World Armwrestling Cup-ah Denic-a'n silver medal la

Aizawl : Chief Minister Lalduhoma’n World Armwrestling Cup-a silver medal latu Denic Lalruattluanga chu Mizoram leh India ti hmingtha tu a nih thu a sawi.

   5.2.25 zan khan Taskent, Usbekishtan-ah final khelh niin Denic Lalruattluanga hi Kg 80 huangah a inlan a, a khingpui world champion vawi thum ni tawh Danil Ustinov (Kazakhstan) lakah a vanduai ta zawk a ni.

   Chief minister Lalduhoma chuan pakhatna dinhmun chang zo lo mah se a duai lo hle tih a sawi a, Denic Lalruattluanga chu a lawmpui in Mizoram leh India a ti hmingtha tih a sawi.

   Sports Minister Lalnghinglova Hmar pawhin lawmpuina thu sawiin, Mizo tlangval Denic Lalruattluanga’n Silver Medal a la thei hi chu a lawmpui a. Mizoram mai ni lo, India tihmingthatu Mizo tlangval a ni chu lawmawm a tih thu a sawi bawk.

Zodin Flyover bulah nuai 35 man Heroin man

Aizawl : Anti-Narcotics Squad, Excise & Narcotics, Aizawl leh Assam Rifles tangkawp chuan February 3 zan khan Zodin square bula fly-over bulahah Heroin gram 50, cheng nuaih 35 man hu a chhut chu Tingngaihkhawmi, 40, Ngur, Champhai district kut atangin an man.

   Thu an dawn bawhzuiin Anti-Narcotics Squad, Excise & Narcotics, Aizawl leh Assam Rifles te hian hma an la a, a chet dan atangin he hmeichhia hi an ringhlel a, amah hi tidingin a kut atanga hian dan phal loh ruihlo hi an mansak ta a ni. Heng an ruihhlo leh a kawltu hi Anti-Narcotics Squad, Excise & Narcotics, Aizawl, Mizoram te chuan an kawl zui nghal a ni.

Lalnghinglova Hmar-in MCC bawhchhiatna a nei lo

Aizawl : Model Code Of Conduct bawhchhia ti a MNF General Headquarters-in State Election Commission, Mizoram hnena Lalnghinglova Hmar, Minister of State hekna chungchang SEC-in an ngaihtuah hnuah February 4, 2025 khan thuchhuah (order) an siam a, Lalnghinglova Hmar-in MCC bawhchhiatna a nei lo an ti.

   State Election Commission, Mizoram chuan MNF General Headquarters-in an hekna leh Lalnghinglova Hmar, MoS insawifiahna ngun taka an ngaihtuah hnuah thutlukna siamin Election Model Code of Conduct Para - VIII (2) leh (14) bawhchhiatna a nei lo an ti a, Minister hian Party mite hmaah sawrkar hmalakna awm tawh sa leh hmalakna kal mek chungchang a hrilhfiah mai a ni a ti.

YMA in kuhva rah phur tlan phal lo

Aizawl : Kawlkulh Group YMA chuan February 4 khan thuchhuah siamin, dan phal loh, kuhva rah phur te avanga kawngpui a chhiat lohna turin, an huam chhungah kuhva rah phur motor tlan phal a ni tawh lo tih an tarlang.

   Thuchhuah an siam a tarlan a nih danin, kawlkulh Group YMA Executive Committee, February ni 1, 2025 (inrinni) a neih chuan kuhva rah phurtu ten Kawlkulh leh a chhehvel kawng an hman dan ngun takin a ngaihtuah a. Kawlkulh - Dulte inkar bypass avanga One Time improvement tih hmabak mek te chu tun ang zela kuhva rah phur motor ten an zawh chuan reilote-ah a chhe leh vat dawn nia a lan avangin, ngenna thuchhuah atanga thu leh awm hma chu kuhva rah phur motor te Kawlkulh Group YMA huam chhungah tlan phal a ni tawh lo a, ngenna thuchhuah pawisa lo a tlan lui an awm a nih chuan district thuneitute nena inbiakremna angin hmalak a nih tu thu an tarlang.

Sik leh sa leh boruak inthlakin hriselna a nghawng dan training buatsaih

Aizawl : February 5, 2025 khan Directorate of Hospital & Medical Education (DHME) Conference Hall, MINECO-ah National Health Mission hnuaia National Programme on Climate Change and Human Health (NPCCHH) buatsaihin Aizawl East & Aizawl West district huam chhunga Health & Wellness Centre hrang hranga Health & Wellness Officer-te leh Medical Officer (AYUSH) te tan Training of Trainer buatsaih a ni.

   He Training hi Dr. Eric Zomawia, Mission Director, National Health Mission chuan Khuallian niin a hmanpui a. He hunah hian sik leh sa leh boruak inthlakin hriselna a nghawng dan chungchangte, hemi laka invenna tur leh boruak/leilung tichhe lo tura tih tur hrang hrangte inzirtirna neih a ni.

Exchange for Ballot Papers neih a ni

Aizawl : Kumin Village Council/ Local Council inthlan lo awm tur atana Election a duty nei te vote thlakna tur Ballot Paper semchhuah leh inthleng - Exchange for Ballot Papers chu Aizawl DC Conference Hall-ah February 4 khan neih a ni.

   He hunah hian election a duty ten an duty na hmuna vote an thlak na tue ballot paper hman tur pekchhuah a ni a. An duty na hmun (District) theuh ah vote an thlak theihna turin dilna thehlut te tan ballot paper hi an vote neihna District theuh ten an buatsaih sak a. He ballot paper hi District tina Nodal Officer Aizawl ah kengkhawm in, voter-in vote a thlak theih nan an haw pui lehnghal a. Voter on Election duty te hian February ni 6 atangin an duty na hmun District theuh ah vote an thlak a hei hian an bial theuh a chhiar turin polled ballot paper chu February 8 khan Aizawl DC office-ah inhlanchhawn neih leh a ni.

World Cancer Day hman a ni

Aizawl : National Health Mission hnuaia Programme pakhat, National Programme for Prevention & Control of Cancer, Diabetes, Cardiovascular Diseases & Stroke (NPCDCS) chuan February 4, 2025 khan United by Unique" tih thupui a hmangin khawvel puma Cancer dona ni "World Cancer Day 2025" chu "Taxation Auditorium, MINECO-ah an hmang.

   Kumin World Cancer Day thupui "United by Unique" hmangin Dr. Zirsangliana Chhangte, Gynecologist Oncologist. MSCI Zemabawk chuan zirtirna a pe a. Dr. Jeremy L.Pautu, Director, MSCI, Zemabawk pawhin, Mizoram State Cancer Institute chungchang report a pe bawk

   World Cancer Day hi khawvel pumah kum 2000 atang khan hman tan tawh niin, Mizoramah erawh chuan kum 2014 atang khan hman a ni thung.

   Mizoram State Cancer Institute-in a tarlan danin kum 2023 chhung khan Cancer Hospital Zemabawk-a Cancer natna vei inziak lut mipa leh hmeichhe belhkhawm chu 2100 an chuang tawh a ni.

I&PR Secretary-in Lianchhiari Rûn Mini Theatre hawng

Aizawl : February 4, 2025 khan I&PR Secretary Betsy Zothanpari Sailo chuan Lianchhiari Rûn, DIPR New Building, Treasury Square, Aizawla din Mini Theatre chu Khuallian niin a hawng.

   Lianchhiari Rûn Mini Theatre hawnna hun hi C. Lalnunkima, Director, Department of Information and Public Relations chuan a kaihruai a. Pratap Chhetri, Deputy Director & Nodal Officer, Visual Art chuan Mini Theatre din chhoh dan leh hmalak zel dan tur report a pe a. Lianchhiari Rûn chungchang tarlanna documentary tawi thlirho a nih hnuah hun hman hi khar zui a ni.

   Mini Theatre, Lianchhiari Rûn hi mi 100 len theihna tura duan niin, laser projector leh bungraw changkang tak taktea thuam a ni a. Film siamtute pawhin I&PR Department-ah dilna thlen hmasain an film siamte chu Mini Theatre-ah hian man chawiin an chhuah thei tawh dawn a ni.

MBSE leh PARAKH-in workshop buatsaih

Aizawl : February 3 khan Mizoram Board of School Education (MBSE) leh Performance Assessment, Review and Analysis of Knowledge for Holistic Development (PARAKH), NCERT tangkawpin ni 5 awh, Holistic Progress Card (HPC) leh Standardization of Question Paper Templates tih thupui hmangin Workshop an buatsaih.

   Ni 5 awh Workshop buatsaih chhung hian Holistic Progress Card zulzui a Assessment Rubrics duan dan te, State question paper zirchianna te, Assessment design and blueprint siam dan te leh Model question paper duan dan zirtirna neih a ni a. PARAKH, NCERT atang a mi thiam ten zirtirna hi an pe a, Secondary, Higher Secondary School, IASE leh DIET atangin zirtirtu 50 chuang an tel a ni.

Larsapin 23 Sector AR Hqrs. tlawh

Aizawl : Ningani khan Mizoram Larsap Gen (Dr) Vijay Kumar Singh, PVSM, AVSM, YSM (Retd) chuan 23 Sector Assam Rifles Headquarters, Khatla, Aizawl chu tlawhin Assam Rifles hotute a kawm.

   He hunah hian Larsap hi guard of honour pek niin, Brig Girish Upadhya, SM, VSM, DIG, HQ 23 Sector Assam Rifles, Aizawl leh a thawhpuite'n an lo dawngsawng a. Mizorama Assam Rifle hmalakna leh pawimawh hrang hrangte PowerPoint Presentation kaltlangin an lo hrilhfiah a ni.

   Assam Rifle-te hian Mizoram bikah hian India leh Myanmar ramri 510 Km vela thui ven hna an thawk mek a. 23 Sector Assam Rifles Hqrs. Khatla, Aizawl hnuaiah hian Battalion 3 a awm a. Battalion tinah Company Operating Base (COB) 6 zel awmin, Indo-Myanmar border ven hna an thawk mek a ni.

Meghalaya leh Mizoram inter-state youth exchange programme hawnna hun hmang

Aizawl : Nehru Yuva Kendra Sangathan (NYKS) hnuaia Meghalaya leh Mizoram state thalaite intlawh tawnna, inter-state youth exchange progamme ruahman hawnna hun chu February 6 khan Lunglei Zotlanga Tourist Lodge Conference Hall-ah hman a ni.

   Meghalaya-Mizoram YEP-ah hian Meghalaya atangin Team Leader pahnih hovin thalai 25 an lo kal a. NYK Lunglei chu a thlengtu niin, February ni 6-10, 2025 chhungin Mizorama YEP hun hi hman a ni dawn a. Hemi chhung hian Meghalaya atanga thalai lo kalte hi Mizoram leh Mizote chanchin, nunphung, hnam ziarang leh thil pawimawh hrang hrang zirpui an nih bakah, Lunglei leh a chhehvela pisa leh hmun pawimawhte fanpui an ni dawn a. Mizo inmikhual dan leh Mizo ei leh in te an hriat thiam theih nan YMA Zotlang Branch te'n lo mikhualin hun an hmanpui dawn a. Hnatlang bakah, Mizo tawng, hla leh lam zir hona te buatsaih thin a ni bawk.

Ruihhlo ngai enkawltute training pek an ni

Aizawl : Mizoram Social Defence & Rehabilitation Board, Social, Welfare & Tribal Affairs, Government of Mizoram leh Ministry of Social Justice, & Empowerment, Government of India tangkawp chuan Mizoram chhunga ruihhlo ngaite enkawlna hmun (De-addiction centre)hrang hranga thawktute pualin February 4 & 5 khan ni 2 awh training a buatsaih.

   He training ah hian ruihhlo ngaite enkawlna kawnga a tak tak a tha thawhtute sawm an ni a. Dr. Lalremruati, Associate Professor, Department of Psychology, Govt. Aizawl West College hnen atangin Ruihhlo ngaiten nun thar an neih lehna tura, centre a thawktute pawimawhna leh mawhphurhna te, ngawlveina lak a ta khaichhuaktu an nih theih dan te uluk taka zirho a ni.