PUMP-in Cheng nuai thum hlan

Aizawl : January 22, 2025 khan chhawmdawl ngaite chhawmdawl tura pawl din People United in Music with a Purpose (PUMP) chuan Mizoram State Cancer Institute tan cheng nuai thum chuang a hlan.

   PUMP hian puih ngaite puihna sumtuakna atan charity concert a nei thin a. 2024 December khan Mizoram State Cancer Institute tan hian charity concert tum thum neiin, heta an sum hmuh zawng zawng Rs 3,10,300 hi January 21 (Thawhlehni khan) MSCI hotute hnenah PUMP hruaitute hian an hlan a ni.

   Cancer Hospital Poor Fund atan hian PUMP chuan January 2020 khan sum tuak sakin Rs. 4,58,502 a lo hlan tawh bawk.

MPF hruaitute charge inhlan

Aizawl : January ni 21, 2025 khan Mizoram People Forum General Headquarters, Governing Board chuan Synod Committee Room 1-ah President charge inhlanna an nei a, VC leh LC inthlan tur an thlir lawk bawk.

   President kalchhuak Rev. R Vanlalnghaka chuan President thlan thar Rev. R.C. Lalnghakliana hnenah charge a hlan a. MPF Khawmpuiin MPF Dan Pui a lo tih danglam tawh angin Governing Board Committee chuan meeting hmasa lamah Rev. R.C Lalnghakliana chu lungrual takin a lo thlang tawh a ni.

   Governing board thukhawm chuan inthlan thuchah print leh electronic media lamah tihchhuah a rel bawk.

Lza Varte Thirsakawr Museum-ah dah

Aizawl : Vanlallawmzuala Varte (Lza Varte)-in 'Righ to Clean Air' tih thupuia neia India ram state tin tlawh chhuahna atana a hman thirsakawr chu 23.1.25 khan Mizoram State Museum a dah a ni.

   Lza Varte-in India ram tlawh chhuahna atana a hman thirsakawr hi 23.1.25 khan Mizoram State Museum thawktuten Museum a dah turin an la fel a, January 24, 2025 khan official a inhlanna programme hman a ni.

   Vanlallawmzuala Varte hian thirsakawr hmangin January 25, 2024 khan Aizawl a chhuahsan a, state tin (28) leh union territory panga tlawhin, thirsakawrin km. 17,028.10 a tlan. A thang chhung hi ni 286 a ni a, thirsakawra a tlan ni bik chu ni 204 a ni.

Apex Bank Board of Directors Meeting neih a ni

Aizawl : Mizoram Cooperative Apex Bank, Board of Directors Meeting chu January 21, 2025 khan Board Meeting Room, Head Office, Tuikual South-ah neih a ni.

   Meeting hi Lalnunsanga, Chairman chuan kaihruaiin, Registrar of Cooperative Societies John LT Sanga, MCS, chuan a telpui bawk a ni.

   Tun dinhmunah Apex Bank hian Deposit cheng Vaibelchhia 1557 a dawn atangin Loan cheng Vaibelchhia 1198 a pe chhuak a. Deposit dawn atanga Loan pekchhuah tehfung (CD Ratio) hi 77% a ni.

Sawrkar hnathawkte chawlh atan puang

Aizawl : Mizoram sawrkar chuan 12th February, 2025 (Nilaini) chu Aizawl Municipality leh Lunglei Municipality huam chhunga inthlan hruaihawt a nih angin January 23, 2025 khan Central/State Public Undertakings, Educational Institutions leh Banking Institution hnuaia thawktute telin Pisa chawlh atan a puang a. Hei hi Local Council inthlanpui lo awm turah tluang taka vote thlak theihna atana ruahmanna a ni.

Vice President leh Sawrkar laipuia Minister pawimawhte a hmu

Aizawl : New Delhi-a cham mek Mizoram Governor Gen (Dr) VK Singh, PVSM, AVSM, YSM (Retd) chuan January 22, 2025 khan Vice President Jagdeep Dhankhar chu Vice President's Enclave-ah hmuin a kawm a. A ni bakah hian Sawrkar laipuia Minister pawimawh tak takte hmuin Mizoram hmasawn nana tul leh pawimawh hrang hrangte a sawipui a ni.

   Mizoram Governor hian Vice President bakah hian Sawrkar laipuia Home Minister Amit Shah, Road Transport & Highways Minister Nitin Gadkari, Communications & Development of North Eastern Region (DoNER) Minister Jyotiraditya Scindia, Power & Housing and Urban Affairs Minister Manohar Lal Khattar te a hmu bawk a ni.

Mizoram Governor-in President leh Prime Minister hmu

Aizawl : Mizoram Governor Gen (Dr) VK Singh, PVSM, AVSM, YSM (Retd) chuan Governor a nih hnua a tum khat nan January 21, 2025 khan New Delhi-ah President Droupadi Murmu, Prime Minister Narendra Modi leh Sawrkar laipuia mi pawimawh te hmuin Mizoram hmasawn nana tul leh pawimawh te a sawipui.

   Mizoram Governor hian President leh Prime Minister-te bakah hian Sawrkar laipuia Finance Minister Nirmala Sitharaman, Jal Shakti Minister CR Patil, Petroleum and Natural Gas Minister Hardeep Singh Puri, Environment, Forest and Climate Change Minister Bhupendra Yadav, Labour and Employment Minister Mansukh Mandaviya leh Health & Family Welfare Minister JP Nadda te a hmu bawk a ni.

8th Schedule-a Mizo tawng dah a tul chhan sawi

Aizawl : All India Presiding Officers' Conference 85-na, Patna, Bihar a neihah January 21, 2025 khan chhunzawm a ni a. Mizoram Legislative Assembly Speaker Lalbiakzama chuan Lok Sabha Speaker Om Birla, Rajya Sabha Deputy Chairman, Harivansh Narayan Singh India ram pum atanga Speaker leh Dy. Speaker-te hma ah thu a sawi.

   Speaker hian India Danpui 8th Schedule a Mizo tawng a chuan ve pawimawhna sawifiahin, a tel ve theihna tura thawhpui theuh turin Speaker leh ram hruaitu rual kalkhawmte chu a ngen a ni.

   All India Presiding Officers' Conference hi 20.01.2025 khan neih tan a tuk tlaiah a hmawr bawk a ni a.

BBBP scheme kum 10 tlinna lawm

Aizawl : Ramchhung hmun dangte ang bawkin Beti Bachao Beti Padhao (BBBP) scheme kum 10 tlinna leh National Girl Child Day 2025 chu tunkar chho khan Mizoram hmun hrang hrangah hman a ni.

   Aizawl ah pawh Dawrpui Multipurpose Centre ah Zirtawpni khan hman a ni. Chief Secretary Shri Khilli Ram Meena chu khuallian a ni. He hun hi State Hub for Empowerment of Women (SHEW), Directorate of Women & Child Development-in a buatsaih a ni.

   Beti Bachao Beti Padhao hi kum 2011 census ah India rama nau piang zingah mipa aia hmeichhia an tlem tak lutuk tih hmuhchhuah a nih avang leh hmeichhe fa duh lohna a nasat em avanga hmeichhe fate hum him nan leh thlamuang taka inthliarhranna tawklo a an nun chhoh theih nan Sorkar laipui chuan kum 2015 khan he scheme hi a kalpui tan a ni.