Nuai 68.40 man hu Exotic animal man

Aizawl : February 1, 2024 khan Assam Rifles leh Forest department ten Rs. Nuai 68.40 hu Exotic animal leh sava bakah a tawlhtute an man.

   Nimin 31.1.24 khan heng dan lova tawlhruk ramsa leh sava te hi Champhai DC Complex Road ah man an ni a, a tawlhtumtu a puh mi pahnih man tel an ni bawk.

   Sava leh ramsa te hi thir bawm leh plastic bawm ah khung an ni a, Zokhawthar atangin Aizawl lam panpui tur nia hriat an ni.

MZP ten Modi leh Amit Shah lim hal

Aizawl : MZP chuan Border Fencing leh Free Movement Regime (FMR) tihtawp tumna duh loh lantir nan, January 31, 2024 khan India Prime Minister Narendra Modi leh Union Home Minister Amit Shah te lim an hal.

   MZP chuan hemi chungchangah hian Mizoram Chief Minister Lalduhoma leh Home Minister Sapdanga chu theih tawpa hmala turin a lo ngen tawh a. India Prime Minister Narendra Modi hnenah Memorandum thehluh tawh niin, Union Home Minister Amit Shah bakah, India Vice President leh Union Home Secretary-te a copy an lo pe tawh. Chuti chung chuan ceneral sawrkar atangin thulh tumna emaw engmah thu lawmawm dawn an nei lo a, ramri hung tur hian ngawrh takin inbuatsaihna a kal mek niin hriat a ni.

MZP-in MZU zirlai lakah FIR thehlut

Aizawl : January 30, 2024 khan Meitei hel tana pawisa lo khawntu Teresa Nungthujam MZU-a Ph.d zirlai mek lakah MZP General Hqrs chuan Vaivakawn Police Station ah First Information Report (FIR) a thehlut a ni.

   Teresa Nungthujam hi Kumtluang Women Hostel, Mizoram University-a awm mek niin, Meitei hel (Arambai Tengol) hnena silai mu man tur khawna hlantu niin MZU hnuaia PhD a zirna chhunzawm theih tawh lohna tura hmala turin MZP chuan MZU Registrar leh Dean Students’ Welfare hma la turin an lo ngen tawh a, Tunah hian Police te hma lakna turin FIR hi an thehlut leh ta a ni.

Lu ruhro lian tak laichhuak

Aizawl : January 24, 2024 Changpui (Lunglei district) khua a laih chhuah, mihring lu ruhro ni ngei a hriat chu a lan mai dan ah a lian hle a, January 29 khan endik turin Aizawl ah lak a ni.

   Changpui khua atanga ZALEN thudawn danin, lu ruhro hi nikum October thla a Ni za inhlawhna an neih a, hna an thawhna ah laih chhuah a ni a, a hmun hi tun hma lam a khaw hmun hlui a ni lo a, hemi vang hian thil chinchang hre deuh te pawhin a ngaihna an hre lo hle.

   Mihring lu ruhro ni ngei rin hi a lan mai danah a lian hle a, endik turin Aizawl lamah lak a ni a, a khaw mi te chuan tun dinhmun ah lu ruhro chinchang hi an la hre zui rih lo.

Agri Minister hovin inrawnkhawmna nei

Aizawl : February 1, 2024 khan Agriculture Department chuan Department kaltlanga hmalakna hrang hrangte thlirletna leh hmalak zel dan tur kawnga chipchiar taka inrawnkhawma, Agriculture Minister P.C. Vanlalruata hovin an nei.

   Agriculture Minister chuan Agriculture chu kum tam tak chhung thar tam lam tinzawn (production based) ringawta a kal thu sawiin, tunah chuan thar chhuahte hralhna lam tinzawn (market based) hmanga kalpui tum a nih thu leh 'Market First' ti a kal chu a hun tawh takzet thu a sawi a. Sawrkarin a hralhna tur lam ngaipawimawhin Sawhthing, Aieng, Hmarcha leh Hmunphiah hralhna tur sum a dah thu leh rate mumal tak a duan thu sawiin, nakum budget pharh hma ngeiin buhfai rate pawh siama loneitute tana puanzar hman tum a ni a, Tung pawh sawrkarin a ngaih pawimawh dawn thu a sawi a.

Road Safety Month -2024 hawng

Aizawl : February thla (1-29 Feb, 2024) chhunga hman tur 'Road Safety Month -2024' chu February 1, 2024 khan Mizoram State Road Safety Council buatsaihin Assembly Annexe Conference Hall, Aizawlah hawn a ni.

   He hun hi Transport Minister Vanlalhlana, Chairman, Mizoram State Road Safety Council chuan khuallian ni a hmanpuiin Road Safety Month, 2024 chu February thla chhunga Mizoram puma hman turin a hawng. Kumin Road Safety Month atan hian 'I him theih nan Traffic Rules-te zawm thin ang che (Obey Traffic Rules for your own safety)' tih chu thupui atan hman a ni.

Bharat Scout & Guides President leh Vice President lalut

Aizawl : January 31, 2024 khan CM's Conference Hall ah Chief Minister Lalduhoma chu Bharat Scout & Guides Mizoram State President atan lakluh a ni a, a rual hian Education Minister Dr. Vanlalthlana, Minister leh Sports & Youth Services minister Lalnghinglova Hmar te chu Vice Presidents atan lakluh an ni bawk.

   Chief Minister chuan, Scout & Guides hmalakna hi khawvel huapa fak leh chawimawi a ni a, Mizoramah ngei pawh an kaihhruai thalai tam takte mi hlawhtling leh chhuanawm tak takah an lo chhuak tawh a, khawtlang tan thil tha tam tak an lo thawk tawh thin. A thiltum leh hnathawhte hi keini Mizote pawhin kan mamawh em em a thil vek a ni, a ti.

   Vice President thar Dr. Vanlalthlana leh Lalnghinglova Hmar te pawhin Vice President-a lakluh an nih avangin lawmthu an sawi.

In thiat duh lo te In thiahsak

Aizawl : National Highway-54 laihzauh leh siamthat hna thawh mekah Serchhip District chhunga zangnadawmna la tawh, mahni In la thiat lo te chu January 31, 2024 khan Executive Magistrate te kaihhruaina hnuaiah endik niin chenna in, in sak lai, green house leh sawrkar ram lak china bungraw chhawpchhuah te an thianfai a ni.

   Serchhip DC David Lalthantluanga, Competent Authority for Land Acquisition (CALA) kaihhruaiin Khumtung, Chhingchhip, Chhiahtlang leh Baktawng khuaah Eviction Team te hi an chhuak a. Zangnadawmna sum a pumhlum la tawh si, In la thiat duh lo te chu District Administration chuan an chungah khawng taka hma la in, an In hmun lo ram te dan anga thiatin an senghawi sak a ni.

   Heng khaw li-ah te hian chhungkaw engemawzat chuan an In hi an thiah mek avangin thiah sak ngai lova lo thiat chhunzawm zel tura hriattir nghal an ni a. Hetihlai hian ln thiat ve lo In engemawzat chu sawrkarin ram a lak tawh Right of Way (ROW) chinah chhinchhiahin, khawl hmangin thiah sak an ni.

Khelo India University Football thlen dan tur rel

Aizawl : January 31, 2024 khan Secretariat Conference Hall, MINECO-ah Sports Minister Lalnghinglova Hmar hovin Khelo India University 2024 Mizoramin February thla chawhnu lama a lo thlen dan tur rel a ni.

   Sports Minister Lalnghinglova Hmar chuan National Level Sports promotion program pawimawh tak, Khelo India University 2024 Mizoramin a thlen tur a sawi hmasa a. Tun tuma Khelo India University Football hi Mizoramin sports event liantham zawk a dawn leh hun atana inpuahchahna tha tak a ni tih a sawi.

END ten an minister hovin meeting nei

Aizawl Excise & Narcotics Minister Lalnghinglova Hmar hovin Excise & Narcotics Department Officer te chuan January 30 khan Department hnathawh dan thlirin hmalak zel dan tur an sawiho.

   Lalnghinglova Hmar chuan, “Ruihhlo do chungchang hi kan CM chuan a ngaipawimawh hle a, Tun hnaia Excise & Narcotics department te’n zu leh ruihhlo leh a kaihhnawih kan man a thahnemin a lawmawm ka ti hle. Ruihhlo hi kan khap rem vek thei kher lovang, mahse kan theihtawpin kan bei ang a, a rem duak kan beisei. Ka sawi tawh thin angin ruihhlo kan beihnaah hian Department-a hnathawktute pawhin kan thil neihsa te hi tun aia tangkaia hmangin kan theihna leh kan thiamnate kan tipung zel tur a ni,” a ti.

Governor hovin Bengdar sem

Aizawl : Coal India Limited, Kolkata, Deen Dayal Sravana Foundation (DDSF), Andra Pradesh leh National Programme for Prevention and Control of Deafness (NPPCD), NHM Mizoram te tangkawp buatsaihin January 29, 2024 khan Raj Bhavan Durbar Hall-ah ri hriatna tha lo, bengdar vuah ngaite hnenah a thlawna bengdar (hearing aid) sem a ni.

   He hun hi Governor Dr. Hari Babu Kambhampati chuan khuallian niin a hmanpui a, Home Minister K. Sapdanga chu khualzahawm a ni. Khuallian Governor Dr. Hari Babu Kambhampati chuan World Day of the Deaf pualin September ni 25, 2023 a thlawna bengdar sem chhuah tum khatna hlawhtling taka neih a nih hnuah a thawh hnihna hmanga mi 339 te hnena a thlawna bengdar sem chhuah a ni leh tur chu lawmawm tiin duhsakna a hlan.

   Governor chuan Ministry of Social Justice and Empowerment hnuaiah Disabled persons for purchasing / fitting of aids / appliances (ADIP) kaltlangin painphunga rualbanlote tan tanpuina a dawn theih thu a sawi

Aizawl-Thenzawl-Lunglei (ATL) kawngpui siam mek enfiah

Aizawl : January 29, 2024 khan PWD Minister Vanlalhlana chuan Aizawl-Thenzawl-Lunglei (ATL) kawngpui siam leh cheithat hnathawh mek chu a hmunah tlawhin a enfiah a. Lunglei High Powered Committee Vice Chairman V. Malsawmtluanga leh Lunglei West bialtu MLA Lalhlimpuia ten Minister hi an tawiawm a ni.

   Aizawl-Thenzawl-Lunglei kawngpui siam leh cheithat hna hi SASCI II sum hmanga thawh a ni a. PWD hnuaiah Hmuifang Division leh Lunglei Division ten an vil a. Lunglei Division chanpual lamah hian SASCI II hnuaiah kawngpui chei that hna hi hlawm hnih a then niin contractor pahnihin an thawk a ni.