NH 306 & 06 chak zawka thawh dan tur sawiho

Aizawl: Thawhtanni khan Kolasib Bialtu MLA, Deputy Speaker Lalfamkima hovin Kolasib DC Robert C Lalhmangaiha, SP Lalrinpuia Varte, SDO(S) leh Addl. SP te chuan MLA chenna inah NHIDCL General Manager, Binod Kumar Shrivastava kawmin, National Highway 306 & 06 siam mek chungchanga hmalak dan tur sawiho a ni.

  He hunah hian Kolasib district chhunga kawngpui siam hna kal mek te uluk taka thlirho a ni a. District official te chuan NHIDCL hotupa hi kawngpui siam hna chu tun aia chak zawka kalpui tur leh ngawrh zawk a thawk turin an nawr a ni.

  NHIDCL General Manager chuan NHIDCL leh an hnuaia contractor-te hnathawh dan leh thawh tum dan (work plan)-te report a pe a. Guwahati High Court hmaa an lo intiamkamna (affidavit) angin an enkawl chin kawngte chu April 30, 2026 ral hma ngeia siam zawh vek an tum thu a tar lang bawk.

Scooter chesualah nula thi

Aizawl: Mangthanchhungi (51)/d/o Phirthuami (L) chu Thawhtanni zing dar 12:45 khan scooter-a chetsualna vangin a thi.

  Thudawnnain a tar lan danin Mangthanchhungi te hian February thla tir khan Tlawng road-ah scooty khalh an zir a, hetah hian chesual palhin hliam na tak a tuar a ni.

  A chetsual hnu hian damdawi inah enkawl a ni a, a hliam tuar loin a thi a, a thih ni chawhnuah vui a ni.

ZPM Legal Board-in MNF MLA lakah complaint an thehlut

Aizawl: ZPM Legal Board chuan Assembly Speaker hnenah MNF MLA Er. Rohmingliana’n ‘Assembly Committee on Petitions’ a reports a thehluh danah complaint an thehlut.

  Thawhlehni khan ZPM Legal Board chuan an chairman, Vanlalsiama Pachuau hovin Assembly Speaker Lalbiakzama hnenah December 22, 2025-a Er. Rohmingliana, MLA-in ‘Assembly Committee on Petitions’ aiawha report/recommendation a thehluh chungchangah Assembly House dan kalh leh tih dan phung pela report a thehlut nia lang te, a thehluh dawna media mite kova report dik lo a pe nia a lan avangin; hemi chungchang chhui fiah tura ngenna an thehlut.

  Asssembly Speaker Lalbiakzama chuan ZPM Legal Board complaint thehluh chu lo dawngin dan anga an complaint thehluh te chu ngun taka an lo chhuizui phawt tur thu a lo hrilh.

MUHCS thuneitu sang thukhawm

Aizawl: Mizoram Universal Health Care Scheme thuneitu sang, Governing Body chu an chairman, Lalduhoma, Chief Minister hovin Thawhtanni khan CM Conference Hall-ah an thukhawm.

  Chief minister hian Health Minister Lalrinpuii leh MUHCS a thawktute chungah lawmthu a sawi a. An thawhrimna leh remhriatna zarah sorkar a hmingtha a, kan scheme chhawrtu mipuite an lawm em em tih a sawi.

  MUHCS-ah hian chhungkaw 20,198 mihring 80,792, pensioner chhungkaw 10,236 mihring 40,944, sorkar hnathawk chhungkaw 35,325 mihring 1,41,300 leh AB PMJAY chhungkaw 2,22,943 mihring 8,91,772 awmna, a vaiin chhungkaw 2,88,702 te, a mihringa mi 11,54,808 te chu an inziaklut a.

  Kum kal mekah chhungkaw inziak lut zawng zawng atanga chhuta 29%-ten medical bill an thehlut a, mihring inziak lut zat atanga chhutin 7% an ni a. Mi pakhat hnena bill pek zat chawhrualin Rs. 15,106 a ni.

  MUHCS kalpui a nih hnuah hian sorkar damdawi in pantu an pung nasa a. Bill endik tawh 70% chu sorkar hospital-a lut a ni a. Sorkar hospital-a lutte hi tam zawk mah se an bill erawh chu bill pawm tawh zawng zawng atanga 39% a ni thung a. Private hospital pantute bill a san bik chhan hi natna serious bik, thluak zai, thin thlak leh kal thlak ang chite an nih thin vang a ni tlangpui a. Hei vang hian sorkar hospital te thuam chak zel a tul hle ngaih a ni.

CADS leh Excise tangkawpin heroin hawng 33 an man

Aizawl: Nilaini zan khan CYMA hnuaia Central Anti Drugs Squad (CADS) leh Excise & Narcotics Dept. hnuaia Anti Narcotics Squad thawkho chuan Bawngkawn hmun hnihah Heroin (No. 4) Hawng 33 an man.

  Ruihhlo man hmasaknaah hian Lianchhiari (40), North Vanlaiphaia cheng nia insawi hnen atangin Heroin Hawng thum an man a. Hemi hnu hian thudawn bawhzui zelin, ZDU Office bul, Bawngkawnah vek Heroin Hawng 30 dang an man leh a ni.

  Ruihhlo mannaah hian Zohmingliana (40) s/o Hrangmanliana leh Lalawmpuia (36) s/o Lalchhuanvawra, Edenthar Venga cheng ve ve nia insawite chu an man.

  Ruihhlo man zawng zawng hi a vaiin Hawng 33 a ni a, a neitu nia puh mi pathumte hi Excise & Narcotics Department-in dan angin thubuai an siamsak nghal a ni.

MSU-in party hrang hrangah ngenna thlen

Aizawl: MSU General Headquarters, Aizawl hruaitute chuan Thawhlehni khan Mizoram Budget Session chungchangah party hrang hrangte hnenah lehkha an thehlut. 

  MSU hruaitute chuan college zirlaite Study Tour Fund Rs. Nuai 50 Mizoram Budget a awm chu Rs. Nuai 150 a tipung turin Mizoram sawrkar an lo ngen tawh thin a. Hei hi ziakin chief minister hnenah February 7 khan an lo thlen tawh.  

  Thawhlehnia tan budget session-ah tipung turin chhawpchhuah a ni dawn a. Hei hi an lawm viau rualin tun dinhmunah hian Mizoram sawrkar college-ah zirlai 13,553 lai an awm tawh a, college zirlai pakhat hian Rs. 737 bak an la chan theih dawn loh avangin beitham hlein MSU chuan a hria a. Hemi avang hian Rs. Nuai 150 chu MSU dinna a ni tih hriaa party anga thlawpna an ngen a ni.

  MSU hruaitute hi ZPM Party aiawhin VL Zaithanzama MLA chuan a lo dawng a, MNF Party aiawhin Vanlalzawma Vice President chuan a lo dawng. MPCC aiawhin Lal Thanzara President chuan lo dawngin, BJP aiawhin party President Dr. K. Beichhua chuan MSU hruaitute hi a lo dawn sawng.

Kawrthah Div-ah phalna nei loa teak lak leh phurh chhui zel

Aizawl: Kawrthah Forest Division chuan phalna nei loa teak kit a sumdawngte chhui hna ngawrh lehzuala kalpui chhunzawm zel a ni a. Inrinni zan khan Zawlnuam khaw bulah phalna nei lova teak thing lakkhawm phur tractor pakhat man a ni a, thingru tute hi an tlanbo hman a ni.

  Kawrthah Forest Division chuan Mizoram leilung leh ramngaw hausakna venghima humhalh turin theihtawp a chhuah zel a. Hemi kawngah hian mipuite thlawpna leh bengvar chhuahpuina a ngen a. Dan lova thing kih leh phurh te, forest produce engpawh phalna nei lova sumdawn nana hmang hriate chuan mahni awmna hnaih her range office-a report turin a ngen bawk a ni.