CYMA huaihawtin Bangladesh atanga raltlante thlavang hauhna nei
Aizawl: January 9, 2023 khan Central Young Mizo Association huaihawtin Raj Bhawan North Gate tualah Bangladesh atanga sahimna zawnga Mizoram-a rawn tlanchhiat tum, BSF ten an hnawhkir thin avanga lungawilohna lantir nan leh an thlavang hauhna atan punkhawm huaihawt a ni.
    He hun hi Central YMA vice president Lalhmachhuana'n kaihruaiin, General Secretary Prof. Lalnuntluanga chuan report a pe a, CYMA President R. Lalngheta bakah MZP president leh MSU president ten thu an sawi bawk a, Central YMA assistant secretary Prof. Malsawmliana kaihhruaina in tunhnai a ramri a boral Pastor Sawmkhupa sunna hun hman a ni bawk.
    Vawiin punkhawmna ah hian resolutiin 2 pass in, chungte chu;-
1. Sahimna zawnga Chittagong Hill Tract Bangladesh atanga Mizorama kan unau raltlante hi India sawrkar in mihring dikna zah sak a, sahimna an hmuh theih nan ruahmanna siam thuai turin kan phut tlat a ni.
2. Sahimna zawnga rawn tlante mamawh ngaihtuah sak turin India sawrkar kan phut tlat a ni.

Land Revenue & Settlement Department in mawhphurhna kan nei sang- Lalruatkima
Aizawl January 9, 2023: Land Revenue & Settlement Department chuan January 9, 2023 khan an Minister Lalruatkima hovin inhlantharna leh infuihtharna hun an hmang a. 2022 chhunga Land Revenue & Settlement Department hmalak tawhna thlir ho a ni a, kum thar lo awm tura department in hmachhawp hrang hrang a neihte PowerPoint- hmanga present a ni.
    Minister Lalruatkima chuan ram leilung Pathianin min pe a, chu ram enkawl chu sawrkar mawhphurhna a ni a ti a. Hmasawnna engpawh thawk dawn ila land based vek a ni a, ram a awm loh chuan hmasawnna ruhrel a inbun ngheh theih loh a, chuta tang chuan Land Revenue & Settlement Department in mawhphurhna kan nei sang hle a ni tih kan hre theuh awm e tiin a sawi. 
    He hunah hian Land Revenue & Settlement Department in Minister Lalruatkima chu Cabinet Minister a nih lawmpuina an hlan nghal a ni.

Short Term Course for Media Persons from Sikkim hawng
Aizawl: Indian Institute of Mass Communication, North-Eastern Regional Campus buatsaih ni 5 awh “Short Term Course for Media Persons from Sikkim” chu January 9, 2023 khan Lok Sabha MP C. Lalrosanga’n Mizoram University Guest House Seminar Hall, Tanhril-ah a hawng.
    January ni 9 – 13, 2023 chhunga neih tur Short Term Course for Media Persons ah hian Sikkim sawrkar hnuaia Information & Public Relations Department official 4 leh journalist 16 an tel a ni.

Governor-in State Bank leh RRB hotulu te kawm
Aizawl: Governor Hari Babu Kambhampati chuan January 10, 2023 khan Raj Bhavan-ah State Bank of India (SBI) leh Regional Rural Banks (RRB) hotute a kawm. 
    Meeting hmasa zawkah V Siva Kumar, General Manager(RRB), SBI Corporate Center, Mumbai leh Pu Jaya Chandra, Chairman, Mizoram Rural Bank te chuan Mizoram Rural Bank hmalakna leh an hmasawnna te an sawi a. Meeting hnuhnung zawkah hian Rakesh Kumar Ravi, Regional Manager, SBI chuan SBI in hma a lak mek dan leh Mizoram chhunga an hmachhawp te a sawi bawk a ni.

Football Ground leh MSSC-TATA Trusts Football Academy hawng
Aizawl: January 10, 2023 khan Kawrthah leh Tuidam-ah PMJVK Scheme atanga sum hmuh hmanga Synthetic Turf Football Ground leh MSSC-TATA Trusts Football Academy, Kawrthah Centre hawnna neih a ni a. Chief Minister Zoramthanga chu khuallian niin a hawng. Sports & Youth Services Minister Robert Romawia Royte chu khualzahawm a ni bawk.
    Chief Minister chuan Mamit district vanneihna a lan zel thu sawiin, Kawrthah a Residential School siam hmalakna kal mekah a ken tel Football turf changtlung tak vawiina hawn bakah zirna in leh hostel building sak mek te chu lawmawm, tiin, thangtharte tan hmasawnna lian tak a thlen a beisei thu a sawi. Chief Minister chuan covid len laiin hmalakna tam tak thuanawp phah mah se, sawrkar laipuiin hmanna tur sum a rawn bituk sa hmangin tuna khelmual tihchangtlun hna hi ngawrh taka hmalak a nih thu a sawi a. TATA Trusts nen thawk duna football khelh zirna chu a hlawhtlin ngei theih nan sawrkarin hma a lak thu a sawi bawk a. 

Fire Prevention week hi February 6–10, 2023-ah hman tur
Aizawl: State Level Sub-Committee on Fire Prevention chu January 10, 2023 khan SAD Conference Hall, MINECO- ah Chairman TJ Lalnuntluanga, Hon’ble Minister hovin kum 2023 chhunga Ramkang ven dan tur an rel a. Committee-ah hian a kaihhnawih Department engemawzat leh environment based NGOs member te meeting-ah hian an tel a ni.
    Mizorama ramkang tam ber chu Lo, Leipui leh Huan hal atanga in tan a nih thu an sawi. Kum danga lo tih thin tawh angin Committee hian kumin 2023 a ramkang ven anih theih nan Fire Prevention week hi Dt.6.02.23 – 10.02.23 inkar hian hman nise, Lo hal theih hun chhung ni hnuhnung ber pawh 15.3.2023 ni se tih a ni. Lo hal avanga Thlawhna service tibuai thei pumpelh nan Lengpui khaw chhehvelte chuan chhawhnu dar 3.30PM hnulamah chauh hal se tih a ni bawk.

Midday News Bulletin tichhuak tan
Aizawl: January 10, 2023 khan Information & Public Relations Minister Lalruatkima chuan Midday News Bulletin chu AIR, Aizawl-ah a tlangzarh. Midday News hi a hmunah ngaihthlak nghal a ni a, nitin chawhnu dar 2:30PM a tihchhuah turin AIR Aizawl chuan a buatsaih a ni.
    Midday News Bulletin hi Live Streaming Prasarbharati Apps, FM, MW channel-ah leh Satellite mode-in DTH ah pek chhuah a ni dawn a. Mizoram-a AIR FM Station zawng zawng Lunglei, Siaha, Taiping, Champhai, Kolasib ten an relay vek dawn bawk a ni.

Laldenga Synthetic Turf Football Ground hawng
Tuidam, 10.01.2023: PMJVK Scheme atanga sum hmuh hmanga Laldenga Synthetic Turf Football Ground (Tuidam) hawnna 10.1.2023 khan buatsaih a ni a. Chief Minister Zoramthanga chu khuallian niin a hawng. Sports & Youth Services Minister Robert Romawia Royte chu khualzahawm a ni bawk.
    Chief Minister chuan khawthlang lamah development a kal mek a, a kal zel dawn a ni tiin, football ground changtlung tak hawn a ni chu a lawmpui thu a sawi a. Thalai ten tangkai taka an hman a, inkhelthiam lar, ram pawn thlenga lar ni turin tumruhna nen bei turin a chah a. 

Budget Session thutkhawm ko

Aizawl: January 12, 2023 khan Governor Dr. Hari Babu Kambhampati chuan Eighth Legislative Assembly of the State of Mizoram chu Eleventh - Cum - Budget Session atan February 7,  2023 chawhma dar 10:30 AM atanga thu khawm turin a ko.

Chief Minister in Sihphir VC House leh Rohrenga Hall a hawng
Aizawl, 12th January, 2023: Chief Minister Zoramthanga leh Aizawl East-I bialtu ni bawk chuan vawiin khan Sihphir VC House leh Rohrenga Hall chu khuallian niin a hawng.
    Chief Minister chuan khawtlang inrelbawlna atana tangkai tak tur VC House changtlung tak leh vantlang punkhawmna atana hmun remchang tha tak hall tha tak vawiinah Sihphir ah hawn a ni thei chu lawmawm a tih thu a sawi. Hall hming atana Sihphir lal hlui Rohrenga hming vuah a ni chuan mi hmasa mi ropui te chawimawina rilru an pu tih a lantir in, fakawm an tih thu a sawi bawk.

Card eng leh pawl ten 2023 chhung a thlawnin Buhfai dawng dawn
Aizawl: Carolyn L.B. Khiangte DCSO, Lunglei chuan AAY leh PHH (Ration Card eng leh Card pawl) te tana kum 2023 January atanga buhfai a thlawna an lak theih chungchang leh Fair Price Shop Dealer (Reatailer) te tana hriattur pawimawh a ti chhuak.
    Ministry of Consumer Affairs, Food and Public Distribution, Department of Food & Public Distribution, Government of India in Lehkha No.F.15-33/2022-NFSA dated 30.12.22 hmanga Notification a tih chhuah angin National Food Security Act, 2013 Section 3 hnuaia beneficairy (AAY leh PHH) card eng leh card pawl te tan January, 2023 atang hian kumkhat chhung ration buhfai a thlawna sem a ni dawn a. AAY chhungkaw tan 35 kgs per card, PHH beneficiary te tan 5 kgs per member/beneficiary a sem tur a ni.