Remsiami'n Hockey stick 200 leh ball 120 pe

Aizawl : India-in Olympic Games 2036 thlen a tum a, a tam thei ang Mizo tel ngei se a duhzia lantir nan Lalremsiami a insengso a, Mizoram hockey-in hma a sawn theih nan Rs nuai 7.6 vel man stick 200 leh ball 120 a pe.

   Ningani khan Hockey Mizoramin an office, Tuikhuahtlang, Aizawlah inkhawm buatsaihin an hnuaia district association 10 hnenah Siami’n hockey stick 20 theuh leh ball 12 theuh a hlan a, Khawzawl-ah erawh hockey association din a ni ve lo a ni.

   A khelkawm sem hi Flush company-in ama puala bikin an siamsak a, a hming leh a jersey hak thin number 20 an chhu kai vek a. A tha ber chi ni mah se tunlai hi a man an tihtlawm lai a nih avangin pakhat Rs 3,500-in a lei theih a, ball pakhat Rs 500 man a ni bawk.

Zu siamna hmun 101 luhchhuak

Aizawl : Excise and Narcotics Department leh Police Department thawkdun chuan January 30, 2025 khan Phunchawng leh Rangvamual chhehvela Zu siamna hmun 101 an luhchhuah.

   January 30, 2025 (Ningani) hian Excise & Narcotics Department leh Police Department te chu group hrang hrangah insem darhin Aizawl leh Mizoram hmun hrang hranga dan phal lohva zu siamna hmunpui – Rangvamual leh Phunchawng chhehvela a ruka zu siamna hmunte chu an luhchhuak a ni.

   Police Department atang hian 3rd MAP leh 5th IR an thawkchhuak a, a hnuai mi ang zat hi zu siamna leh a hmanruate tihchhiat a ni:

Zu siamna hmun - 101

Zu bilh lai - Tin 25,556

Zu siamna bel - 96

Rakzu - Liter 1,083

India leh Mizoram sawrkar thupek hal

Aizawl : ZORO General Headquarters buatsaihin January 30, 2025 khan Free Movement Regime (FMR) hlih leh Border fencing tum duhloh lantirna Aizawl-ah neih a ni a. He hunah hian FMR hlip a, kengkawh tura India sawrkar thupek leh Mizoram sawrkar thupek hal a ni.

   He hunah hian ZORO Vice President Rohmingthanga Kawlni, ZORO General Secretary L. Ramdinliana Renthlei leh Lalnunfela Chawngthu te bakah ZORO in Free Movement Regime hlih leh border fencing duhloh lantirnaah hian MPCC aiawhin General Secretary Joseph Lalhimpuia, MNF aiawhin TJ. Lalnuntluanga, Ex-Minister leh ZPM aiawhin PAC member Ngursailova Sailo te chuan thu an sawi a ni. Free Movement Regime (FMR) hlih leh Border fencing tum duhloh lantirna hi Champhai, Serchhip, Lunglei, Kolasib, Mimbung, Vaphai leh Tengnopal Manipur-ah te hman a ni bawk a ni.

Heroin leh Meth cheng Vaibelchhe 7 man chuang man

Aizawl : Police Department, Zokhawthar leh Assam Rifles tangkawp te chuan Dilkawn, Champhai District Mizoram kut atangin Heroin No 4 Hawng 10 leh Methamphetamie tablet Kg 2.276 an man.

   Police leh Assam Rifles ten Heroin No 4 hawng 4 leh Methamphetamine Tablets Kg. 2.276 an man te hi Cheng 7,64,55,000 (Cheng Vaibelchhe sarih nuai 64 leh cheng sangnga zanga) man a chhut niin Zokhawthar, Champhai district-ah Lalruatzauva, 34 s/o C. Vanlalzinga, Dilkawn, Champhai kut atanga an man a ni.

Motor chil nia hriat boral

Aizawl : Lalzawmliana (58), Kolasib Venglai chu motor chil ni a hriat vangin January 28, 2025 khan a boral.

   ZALEN thudawn danin, Lalzawmliana h/o Malsawmkima hi tukin (28.1.25) khawvar hma deuh khan Bairabi road kawngpui sir-ah hmuh a ni a, hmuh hian a boral tawh. A hliam tawrh dan atangin motor chil a nih rin a ni a, he thu ziahlai thleng hi chuan a chiltu motor hi hriat a la ni lo.

Governor-in BSF Officer leh sipaite kawm

Aizawl : Mizoram Governor Gen (Dr) Vijay Kumar Singh, PVSM, AVSM, YSM (Retd) chuan January 31, 2025 khan Border Security Force (BSF) Sector Headquarters, Durtlang North, Aizawl chu tlawhin BSF Officer leh sipaite a kawm.

   Governor hi Kalyan Kanti Majumdar, DIG, Sector Hqrs. BSF leh a thawhpuite'n lo dawngsawngin office leh Composite Hospital-te an fanpui a. Mizorama BSF hmalakna leh hmachhawpte PowerPoint presentation hmangin an sawifiah bawk.

   BSF te hian Mizoram bikah hian India leh Bangladesh ramri 318 Km vela thui ven hna an thawk mek a. Sector Hqrs. Aizawl, Mizoram hnuaiah hian Unit 4 a awm a. Service company 24 awmin, tun dinhmunah Border Out Post (BOP) 58 an vil mek a ni.

State pathum foundation day hmanpui

Aizawl : January 30, 2025 khan Durbar Hall, Raj Bhavan-ah 'Ek Bharat Shreshtha Bharat' hmalakna hnuaiah Mizoram Larsap Gen (Dr) Vijay Kumar Singh, PVSM, AVSM, YSM (Retd) chuan Uttar Pradesh State leh Dadra and Nagar Haveli and Daman and Diu Union Territory-te Foundation Day lawmna hun a buatsaih.

   He hun hi Lalhruaitluangi, Addl. PS to Governor chuan kaihruaiin program buatsaih chhan a sawifiah a. Dr. Pragati Singh, Asst. Prof., NIT Mizoram hnen atangin Uttar Pradesh State chanchin ngaihthlak niin, Dadra and Nagar Haveli and Daman and Diu chanchin tarlanna video thlirho a ni a. UP atanga lokal NIT Mizorama zirlaite'n lemchan leh hnam lam an entir bakah Govt. Mizo Higher Secondary School zirlaite'n hnam lam mawi tak an entir bawk a ni.

World Leprosy Day hmang

Aizawl : Khawvel Puma Pharte ni “World Leprosy Day” chu “Unite, Act. Eliminate” tih thupui hmangin, Taxation Auditorium MINECO ah January 30, 2025 khan hman a ni a. He hun hi Dr. Eric Zomawia, Mission Director, National Health Mission, H&FW Dept. chuan khuallian niin a hmanpui.

   Tun dinhmunah Phar Natna vei chu: Aizawl District-ah 4, Lunglei District-ah 2, Lawngtlai District-ah 3 leh Kolasib District-ah 1 an awm mek a ni.

Manipur, Meghalaya leh Tripura State foundation day hmang

Aizawl : January 29, 2025 khan Durbar Hall, Raj Bhavan-ah 'Ek Bharat Shreshtha Bharat' hmalakna hnuaiah Mizoram Larsap Gen (Dr) Vijay Kumar Singh, PVSM, AVSM, YSM (Retd) chuan Manipur, Meghalaya leh Tripura State-te pualin Foundation Day lawmna hun a buatsaih.

   Manipur leh Tripura-te hi kum 1949 khan India-ah betin kum 1956 ah Union Territory pek an ni a. Meghalaya hi tunhmain Assam State hnuaiah awmin kum 1969 khan Autonomous State an ni a. Heng State pahthumte hi January ni 21, 1972 khan North Eastern Region (Re-organisation) Act, 1971 hmangin State puitlina hlankai an ni.

MIC-in Mizoram RTI Online Version 2 tlangzarh

Aizawl: Mizoram Information Commission (MIC) chuan Mizoram RTI Online hman mek chu Software tha zawk nen version thar hman a ni tawh a, App thar hi 30.01.2025 ah Google Playstore/Apple Appstore ah te upload a ni.

   Mizoram RTI Online (version 2) hmang tur hian Mizoram RTI Online mahni phone a download/install sa uninstall phawt a, Mizoram RTI Online (version 2) hi download/install tur a ni.

Larsap-in Budget Session ko

Aizawl : Mizoram Larsap General (Dr) Vijay Kumar Singh, PVSM, AVSM, YSM (Retd) chuan January 28, 2025 khan Mizoram Legislative Assembly 9-na, thutkhawm vawi 4-na leh Budget Session ni bawk chu February ni 19, 2025 chawhma dar 10:30 atanga Legislative Assembly House, Aizawla neih tan turin a ko.

   Assembly Session kohna hi Larsap hriatpuinain January 28, 2025 khan Mizoram Legislative Assembly Secretariat chuan a tichhuak a ni.

PCR thlirletna workshop buatsaih

Aizawl : International Fund for Agricultural Development (IFAD) bultum Fostering Climate Resilient Upland Farming Systems in the North East (FOCUS) Mizoram hnuaia hlawhtlinnate thlirletna (Project Completion Report) ni khat awh workshop chu Finance Department (Taxation) Auditorium, MINECO Khatla, Aizawlah Janaury 28, 2025 khan a buatsaih.

   Workshop hian a tum ber chu Mizorama district paruk- Champhai, Kolasib, Serchhip, Mamit leh Khawzawl-ah te Mizoram Sawrkar hnuaia Focus project kalpui a nih dan chungchanga stakeholder-te hmuhdan leh hmasawnna atana an vei zawngte sawitlan a ni.

Chief Minister hlui leh Governor inhmu

Aizawl : Mizoram Chief Minister hlui Zoramthanga chuan January 28, 2025 khan Mizoram Governor Gen (Dr) VK Singh, PVSM, AVSM, YSM (Retd) chu Raj Bhavan-ah hmuin a kawm.

   He hunah hian former Chief Minister Zoramthanga chuan Governor hi duhsakna a hlan a. Mizoram tana pawimawh leh tul hrang hrangte inpawhtlang taka inkawmin an sawidun a ni.

State level Sub-committee on fire prevention 2025 thukhawm

Aizawl : State level Committee on Fire Prevention 2025 chu Secretariat Conference Hall, Mineco-ah January 27, 2025 khan an thukhawm a. Fire Prevention Week 2025 neih dan tur te, kumina Lo hal Ni tur te leh thu pawimawh dang te an rel.

   Thutkhawmnaah hian Kum kal ta (2023-2024) chhunga kangmei ven kawnga hmalaknate thlir letna, Fire Prevention Week hman hun tur leh a hawnna hun hman dan tur chungchang, Kumin a lo hal theih hun chhung remruatna, District zawng zawngah kangmei ven kawnga hmalaknate zirhona, Kangmei chhuak tur ven kawnga lawmman semdan tur chungchang te, Kangmei ven kawnga mipuite inzirtirna leh chumi atana kawng hrang hranga hmalak dan tur chungchang te, Khaw hrang hrang, kangmei ven kawnga tithate chawimawidan tur chungchang bakah Kumin Fire Prevention Week thupui tur te an rel a ni.

Governor-in NGO lian pathum hruaitute kawm

Aizawl : Mizoram Governor Gen (Dr) VK Singh, PVSM AVSM, YSM (Retd) chuan January 27, 2025 khan Young Mizo Association (CYMA) hruaitute, Mizo Hmeichhe Insuihkhawm Pawl (MHIP) hruaitute leh Mizo Zirlai Pawl (MZP) hruaitute chu Raj Bhavan-a lengah sawmin, Mizoram hmasawn nana pawimawh leh tul hrang hrangte a sawipui a ni.

   NGO hruaitute hian a hran theuha Governor hi hmuin inpawhtlang takin an inkawm a. YMA hruaitute'n chuan chawhma lamah CYMA President Lalhmachhuana hovin Governor hi hmuin an kawm a. Chhunah MHIP President Ngurmawii Sailo hovin MHIP te'n Governor hi an kawm bakah chawhnuah MZP hruaitute'n an pawl Adviser Peter Lalzawmliana hovin Governor hi an kawm bawk a ni.