-ah kum tir syllabus-a tello Yoga Subject chawpchilh taka Compulsary Subject atan dah an duh loh chungchangah Mizo Hindi Zirlai Pawl chuan a tawp thlenga hmalak an tum.

   MHZP chuan, "Kan ngenna in awmzia a neih loh avangin ni 14/02/2024 Nilaini khan MHTC staff te office kai tur dan an ni. MHZP thil phut hi engti zawng pawha a hlawhtlon hma chu zirlai te hian lungawilohna lantir zel kan tum a. Exam Boycott thlenga hmalak a chungchangah inremna neih a nih tak avangin lungawilohna an lantir chu tih tawp a ni," an ti.

ZPM president thar Lalliansawta

Aizawl : February 15, 2024 khan ZPM chuan inthlanna an nei a, president thar atan president ni lai Lalliansawta thlan leh a ni.

   ZPM hruaitu thlannna hi Baptist Centre Falkland ah neih niin, president, vice president leh treasurer tur thlan a ni a, inthlanna ah hian party mi an kal tha hle.

   Result hriat theih chinah Lalliansawta chu president atan thlan leh a ni a, vote tla zawng zawng 4491 niin, vote thi 12 a awm a, president atan vote 2528 hmuin, MLA tanglai VL. Zaithanzama'n vote 1863 a hmu.

   Vice president atan W. Chhuanawma, MLA thlan tlin niin, treasurer ah Lalchhuanthanga MLA thlan tlin a ni bawk.

President atana thlan thar leh president tanglai Lalliansawta hi Mizoram sawrkar a ZOHANDCO chairman atan tunhnai khan ruat thar a lo ni tawh.