Ram pumah State Day of Prayer hmang

Aizawl : Mizoram State din champhaphak vawi 38-na chu February 20, 2025 khan Mizoram pumah ram tana a huho a tawngtai ‘State Day of Prayer’ hun atan hman a ni a, a hranpa a hmanna official function dang buatsaih a ni lo.

   Hemi ni pual hian Mizoram hmun hrang hrangah pawl, party leh kohhran bik awm lo in ram tana tawngtaina hman a ni a. A hmanna pui ber Aizawl Sipai Lammual-ah chuan chawhma dar 11 atanga hman niin, ram tana tawngtaina turin mipui tam tak an kal khawm. Thupui awmsa ‘I ram lo thleng rawh se’ tih hmanga tawngtai rual a nih bakah kohhran hrang hrang atangin zaipawl sang chuang in hla an rem a ni.

   He hunah hian ram hruaitu chief minister Lalduhoma, minister, MLA, sawrkar official te leh mipui thahnem tak an tel.

Cheng vaibelchhe 71 man chuang ruihhlo man

Aizawl : Mizoram Police leh Assam Rifles tangkawp te chuan February 18, 2025 khan Zokhawthar, Champhai District-ah Heroin No. 4 bakah Methamphetamine leh Crystal Methamphetamine tam tham tak an man.

   Assam Rifles te hian Methamphetamine tablets packet 6, Kg 7.1 a rit leh Crystal Methamphetamine Kg 3.1-a rit Cheng vaibelchhe 71.15 mana an chhut chu Vangkai, Zokhawthar, Champhai district a-ah an man a, heng an thil man te hi Police Department, Zokhawthar kutah an hlan.

   Zokhawthar-ah vek hian Assam Rifles leh Police te chuan an thudawn an bawhzuia lamah Heroin No. 4 hawng 4 tu tih hriat loh thuhruk chu an man. Heng an thil man te hi Police Department, Zokhawthar kutah an hlan bawk a ni.

A thlawnin bawngchaw sem

Aizawl : AH & Veterinary Minister C. Lalsawivunga chuan February 18, 2025 khan Selesih A.H & Vety Farm ah Durtlang leh Sihphir-a bawng vulhtu mi 41 hnenah a thlawnin bawngchaw tur buhpawl a semchhuak.

   Ran chaw semna pual inkhawm, Selesih AH & Vety Rest House ah neih ah Minister C. Lalsawivunga chuan, bawnghnute, artui leh sa a intodelh tur chuan ran chaw atanga bul tan a ngai a ni, a ti a. Department thawktu leh farmer kalkhawmte chu ram innghahna leh hnam zahawma siam theihna tura mawhphurhna kengtu an nih thu a sawi a. Kuthnathawktute thawhchhuah chu ram economy chawisanna niin, anni tello in sawrkar a kal thei lo a ni a ti a. Chhel takin taima taka thawk turin a fuih a ni.

Meth Kg 9 chuang Zokhawthar-ah man

Aizawl : Police Department, Zokhawthar leh Assam Rifles tangkawp te chuan February 17 khan Methamphetamine mum Kg 9.298 a rit chu Vangkai, Zokhawthar, Champhai District Mizoram-ah Myanmar khua leh tui mi pahnih kut atangin an man.

   Mihring an man te hi Lalthangvela (28 yrs), Hrangthanzema, Khawmawi (Myanmar) leh Zaithangpuia (26 yrs) S/o Raldothanga, Khawmawi (Myanmar) te chu February 17 khan an man a, heng damdawi te leh an mi man te hi Police Department, Zokhawthar te chuan dan anga hmalak zel turin an kutken nghal.

Mizoram leh Arunachal Pradesh Foundation Day lawm

Aizawl : February 20, 2025 khan 'Ek Bharat Shreshtha Bharat' hmalakna hnuaiah Mizoram Larsap Gen (Dr) Vijay Kumar Singh, PVSM, AVSM, YSM (Retd) hovin Mizoram leh Arunachal Pradesh-te State puitlinga hlankai an nihna 'Foundation Day' lawmna Durbar Hall, Raj Bhavan-ah buatsaih a ni.

   Larsap Gen (Dr) VK Singh, PVSM, AVSM, YSM (Retd) chuan kalkhawmte chu Mizoram leh Arunachal Pradesh State-te dinchampha 'foundation day' pual chibai bukin duhsakna a hlan.

   Northeast Areas (Reorganisation) Act, 1971 hnuaiah kum 1972 khan Mizoram chu Union Territory (UT) a puan a ni a. India ram Danpui siamthat vawi 53-na, 1986 hnuah India ram State 23-na ni tura hlankai a ni. Arunachal Pradesh hi North-East Frontier Agency (NEFA) tih niin, kum 1972 khan NEFA chu Union Territory (UT) ah hlankai a ni a. February ni 20, 1987 khan India ram danpui siamthat vawi 55-na, 1986 hnuah India ram State 24-na a ni ta a ni.

SPEFL-SC CEO leh Sports minister inkawm

Aizawl : Ministry of Skill Development & Entrepreneurship (MSDE) hnuaia Sports, Physical Education, Fitness and Leisure Skill Council (SPEFL-SC) CEO Tahseen Zahid chu Aizawlah a rawn zin a, Sports Minister Lalnghinglova Hmar nen SPEFL-SC kaltlanga Mizo thalaite tan sports leh skill kaihkawp dan tur an sawi dun.

   Sports Minister Lalnghinglova Hmar leh Pu Tahseen Zahid te hi Thawhtanni tlai khan Sports Minister office-ah an inkawm a, Thawhlehni khan Labour, Employment, Skill Development & Entrepreneurship (LESDE) Department leh Mizoram State Sports Council official te telin thawhho dan tur an sawiho leh a ni.

   Thawhho dan tur tlangpuiah Nodal Department atan LESDE Department ruat te, Training Partner atan Mizoram State Sports Council hman te a tel a. Vision 2036 Olympic nei chunga kalpui tur ‘Bana Kaih Empowering Mizoram Sports’ a trainer tur te tan ‘Training of Trainers’ kalpui leh, school hrang hranga zirtirtute tan Physical Education training neih te a tel bawk.

Revenue Minister-in e-ram tlangzarh

Aizawl : February 19, 2025 khan Directorate of Land, Revenue & Settlement Conference Hall ah Revenue Minister B. Lalchhanzova chuan, e-ram portal go-live na hun a hmang.

   E-ram ah hian service sawm leh pakhat (11) a awma : ram teh, ram teh that, ram then, ram pawhkhawm, ram hmingthlak leh adangte chu office a kal kher tawh lovin online in mahni awm hmun atangin dil tawh tur a ni dawn a. A dil dan hi awlsam te mah nise mahnia ti thiam lo tan pawh Common Service Centre (CSC) kaltlangin dilna te chu a thehluh theih dawn a ni.

   Mipui te chuan e-ram hmang hian an dilna te an thehluh bakah, an dilna in a ken tel fees zawng zawng pawh online in an pe vek thei tawh dawn a, an dilna thlen chin leh khawiah nge a tan tih te an hmu thei vek tawhin, Office kal buai kher ngai lovin an thil dil thlen chinte an hre thei vek tawh dawn a ni.

Mizoram Health Care Scheme thar sawiho

Aizawl : Chief Minister Lalduhoma hovin Health Minister Lalrinpuii, Adviser to CM TBC Lalvenchhunga leh official pawimawh te leh Non-Government Hospital Association of Mizoram (NGHAM) member te chuan February 19, 2025 khan CM Office-ah Mizoram Health Care Scheme thar tur duan mek thlirhona an nei.

   Dr. Lalnghinglova, MFAS, DD, IF&SL chuan Mizoram Healthcare Scheme thar tur ruahmanna report kimchang a sawi hmasa a, chumi hnuah kal khawmte hian sawihona hun an nei.

   NGHAM member te hian sawrkarin an ruahmanna te chipchiar taka a sawipui avangin lawmthu an sawi a. Hun kal tawha harsatna an lo tawh dan te an tarlang bawk.

Federation Enclave Sample Flat leh Community Centre hawng

Aizawl : Ainawn Venga Federation of Mizoram Goverment Employees & Workers te bultuma sak mek Federation Enclave Sample Flat leh Community Centre chu February 19, 2025 khan Chief Minister Lalduhoma chuan a hawng.

   Federation Enclave hi FMGE&W hnuaia Mizoram Government Employees Housing Society te chuan Blue Mountain Engineering & Services Limited nena tang dunin chhungkaw 350, mihring 2000 vel chen theihna tur Housing Complex hi kum 10 vel kalta atang khan an buaipui tan a. An hawn tak hi Complex Community Centre building niin, he building-ah hian Sample Flat an dah nghal a. Chief Minister hian Sample flat hi a en kual bakah heng flat sak tur lei duh tute tana hauh theih hun (mass booking) a puang nghal bawk.

Larsap-in a tum khat nan Budget Session-ah thu sawi

Aizawl : Mizoram Legislative Assembly 9-na, thutkhawm vawi 4-na leh Budget Session ni bawk chu February 19, 2025 khan Legislative Assembly House, Aizawlah tan a ni a. Governor a nih hnuah Mizoram Larsap Gen. Vijay Kumar Singh chuan thu a sawi.

   Budget Session hawnna inkhawmah hian Mizoram Larsap Gen (Dr) Vijay Kumar Singh, PVSM, AVSM, YSM (Retd) chuan Mizoram Legislative Assembly-in rorelna kalphung zahawm tak vawnhim kawngah sulhnu duhawm tak a lo nei tawh thin tih sawiin, member-te chu he sulhnu chhuanawm tak hi chhawmnung zel turin a sawm a. Larsap chuan he hunah hian a Sawrkar hmalakna, hmachhawp leh ngaihpawimawh hrang hrangte a sawi a ni.

   Budget Session hian February 19, 2025 atanga March ni 20, 2025 thleng a awh ang.

Aizawl Peak Resort Skywalk hawng

Aizawl : February 18, 2025 khan Chief Minister Lalduhoma chuan Hangi Lunglen Tlang, Aizawl-a Aizawl Peak Resort Skywalk chu a hawng. Aizawl Peak Resort hi Er. H. Ginzalal, Adviser to CM (technical) te chhungkaw enkawl a ni.

   Chief Minister chuan Er. H. Ginzalala te chhungkaw thawhrimna leh inpekna a fak a, India rama Solar Pumping sang ber a siam tawh a, Mizorama Skywalk hmasa ber an siam leh a, rawngbawltu chhungkua atanga seilian malsawm tlaka nung an ni tih pawh a chiang a ni, a ti a, an hmalaknaah lawmthu a hrilh.

   Speaker Lalbiakzama, UD&PA Minister K. Sapdanga leh Tourism Minister Lalrinpuii te pawhin thu an sawi a ni.

Larsap leh SYS minister inkawm

Aizawl : Lalnghinglova Hmar, Sports & Youth Services Minister chuan February 17, 2025 khan Larsap Gen (Dr) Vijay Kumar Singh, PVSM, AVSM, YSM (Retd) chu Raj Bhawan-ah hmuin Mizorama sports hmasawnna turte an sawi dun.

   Larsap chuan Mizoramin infiamna lama theihna a neih thu leh football avanga a hmelhriat thin thu sawiin, "Football piah lamah hian hmasawn theihna sang tak Mizoram hian a nei," a ti a. Larsap chuan Union Sports Minister a lo biak tawh thu te, Mizoramin Vision Olympics 2036 a neih avanga lawmawm a tih thute a sawi bakah, sipai lamah pawh a tul anga thawhpui tur a lo zawn tur thu a sawi bawk.

   Sports & Youth Services Minister Lalnghinglova Hmar chuan Mizoramin infiamna lama hma a lakna kawngah State flagship programme 'Bana Kaih' hnuaiah Empowering Mizoram Sports an kalpui tur thu te, thingtlang hrut chhuaka sports lama talent zawnchhuah hna kalpui tura ruahmanna an neih dan te Larsap hi a hrilh.