MNF leh Congress ten IAF ram lei chungchangah FIR thehlut

Aizawl: Mizo National Front (MNF) leh Mizoram Pradesh Congress Committee chuan Lengpui leh Sihphir a IAF te hnena ram lei leh hralh dan ah thil fel lo awm nia an hriat avangin CBI chhui turin February 5, 2026 khan FIR an thehlut.

  MNF chuan Lengpui Land Scam-ah Mizoram sawrkar hotute an inhnamhnawih ngei nia a lan avangin CBI chhuitir turin February 5, 2026 khan Chief Vigilance Officer, Khilli Ram Meena, Chief Secretary ni bawk hnenah ngenna hi an thehlut a, MNF party aiawh hian MNF Legal Board Vice Chairman Lalpianfela Chawngthu, MNF General Secretary ni bawk chuan a thehlut a, MNF Legal Board Hruaitute leh MNF Publicity Board hruaitu bakah MNF hruaitu dangten an tawiawm

  Congress chuan FIR hi DIG & Head of Branch,CBI/ACB, Imphal, Lamphelpa, Near DC Office, Imphal-795004, Manipur address-in Aizawl Unit CBI-ah an thehlut a, MPCC Action Committee Secretary leh MPCC General Secretary Lalhmachhuana te hminga thehluh a ni.

  Indian Air Force ten Lengpui leh Sihphir ram an lak tur chungchangah ZPM chuan February ni 4, 2026 (Nilaini) khan CBI ah FIR an thehlut dawn tih an sawi a, Central Bureau of Investigation (CBI) ah ZPM media committee chairman B Lalchhanzova, minister hmingin thehluh ni se tiin an rel a ni.

Chin hriat loh a bo tlangval kum 39 mi thi in hmu

Aizawl: Philip Lalfakzuala (39), Khumtung, January ni 31 atanga chin hriat loha bo chu February 2 khan thi in hmuh a ni.

  Philip Lalfakzuala S/o Lalramlawma hi January 31, 2026 zan khan chaw eikhamah leng turin a chhuak a, a chin hriat lohin a bo zui a. A chhung ten an hmuh mai loh avangin khawtlang hruaitute an pun a, February 2, 2026 khan khawtlang huapa zawn a ni a, kawngthlang leivung paihnaah thiin an hmu.

  Ruang awmna hi kawng atanga metre 100 vel a ni a, leivungin a lo chhilh deuh a, a taksaah hliam nasa tak a awm lo va, a thih chhan tak hriat ni lo mahse parapet atanga tla niin rin a ni a, a insawhna hliam tuar lovin a thi nia rin a ni.

Mizoram Ju-Jitsu team in Gold -6 leh Bronze -3 la

Aizawl : January ni 31 atanga February ni 2 chhunga Guwahati, Assam-a 1st North East Ju-Jitsu Championship neih zawh taka Ju-Jitsu Association of Mizoram (JAM)-in Mizoram aiawh turin athlete 5 leh coach 1 a tirh te chuan Gold medal 6 leh Bronze medal pathum an la.

  Ju-Jitsu hnuaiah hian fighting style chi 3-ah inelna - Ne-Waza (Brazilian Jiu-Jitsu), Contact Fighting (MMA Rules) leh Fighting System (Semi Contact striking leh Grappling) a awm. 

  Ju-Jitsu-ah hian India ram hian BJJ black belt 10 pawh a la nei tling lo a, Mizoram-in pakhat an nei a ni. 

Lok Sabha MP-in Union Minister hmu

Aizawl: Member of Parliament, Lok Sabha Richard Vanlalhmangaiha chuan February 5, 2026 khan Union Minister of State for Environment, Forest & Climate Change Kirti Vardhan Singh chu Parliament-a a office-ah lengin a kawm.

  Richard Vanlalhmangaiha chuan Union MoS hnenah hian NIT, Mizoram-in Forest Clearance an hmuh theih loh avanga hna thawh theih a nih loh thu a thlen a. Mizoram Sawrkarin tih tur tul a tihfel tawh thu hrilhin, Central Ministry lamin a rang lama tihfelsak turin Minister hi a ngen a. NIT chu Mizoram tana Institution pawimawh tak a ni a, thangthar lo la awm zel turte tan zirna in chhenfakawm tak a nih tur thute a sawi bawk a ni.

  Union MoS Kirti Vardhan Singh pawhin a rang lama tihfelsak vat turin hma a lo laksak tur thu a lo hrilh ve bawk a ni.

Empowered Committee on Investment thukhawm

Aizawl : February 5, 2026 khan CM Conference Hall-ah Chief Minister Lalduhoma kaihhruaiin Empowered Committee on Investment te an thukhawm.

  Meeting-ah hian Mumbai-a inbun FC Tech Energy chuan Plastic Waste atanga Fuel Cell leh Sustainable Energy an siam dan sawifiahna (presentation) pein Mizoram-ah chutiang hmunpui chu din an duh thu an thlen a. An ram mamawh tur ang te, tui an mamawh zat tur leh Power an mamawh zat tur te an sawi nghal a.

  Committee hian a thuphungin FC Tech Energy te dilna hi pawmsak phawt ni se an ti a. Mumbai-a an Plant tlawh a, zirchian ni se an ti. An ram mamawh zat han pek theihna tur laite an sawiho bawk.

  Opickpure Private Limited, Khuangleng ten Ginger Processing Unit an sak mek chungchang report ngaihthlak a ni a. Opickpure nen hian Mizoram sawrkar chuan September 20, 2025 khan inremna (MoU) a lo ziak tawh a, company hian Vaibelchhe 2.50 Crore sengin Processing Unit an sa mek a, an zo tep tawh a ni.

CoM ramri hung chungchangah an dinna ngaiah ding

Aizawl: Chief Minister Lalduhoma kaihhruaiin February 4, 2026 khan Council of Minister meeting neih a ni a, India leh Myanmar ramri hung chungchangah Mizoram sawrkar chu a dinna ngaiah a la ding a. Amaherawh chu Central Subject a nih avangin state sawrkar chuan dodal theihna a nei lo an ti.

  An thu pawm dang zingah School Provincialise theih te chu hlankai ni se an ti a, Dan anga tih fel ngai te tihfel a nih hnuah Law department endik tur a ni a, chumi hnuah Finance department leh DP & AR paltlang a ngai leh dawn a ni.

  The Mizoram State Cooperation Policy, 2025 ; The Mizoram Home Guards Rules, 2025 ; Sialkal Range Development Council Draft Bill, 2026; Mizoram Private Security Agencies (Amendment) Rules, 2026 te, Mizoram Jan Vishwas Bill siamthatna tur te, Mizoram Drug treatment-cum-Rehabilitation Centre Accreditation Draft Rules, 2026 te an pawm bawk.

Meichher Award 2025 sem

Aizawl: School Education Department-in thla tina a chhuah thin Meichher Award 2025 chu School Education Directorate Conference Hall-ah February 4, 2025 khan an sem.

  Meichher chanchinbu hi “ZORAM ÊNG' tih hming vuahin March/April 1975 atang khan thlakip chhuakin chhuah tan a ni a. October 1975 atang khan 'MEICHHER' tia a hming thlâkin vawiin thlengin chhuah a ni. 025 khan kum 50 a tling a, Meichher Golden Jubilee 2025 lawmna chu June 26, 2025 khan Aizawl Vanapa Hall-ah neih a ni. Kum 1975 March & April thla chhuak atanga chhiarin January 2026 chu bu 815-na a ni.

  Meichher chanchinbua thu chhuahte zingah hian zirlaibua seng luh thuziak 22 a awm tawh a. Hengte hi School leh College a Mizo zirlai atan hman an lo ni tawh a ni.

  Meichher Best Article of the year 2025-ah pakhatna Rev Zosangliana Colney Mission Veng Aizawl a ni a, a thu ziah chu 'Lal thar chibai i buk ang u' tih a ni a, pahnihna Joseph L.Ralte Chawnpui Veng a ni a, a thuziah chu 'Hlawhtling tura beidawnna' tih a ni. 3-na Commissioner Lalkiamlova Tuikual South Aizawl a ni a, a thuziah chu 'Vawk leh Mizote' tih a ni.

  Meichher Best Contributor of the year-ah pakhatna JH Biakmawia Electric Veng, Aizawl, pahnihna Familia Laltansanga Fanai Zotlang Lunglei, pathumna Mahmuaka Chhakchhuak Chanmari Lunglei te an ni.

Project CLEAR hnuaia buatsaih POCSO Act leh a kaihhnawih a tlangzarh

Aizawl: Adviser to Chief Minister (Political) Lalmuanpuia Punte, MLA chuan February 4, 2026 khan Project Child Law for Everyone, Accessible and Readable (CLEAR) hnuaia kalpui pianphunga rualbanlo naupangte tana buatsaih, POCSO Act leh a kaihhnawihte sign language leh Mitdel Hawrawp (braille) a siam chu khuallian niin a tlangzarh.

  Tlangzarh inkhawmah hian Mizoram State Commision for Protection of Child Rights (MSCPR) hotute leh Social Welfare,Women & Child Development hotute, Mizorama pianphunga rualbanlote tana zirna school hotute leh zirlaite bakah pawl pawimawh tak tak leh mi pawimawh sawm bikte an tel a, Vanhmingliani, Member, MSCPCR hnen atangin Project CLEAR kalpui dante technical report ngaihthlak a ni.

SAGY hnuaia project la zawh loh 80-te chu paih turin an rel.

Aizawl : Chief Secretary Khilli Ram Meena hovin February 3, 2026 khan State Level Empowered Committee (SLEC) chu Conference Hall No. 1, New Secretariat Complex-ah an thukhawm a. Sansaad Adarsh Gram Yojana (SAGY) hnuaia project la zawh loh 80-te chu paih turin an rel.

  SAGY hi thingtlang khuate tihhmasawnna tura October 2014 atanga India sawrkar laipuiin a kalpui tan a ni a. He scheme hnuaiah hian MP-te’n thingtlang khua an thlana hmasawnna ruhrel huap zau – khawtlang tan, hnam tan leh ram hausakna tihchangtlun nan mawhphurhna an la a. 2016 thleng khan MP tinin Gram Panchayat (Village) pakhat an thlang a, model village-ah a chhuah a. 2019 thleng khan MP tinin khaw pahnih dang an enkawl leh a, 2024 thlengin kumtin khaw pakhat an enkawl bawk a ni.

  Ministry of Rural Development, SAGY Division chuan August ni 7, 2023 khan SAGY portal-a VDP hnuaia project paih phalna a pe a. Gram Sabha, District Level Committee (DLC) leh State Level Executive Committee (SLEC)-te remtihna lak hmasak a ngai a. Mizorama SAGY khaw hrang hranga Charge Officer-te chuan Gram Sabha leh DLC atangte hian remtihna an la fel tawh a. SLEC-in project 80 paih a rel takah hian Ministry-in July ni 31, 2025 hmaa SAGY hnuaia project-te zo fel tura thu a pek zawmin Mizoram chuan SAGY hmalaknate kim tak leh hlawhtling takin a khar thei dawn a ni.

PWD Minister-in ni hnih awh International conference hmanpui

Aizawl: Department of Environmental Science, Pachhunga University College leh Society for AgroEnvironmental Sustainability, Dehradun, Uttarakhand te tangkawpin an huaihawt, ni hnih awh tur ‘International Conference on Recent Advances in Environmental Research, Biodiversity Conservation and Sustainable Development” tih chu February 3, 2026 khan Pachhunga University College Auditorium-ah a khuhhawnna hun hman a ni.

  Public Works Department Minister Vanlalhlana chuan khuallian niin Conference hi a hawng a, Higher & Technical Education Minister Dr. Vanlalthlana chuan khualzahawm niin hun a hmanpui.

  He International Conference hi online leh offline mode-a kalpui niin Mizoram mai bakah, ram pawn atangtein zirlai leh mi thiam rualte’n Environment, Biodiversity leh Sustainable Development chungchanga thupui chi hrang hrang thlanchhuahte hmangin, thu sawi leh zawhna leh chhan hunte an hmang ho dawn a ni.

Road Safety Month 2026 hawnna nei

Aizawl: Transport Minister Vanlalhlana chuan February 2 khan Directorate Conference Hall, Transport Department-ah Mizoram State Road Safety Council (MSRSC) buatsaih, Road Safety Month 2026 hawnna hun chu khuallian niin a hmanpui.   

  Kumin hi Mizorama Road Safety Month hman a nih vawi 4-na a ni a. Thupui atan ‘Sadak Suraksha – Jeevan Raksha’ (Road Safety – Life Safety/Fimkhur la, i nun humhim rawh) tih hman a ni.

  Hawnna hunah hian Transport Department-a officer leh staff-te bakah MSRSC, State Transport Authority (STA), Traffic Police leh lirthei hmanga eizawng pawl aiawhte an tel.