Cheng Vbc. 4 man hu heroin man

Aizawl: Champhai Police te chuan, Champhai district a Hnahlan- khuaa January 21, 2026 khan Assam Rifles duty te atanga an thudawn bawhzuiin, Hnahlan khaw daiah heroin hawng 187, Kg. 2.288 a rit International Market hralhnaa chhut a Rs. Vbc. 4 hu an man.

  Ruihhlo hi a tirah a neitu emaw a kengtute hmuh leh hriat a ni lova, heroin an hmuhna hmuna mobile phone an chhar hmangin hnuchhui hna an thawk nghal a, phone an endik mek lai hian Bolero pakhat chu heroin an hmuhna hmunah hian chak takin a rawn tlan a, Police te chuan Bolero khalhtu chu phone a thlalak lang nen a inang tih an hre hman a, um zui nghal niin km 3 vel an um hnuah um phain, motor a chuang mi pahnih - Mohammed Morsur Barbhuirya (36), Hailakandi, Assam leh Umedh Raja Laskar (27), Silchar, Assam te chu an man nghal.

Central YMA Ruihhlo Do pawl, CADS la lut

Aizawl: 20.01.2026 (Thawhlehni) khan Central YMA hnuaia Ruihhlo Do tura din Central Anti Drug Squad (CADS) Batch thar lawmluhna hun Central YMA Hall ah hman a ni.

  He hun hi CYMA Vice President Prof.Lalnuntluanga'n a kaihruai a, President R. Lalngheta chuan CADS lawmluh pah a thusawiin, Ruihhlo in ram a run mek a, hemi Do tur hian theihtawp chhuah a tul tak zet a. Ruihhlo kan dona kawngah hian fimkhur taka kal tur leh hmalak zelna kawngah pawh in finchhuah tawn zel turin a sawm a ni. 

  CADS din tharah hian member 24 awm in Convener chu Central YMA Treasurer Er. H. Duhkima a ni. CADS Term hi thla thum a ni ang a, an term zawh hunah Batch dang inruat leh a ni ang.

Two wheeler ruk hmang Assam mi pali an man

Aizawl: Mizoram Police te chuan January ni 19 khan two wheeler ruk hmang Assam mi pali an man.

  Two wheeler ruk kaihhnawih case January ni 18 a Bawngkawn PS a ziahluh kaihhnawih-ah nimin January ni 19 khan two wheeler ruk hmang nia puh Assam mi pali Karimganj leh Patharkandi, Assam mi te an man a, heng mite hi Zakaria Ahmed (19) s/o Abdul Salam, Saidur, Karimganj tuna Leitan a cheng nia insawi te, Noor Ahmed (19) s/o Anwar Hussain, Patharkandi tuna Durtlang a cheng nia insawi te, Babul Hussain (19) s/o Moin Uddin Patharkandi, tuna Leitan a khawsa nia insawi leh Junil Hussain (19) s/o Aftam Hussain, Karimganj tuna Leitan Ramthar a cheng nia insawite an ni.

  Zuangtuia an two wheeler ruk man a nih hian two wheeler dang pahnih Yamaha R15 V4 (B/R No MZ0-01W-7907) leh Scooty Yamaha Ray ZR (B/R MZ 01 AD 0258) te ruk ngei nia rinhlelh te chu an hmu a, a neitute atangin heng two wheeler pahnihte pawh hi ni 18.1.2026 zana rukbo an ni tih hriat chhuah a ni a, a neitu ten FIR an submit atangin case pahnih ziahluh a ni bawk.

  Heng Assam mite thu zawhfiahna kal zelah November 2025 leh January 2026 a two wheeler ruk case pathum a an inhnamhnawihna hriat chhuah a ni ta zel a, pahnih chu Yamaha R15 V3, Yamaha R15 M leh Yamaha R15 V4 rukbo case a ni. Heng miten an sawi danin twowheeler rukbo 3 te chu Silchar, Assam ah an hralh a ni.

Mizoram Police Raising Day vawi 54-na lawm

Aizawl : Mizoram Police Raising Day vawi 54-na chu January 21, 2026 khan GS Arya Mess, Police Headquarters, Aizawl-ah lawm a ni a. He ni hi Mizoram Police ten ram leh mizo mipuite tana an inpekna te, an hun leh nite thahnemngai taka ram tana an hlannate hriat rengna atan hman thin a ni a, Mizoram Police zinga hnathawk tha leh chawimawi phute chawimawina leh lawmman hlanna hun hman nghal a ni bawk.

  Vawiina lawmman sem takte leh chawimawina hrang hrang leh a dawngtute chu hengte hi an ni:

1. DGP’s Cash Reward for Bravery: Lalremsanga, Driver Grade – II leh Constable T. Lalhruaitluanga, Saitual DEF..

2. Kendriya Grihmantri Dakshata Padak 2025: He chawimawina hi India ram pum huap niin Ministry of Home Affairs-in Police hnathawk tha, chawimawi phu a tihte hnenah hlan thin a ni a. Intelligence Category leh Investigation Category-ahte then a ni.

  Intelligence Category-a chawimawina dawngtute - Inspector Lalchhuanmawia, CID (SB) leh Head Constable C. Lalfakzuala, CID (SB). 

  Investigation Category-a chawimawina dawngtu - Sub-Inspector Samuel Lalramenkima, Mamit DEF

3. Gallant Warriors Award 2024-2025: Sub-Inspector J. Lalnghinglova, 1st Battalion, MAP, leh Constable C/627 Lalkhawngaiha, 1st Battalion, MAP.

4. DGP's Commendation Disc & Certificate 2025: Victor Zothansanga, MPS, ASP, Champhai DEF leh Alan Hmangaihsanga, MPS, DSP (Hqrs.), Champhai DEF

5. Best Police Station of Mizoram 2025 – Vaivakawn Police Station.

Chief Minister-in MULCO leh NDDB inremna ziah telpui

Aizawl : January 22, 2026 khan Chief Minister Conference Hall-ah Chief Minister Lalduhoma leh Cooperation Minister PC Vanlalruata te hmaah Mizoram Milk Producers Cooperation Union Limited (MULCO) leh National Dairy Development Board (NDDB) te chuan Mizorama bawnghnute tharchhuah leh sawngbawlna lam tihhmasawnna tur thawhhona thuthlung (Memorandum of Understanding) an ziak.

  Thawhhona tura inremna hi Mizoram sawrkar aiawhin Udit Rai Prakash, IAS in a ziak a, National Dairy Development Board aiawhin S. Rajeev, Executive Director, NDDB in a ziak a, Mizoram Milk Producers Cooperation Union Limited (MULCO) aiawhin Lalhmunliani, Managing Director chuan a ziak a ni.

  National Dairy Development Board hian Ministry of Cooperation Flagship Scheme White Revolution 2.0 dung zuiin Mizoram state tan Comprehensive Dairy Development Plan a siam ang a, chumi ti hlawhtling tura Mizoram Milk Producers Cooperation Union Ltd te hmalakna tur a duang ang a, technical lam leh thil tul tinrengah NDDB hian a thawhpui dawn a ni.

Guwahati-ah AIHM 2026 leh Mizoram Tourism chungchang Press Conference nei

Aizawl: Sports & Youth Services leh Tourism Minister Lalnghinglova Hmar chuan January 21 khan Mizoram House, Guwahati-ah Aizawl International Half Marathon (AIHM) 2026 leh Mizoram Tourism chungchang Press Conference a nei.

  Minister chuan AIHM 2026 chu February ni 14 ah neih tur a nih thu leh, mi ?hahnem tak tel tura beisei a nih thu a puang a. Tun hnaiah Mizoram tlawhtu khualzin an pung nasa tih sawiin, kum 2025 ah state pawn mi 8,41,322 in Mizoram tlawhin, hei hi 2024 a tlawhtu aiin 96.9% in a tam tih a tarlang. Press Conference-ah hian Assam leh national media te an kal tha hle.

  Tourism Minister ni bawk Pu Lalnghinglova Hmar chuan Aizawl chu India ram krismas khawpui, ‘Christmas capital of India’ ah chantir an duh thu a sawi a, December 26-a ‘Krismas Ruaitheh’ chu India ram hmun danga awm ve lo, Aizawl leh Mizoram krismas lawm dan tihlutu leh chhim tichakawmtu a ni, a ti. December 31-ah Sakawrhmuituai tlang mawi tak atangin music nen a huhova kumhlui thlahho thin a nih thu a tarlang bawk.

SNA Sparsh sawihona CM hovin nei

Aizawl : Chief Minister Lalduhoma, Finance Minister ni bawk hovin January 20 khan CM Conference Hall-ah SNA Sparsh chungchang sawihona meeting department thlanbikte nen an nei a. EF&CC Minister Lalthansanga, RD Minister Prof Lalnilawma, leh Adviser to CM TBC Lalvenchhunga bakah official pawimawhte an tel.

  Sawrkar laipui hnuaia hnathawh Single Nodal Agency System for Public Account Routing System for Harmonised transfers (SNA SPARSH) hmanga funding kal dan thar sawifiah a ni a. Sawrkar laipui lama schemes kalpui mek hrang hrang 66 zingah Mizorama kalpui theih (relevant) scheme 40 an awm a. Chung zinga scheme 34 teah SNA SPARSH hi fel taka chettir mek an ni.

  Mizoram hi SNA SPARSH kaltlanga sum che vel zawng zawng atanga chhut ah North-East state zingah a che tha ber a ni a. India ramah a ti tha ber sawm zingah a awm mek bawk. Chutih rual chuan hmabak tlema zawng la awm hi, hun tiam chhunga tha taka kalpui a nih chuan hmalak that lawmman (incentives) SASCI atangin Rs. 350 Crore a hmuh theih a. Meeting hian he hnathawh that lawmman dawng thei tura hmalak dan tur a rel a ni.

Lalrinpuii’n Christ University, Bangalore ah International Conference hmanpui

Aizawl: Christ University buatsaih - Libernum 2026 - International Conference on Northeast India at the Crossroad:Inclusion, culture and a sustainable future" neih chu Health Minister Lalrinpuii chuan January 20 khan Khuallian (Chief Guest) niin a hmanpui a.   

  He hunah hian India ram chhung leh khawvel hmun hrang hrang atanga University professor thahnem tak leh mithiam rualte an tel a ni.

  Minister chuan ?halaite hnenah North East chu 'Landlocked' ti a sawi tawh lova, 'Land-linked' tia sawi tawh turin a chah. Agartala-Akhaura rail kawng te, Kaladan Multi-Modal Transit leh Asian Highway te avangin kawng engkimah kalpawhna a tha tawh hle a ni a ti a.

  North East chu India ram boruak thianghlim petu a nih avangin, hmasawnna kan kalpui dan pawh a danglam a ngai a. Eco-tourism te, Carbon credits te leh energy thianghlim hmanga hma lakna chu North East innghahna tur a nih thu a sawi bawk.

24 Megawatt Tuirini Small Hydro Electricity Power Plant lungphum 

Aizawl : Chief Minister Lalduhoma chuan January 19, 2026 khan 24 Megawatt Tuirini Small Hydro Electricity Power Plant dinna tur lungphum Tuirini kamah a phum.

  Home Minister K. Sapdanga chu khualzahawm niin P&E Minister F. Rodingliana chuan lungphum inkhawm a kaihruai a, &PR Minister B. Lalchhanzova leh Lt. Col. Clement Lalhmingthana, MLA te chuan Chief Minister hi an tawiawm a ni.

  He power plant hi Externally Aided Project sum hmanga cheng 676.98 crore senga thawh tur niin New Development Bank, Sanghai atanga loan Rs. 676.98 Crore hmanga thawh tur a ni.

  Hna hi kum 5 chhunga zawh tura duan a ni a, power house-ah hian Megawatt 12 pe chhuak thei khawl pahnih, an pahnih belhkhawm 24 Mw tling tur bun a ni ang.

Reading Decathlon-a tel School pahnih chetha

Aizawl : Mizoram Youth Commission (MYC) kaltlanga India rampum Lehkhabu Chhiar inelna (Reading Decathlon) a tel School pahnih - Mt Carmel, Chaltlang leh La Montessori, Mission Veng chu 2-na leh 3-na dinhmun an hauh a ni. 

  He inelna hi Food4Thought Organisation leh Monocept te tangkawpin an buatsaih a ni a, inelna hi quiz round hrang hranga neih a ni. Inelna hi level thum ah kalpui a ni a, State level, Regional level leh National level a kalpui a ni.

  National level ah hian School 10 an qualify a January 17, 2026 (Inrinni) ah Hyderabad ah neih a ni. Zing dar 8 atanga neih tan niin tlai 5:30 ah zawhfel a ni. He inelna ah hian avaiin lehkhabu 100 chuang hret hmanga inel a ni a, Mizoram aiawih School Mt Carmel atanga tel pahnih- Krista Roluahpuia Khiangte Class IX zirlai leh Rebek Malsawmzuali Class VIII zirlai te chu pahnihna (2nd place) dinhmun an hauh a, La Montessori atanga tel pahnih - Malsawmhlui Pachuau Class VIII zirlai leh Joshua Lalawmpuia Class VIII zirlai te chuan pathumna (3rd place) dinhmun an hauh bawk a ni.

Science & Mathematics-a ti tha lawmman sem

Aizawl: State Council of Educational Research and Training (SCERT), Science Promotion Wing buatsaihin January 22 khan MBSE hnuaia HSLC leh HSSLC examination-a Science leh Mathematics Subject-a zirlai titha lawmman semna ‘48th Incentive Cash Award for Proficiency in Science & Mathematics, 2024 – 2025’ chu Vanapa Hall-ah neih a ni a. He hun hi Education Minister Dr. Vanlalthlana chuan Khuallian niin a hmanpui.

  48th Incentive Cash Award for Proficiency in Science & Mathematics 2024 – 2025 hmanna hi thawhhniha then niin, a thawhkhatna ah hian zirlaite’n hlawk zawha Mathematics & Science hriatthiam an neih theih nan hun hman a ni a. 

  Thawhhnihnaah hian F. Lalliansanga, Deputy Director(SPW), SCERT atangin Technical Report ngaihthlak a ni a, lawmman semna hun hman a ni bawk.

  48th Incentive Cash Award for Proficiency in Science & Mathematics, 2024 - 2025 a lawmman dawng thei te chu HSSLC leh HSLC Mizoram Board of School Education-in a buatsaih Examination Result Top 3 –te a an ni a. HSLC-ah Science Subject-ah zirlai 25 leh Mathematics Subject-ah zirlai 15 te’n lawmman an la a. HSSLC ah Mathematics Subject-ah zirlai 3, Physics Subject-ah zirlai 7, Chemistry Subject-ah zirlai 4 leh Biology Subject-ah zirlai 5, zirlai 59 ten lawmman hi an la a ni.

One Day Review Meeting

Aizawl: UD&PA Minister K. Sapdanga chuan January 22 khan a Department chan Urban Development & Poverty Alleviation Department hnathawh dan hrang hrang thlirletna hun, One Day Review Meeting a neihpui.

  Review Meeting-ah hian UD&PA Department enkawl office hrang hrang - Directorate of UD&PA, Aizawl Smart City Limited (ASCL), Aizawl Municipal Corporation (AMC) leh Lunglei Municipal Council (LMC)-a hnathawh dan leh hnathawh kal mek awmte enho a ni a. Hnathawh mek leh hmabak thawh dan tur te, hnathawh mek laia harsatna awm leh a tha lai awm te thlirho a ni.

Art & Culture Minister-in Mizo Chiefs’ Council Souvenir tlangzarh

Aizawl : Art & Culture Department Minister C. Lalsawivunga chuan I&PR Auditorium, Treasury Square-ah Mizo Lal leh an tu leh fate inzawmkhawmna pawl (Mizo Chiefs’ Council) buatsaih Mizo Chiefs’ Council Souvenir 1946-2025 tlangzarhna hunJanuary 22, 2026 khan khuallian niin a hmanpui a; Souvenir hi a tlangzarh nghal a ni.

  Mizo Chiefs’ Council hi Mizote’n lal kan neih thin lai hun, 1946 khan Mizo lalte’n, anmahni leh an thlah kal zelte insuihkhawm nan leh an hmakhua an sut ho nana an din a ni a. Aizawl-ah headquarter neiin, district khawpui 8-ahte Sub-hqrs an nei bawk a ni.

  Tlangzarh inkhawm hi Mizo Chief Council President Rev Mangchhuana Sailo-in kaihruaiin, Er Lalnunmawia Sailo, Souvenir Editor-in ‘Souvenir Report’ a pe a. S. Lianlula, Vice President-in Mizo Chiefs’ Council chanchin tlangpui a tarlang a. Lalzarliana Sailo, Treasurer, MCC chuan lawmthu sawiin inkhawm hi a khar a ni.