PM Modi-a'n Mizoram Kuthnathawktute kawm

Aizawl : January 8 khan Durtlang MC Hall-ah Video Conference kaltlangin Prime Minister Narendra Modi leh Mizoram kuthnathawktu thlanchhuah te’n Viksit Bharat Sankalp Yatra hmalakna hnuaia Agriculture sector chungchangah inkawmna an nei.

   Prime Minister Narendra Modi chuan India in kum 2047 ral hmaa Ram Hmasawn/ Ram Changkang nih a tumna kawngah Agriculture sector pawimawhna a sawi a. India ram state hrang hranga Kuthnathawktute pawh Video Conference kaltlangin a kawm nghal a ni. Mizorama Kuthnathawktute zinga thlan chhuahte pawh he program-ah hian an tel tha hle a. He hunah hian VL Hruaia Ralte, Durtlang North chuan kuthnathawktute aiawhin Prime Minister Modi-a chu Organic Farming chungchang a titi pui a ni.

Nagaland Dy. CM-in Lalduhoma tlawh

Aizawl : Nagaland Deputy Chief Minister Y. Patton chuan January 8, 2023 khan Chief Minister Lalduhoma chu a chenna Bungalow ah a tlawh a, inkawmna hun tha tak an nei.

   Y. Patton hian, Mizoramah sawrkar thar chak tak a siam avanga a lawmpui thu a hrilh a, Naga te leh Mizote hi thlahtute atanga unau leh inhnai tak kan niin a lang a, chuvang chuan kan tan pawh Chief Minister i ni, a ti. Lengpui a lo thlen atanga Aizawl khawpui chhung a kal tawhna chinah Mizoram mipuiten a kaihhruai sawrkar an thlawp tha hlea a hriat thu leh an hlim hle nia a hmuh thu a hrilh bawk.

   Y. Patton hian, Myanmar leh India ramri hung chu Naga mipuite tan pawh thil pawm theih loh a ni a ti. Y. Patton hian Chief Minister chu Nagaland-a zin tura sawmin, Nagaland hian Mizo Chief Secretary pathum an nei tawh a, Addl. Chief Secretary pakhat an nei tawh bawk.

CM leh Presbyterian Church of USA aiawhte inkawm

Aizawl : Chief Minister leh Presbyterian Church of USA aiawhte chuan Mizorama ruihhlo ngaite enkawlna kawngah thawh hona a awm theih leh theih loh chungchang sawihovin January 9 khan CM pisaah an thukhawm.

   Inkawmnaah hian Presbyterian Church of USA aiawha thute hian tun hnaia Aizawl leh a chhehvela ruihhlo lama harsatna nei an hmuh te leh ruihhlo ngai enkawlna an tlawh theih chinte atanga an thil hmuh dan leh hmalakna awm thei tur nia an ngaihte an sawi a. US lama an kohhran leh mi inphal, sum leh pai thawh thei dap lamah harsatna an neih loh tur thu an sawi rualin, thawklehkhata hmalakna lian tak kalpui nghal mai erawh a harsat deuh theih thu an tarlang a ni.

   Chief Minister hi Lalrinpuii, Minister, Social Welfare & Tribal Affairs, Health, etc.leh Lalnghinglova Hmar, Minister of State, Excise & Narcotics ten an tawiawm. Presbyterian Church of USA aiawh hian Rev. Vanlalrosanga Ralte leh a thawhpuite an rawn kal a ni.

Sawrkar thar lawm nan CM Relief Fund pe

Aizawl : Mizoram Iskut Grower's Association (MIGA) hruaitute chuan Chief Minister Lalduhoma chu January 9 khan a pisaah an hmu a, Chief Minister Relief Fund atan cheng singkhat an pe.

   Chief Minister hnena Relief Fund an chhunluh chhan ziaka an pekah chuan, "keini kuthnathawka eizawngte tan innghahna tur sawrkar thar kan nei ta hi kan lawm tak meuh a, sawrkar thar lawmna, kan lawmzia lan tir nan kan theih tawk beitham tak hi kan hlan a che", tiin an ziak a ni.

Chapchar Kut hman dan tur rel

Aizawl : Art & Culture Minister Pu C. Lalsawivunga hovin January 9, 20244 khan Chapchar Kut 2024 lawm dan tur chungchanga pawimawhte thlirlawkna Art & Culture Department hotute'n Minister Pisa, MINECO-ah an nei a.

   He hunah hian Chief Minister kaihhruai Chapchar Kut Organising Committee thutkhawm neih huna thlen tur rawtna leh pawimawh hrang hrangte chipchiar taka sawiho a ni. Art & Culture Minister Pu C. Lalsawivunga chuan Chapchar Kut chu mizote'n kut kan neih tlemte zinga pawimawh leh ngaihven hlawh tak a nih thu sawiin, hnam ziarang leh nunphungte chawinun leh vawnhim nana hman tangkai a tul thu a sawi.

I&PR Minister hovin inhlantharna nei

Aizawl : January 9, 2024 khan I&PR Minister Dr. Vanlalthlana hovin I&PR Auditorium-ah kumthar inhlantharna leh thingpui inhona hun hman niin, he hunah hian Mizoram Journalists' Association (MJA) member-te leh Directorate of Information & Public Relations, Aizawla Officer-te an tel a ni.

   He hun hmanpuitu I&PR Minister Dr. Vanlalthlana chuan MJA leh I&PR a thawkte chu kumthar duhsakna hlanin sawrkar reng reng veng thei tu leh khalh ngil thei ber chu opposition party-te leh chanchinbu mi media te an ni a, a bik takin ram siamthatna kawngah te, ram vei kawngah te, journalism leh journalist te hian dinhmun pawimawh tak an luah a, chumi hre reng chungin a thawhpui, chanchinbu mite leh thuthar thehdarhtute te chu Sawrkar venpuia thurawn te pe turin a chah.

   Programme zawha Minister hian I&PR Directorate Office bulah sak thar leh luahluh tawh building thar Lianchhairi Run a fang leh a ni.

CEO-in Pol party te meeting neihpui

Aizawl : Mizoram Madhup Vyas, IAS, chuan Janaury 9, 2024 khan Special Summary Revision of Photo Electoral Roll, 2024 kal mek chungchangah Political Party hrang hrang aiawhte meeting a neihpui.

   CEO Madhup Vyas chuan Political Party-te chu electoral roll dik leh felfai neih theih nana thawhpuiah a sawm a. A bikin khawpuiah hmun khat aia tamah E-Roll a hming chuang emaw, hmun danga insawn tawh, an awmna hmasa Electoral Roll-a hming la awm emaw, mitthi tawhte Electoral Roll-a la chuangin inthlanpuia vote tlak dan percentage thleng a nghawng theih avangin heng hi a awm loh nana hma lakpui turin a sawm.

   Election Commission of India (ECI) duh dan angin Electoral Roll-a felfai leh felfai loh BLO te enpui turin Polling Station tinah Political Party-te chu an aiawh Booth Level Agent (BLA) ruat theuh turin a ngen bawk.

Lengpui Airport chungchanga hma la tur Working Group siam

Aizawl: January 10 khan Chief Minister hovin CM Conference Hall ah Lengpui Airport enkawltu dang hnena hlan chungchang sawiin sawrkar mi pawimawhte an thukhawm a. Mizoram tana tha ber tur zawnga enkawltu tur hi thlan a nih theih nana lo bawh zuitu tur Working Group din ni se, an ti.

   Meeting-ah hian India ram hmun danga Airport engemawzat, Airport Authority of India kuta awm mek te an enkawl zui dan te leh private company ten (PPP Mode-a) an kuta awm an enkawl dan chanchin tlangpui tarlan a ni. Chungte ngaihtuah chung chuan Airport Authority of India hnenah nge private company te hnena hlan tha zawk dawn a, Mizoram tana hlawk ber tur enge ni ang tih kil hrang hranga khaikhinna chipchiar lo neitu tur Working Committee (working group) din ni se, annin a rang lama lo umzuiin, report kimchang an neih hunah thutkhawm leh ni se, an ti a ni.

Art & Culture leh CYMA te inkawm

Aizawl : Art & Culture Minister C. Lalsawivunga chuan January 10 khan a Pisa, MINECO-ah Central Young Mizo Association (CYMA) Office Bearer (OB) te lengah sawmin Chapchar Kut lawm dan tur leh pawimawh dangte a sawipui.

   Art & Culture Minister C. Lalsawivunga chuan Chapchar Kut hman dan tur chungchang Department hotute nena sawihona hmasa neih a nih tawh thu sawiin, hlawhtling taka kut lawm a nih theih nana sawrkar kutke pawimawh tak YMA hotute nena inrawnkhawma neih a ni chu lawmawm a tih thu a sawi a. Kalkhawmte chu tun aia hmasawn leh hlawk zawka kut lawm a nih theihna tura ngaihtuahna seng turin a chah a. Hnam inpumkhatna leh hnam ziarangte chawisan a nih theih nana hmalak tlan a pawimawh thu a sawi bawk.

Sawrkar Laipuiin Ni 100 Inhlawhna sum pe

Aizawl : Ministry of Rural Development chuan nimin January ni 9, 2024 khan Wage Component atan Rs.164.27 crore a rawn release.

   Mahatma Gandhi NREGA (MGNREGA) hnuaia inhlawhna Wages bik hi Central Sawrkar atanga 100% direct funding a ni a. Wage Payment hi Mizoram Sawrkar Finance Department kaltlang lo in, Job Card holder te Account-ah Direct Benefit Transfer (DBT) hmangin Central Sawrkar-in a rawn thun (credit) thin a. Mipuite inhlawhna ang zelin Mizoram Sawrkar Rural Development Department chuan FTO hi MIS-ah District leh Block tina thawktute kaltlangin a siam (generate) sak nghal zel thin a ni.

Retailer te thla tluana dawr hawng turin hriat nawn tir

Aizawl : FCS&CA chuan January 10 khan thuchhuah siamin Retailer te chu mipui ten an hman Huna an dawr theih turin kar tluana an Dawr te hawng turin a hriattir.

   FCS&CA Department hnuaia Fair Price Shop Dealer/Retailer zawng zawng te'n thla tluanin an dawr an hawng ngei tur a ni. Hei hi mipuiten sum leh paia harsatna an neih pawha huntiam chhung (thlakhat chhung) a an quota an lak theihna tura ruahman a ni. Fair Price Shop (Retailer) te hian Sunday tiam lovin zing lamah dar 06:30 - 08:30 inkar leh tlai lamah dar 03:30 - 05:30 inkar Fair Price Shop hi an hawng ngei ngei tur a ni. Hei hi chhuna ei bar zawnga kal chhuah ngai te pawhin an eizawnna bahlah lova an chhungkua ration an lak hman ngei theih nana ruahman a ni.

CM leh Aizawl Mayor leh thawhpuite inlawm

Aizawl ; January 10, 2024 khan Chief Minister Lalduhoma chuan a pisaah Aizawl Mayor Lalrinenga Sailo leh a thawhpui Corporators te a kawm a. Corporators te hian lawmpuina hlanin an mamawh thil hrang hrang te an sawipui nghal.

   Chief Minister chuan, tun hnaia Aizawl bawlhhlawh paituten an bawlhhlawh paihna man an hmuh loh rei avanga din an ngaih mai theih thu chanchinthar atang a lo hria thu hrilhin, a hriat ruala Finance department hotute biaa, AMC bawlhhlawh paihna sum pek chhuah tur awm ang te pe chhuak tura a hrilh nghal thu a lo hrilh a.

   Aizawl Bypass road chhuah lam leh tlak lamah a awm thar thuai dawn a, chu chuan nasa takin Aizawl khawpui hi a zauh dawn a ni. Chhuah lama bypass road thawhna tur phei chu Union Minister of Road Transport & Highways in min sanction tawh a ni, tiin Aizawl zauh zel nana hmalakna awm dang te nen a lo hrilh bawk.

CM-in Jeremy-a thingpui inpui

Aizawl : Chief Minister Lalduhoma chuan January 11 khan Indian Weightlifting Federation, Youth, Junior leh Senior National Weightlifting Championships Itanagar, Arunachal Pradesh a, December 28, 2023 - January 7, 2024-a neih zawh taka a vawi hnih nana Senior National Weightlifting Championships, mipa huanga Best Lifter atana thlan Jeremy Lalrinnunga chu a Bungalow ah lawmpuina thingpui a inpui.

   Best Lifter-ah hian Jeremy Lalrinnunga hi Senior National 2020 khan Kolkata, West Bengal ah khan thlan a lo ni tawh a, Senior National Weightlifting Championships ah Vawi thum Gold a lakna a ni. Youth Olympic Gold Medalist a lo ni tawh bawk.

Aizawl leh Lunglei-in fai lawmman dawng

Aizawl : India rampuma Faina Inelna lian ber Swachh Survekshan 2023 lawmman semna chu Bharat Mandapam Plenary Hall, Pragati Maidan, New Delhi ah 11.01.2024 khan neih a ni a. He inelnaah hian category hran ve ve ah Aizawl leh Lunglei khawpui te'n lawmman an dawng a ni.

   Lunglei Khawpui in Clean City in the North East Zone Award (Below 1 lakh population) a dawng a. He award hi R. Vanlalsawta, Chief Executive Officer, Lunglei Municipal Council in a dawng a. Aizawl khawpui in Clean City Award a dawng bawk a. He award hi Dr. Andrew H. Vanlaldika, Director, UD&PA in a dawng a ni.