DOWNLOAD OUR APP

Read latest news on your phone
app-store

The Week that Was on January 22, 2023

Jan 21, 2023

Hun i nei lo maw! Kar hmasa chhunga Mizoram tana thil pawimawh leh chhinchhiahtlak thleng te, tawi, mahse, funkim siin chhiar tura dah a ni. Hun reilotea kar hmasa lama thil thleng te chhiar zawh mai theih turin chhawp chhuah a ni e.

2nd IR Battalion Din Champha vawi 22-na lawm

January 16, 2023 khan 2nd IR Battalion, Khawzawl chuan an Battalion din champha phak vawi 22-na chu Battalion Headquarters, Khawzawlah an lawm.
    2nd IR Bn hi Dt.15.1.2001 khan din niin Commandant hmasa ber chu LT Hrangchal, MPS niin tunah hian Ruatsanga Ralte, MPS chuan Commandant nihna chelh mek a ni.
    2nd IR Battalion hi 2006-2008 khan Chhatisgarh-ah Naxalite hel te bei turin tirhchhuah an ni a, an zinga mi 10 te chu ral kut tuarin an martar a ni.

Minister hovin Inhlan thar

Information & Public Relations Minister Lalruatkima chuan I&PR Department-a thawk te Kum thar 2023 atana Inhlan Tharna Hun, January 16, 2023 khan I&PR Auditorium-ah a hmanpui. Inhlan Tharna Hun hi I&PR Director  C.Lalnunkima chuan a kaihruai a, Joint Director F.Lalfakzuala chuan Bible Chhiarna leh Tawngtaina hun a hmang a ni.
    Minister Lalruatkima chuan kum 2020 March atangin Covid in min nuai a, kan hriat theuh angin I&PR Department chu a hma zawng aiin kan buai zawk tih turin hun kan hmang a, disaster kan tawn lai pawhin mipui kawng kawhhmuh leh thudik tak hrilhhriat hna tha taka Department in a thawh avangin lawmthu a sawi a. Thu dik tawk lo social media-ah a darh chak em em laiin, sawrkar thuthar thehdarhnaah hmasawnin, twitter, instagram leh a dangah te thahnem ngai takin mipui rawng an bawl a, mipui chi ai taka an awm lai pawhin I&PR Department in thu chhuah a neih loh chuan mipui ten a dik tawk lo a niang e tiin thuthlukna fel tak an siam mai a ni, a ti.

International Year of Millet, 2023 lawmna bul tan

January 16, 2023 khan Mizoram Sawrkar Agriculture Department buatsaihin Aijal Club-ah State level Flag-off Programme on Celebration of International Year of Millet, 2023 neih a ni a. Agriculture Minister C.Lalrinsanga chuan khuallian niin a hmanpui.
    C Lalrinsanga chuan Sawrkar Laipuiin buhtun (millet) thatzia leh tangkaizia hriaain UNO lamah rawtna a thlen angin kumin 2023 hi International Year of Millet ah puan a ni, a ti a. Millet-ah hian mihring taksa tana chaw tha tam tak, mihring hriselna atana pawimawh chi hrang hrang a inphum a, natna do theihna kawngah pawh nasa takin a pui thei, tih sawiin heng a thatna tam tak piah lamah ram economy nghawng pha hial khawpa sum lakluhna pawimawh a ni, a ti.

State Level Committee on Standardisation vawi khatna

State Level Committee on Standardisation (SLCS) chu a vawikhatnan January 17, 2023 khan an Chairman Dr Renu Sharma, Chief Secretary hovin an thukhawm a, he hunah hian Commerce & Industries Principal Secretary Esther Lalruatkimi, FCS&CA Secretary Ramdinliani te bakah Bureau of Indian Standards hotute an tel a, Legal Metrology, PHE, PWD, P&E, MPCB, ITI, NEIDA, MCC, MCU leh Mizoram Industries Association aiawhte an tel a ni.
    Dr Renu Sharma chuan Bureau of Indian Standards (BIS) chu mipuiten kawng hrang hranga service an dawnah a tha leh rintlak, an tana him bawk si an dawn theihna tura hmalatu pawimawh tak an ni tih sawiin quality control atana BIS-in inkaihruaina leh zawm tura duante chu mipuite pawhin an  tana tha tur a ni tih an hriat a, an zawm a pawimawh rualin Mizoram sawrkar pawhin a ngaih pawimawh a ngai a, product tha leh rintlak bakah mipuite himna  ngaihtuah ve a tul a, sawrkar hnuaia bungrua leh hmanraw supply chungchangah pawh a theih chin chinah BIS inkaihruaina zawm a tul a ni a ti.

Chief Minister leh AR Commander

Chief Minister Zoramthanga chu a chenna bungalow ah 23 Sector Assam Rifles Commander thar Brigadier Girish Upadhyay SM, VSM chuan 18.01.2023 khan a hmu a. Assam Rifles te an hmun thar Zokhawsanga a hma thei ang bera insawn tura a duh thu leh hemi atana hma la tura a duh thu Chief Minister hian a lo hrilh a ni.
    Brig. Girish Upadhyay chuan Mizorama awm thar a nih angin Mizo mipuite nen inlaichinna tha tak neihpui a duh thu a sawi a. Assam Rifles chu Home Ministry thu angin insawn tur tho an nih thu te, a rang thei ang ber a insawn fel theih nan leh, tuna an hmun chhuahsan tura Laldenga Centre leh project dang te a hma thei ang bera hmalak a nih theih nan amah pawhin theihtawp a lo chhuah tur thu a sawi a. Chief Minister in a tih theih chinah theihtawp a chhuah angin amah pawhin an hotute bulah theihtawpa a nawr tur thu a hrilh a ni. Chief Minister pawhin thawhhona tha tak an neih ho zel a beisei thu a hrilh bawk.

National Girl Child Day, 2023 lawmna bul tan

Kar khat awh tur National Girl Child Day, 2023 lawmna chu 18.01.2023 khan Social Welfare Minister Er.Lalrinawma’n a pisaah a hawng a, district hrang hrangah pawh hemi pual hun hi hman a ni.
    He ni hawnna puala programme buatsaihah Er.Lalrinawma chuan hmeichhe naupang te himna leh dikna chanvo humhalh a tul zia inzirtirna atana kar khat chhung hun bik hman turah hian thinlung taka hmang theuh turin kalkhawm te a sawm a. Hmeichhe naupang te pual ni pawimawh takah hian an tana khawvel chhenfakawm, ralmuang, thlamuang leh him siam a tul tak zet tih Minister chuan a sawi. 
    Programme ah hian Social Welfare Minister Er.Lalrinawma kaihhruaiin National Girl Child Day pualin kalkhawmten intiamkamna (pledge) an sawi rual a ni.

Hmeichhe khawmpui lian hmanna tur tlawh

January 18, 2023 khan School Education Minister Lalchhandama Ralte chuan Zoram Kohhran Hmeichhe Inkhawmpui Lian 2023 neihna tur Darlawn a tlawh a, khawchhung kawngpui cheithat dan tur a en kual a, Pandal sak hna thawh mekah a hnatlang nghal bawk.
    Minister chuan Darlawn Venghlun VC house-ah Inkhawmpui Lian Organising Committee te chu inkhawmpui atana inbuatsaihna a sawipui nghal a. Department thenkhat PWD, PHE, P&E hotute Darlawn khaw mamawh an phuhruk dan tur a sawipui

Sub-Committee on Conference, Programme & Event Management in G20 meeting

Sub-Committee on Conference, Programme & Event Management chuan January 18 khan March ni 2, 2023-a Aizawl-a G20 business meeting awm tur programme an duan leh ruahmanna an siam te thlirho Chairman Esther Lal Ruatkimi, Principal Secretary, Commerce & Industries hovin an thlirho.
    Lal Ruatkimi chuan G20 meeting tur hi Mizoram tan inpholanna hun remchang leh tha tak mai a nih theih thu sawiin Mizoramin an hlawkpui theih dan hi ngaihtuah tel a ngai a, chumi atan chuan sumdawnna hawi zawnga a theihna hi a taka kan pholan thiam a ngai, chutiang zawng chuan a meeting pui ber pawh hi duan chin a ni, a ti. Sawrkar leh mipui ang pawhin theihna zawn theuha theihtawp chhuah a tul niin a sawi bawk.

PM lehkhabu ziah"Exam Warriors"Governor-in tlangzarh

Governor Hari Babu Kambhampati chuan January 19, 2023 khan Durbar Hall, Raj Bhavan-ah "Exam Warriors" tih lehkhabu Prime Minister Narendra Modi in rilru engthawl taka zirlai ten Exam an hmachhawn theihna tura a ziah chu a tlangzarh.
    Governor Hari Babu Kambhampati chuan "Exam Warriors" tih lehkhabu chu zirlaite tan leh nu leh pate tana chhiar ngei chi lehkhabu tangkai bik a ni tih a sawi a. Exam Warriors chu Prime Minister in zirna a ngaih pawimawhzia tilangtu mai a ni lo a; exam hmachhawn tur zirlai tam tak te mangang leh rilru hah thin chu a vei em em a kawng dik kawh hmuh tumin a thusawina hmun tam takah hemi chungchang hi a sawi thin a ni a ti.
    He lehkhabuah hian Exam chu rilru hah leh huphurh ang zawnga hmachhawn tur a ni lo tiin zirlaite leh nu leh pate chu a kawh hmuh a. Exam chu phur takin kutpui hmang tur anga inbuatsaih a hmachhawn zawk tur a ni a. Kumtluana thawhrimna te hlawk taka seng tura rilru pu turin a fuih a ni a ti.

Aizawl DC Pisa chungchang sawiho

Chief Minister Zoramthanga hovin Ningani khan Aizawl District Deputy Commissioner Office sak that dan tur chungchang sawiin CM Cabinet Meeting Room-ah meeting neih a ni.
    December ni 17, 2021-a kangmei chhuak avangin DC Office (Pisapui), heritage building a puan ni bawk chu a chhe hneh hle a. Helai hmun sak that dan tur rawtna hrang hrang awmte chu thlirhovin, nakin hun thlir chungin, INTACH lamin rawtna an lo thlen leh mamawh dan te ngaihtuah chungin hmalak dan tur te sawiho a ni a. Cabinet meeting in a lo ngaihtuahzawm turin thu tihtluk a ni.

Share now