MPSC member ah ruat

Aizawl : February 19, 2024 khan Mizoram Information Service (MIS) atanga pension PB. Lianthangpuii, Dawrpui Vengthar chu Mizoram Larsap in Mizoram Public Service Commission (MPSC) member ah a ruat.

   Hemi chungchangah hian 19.2.24 khan notification tihchhuah niin, thla khat ah Rs. 2,04,000 a hlawh ang a, hei bakah hian MPSC hnuai-ah hamthatna dang a dawng thei bawk ang.

State Day-ah Saiip puan sinin tawngtai

Aizawl : State Day Celebration Committee (SDCC) bultumin Mizoram State Day (February 20) khan Lammualah zaihona leh tawngtaihona neih a ni a, saiip puan sin mi thahnemtak an pungkhawm.

   SDCC hruaitute sawi danin, Chief Minister duhsakna hnuaiah State Day hi ram pum huapa sual ngaihdam dila chawnghei tawngtai beihpui ‘Ninevi Challenge’ atan hman a ni. Chhun dar 12:55 thleng zaiho niin, dar 1 ah chief minister Lalduhoma'n a hawnna hun a hmang a, tawngtairualna hun atan hman zui a ni.

Zoramthanga leh Tawnluia ten MNF Election Nomination Committee Secretary-ah lehkha thehlut

Aizawl : February 20, 2024 khan MNF President nilai Zoramthanga leh Senior Vice President nilai Tawnluia te chuan MNF Election Nomination Committee Secretary Er. R. Rohmingliana hnenah an pahnih chungchang nomination committee ten lo ngaihtuah lo turin lehkha an thehlut.

   Zoramthanga leh Tawnluia te hian hetia an kut an sil takah chuan MNF inthlang tur hi a boruak a sang viau thei tih thudawnna pakhat chuan a sawi a, post thenkhatah boruak a san viau laiin post thenkhatah erawh boruak a sang vak lo thei niin thu dawn a ni a, Party leader post inchuhna chu sang viau theiah a ngai tih thudawnna chuan a sawi bawk.

MPCC president thar Lal Thanzara

Aizawl : Mizoram Pradesh Congress Committee (MPCC) chuan February 20, 2024 khan hruaitu thlan ah Lal Thanzara chu president atan thlan a ni.

   MPCC hruaitu thlanna hi February 20 chawhma lam atang khan Congress Bhavanah neih a ni a, vote thlak zawh ah chhiar chhunzawm nghal a ni.

   President atana Lal Thanzara thlan a nih hnu hian Vice president-ah Lalnunmawia Chuaungo leh Treasurer ah Dr. Lalmalsawma Nghaka te thlak an ni.

Burma Kuhva hring phur Truck panga an man

Aizawl : February ni 20, 2024 Thawhlehni zan dar 9 vel khan E. Lungdar Police Beat Post duty-te chuan an thudawn bawhzuiin dan loa Burma kuhva rah hring phur Truck panga (5), Champhai District atanga lo kal chu an lo man a. He mi zan vek hian N. Vanlaiphai Police Station-ah an thil mante hi hlan nghal a ni.

   Kuhva rah hring man hlut zawng hi a vaiin Rs. 9,72,000/- a ni a, heng thil mante hi vawiin khan Custom Department-a hlan turin Serchhip Police Station-ah dah a ni.

PM leh President ten CM Birthday lawmpui

Aizawl : February 22, 2024 kha Chief Minister Lalduhoma kum 75 na Birthday a ni a. A piancham lawmpuiin President of India Dr. Droupadi Murmu chuan a zinna Andaman & Nicobar Island atangin a rawn bia a, lawmpuina leh duhsakna a rawn hlan.

   Chief Minister piancham hi Prime Minister Narendra Modi leh Union Minister dang te, Assam Chief Minister Himanta Biswa Sarma leh ram pum huap hruaitu thahnem takin an X (tweeter) kaltlangin lawmpuina an hlan a. Mizoram Health Minister Lalrinpuii chuan Chief Minister piancham lawmna cake Assembly Secretariat Recess Room-ah a buatsaih sak a, Assembly Secretariat-ah vek hian Axis Bank hotuten lawmpuina an hlan a, tlai lamah Chief Minister chennaah CM Office a thawkten a birthday hi an lawmsak leh bawk a ni.

R. Vanlawma chanchin zirhona nei

Aizawl : Govt. Aizawl College-ah Ningani khan R. Vanlawma chanchin zirhona 'Symposium on Contribution of R. Vanlawma (1915-2006) to the people of Mizoram' hun buatsaih a ni a, Lalmuanpuia Punte, MLA & Adviser to CM in Khuallian niin a hman pui.

   Prof. Sangkima, President, Mizo History Association chuan thupui 'Contribution of R. Vanlawma (1915-2006) to the people of Mizoram' chungchang a sawi a, chawhnu lamah sawihona hun hman a ni. Symposium hi Govt. Aizawl College- a History Department leh Mizo History Association ten an buatsaih a ni.

Mizoram Resources Mobilisation Committee leh Central sawrkar hnathawk te thukhawm

Aizawl : February 22, 2024 khan Haukhuma Hauzel, IAS (Rtd), Vice Chairman, Mizoram Resources Mobilisation Committee hovin Mizoram Resources Mobilisation Committee leh Central Govt. Organisations te an thukhawm.

   Meeting-ah hian Sawrkar laipui hnuaia thawk department hrang hrang Mizoram chhung a awmte chu an hnathawh dan, an mamawh leh an harsatna tawhte an sawi a, sutkianpui dan a awm chuan Mizoram tan tun aiin an thawhhlawk lehzual an inbeisei thu an tarlang.

   Central Government employees te hian Mizoram sorkarin an chenna tur quarters ngaihtuahsak thei se an duh thu an tarlang bawk a ni.

Prime Minister-in Mamit-ah School campus hawng

Aizawl : February 20, 2024 khan Jawahar Navodaya Vidyalaya, School Campus, Luangpawl Mamit a mi chu India Prime Minister, Nadrendra Modi chuan biakhmuhtheihna hmangin a hawng.

   JNV School Campus, Luangpawl, Mamit-a hun hmannaah Mamit bialtu MLA Er. H. Lalzirliana chuan khuallian niin a hmanpui.

   Prime Minister Nadrendra Modi chuan zirna kawnga hmalakna bakah India ram chawikanna tura Scheme kalpuite a tarlang a, heng Scheme hnuaia hnathawhte hi a chhawrtu mipui te'n tangkai leh hlawkthlak takin an hman thu biakhmuhtheihna kaltlangin a sawi bawk a ni.

Governor leh Chief Minister hovin Mizoram State Day lawm

Aizawl : Mizoram State pian champha phak vawi 37-na chu Mizoram hmun hrang hrangah February 20 khan neih a ni a. He ni puala official program lian ber chu Vanapa Hall-ah neih a ni. Governor Dr Hari Babu Kambhampati chu khuallian a ni a, Chief Minister Lalduhoma chu Khualzahawm a ni thung.

   Governor Dr Hari Babu Kambhampati chuan Zoram dung leh vanga khua leh tui te duhsakna chibai a buk hmasa a. Remmna thuthlung June 30, 1986 a ziah nih hnuin remna leh muanna awm nghalin State of Mizoram Act 1986 hmangin Mizoram chu state puitlingah hlankai a ni tih a sawi. Mizoram chu state 23-na pek a ni mai lova, a bik taka a inrelbawlna atan India Danpui chhungah Article 371-G siam sak a ni a ti a. Mizoram in state pangai angin February 20, 1987 khan bul a tan tih a sawi bawk.

   Chief Minister Lalduhoma chuan chipchiar leh tawi fel takin Mizoram in state a neih theihna kawnga hruaitu hmasa te hmalakna te a sawi a. Article 371-G siam a lo nih dan te, he dan danglam bikna leh a nih phung te sawiin Mizoram thil neih hlu ber leh himna kulhpui a ni a ti.

Sports Minister leh Assam Governor inkawm

Aizawl : Union Sports Minister Anurag Singh Thakur ruahman angin February 19, 2024 khan Mizoram Sports Minister Lalnghinglova Hmar chuan Assam Governor Gulab Chand Kataria a kawm.

   Lalnghinglova Hmar hi Khelo India University Games hawnna Guwahati-a neih hmang turin a kal a, hetah hian Union Sports Minister ruahman angin India hmarchhaka Sports Minister hrang hrangte nen inkawmna hun an nei nghal a, hmarchhaka Sports hmasawnna tur an sawiho.

   Hmarchhak Sports Minister-te an inkawm zawhah Anurag Thakur hian Assam Larsap a hmuhnaa tel ve tura a sawm angin Mizoram Sports Minister hi a tel.

   Union Sports Minister chuan Mizorama Budget Session tan ni-a Khelo India University Games ngai pawimawha a kal avangin Mizoram Sports Minister hnenah lawmthu a sawi.

MYC chairman-in Minority Affairs minister John Barla kawm

Aizawl : Mizoram Youth Commission Chairman Malsawmzuala Ralte leh Jonathan Lalremruata, OSD to CM te chuan John Barla, Union Minister of State for Minority Affairs chu a chenna in, Delhi-ah February 19 khan an kawm.

   Malsawmzuala Ralte chuan, mizo thalaite tana MYC hmalakna hrang hrang hrilhin, minister chu a theih anga a portfolio atanga tanpuina dap pui turin a ngen a. Minister pawhin hriatthiampuiin, a Secretary, Mithunyadav nena hmalak theihna sawiho tura a rawn angin, an sawiho nghal a ni.