SBI ten Traffic Police thilpek hlan

Aizawl : State Bank of India chuan an Corporate Social Responsibility (CSR) atangin Aizawl Traffic Police hnenah January 16, 2025 khan cheng 10,97,190/- man thilpek an hlan.

   SBI ten Traffic hnena hmanrua leh silhfel an pekte chu :

1. Road Signage with pole - 44 Nos

2. High Strength, colour consistency Jacket - 300 Nos

3. Multi-purpose Safety Reflector Jacket - 300 Nos

4. HP All in one 13th Gen Intel Core i7 Computer Set - 1 Set

5. Road Security Traffic Convex Mirror - 50 Nos

   Total Cost - Rs. 10,97,190/-

Silai leh a mu thahnem tak man

Aizawl : Mizoram Police leh an thawhpuite chuan January 15, 2025 khan Mamit District-a West Phaileng Police Station hnuaia awm Saithah-ah Silai leh a mu tam tham tak an man a, tum khata silai leh a mu an man thathnem ber zingami a ni, ralthuam kaihhnawih-a man zingah hian CNF hotu lawk zingami pawh a tel.

   He operation-ah hian AK-47 rifles 6, AK ammunition cartridge 10,050 leh Magazine 13 an man a, hemi kaihhnawihah hian mi pangnga chu man an ni. He thil an chhuina atang hian heng silai leh a mu te hi Myanmar-a Chin National Front leh Chittagong Hill Tract, Bangladesh-a inkulh United People's Democratic Front (UPDF-P) te insumdawn tawnna a ngaih a ni.

High Court-in Mizoram sawrkar insawifiahna hun a pe

Aizawl : Mizoram sawrkarin VC term thla ruk aia tam mah a pawhtawina Gauhati High Court Aizawl Bench a khinna chungchang chu court in thutlingah a ngai a, Mizoram sawrkar insawifiahna hun a pe.

   ZALEN thudawn danin, hemi chungchang hi ni 15.1.2025 Nilaini hian ngaihtuah ni a. High Court chuan VC te khinna chu thutlingah ngaiin, High Court chuan enfiah zui ngai a ni tih sawiin, sawrkar chu insawifiahna hun a pe a. January ni 30-a he thubuai chingfel hman turin ruahmanna a siam.

Sumo accident-ah Mizo pahnih boral

Aizawl : January 15, 2025 zing khan Guwahati - Aizawl sumo (maxi cab) AS 01 KC 9188 chu Meghalaya state thlen hma deuhah chesualin, a hmunah mi pathum an boral a, an zinga pahnih te chu Mizo hmeichhia nia hriat an ni.

   Motor hi Nasim Choudury (Sonabarighat) khalh niin, Ratacher (Meghalaya) thlen hma km 10 velah kawng thlangah tlan liamin a chesual a, passenger pathum hmeichhia vek a phur.

   ZALEN thudawn danin, a hmunah driver leh passenger pakhat chu a ID-a a inziah danin, Zothanpari, Tuithiang, Aizawl a ni a, ani hi a boral nghal a, Umkiang PHC ah hliam te lak phei an nih hnu in Passenger dang Jenny (Mizo) a boral ve leh a ni. Passenger pakhat erawh biak theih in a awm a. Ngaihtuahawm lutuk a ni lo.

Gold leh Senior-ah medal la

Aizawl : Khelo India zone hrang hranga a tithate inelna bik, Asmita Khelo India Women National Weightlifting League Youth, Junior leh Senior neih zawh takah january 14, 2025 khan Zosangzuali’n +87kg huangah Junior-ah gold leh senior-ah silver medal a la.

   Keitum ritchawi chak hian medal pahnih hi a la a. Senior-ah hian Sharon James, Jammu & Kashmir chu tluk lo mah se, Junior-ah chuan tluktu tumah a nei lo va; snatch-ah 55kg leh clean & jerk-ah 70kg, a vaiin 125kg a chawi kang a ni.

Chapchar Kut 2025 Organising Committee thukhawm

Aizawl : January 16, 2025 khan CM Conference Hall ah Chapchar Kut 2025 Organising Committee te chu an chairman Chief Minister Lalduhoma hovin an thukhawm a. Kumin Chapchar Kut hman dan tur an rel a, thupui atan "Zo nun ze mawi - Hawihhawmna" tih chu thlan a ni.

   Chapchar Kut hmanna pui ber hi Aizawl Lammual-ah March ni 6 leh ni 7 ah neih tura duan a ni a. Ni 6 ni hian K. Sapdanga, Home Minister chu khuallian a ni ang a, ni 7 niah Chief Minister Lalduhoma khuallian a ni ang. Kut denchhen programme pawimawh dang te erawh chu March ni 3 atanga kalpui tan tur a ni.

Mizoram Village Councils leh Local inthlanpui hun tur puan a ni

Aizawl : Mizoram District 9-a Local Council leh Village Councils term chu February 19, 2025 hian a tawp dawn a, Constitution of India - Article 243K in thuneihna a pek dungzuia sub-rule (1) of Rule 3 of The Mizoram (Election to Village Councils) Rules, 2014 in mawhphurhna a pek angin State Election Commission, Mizoram chuan January 16, 2024 khan Aizawl, Lunglei, Serchhip, Champhai, Mamit, Kolasib, Siatual, Khawzawl leh Hnahthial District chhunga Village Council - 544 te tan Inthlanpui vawi 21-na tur chu February 12 (Nilaini) hian a buatsaih a nih tur thu a puang.

Film Exhibition kalpui dan tur rel

Aizawl : January 16, 2025 khan India hmarchhak state-a Film Indistry tihhmasawnna tur a Film Exhibition kalpui dan tur relin Video Conference neih a ni a.

   He hun hi Pu Prithul Kumar, Joint Secretary, Ministry of Information & Broadcasting leh Managing Director, National Film Development Corporation-in a kaihruai a, Mizoram, Tripura, Arunachal Pradesh, Meghalaya, Nagaland, Manipur, Sikkim, Assam-a I&PR Nodal Officer-te leh NFDC-a thawktute an tel a ni.

Mizoram Governor thar lakluhna nei

Aizawl : General (Dr) Vijay Kumar Singh, PVSM, AVSM, YSM (Retd) chu January 16, 2025 khan Mizoram Governor 25-na ni turin Circular Lawn, Raj Bhavan, Aizawlah rinawmna thu tiam tira lakluh a ni.

   Gauhati High Court Chief Justice Vijay Bishnoi chuan General (Dr) Vijay Kumar Singh, PVSM, AVSM, YSM (Retd) hi rinawmna thu tiam tirin Governor atan a lalut a. Chief Secretary Khilli Ram Meena chuan President of India-in Governor atana a ruatna a chhiar chhuak a ni.

   Governor thar lakluhna hunah hian Chief Minister Lalduhoma, Chief Minister hlui pahnih Lal Thanhawla leh Zoramthanga, Speaker Lalbiakzama, Home Minister K. Sapdanga, Leader of Opposition Lalchhandama Ralte, Cabinet Minister-te, Gauhati High Court Judge, Dy. Speaker, Minister of State-te, Lok Sabha MP, Rajya Sabha MP, MLA te, Chief Secretary, DGP, Political party leh NGO hruaitute bakah sawm bik mi pawimawhte an tel a ni.

School Education Minister-in Interactive flat panel sem

Aizawl : Mizoram Samagra Shiksha-in Interactive flat panel GEM kaltlanga an lei chu January 15, 2025 khan School Education Complex Conference hall-ah School Education Minister Dr Vanlalthlana hovin sem a ni.

   Interactive flat panel hi school 13 hnenah sem a ni a, chung sikulte chu- Govt Chaltlang High School, Govt Hrangchhuana High School, Govt Pianghleia High School, Govt Sihphir High School, Govt KVM High School, Phunchawng RMSA Secondary School, Govt MICE High School, Govt J.L.High School, Govt Central High School, Govt Kulikawn High School, Govt Sialsuk Higher Secondary School, Govt Republic Higher Secondary School leh Govt Republic High School te an ni.

Mat lui Multipurpose Dam thawh dan tur sawipui

Aizawl : Chief Minister Lalduhoma chuan January 15, 2025 khan a office ah Pradeep Sharma, Executive Director, Head of Business Development, NBCC a kawm a. Serchhip kiang Mat lui Multipurpose Dam thawh dan tur sawipuiin, a 3D model an siam te an thlirho.

   NBCC lam hian Mat lui hi state sawrkar sum leh pai seng lo va an thawh theih an beisei a, a thawhna sum hnar (fund source) kan lo dap zui zel ang a. Kan hmu thei a nih chuan hna thawh chhung hi chu a rei lovang, an ti.

NIT Mizoram Convocation hmanpui

Aizawl : Chief Minister Lalduhoma chuan Art & Culture Auditorium, Berawtlanga buatsaih National Institute of Technology Mizoram 8th Convocation chu January 14, 2025 khan khuallian niin a hmanpui.

   NIT Mizoram 8th Convocation ah hian kum 2020 batch B. Tech degree, kum 2022 batch M. Tech degree leh Ph. D degree te hlan a ni a. B. Tech branch teah hian Civil Engineer degree mi 28, Computer Science & Engineering degree mi 25, Electronics & Communication Engineering degree mi 25, Electrical & Electronics Engineering degree mi 20 leh Mechanical Engineering degree mi 18 te pek an ni a. M. Tech degree hi mi 3 hnenah hlan niin Ph. D degree hi branch hrang hrang 7 atangin mi 28 te pek an ni bawk. Degree hmu thar te hi an vaiin mi 147 an ni. NIT Mizoramah hian Under Graduate course chi nga, Post Graduate course chi li leh Ph.D degree course te a awm mek.

National Youth Festival-a kalte kawm

Aizawl: India ram Sawrkar laipuiin Vision 2047 tihlawhtling tura programme a siam pakhat, Viksit Bharat Young Leaders Dialogue, National Youth Festival 2025 chu hlawhtling taka zawh fel a ni ta a. He Festival-a Mizoram aiawh a kalte chu Sports & Youths Services Minister Lalnghinglova Hmar chuan January 14 khan Directorate of Sports & Youth Services Video Conference Hall-ah a kawm.

I&PR leh MJA inhlan tharna hmanpui

Aizawl : Information & Public Relations Minister Dr. Vanlalthlana chuan January 14 khan I&PR Department-a thawk zawng zawngte leh MJA member-te, Kumthar 2025 atana Inhlan tharna hun, I&PR Auditorium-ah a hmanpui.

   Information & Public Relations Minster Dr. Vanlalthlana chuan I&PR Officers, Staff leh MJA member zawng zawngte kumthar chibai a buk a. Ram hmasawnna tur leh khawtlang hmasawnna tur a sawrkar in ruahmanna a siam tipuitling turin theihtawp chhuaha tan lak puiah I&PR Department leh MJA member zawng zawngte a sawm a ni.

   He hunah hian I&PR Secretary Betsy Zothanpari Sailo leh MJA President C. Lalrambuatsaiha te pawhin thu an sawi bawk a ni.

MSSC leh Samagra Siksha ten MoU ziak

Aizawl : Mizoram State Sports Council leh Samagra Shiksha te chuan Sports Minister Lalnghinglova Hmar leh Education Minister Dr. Vanlalthlana hriatpuina hnuaiah Mizoram Sports tihhmasawnna tura Inremna thuthlung (Memorandum of Understanding) January 13, 2025 khan an ziak .

   Inremna Thuthlung (MoU) hi MSSC aiawh Henry Lalrawnkima, Secretary MSSC leh Samagra Shiksha aiawh Lalthanzira, SPD, Samagra Shiksha ten an ziak a. Sports Minister Pu Lalanghinglova Hmar leh Education Minister Dr.Vanlalthlana te chu hriatpuitu an ni.

   Samagra Shiksha hian Grassroots Level Sports Development (GSDP) an kalpui mek a. GSDP hian naupang kum 6-18 a huam a, heng programme pahnih te hi Sports hmasawnna lama hmalakna tur ve ve a nih a vangin, kalpui tum dan leh a huam chin te in ang diak diak lo mah se, thawhduna zaia khata (Converge) hmalak hian Mizoram chu Sports-ah hmasawnna sang zawkah a hlan kai ngei beiseina avanga Inremna thuthlung hi ziah a ni, Minister te hian an ti.

National Livestock Mission hnuaia hna thawk tha lawmman dawng

Aizawl : January 13, 2025 khan Entrepreneurship Development Conclave 2025, GD Madgulkar Auditorium, Pimpri-Chinchwad, Pune, Maharastra-a neihah, Zorinpuia, SR Piggery Farm, Lengte chuan Piggery Entrepreneurship lama titha lawmman a dawng.

   Zorinpuia hian India rama National Livestock Mission Scheme hnuaia Piggery Farm dinna tura insak atanga ranvulh thlengin monitoring leh inspection zawng zawngte tha taka a paltlang hnuah subsidy tlenga dawng tawhte zingah a zo hmasa leh ti tha ber zingah thlan a ni.

   Mizoram chu India rama National Livestock Mission-Entrepreneuship Programme (NLM-EDP) a ti tha zual top 10 a thlan zingah telin, North East State-te zinga ti tha ber a ni bawk. National Livestock Mission Scheme hian sa, bawnghnute, artui leh ranchawa intodelhna tura hmalatute tanpui nan subsidy a pe thin a ni.