IPRP&S Minister-in inhlan tharna hun hmanpui

Aizawl: IPRP&S Department changtu Minister B. Lalchhanzova chuan January 8, 2026 khan I&PR Auditorium-ah kum 2026 atana Mizoram Journalist Association (MJA) member-te leh IPRP&S Department te inhlan tharna hun chu khuallian niin a hmanpui.

  Khuallian B. Lalchhanzova chuan MJA member-te inhlan tharna hun a hmanpui thei chu lawmawm a tih thu a sawi a. MJA member-te chu sawrkar khalh ngil kawnga hna pawimawh tak, zalen taka thawktu an ni tih inhre reng tura chahin, kalphung ngelnghet leh rintlak tak an kalpui chu vawng nung zel turin a chah a. Sawrkar pawhin MJA member-te hmasawnna tur leh an than zelna turin theihtawpa hmalakpui a inhuam thu a sawi bawk a ni.

  He hunah hian IPRP&S Secretary Betsy Zothanpari Sailo leh MJA President C. Lalrambuatsaiha te pawhin, MJA leh Sawrkar thawhhona tha tak chu lawmawm a tih thu a sawi.

GAC building inhlan chungchang sawrkar leh Synod-in sawiho

Aizawl : Higher & Technical Education Minister Dr Vanlalthlana chu January 8, 2025 khan a pisa-ah Mizoram Presbyterian Kohhran hruaitute nen an inkawm a, Sikulpuikawna Govt. Aizawl College building inhlan chungchang an sawiho.

  Mizoram Sawrkar leh Mizoram Presbyterian Kohhran inremna angin kum 2019 khan Sikulpuikawna Govt. Aizawl College dinna ram hi Mizoram Presbyterian Kohhran kutah hlan a lo a ni tawh a. Govt. Boys Primary School leh Govt. Boys Middle School, Sikulpuikawn chu school building leh a ram nen Mizoram Presbyterian Kohhran kuta hlan niin Govt. Aizawl College building chu hemi ram hian a huam tel a ni.

  Govt. Aizawl College building Mizoram Presbyterian Kohhran hnena hlan fel vat a nih theih nan hian hun tiam siam niin a hma thei ang bera sawiho leh a, sawrkar leh kohhrana thuneitu sang zawk hnena thlen vat ni se tih a ni.

Tlaizawng Paradise kharna hun hmang

Aizawl: January 7 zan khan Phuaibuang Field-ah Tourism department hmalakna a buatsaih, ni hnih awh 'Tlaizawng Paradise' kharna hun chu Lalnghinglova Hmar, Minister, Tourism department chuan a hmanpui a, Lalbiakzama, Speaker, Mizoram Legislative Assembly chuan a tawiawm.

  Tourism Minister Lalnghinglova Hmar chuan Tlaizawng Paradise chu Tlaizawng par vul nasat hunlai berah buatsaih a nih theih nan ruahmanna siam a nih thu sawiin kum 2026 December thla a buatsaih leh tum a nih bakah nghakuai chiah runpui pawh huapzau zawka buatsaih a nih tur thu a sawi.

  Tourism department hmalakna a buatsaih Tlaizawng Paradise hi January ni 6 leh ni 7 hian hman niin, Tuivai luia nghakuai runpuite, Phuaibuang khaw chhevela tlang, puk leh lui dung tlawh chhuahna hunte buatsaih a ni a. Phuaibuang leh a chhevel khua mipuite thil siamchhuah phochhuahna hmunte buatsaih a ni. He huna tarlan danin Phuaibuangah hian Tlaizawng Paradise chhimtu khualzin mi sang khat chuang ziahluh a ni.

Lengpui Airport Runway siam that hna thawh mek tlawh

Aizawl : Public Works Department changtu Minister Vanlalhlana’n Lengpui Airport Runway siam that hna thawh mek chu January 7 zan khan a hmunah kalin a endik.

  Lengpui Airport hi Mizoram Sawrkar chuan engtiang taka thawm that ngai nge a nih hre tur leh zirchiang turin CRRI (Central Roads Research Institute) ruaiin, Thlawhtheihna lian chi pawh tum theihna tur, 50 PCN tal ni turin, re-surfacing hna hi thawh mek a ni. March 31, 2026 hian, runway re-carpeting hi thawh zawh hman an inbeisei thu hnathawktute chuan an sawi a ni.

  Re-surfacing hna thawh nan hian Mizoram Sawrkar chuan SASCI atangin Rs 91.00 crore a ruahman a, a thawktu atan Airport lama tawn hriat nei tha, Brahma Infra, Rajasthan rawih niin, anni hian nikum April, 2025 atang khan hmanraw mamawhte chhek khawmin hma an la tan a, November ni 1, 2025 khan trial run neiin, November ni 10 atang khan re-surfacing hna hi an thawk tan ta a ni.

Lok Sabha MP in Finance Secretary kawm

Aizawl : Richard Vanlalhmangaiha Member of Parliament (Lok Sabha) chuan January 7, 2025 khan Deparment of Expenditure, Ministry of Finance-a Secretary nilai mek Vumlunmang Vualnam, IAS chu kum thar chibai buk pahin a office-ah lengin a kawm.

  Lok Sabha MP chuan Mizo hnahthlak zingah hetiang dinhmun sang leh pawimawh a chelh thei chu a lawmpui thu a hrilh a. PMGSY-1 leh 3, Rural Development Ministry-in Finanace Ministry hnena extend a dil mek chu a tihhlawhtlin sak chuan, Mizoramah PMGSY-1 leh 3 hna la thawh zawh loh tam tak a awm avangin Mizorama PMGSY Contractor-te tan thil lawmawm tak a nih tur thu sawiin hma laksak turin a ngen nghal bawk a ni.

Pradhan Mantri Rashtriya Bal Puraskar 2025 dawngtu Esther Hnamte lawmpuina hlan

Aizawl: India rama naupang chawimawina sang ber Pradhan Mantri Rashtriya Bal Puraskar 2025 dawngtu Esther Hnamte chu Social Welfare, Women & Child Development Department Minister Lalrinpuii hovin January 7, 2025 khan a Award dawn den chhena lawmpuina hun hman a ni.

  Pradhan Mantri Rashtriya Bal Puraskar hi Ministry of Women & Child Development hnuaiah heng category pasarih (7) - Bravery, Art & Culture, Environment, Innovation, Science & Technology, Social Service leh Sports lama naupang titha bikte hnenah hlan thin a ni a. Esther Hnamte hian he chawimawina hi Art & Culture hnuaiah India President Droupadi Murmu hnen atangin December ni 26, 2025 khan a dawng a ni.

CADC chungchang CoM in sawiho

Aizawl : January 6 zan khan Council of Ministers chu Chief Minister Lalduhoma kaihhruaiin Chief Minister Office Cabinet room-ah an thukhawm a. Chakma Autonomous District Council chungchanga Mizoram Governor-in Council of Ministers thurawn (Advice) hriat a duh chungchang an sawiho.

  Governor hian Chakma Autonomous District Council kal dan chhui chiangtu tur Inquiry Commission thar din tha an tih leh tih loh thuah Council of Ministers ngaihdan hriat a duh a. CoM chuan Inquiry Commission din tharleh hi a tul tawh lovah a ngai a ni.

  Governor hian CADC chu Governor's Rule a dah chhunzawm zel tur chi a nih leh nih loh thuah Council of Ministers ngaihdan (Advice) hriat a duh bawk a. CADC ah hian sawrkar ngelnghet tak a ding thei tih chu Council of Ministers ngaihdan a ni a, Governor's Rule a dah chhunzawm a tulna an hre lo bawk.

CM Office-a thawkte Chief Minister-in thingpui inpui

Aizawl Chief Minister Lalduhoma chuan January 5, 2026 zing khan Chief Minister Office-a thawkte chu CM Conference Hall-ah thingpui a inpui.

  Chief Minister hian kum thar chibai bukin an hnathawhna theuhah tha taka thawk chhunzawm turin duhsakna a hlan. "Chief Minister mawhphurhna ka lak rualin thawhpui tur tha min pe turin Pathian hnenah ka dil a. Nangni hi min pe ta a ni. In thawkrim tlang thin tih ka hria a, ka lawm a. Kan ram tan leh Pathian tan hna kan thawk a ni tih hriain taima takin kan thawk zel dawn nia," tiin lawmthu hrilhin a fuih.

NFDB Governing Body meeting hmanpui

Aizawl: Fisheries Minister Lalthansanga chuan January 5, 2026 khan National Fisheries Development Board (NFDB) Governing Body meeting vawi 12-na chu Novotel Hotel, Hyderabad-ah a hmanpui a. He meeting hi Union Fisheries & Animal Husbandry Minister Rajiv Ranjan Singh chuan a kaihruai a ni.

  Minister Pu Lalthansanga chuan Mizoram chu sangha-a a intodelh theihna tura hma laksak turin Union Minister hi ngenin, Integrated Aquapark project thehluh tawhte pawh a ranglama min pawm sak turin a ngen a. Lengpui-a Fisheries Department rama training centre sak mek pawh tangkai zawka hman a nih theih nan NFDB leh ICAR-te thawhpui turin a sawm bawk a ni.

  Union Minister Rajiv Ranjan Singh-a chuan Mizoram harsatnate chu a hriatpui thu leh remchang hmasa berah heng harsatnate sutkian dan tur leh hmalak zel dan tur sawiho turin Aizawl-ah meeting neih a nih tur thu a sawi a ni.

Larsap-in Mizoram aiawha tel turte a kawm

Aizawl: Mizoram Larsap General (Dr) Vijay Kumar Singh, PVSM, AVSM, YSM (Retd) chuan January 5, 2026 khan Viksit Bharat Young Leaders Dialogue (VBYLD) 2026-a Mizoram aiawha tel tur thalai 14 leh official-te chu Durbar Hall, Lok Bhavan-ah kawmin duhsakna nen a thlah.

  Viksit Bharat Young Leaders Dialogue, 2026 a kal turte thlahna hunah hian Larsap chuan Mizoram aiawh turte chu an chanvo tur leh inpuahchahnate a sawipui a. Thalaite chuan sawrkarin hetiang ang hun remchang a siam sak avang leh, Larsap-in an puala inkawmhona hun a buatsaih avanga lawmthu sawiin, Mizoram tana hlawhtlinna chang tura theihtawp chhuah an tum thu Larsap hi an hrilh a ni.

  Viksit Bharat Young Leaders Dialogue 2026 hi January 9-12, 2026 chhung hian Bharat Mandapam, New Delhi-ah neih a ni ang.

Saza sa leh a peltu man

Aizawl : January ni 7, 2026 khan Aizawl Forest Division hnuaia Seling leh Saitual Range tangkawpte chuan an report dawn bawhzuiin, Saza sa leh a peltu an man. 

  Sa peltua puh hi Sesawng khaw mi niin, Forest Department te hian an report dawn bawhzuiin a in leh a chhehvel an dap a, Saza sa leh pawihkhawihna atana a hman hmanrua te an man a. vawiin khan thubuai siamsak niin, Central Jail-ah dahluh nghal a ni. 

  Mizoram State Animal Saza hi humhalh tura tan lak a nih mek laia hetiang pawikhawihna a thleng thin hi Forest Department chuan pawi a ti a, Zoram mipuite nungcha leh ramngaw humhalh kawnga hma sawn zel turin a ngen a ni.