Ramp awm loh vangin complaint thehlut

Aizawl : Mahnia ke a kal thei lo, wheelchair hmang, Mumbai atanga lo kal Prakash Nadar chuan nimina Synod Hospital, Durtlang a thisen a pek hnuah January 7, 2025 khan People with Disabilities (PwD) Commissioner Vanlaldiki Sailo hnenah Civil Hospital Aizawl Blood Bank panna turah ramp a awm loh avangin complaint a thehlut.

   Thisen vawi 126 pe ta Prakash Nadar hian India ram state tinah thisen pek kim tumin hma a la a, tun thleng hian State 25 leh UT 5-ah thisen a pe tawh. Aizawl-ah hian Civil Hospital Blood bank-ah thisen pek a tum a, mahse, rualbanlo te kalna tur ramp a awm loh avangin Synod Hospital-ah hian a pe ta zawk a ni.

Heroin vangin mi pathum man

Aizawl : Excise & Narcotics Department leh FIU, Assam Rifles te thawk dun chuan January 7, 2024 (Thawhlehni) zan dar 8:30 khan Electric veng, Champhai-ah Heroin gram 119.700 (Hawng 10) leh a neitua puh mi pathum an man.

   Heroin vanga mante hi The Narcotic Drugs & Psychotropic Substances Act, 1985 (ND&PS Act) tlawhchhana thubuai siamsak an ni a, vawiin khan District & Sessions Judge, Champhai District-ah hruai nghal an ni.

Phalna nei lo tan Petrol leh Diesel zawrh khap

Aizawl : District Magistrate, Aizawl district chuan January 7, 2025 khan phalna nei lo a petrol leh diesel zawrh khapna thupek a chhuah.

   Dan ang taka petrol leh diesel hralh a nih theih nan leh mipuite an lo him tlan zawk nan khapna thupek hi chhuah a ni a, thupek hian thla hnih chhung a huam ang a, dan zawm lo te chu an petrol man sak an ni ang a, dan angin an chungah hremna lek a ni bawk ang.

A vawikhatnan thukhawm

Aizawl : January 9, 2025 khan Mission Governing Council of Mizoram State Skill and Entreprenuership Development Mission te chu a vawi khat nan an chairman Lalduhoma, Chief Minister hovin CM Conference Hall-ah an thukhawm.

   Meeting-ah hian Labour, Employment, Skill Development & Entreprenuership Department, DAY NULM, MzSRLM, Mizoram Startup Mission leh Commerce & Industries department ten skill development an kalpui dan te an tarlang.

   Meeting-ah hian Governing Council Vice Chairman Lalnghinglova Hmar, Minister, LESDE, leh Khilli Ram Meena, IAS, Chief Secretary bakah member dang te an tel a ni.

Sawrkar damdawiin tha pali zingah tel

Aizawl : Health Department chuan January 9, 2025 khan thuchhuah siamin India rama sawrkar damdawi in tha bik thlan zingah District Hospital pahnih – Siaha District Hospital leh Lawngtlai District Hospital leh Primary Health Centre pahnih – East Lungdar PHC leh Phuaibuang PHC te an tel tih an tarlang.

   National Health Mission, Health & Family Welfare Department a?anga thu dawn danin, India rama sawrkar damdawi in ?ha bik tehna, National Quality Assurance Standards (NQAS)-ah Siaha District Hospital, East Lungdar PHC leh Phuaibuang PHC te chu an tling a ni.

District tin Widow Cell tlangzarh

Aizawl : 09.01.2025 khan Minister Lalrinpuii chuan a office chamber-ah Mizoram district tin tan ‘Widow Cell’ a tlangzarh.

   National Human Rights Commission in Centre, State leh UT sorkar hnena hmaithai te dilna chanvo humhim nan leh an hmakhua ngaihtuah sakna hmanrua atana Widow Cell din tura thurawn a pek bawhzuina a ni a. Ti hian Mizoramah chuan Widow Cell hi district tin a One Stop Centre tinah din nghal a ni.

   Mizoram hi India ram State dang zingah Widow Cell din hmasa pawl a nih thu sawi a ni bawk.

Home Minister-in Fire NOC Online Dilna tlangzarh

Aizawl : Home Minister K Sapdanga chuan January 9, 2025 khan Fire & Emergency Services Department-in mipui te tana awlsam zawka insak dawn a No Objection Certificate (NOC) dilna a hmun pan ngai lova Online-a dilna tur Portal www.fsonline.mizoram.gov.in chu a Pisa ah a tlangzarh.

   Home Minister K Sapdanga chuan insak dawna Fire NOC dilna, Fire & Emergency Services Office hmun kal ngai lova, mahni awmhmun atanga online-a a dilna Portal siam tak chu Department tan nilovin mipui tan a ni a, mipui tan awlsamna siamsakin thil pawimawh leh tangkai tak a ni dawn, a ti.

   Portal tlangzarh taka hian hengte hi a hmuna kal ngai lovin online in dilna hi www.fsonline.mizoram.gov.in ah thehluh thei a ni tawh dawn a ni. Online Portal hi ICT Department kutchhuak a ni.

Union Minister-in EMRS Tlangnuam tlawh

Aizawl : Vawiin chawhma khan Union Minister of State for Tribal Affairs Durga Das Uikey chuan January 9, 2025 khan Eklavya Model Residential School, Tlangnuam a tlawh a. A hmunhma te endikin thawktute kawmna hun a hmang.

   Eklavya Model Residential School, Tlangnuamah hian zirlai 101 an awm mek a, chungte chu pawl 6 leh pawl 7 zirlai an ni. Zirtirtu 6 awmin thawktu dang mi 11 an awm bawk. EMRS, Tlangnuam sak hna hi DJ Consultancy Services-in thawkin, hna za zela 95 hi thawk zo tawh anga chhut a ni a, March 2025 chhung a zawh fel hman beisei a nih thu tarlan a ni.

Transport Minister thutkhawmnaah tel

Aizawl : Transport Minister Vanlalhlana chu New Delhi-a India ram state hrang hrang Transport Minister thutkhawmna leh 42nd Transport Development Council January 7-a neih ah a tel a, Union Minister for Roads Transport and Highways Nitin Gadkari-a’n he thutkhawm hi a kaihhruai a ni.

   Mizoram Transport Minister Vanlalhlana chuan Union Minister hnen ah Automated Testing Station pakhat aia tam siam a nih theihna turin hmalak a tul thu a thlen a ni. Command and Control Centre March 2026 hnu lamah hman chhunzawm zelna tura Mizoramin harsatna a neihte a tarlang a. Passenger phur chi lirtheia vuah tur Vehicle Location Tracking Device and Panic Button (VLTD & EAS) chu lirthei neituten lei an harsat thu sawiin, a khawl lei nan hian sawrkar laipui chu subsidy 50% tal ngaihtuahsak turin a ngen bawk a ni.

State Level SASCI Committee thukhawm

Aizawl : Chief Minister Lalduhoma kaihhruaiin January 7, 2025 khan State Level SASCI Committee te chu CM Conference Hall-ah an thukhawm a, SASCI hmanga hnathawh mek leh thawh tur thlan fel tawh te an thlirho.

   Chairman Lalduhoma chuan, sawrkar hian a thiltih tinrengah moral reforms a ngaihtuah thleng phak zel a, hna chhia te, sawrkar hnathawk inthlahdah lutuk te kan remti lo. SASCI leh fund danga thawh tur kan thlan leh kan kutthlak ve tawh chin chu a tha tur a ni. A huna zawh ngei pawh kan tum tlat tur a ni a, revise ngai lo thei zel se a ti bawk.

   Mizoram sawrkar chuan hmasawnna ruhrel pawimawh te hi SASCI 2024-25 Part 1 atangin Rs. 275 crore sengin thawh a ni dawn a ni.

CM hovin MAMB thukhawm

Aizawl : Chief Minister Lalduhoma kaihhruaiin Mizoram Agricultural Marketing Board (MAMB) te chu January 6, 2025 khan CM Conference Hall-ah an thukhawm a, thlai thlan chhuah palite lei tan dan tur chipchiar an sawiho a, an ruahmanna hi puanzar thuai a ni ang.

   Chief Minister chuan member te kum thar chibai a buk a. Sawrkar chuan a lo tiam tawh angin thlai thar thlan chhuah paliah support price a pe dawn a. "Kan kuthnathawktuten an kut kawihte hlawk taka an hralh theih nan an tan kan dingnghet a ni," a ti.

   Sawrkar chuan Mizoram pumah Secondary Collection Centre 54 a tifel tawh a, primary society 675 din tawhin, registered buyers 103 a chhinchhiah tawh a ni.

Union Minister hnenah hmalakpui turin ngen

Aizawl : Transport Minister Vanlalhlana chuan Union Minister for Ports, Shipping and Waterways (MoPSW) Sarbananda Sonowal chu January 6, 2025 khan a chenna inah a kawm a, Transport Department-in Inland Water Transport (IWT) atana hma a lak mekte chu chak lehzuala thawh a nih theih nan hmalakpui turin a ngen.

   Transport Department hnuaiah hian IWT project pathum kalpui mek a ni a. Development of IWT on River Khawthlangtuipui-River Tuichawng, Development of IWT on River Tlawng (National Waterway-102) leh Development of IWT River Chhimtuipui te kalpui mek a ni.