CM leh Union Minister inkalpawhna chungchang sawi dun

Aizawl : 20.02.2023 khan Chief Minister Zoramthanga chu a chenna bungalow ah Minister of State for Communications of India Devusinh Jesingbhai Chauhan chuan hmu in an inkawm.
    Chief Minister leh Union Minister for Communications hian Mizorama communication dinhmun leh hmalakna chungchangte an sawiho a. Mizoram economy hmasawnna te sawi dun bawkin, economy hmasawnna leh communication hmasawnna chu kalkawp tlat leh ngaihpawimawh ngai tak a nih thu te an sawidun a ni.

Zomi Namni Law minister hovin hmang

Aizawl; Law & Judicial Minister T.J. Lalnuntluanga chuan Zomi Cultural Society, Aizawl Joint Committee huaihawt, "Zomi Namni " Vawi 75-na lawmna hun, February 20, 2023 khan Bawngkawn Chhimveng Cultural Hall a neih chu khuallian niin a hmanpui.
    Khuallian T.J. Lalnuntluanga chuan Zomi Namni hman a nih dan te ropui a tih thu sawiin, Hnam Inpumkhatna hi a hlu a, inngeih taka awm leh tanrual chuan hnam chak takah min chhuah theih a ni, a ti a. Mizoram sawrkar kan hrawn lai mek hian hnam inpumkhatna a ngaipawimawh em em a. Sawrkar a din tirh atanga Zo hnahthlak awmna khuaah te Bus service tura hmalak a nih dan te a sawi. 

Mizoram district tinah State Day 36na hmang

Aizawl : Mizoram State Day 36-na chu 20.02.2023 khan Mizoram district khawpui hrang hrangah hman a ni a, a lawmna pui ber Vanapa Hall-ah khuallian Chief Minister Zoramthanga hovin hman a ni
    Chief Minister Zoramthanga chuan Mizoramin kum 36 lai State nihna a chang ta chu lawmawm a tih thu sawiin, he niah hian Mizoram chu midangte tan malsawmna ni tura inbuatsaih a tul thu a sawi. Chief Minister chuan Mizoram a lo indinchhoh dan sawiin, rambuai harsatna tinreng paltlangin vawiinah remna leh muanna duhawm tak hnuaia hun kan hmang thei hi Siamtu’n chhan neia a rel vek a nih thu a sawi a. Midang tan malsawmna ni thei tura min buatsaihna a ni tiin, chu malsawmna haichhuah chu tu dang kutah nilovin keimahni kutah theuh a awm a ni, a ti.

Governor-in PM Modi hnenah Mizoram mamawh thlen

Aizawl : February 20, 2023 khan Governor Hari Babu Kambhampati chuan Prime Minister Narendra Modi chu PM Office, South Block, Raisina Hill, New Delhi-ah a hmu, Mizoram mamawh te a thlen.
    Governor Hari Babu Kambhampati chuan Prime Minister chu Mizorama hmalakna pawimawh leh Mizoram state mamawh te leh state dinhmun tlangpui te a sawipui a. Tun kum kal mek a Mizoram chhunga State leh Central Sawrkar hmalakna pawimawh kalpui mek/thawh mek chungchang pawh an sawi dun bawk.
    Governor Hari Babu Kambhampati hian hemi ni vek hian National War Memorial a tlawh a, Martar te zahna lantirin pangpar a dah bawk a ni.

CM hovin G20 meeting-a presentation pek tur te thlirho

Aizawl: February 20, 2023 khan Chief Minister Zoramthanga hovin Chief Minister’s Office Conference Hall ah Aizawla March ni 2, 2023 a, G20 hnuaia B20 Business Meeting/Conference lo awm tura he intawhkhawmnaah thupui thlan sa mila Mizorama sum peipunna awm thei investment opportunities chungchanga Department ten presentation an siam te thlirho a ni.
    Sawrkar lam atanga presentation 3 leh mimal sumdawng mi 2 ten an presentation an siam hnuin, her rem ngai lai te, siamthat leh belh ngai laite chu chipchhiar taka sawiho niin programme duan sa te thlir ho nghal a ni bawk.

CM hovin Chin National Day hmang

Aizawl: Chief Minister Zoramthanga chuan Chin National Day vawi 75-na puala Vanapa Hall-a programme buatsaih chu khuallian niin 20.02.2023 zan khan a hmanpui.
    Chief Minister chuan Chin National Day kum 75 na a thleng chu lawmawm a tih thu a sawi a. Ramchhung buai avanga Myanmar rama Chin unau chengte'n mahni sahimna zawnga an ram an tlansan a ngai chu pawi a tih pui thu sawiin, an lo luh tirh kha covid19 hripui len nasat zual lai nen a in nang chu vanduaithlak a tih chu a sawi a. An tan Mizoram chhunga chengte chuan theihtawp an chhuah thu leh, Myanmar rama remna leh muanna a awm leh ngei an beisei pui thu a sawi. Zohnahthlak te inpumkhatna leh inunauna chu chhawm nun zel pawimawh a tih thu a sawi bawk.

Kum upa zawk te tan center hawng

Aizawl: Adult Education Wing, School Education Department hnuaia post-literacy and continuing education programme hnuaia Critical Life Skills and Occupational Skill Development Programme atâna hmalâknaah, he programme kalpuina tûr Chawnpui Vêng, Aizâwla Model Centre din tûra ruahman chu February 21, 2023 khân hawn a ni.

Aizawl Day film festival Mayor-in hawng

Aizawl: Aizawl Day 133-na denchhena Aizawl Municipal Corporation, Department of Information & Public Relations leh Mizoram Film Forum ten an buatsaih chu 22.2.2023 khan Information & Public Relations Auditorium-ah Aizawl Municipal Corporation Mayor Lalrinenga Sailo chuan a hawng.
    Aizawl Mayor Lalrinenga Sailo chuan, "Official taka Aizawl hi khuaa puan a nih champhaphak kum 133-na a lo thlen hian Aizawl mipuite chibai ka buk a, Aizawl khawpui mi nuai li singnga vel chen mekna hian hma a sawn zelna tur leh duat taka enkawl hi kan zavaia kovah a innghat a. Kum tinin Aizawl Day hi lawm tura ruahman a ni; a lawmna hmasaah hetianga Aizawl Day Film Festival buatsaih a ni hi lawmawm ka ti hle a ni," a ti. Mizo film industry tan hetiang ang platform buatsaih zel hi AMC chuan a tum thu leh Film industry chu hnam, ram phochhuahna leh hna siamtu tha tak, mipuite min awmtleitu a nih avangin chawi nun zel tul a tih thu a sawi bawk.

ZMC-ah phir inzawm zai

Aizawl: February 22 khan Mizorama a vawikhatna atan phir an taksa a inzawm "conjoined twins" chu Zoram Medical College-ah hlawhtling takin zai hran an ni a, ZMC NICU ah uluk taka enkawl mek an ni.
    Team leader Dr.John Lalliandinga, Associate Professor of Surgery and Paediatric Surgeon, ZMC hovin Plastic Surgeon, General Surgeon leh Anesthesiologist ten darkar 3 chhungin an zai zo a ni.  Thin (liver) pakhat intawm an nih avangin nausen pahnih hi thin pakhatin a chawm zawh dawn loh avangin naute pakhat zawk chhan nan thin hi zai phel a ni.

Rubber Board hotuten CM leh CS hmu

Aizawl: Chief Minister Zoramthanga chu 23.02.2023 khan a pisa ah Rubber Board of India Executive Director Dr. K.N. Raghavan leh a thawhpuite an hmu a, hemi ni vek hian Chief Secretary Dr. Renu Sharma chu a office ah an hmu bawk a, Mizoram leh hmarchhak state a an hmalaknate an sawipui a ni.
    Chief Minister chuan Rubber board hmalakna chu lawmawm tiin, economy tihhmasawnna atan thil tha tak, Mizoram leh hmarchhak state dangte pawhin an thatpui phah ngei a beisei thu a sawi a. Transportation cost tihhniam nan a link road siam chungchanga mamawhna an thlen chu thil pawimawh tak a nih thu leh, a remchan dan ang zela theihtawp a chhuahpui tur thu a hrilh a ni.
    Rubber Board te hian Mizoramah kum 2021 khan office hawng tanin Soil Department hnuaiah hma an la a. Mizoramah hian District hrang hrangah hectare 1500 a zauah hma an la mek a, beneficiary 1200 an nei. Kumin hian hectare 1600 a zauah hma lak tumin an inbuatsaih a ni.
    Dr. K. N. Raghavan chuan Chief Minister hi Mizorama rubber chin hmalakna chungchang sawipuiin, state sawrkarin a tawiawm tawhna zawng zawng chungah lawmthu a sawi bawk.