DOWNLOAD OUR APP

Read latest news on your phone
app-store
The Week that Was on January 21, 2024
Jan 21, 2024

Mathlana'n Workshop kharna hmanpui


Aizawl : January 18 2024 khan Dr. Vanlalthlana, Minister, Higher & Technical Education, Mizoram chuan Pachhunga University College-a neih, ni hnih awh 'National Level Research Methodology Workshop' kharna a hmanpui a. He workshop hi research lama hmasawnna a awm theih nana huaihawt a ni.

   Khuallian H&TE Minister Dr. Vanlalthlana chuan Mizoram sorkara a department chan hnuaia hma a lakna hrang hrangah PUC kalphung thate entir nan a hman thin thu a sawi a. Ram hmasawn nan zirbingna chu thil pawimawh anih thu sawiin, zirbingna (research) lo awm tawh hmanga a department chan hnuaia hmalakna awm turte pawh thawh an tum thu a sawi bawk. PUC chu zirna kawngah hmahruaitu ni zel turin duhsakna a hlan nghal bawk a ni.


Myanmar Sipai 276 rawn tlanchhia


Aizawl : Myanmar Sipai sawrkar leh Mipui sipai te inkahna kal velah Janaury 17 khan Myanmar Sipai 276 te chuan Parva, Lawngtlai district an rawn lut leh tawh a ni.

   Myanmar ramchhung, Lawngtlai District, Parva piahlam a Myanmar Sipai leh Mipui Sipai te inkahna vanga Myanmar Sipai tlanchhia 278 chuan vawiin tlai dar 4 vel khan Lawngtlai District chhung, Bandukbanga an lut a, Assam Rifle ten an buaipui mek tih ZALEN chuan The Lawngtlai Post atangin a dawng.


Vawk vulh titawp an rel


Aizawl : Aizawl Municipal Corporation (AMC) in Aizawl khawpui huam chhunga vawk vulh khuahkhirhna dan a kalpui turah engemaw harsatna bik nei te tan vulh chhunzawm dilna January 2024 chhungin dil theih a ni.

   17.1.2024 (Nilaini) khan AMC Auditorium, Thuampui ah vawk khuahkhirhna chungchang hi Aizawl khawpui chhunga Local Council aiawhte chu AMC thuneitu ten an sawipui a. He hunah hian thu sawiin AMC Mayor Lalrinenga Sailo chuan, "Aizawl khawpui hi thianghlim, fai leh hrisel taka kalpui kan tum a. Hetih lai hian vulh laklawh, harsatna nei bik te tan chuan khawngaihna hun hawn a ngai a. Mahse hei hian kum khuaa vulh theihna tur ni lovin engemaw hun chhung bik atan chauh a ni," a ti.


Zoramthanga'n chawlh a tum tih sawi


Aizawl : January 15, 2024 khan Mizo Hnam Run hawnna hun hman a ni a. He hunah hian President Zoramthanga chuan thu sawiin amah leh Tawnluia'n an tel lovin party kal tawh se tha an tih thu a sawi.

   Zoramthanga chuan Party-a a nihna chungchang sawiin, "Pu Tawnluia nen kan sawi dun a, kum 80 chunglam ve ve kan lo ni tawh a, keini tel lovin kal tawh se kan ti a ni. Kan Party tan hian theih tawp kan chhuah zel dawn a, hotute pawh kan hrilh tawh a, hotuten remruatna an la rawn nei mai ang," a ti a. MNF hruaitute ni lai term a tawp tawh thu sawiin, "Hotute hnenah keini chu min ngaihtuah tel tawh suh u, kan ti a ni," a ti bawk.    


Budget-ah Chapchar Kut hmanna tur sum dah tawh dawn


Aizawl : CM Conference Hall ah January 16 khan Chapchar Kut, 2024 hman dan tur relin chairman Chief Minister Lalduhoma kaihhruaiin Organising Committee te an thukhawm a, chairman hian nakum atang chuan Kut hmanna tur sum budget-ah dah a nih tawh tur thu a sawi.

   Committee hian, Kut hi ni khat hman ni se an ti a, kut pa tur leh kut thlengtu tur te an ruat a. Chapchar Kut hmanna tur sum, district leh Mizoram house te a sem darh dan tur te siam fel a ni. Chapchar Kut hmanna tur sum hi sawrkar budget-ah dah a ni ngai lova, kumtina hman thin, ni pawimawh a nih avangin nakkum atang chuan sawrkar budget-a dah a nih tawh tur thu Organising Chairman, Chief Minister hian a tarlang a ni.


Mizoram mamawhte thlenin Sawrkar laipui dawr


Aizawl : New Delhi-a cham mek Power & Electricity Department, Commerce & Industries leh Printing & Stationery Department changtu Minister F. Rodingliana chuan Mizoram mamawhte thlenin Sawrkar laipui leh pawl hrang hranga thuneitu te a dawr.

   Commerce & Industries Minister F. Rodingliana chuan January ni 16, 2024 khan Dr. Arun Kumar Sarma, Director General, North East Centre for Technology Application & Reach (NECTAR) chu hmuin Mizoram thlai tharte lei leh hralh dan tur a sawipui a. Kuthnathawktute tharchhuah Sawhthing, Hmarcha leh Aieng te chu India ram chhung leh pawna hralhpui a inhuam thu lo hrilhin, a tam lamah harsatna a awm a rin loh thu a lo hrilh a ni.


Fisheries infuihthar


Aizawl : Fisheries Department chuan January 18 khan Fisheries Minister Lalthansanga hovin Directorate of Fisheries Conference Hall-ah infuihtharna hun an hmang.

   Fisheries Minister Lalthansanga chuan Sawrkar chu mipui awlsamna leh that tlan zawkna tura ding a nih thu a sawi a. Fisheries Department hnuaia thawktute chu dikna, rinawmna leh inpekna nena thahnemngai taka hna thawk theuh turin a chah a, ram damlo tidamtu ni ngei turin a sawm nghal bawk a. Kumina Department hmalakna tur hrang hrangte leh ngaih pawimawh tulte a sawi lang bawk.


Union Health Minister hmu


Aizawl : Health Minister Lalrinpuii chuan Dt 17.1.24 khan Union Health Minister Mansukh Mandavya hmuin inkawmhona hun ?ha tak an nei.

   Health Minister hian ZMC-in hma a sawn zel dan turte thlenin, Central sawrkar chu theihtawpchhuahpui turin a ngen a. Sawrkar tana a hautak lutuk dawn chuan Central sawrkar kuta hlan mai tha ni-a an hriat thu a thlen bawk. Union Health minister chuan Mizoram sawrkar chutha taka thawhpuia theihtawpa tanpui a inhuam thu sawiin, state sorkarin an kalpui chhunzawm theih nan a bik taka puihna 'special package' pek an nih tur thuin a chhang a ni.


CM-in IFAD Country Director inkawm


Aizawl : January 17, 2024 khan Chief Minister Pu Lalduhoma chuan a office ah Ulac Demiraq, Country Director, India, International Fund for Agriculture Development (IFAD) a kawm.

   Chief Minister hian IFAD kaltlanga hnathawhte a lo hmuh hlawm tawh thu a hrilh a. Covid hripui avanga an beisei anga hna an thawh theih loh dan te, inthlanpui avanga an sum leh pai che vel a muan thute a hriatpui tih a hrilh a ni. FOCUS hmalakna hian district paruk chauh a huam avangin district zawng zawng huapa hmalak zui zel tha a tih thu pawh a sawi a ni. Chief Minister hian, loneitute hmasawn zelna an ngaihpawimawh thu te, thlai thar thlan bik leina tur an ruahman thute hrilhin, heng thlai bika tharchhuah te pawh kum khat hnuah chuan nasa taka a pun chhoh a rin thu a lo hrilh a ni.


Sairang Primary School tlawh thut


Aizawl : January 16, 2024 khan School Education Minister Dr. Vanlalthlana chuan 'surprise visit' neiin Govt. Primary School-I, Sairang a tlawh a, zirtirtute nen inkawmhona neiin school zirtirtuten an harsatna hrang hrangte Minister hnenah an thlen a ni.

   Education Minister Dr. Vanlalthlana chuan hnathawhna hi rawngbawlna kawng khat a nih angin thahnemngai lehzual zel turin zirtirtute a fuih a. Zirtirtu tho a nih angin zirtirtu hna chu mahni tana hlawkna awmah ngaih loh pawhin, naupangin an hlawkpui a, an seilen zelnaah an hre reng thin a, chu chuan ram leh hnam tan pawh rah ?ha a chhuah ?hin a ni a ti.


MLA thar ten New Delhi-ah training nei


Aizawl : Mizoram atanga Member of Legislative Assembly (MLA) tling tharte tan January 16 khan Parliamentary Research and Training Institute for Democracies (PRIDE) buatsaihin Parliament Building, New Delhi-ah 'Orientation for Newly Elected Members of Mizoram Legislative Assembly' tih thupui hmangin training neih tan a ni a. He hunah hian Mizoram MLA 23 te an tel a ni.

   Training hawnna hun hmanah Mizoram Legislative Assembly Speaker Lalbiakzama chuan thu sawiin, Mizoram sawrkar chuan mipui nena kalrual leh sawrkar meng kar nih a tum thu a sawi a. Mizoram chuan chhuan tur nei lo mah se, state ralmuang ber a nihna te, harsatna leh buaina avanga thenawm ram Myanmar leh Bangladesh bakah state thenawm Manipur atanga sahimna zawnga pantute duat taka tuamhlawm an ni chu thil chhinchhiah tlak tak a ni, a ti.


Laboratory leina tur sum approve


Aizawl : Chief Minister Lalduhoma chuan a office-ah Dr. Lalnuntluangi Hmar, Dean, College of Veterinary Science & Animal Husbandry, Central Agriculture University leh a thawhpuite chu January 15 khan a kawm a. An college Campus-a thlai eitur thianghlim leh thianghlim loh endikna, Pesticides Residue Anaysis Laboratory leina tur sum an dil chu RKVY atanga pek tura approve a nih tawh thu a hrilh.

   NE India huama a hmasa ber tur nia an sawi he Laboratory hi Mizoram tan mai ni lo, hmarchhak state te tana tangkai tak tur a nih avangin sawrkarin a ngai pawimawh a ni, tiin Chief Minister hian Dean leh a thawhpuite hi a lo hrilh a. An fund dil chu RKVY atanga pek tura pawm (approve) fel tawh a ni, a ti.

India leh Myanmar Border Fencing
India leh Myanmar ramri hung tum chungchang hi eng nge i ngaihdan?
Hung hi tha ka ti lo
Hung se ka ti
Ngaihdan ka nei lo

Latest News & Chhiar Hlawh