Kuhva tawlhruk zirchiang tura din Task Group thukhawm
Aizawl: January 30, 2023 khan dan lova khuhva tawlhruk chungchang ngaihtuah tura din Task Group on Illegal Arecanut chu an Task Group Chairman H. Lalengmawia IAS, Commissioner & Secretary Home Department kaihhruaina hnuaia meeting pawimawh tak neiin Forensic Science Laboratory Conference Hall ah an thukhawm.
    Meeting ah hian Myanmar leh khawchhak ram dang atanga danlo a Mizoram, India a kuhva lo lut chungchanga hmalakna awm mek te tihchak leh zual dan tur sawiho a ni a. February thla chhung in District hrang hrang a danlo a lakluh kuhva chhekkhawl stocks awm zat khawn khawm zui zel ni se tih rel a ni.

Raltlante Mizorama luh phalsak turin ngen
Aizawl: 30.01.2023 khan Defence Minister Rajnath Singh hovin All Party Leaders MP ten January 31 atanga neih tan tur, Parliament Budget Session atana inbuatsaihna atan Parliament Library Committee Room ah meeting an nei a.
    Meeting-ah hian Mizoram Rajya Sabha Pu K.Vanlalvena chuan tMizoramah Myanmar atanga raltlan mi eng emaw zat enkawl mek an nih thu leh Bangladesh atanga raltlan lo lut tur te erawh ramriah BSF ten an lo dan kir thin avangin mi tam zawkte chu an kir leh thu a sawi chhuak a, Mizoram luh phalsak turin ngen.

Governor hnenah Mizoram Lokayukta Report thehlut
Aizawl: Mizoram Lokayukta Act, 2014 chhunga section 47 in a phut angin January 31, 2023 khan C.Lalsawta, Chairperson, Mizoram Lokayukta chuan Governor Hari Babu Kambhampati hnenah Third Annual Report of the Mizoram Lokayukta (2021-2022) a hlan a. 
    He Annual Report hian 1st April 2021 leh 31st March, 2022 inkar a huam a. He Third Annual Report of the Mizoram Lokayukta hi Mizoram Legislative Assembly-ah pharh a ni dawn a ni.

EmpEx portal tlangzarh
Aizawl: 31st January 2023 khan LESDE Minister Lalchhandama Ralte chuan a office chamber-ah Employment Exchange (EmpEx) Portal a hawng.
    Minister chuan Employment Exchange (EmpEx) Portal hawn a lo ni ta chu lawmawm a tih thu a sawi a. Sorkar department bakah sorkar hnuaia corporation zawng zawngten an hman tangkai tura hmalak zel tul a tih thu a sawi bawk.

CM hovin NEC Golden Jubilee lawm
Aizawl: Aizawl Sipai Lammualah January 31, khan North Eastern Council Golden Jubilee ropui takin lawm a ni a. Chief Minister Zoramthanga chu khuallian niin Mizoram State Planning Board Vice Chairman H Rammawi chu khual zahawm a ni.
    Chief Minister NEC Golden Jubilee lawmnaa chibai a buk, NEC chu Pathianin malsawmna min pek tiin tungnung a, tichangkangin, i kalpui zel ang u tiin mipuite a sawm a ni. India hmarchhak State te tan Sawrkar Laipui chuan a bikin pawisa a sanction thin a, hmasawnna sum thalna khurbik kan nei a, NEC avang hian Mizoram leh hmarchhak state ten kawng hrang hrangah hmasawnna kan neih phah hi a lawmin a ropui em em a ni, a ti.

Dy. CM leh MZP te inkawm
Aizawl: Mizoram State Subordinate Services Selection Board (MSSSB) hnuaia hnalak chungchanga lungawi lohna lantirtu Mizo Zirlai Pawl (MZP) hruaitute chuan February 1, 2023 khan Deputy Chief Minister Tawnluia’n a pisaah a kawm a, an lungawi lohna lantir mek chu chawlhsan turin a ngen. 
    Deputy Chief Minister hi School Education Minister Lalchhandama Ralte, DP&AR Secretary R. Lalramnghaka leh DP&AR Deputy Secretary H. Lalrinpuia ten an tawiawm a, MZP hruaitute hi an adviser pahnih F. Lalnienga leh Lalhruaitluanga Chawngte ten an tawiawm a ni.

CM leh NDMA hotu inkawm
Aizawl, : Chief Minister Zoramthanga chu 01.02.2023 khan a pisaah Lt. Gen. Dyed Ata Hasnain (Retd.), Member, National Disaster Management Authority leh Brig. BS Thakar (Retd.), Consultant Grade-II, (ME&IRS), NDMA chuan an hmu.
    2.2.2023-a district tina chhiatrupna lian tham lo thlen thulha felfai zawka chetlakdan enchhinna “Mega Mock Drill” chungchang an sawiho. 

K. Vena'n UCC chungchang zawt
Aizawl: India sawrkarin sakhaw tin leh hnam tinte hrût rualna tur dân Uniform Civil Code hman a tum chungchangah Mizoram Rajya Sabha MP K.Vanlalvena chuan Union Law and Justice Minister Kiren Rijiju chu February, 2023 khan Parliament House-ah zawhna pahnih a zawt
    Vena hian Sawrkar laipui hian Uniform Civil Code Bill passed tumna a nei em? tih leh Nei ta se MNF leh India inremna thuthlung avanga siam India constitution article 371(G) hi a nghawng buai thei ang em? 3) Nei ta se India rama hnam hrang hrang te hnam dan, customary law te hi UCC chuan a palzut ang em? tih a zawt.
    Union Minister of Law and Justice Kiren Rijiju chuan Vena zawhna te hi chhangin India sawrkar chuan 21st Law Commission of India hnenah Uniform Civil Code in a nghawng theih tur thil chi hrang hrang te lo zir chiang a chumi zulzuia rawtna siam turin ngenna a lo thlen tawh thu te, Law Commission hotu te chuan 21st Law Commission of India term chu Dt 31.8.2018 ah a tawp tawh thu leh 22nd Law Commission in a la ngaihtuah zawk tur nia a lan thuin an rawn chhan thu te a sawi a. Hemi a nih avang hian tun dinhmunah Uniform Civil Code hman tumna engmah a awm lo, tiin K.Vanlalvena zawhna te hi ziakin a chhang a ni.

G20 palai te Chapchak Kut-a tel tura sawm rel
Aizawl: Chapchar Kut lawmna Aizawla neih tura B20 meeting delegates te sawm chungchangah 02.02.2023 khan Chief Minister Zoramthanga hovin CM Office Conference Hall-ah Chapchar Kut Organizing Committee OB leh G20 Mizoram Core Committee te an thukhawm.
    G20 hnuaia committee pakhat B20 meeting hi March ni 2 hian Aizawlah nghah a ni dawn a. Ram hrang hrang atanga he meeting avanga rawn kal tur te chu March ni 1 ah lo thlengin, ni 3 ah let leh tur an ni a. Chapchar Kut Organizing Committee chuan heng delegates te hi Kut chhim ve tura sawm ve ni se tiin a lo rel tawh a, G20 meeting organizer lam pawhin delegates ten Mizo kut lian ber an telpui chu tha an ti, tihhlawhtlin turin hmalakdan tur an rel. 

ZMC NMC Inspection chungchang sawiho
Aizawl: Chief Minister Zoramthanga hovin 2.2.2023 khan CM Office Conference Hall-ah NMC (National Medical Commission) in Zoram Medical College a rawn endikna chungchangah H&FW Minister Dr. R. Lalthangliana leh ZMC hotute chu thlirletna neiin an thukhawm.
    Meeting-ah hian NMC lamin observation an siam leh ZMC a thawktu indaihlohna awm thenkhat te leh heng indaihlohna phuhruk tura hmalak dan tur te sawiho a ni.

District tinah Mock Drill nei
Aizawl: Mizoram State Disaster Management Authority (SDMA) leh National Disaster Management Authority (NDMA) tang dun chuan February 2 khan ‘State Level Mock Exercise on Earthquake’ chu district tinah an huaihawt. 
    Hemi atân hian ‘Orientation and Coordination Conference (virtual)’ chu ni 23.01.2023-ah neih a ni a. Table Top Exercise ni 31.01.2023-ah neih a ni tawh bawk. February 2 khan Aizawl khawpui hmun thlan bikah Mock Exercise neiha ni District headquarters-ah pawh hmun thlan bîkah te ‘Mock Exercise on Earthquake’ hi neih a ni. 
    ‘Mock Exercise on Earthquake’-ah hian lirnghing lo thlen palh thulha hmalak dan tur chi hrang hrang entirin leh zirho a ni a. 

ASUTP hmalakna chungchang sawiho
Aizawl: Chief Minister Zoramthanga hovin 2.2.2023 khan Aizawl Sustainable Urban Transport Project (ASUTP) hnuaia ruahmanna duan chhin te sawiho a ni a. UD&PA changtu Deputy Chief Minister Tawnluia leh Revenue Minister Lalruatkima pawh an tel a ni.
    Meeting-ah hian ADB funding hmanga khawpui chhung cheibawl leh tihhmasawn hna thawka hmalak theihna hrang hrang tarlangin, chumi atanga project siam theihte chhawpchhuah a ni a. Tam zawka public transport hman te, khawchhung fai zawk leh mihring kalna pavement zauh te, lirthei park na leh parking fee khawn dan changkang zawk siam te, khawpui chhunga junction pawimawh tihhmasawn dan tur te sawiho a ni.