Boundary Committee thukhawm

Aizawl : January 25, 2024 khan Mizoram State Boundary Committee chu an Chairman K. Sapdanga, Home Minister hovin Directorate of Forensic Science Laboratory Conference Hall-ah a vawi 6-na atan an thukhawm.

   Thutkhawmah hian sawrkar hmasa hun tawp lama Mizoram sawrkar leh Assam sawrkar indawrna kal tluang lai, Mizoram inthlanpui neih dawn vanga chawlh lailawk chu tharthawh tura hmalak tha a ti a, hei bakah hian ramri chungchanga ngaihdan hrang hrang awmte sawiho niin hun remchang hmasa berah thutkhawm leh nise an ti a ni.

   Meeting-ah hian EF&CC Minister, Boundary Committee Vice-Chairman ni bawk Lalthansanga, Chief Secretary Dr Renu Sharma, DGP Anil Shukla bakah Boundary Committee Member zingah MNF, ZPM, MPCC, AAP, BJP, MZP, MSU, CYMA, MUP, MKHC, JAC on ILRFD aiawhte an tel a, ramri chungchanga mithiam sawm bikte leh Home Department official pawimawhte an tel a ni.

CM leh Officer hruaitute inkawm

Aizawl : Chief Minister chuan January 25, 2024 khan a Pisa-ah Mizoram Departmental Officers Association hruaitute a kawm.

   MDOA te hian Sawrkar hnathawk quarters indaih loh vanga harsatna awm thin an thlen chu Chief Minister chuan, thingtlangah zirtirtu quarters engemawzat sak tuma ruahmanna siam a nih thu a lo hrilh. Sawrkar sum leh pai dinhmun tlangpui pawh lo hrilhin, an dinhmun a that loh avangin hma an la zung zung thei loh bakah an sawi fo angin kum khat vel chu insawhngheh nan hun an mamawh tih a lo hrilh bawk.

Lengpui Airport chungchang sawi

Aizawl: CM Meeting Room-ah Chief Minister hovin January 25 khan Lengpui Airport Terminal building chei that mek hmalak zel dan tur relin an thukhawm.

   Meeting-ah hian Lengpui Airport Terminal building cheina hna kal mekah sawrkarin contractor hnenah tha taka pawisa a pekchhuah zel thu leh chutihlaia hna a kal chak tawk loh thu sawi a ni a. Hei vang hian hnathawh tur hmabak la awm te chak taka thawh a nih theih dan tur chipchiar an sawi a ni.

   He hunah hian Vanlalhlana, PWD Minister bakah K. Lalthawmmawia, Commissioner & Secretary to Chief Minister te, GAD leh PWD official pawimawhte an tel a ni.

National Girl Child Day 2024 hmang

Aizawl : Women & Child Development leh District Programme Office, Aizawl District tangkawp te buatsaih January Ni 19 atanga hman tan National Girl Child Day 2024 chu January 25 khan Taxation Auditorium-ah Pi Zoramthangi Chhangte, Director, Women & Child Development hovin hman a ni.

   He hunah hian hmeichhe naupang zirna lam leh inkhelh lama titha te chawimawina, BBBP Girl Child Achiever Award team 2 leh mimal-a chawimawna dawng te hnenah lawmman hi hlan a ni.

National Voters’ Day (NVD) - 2024

Aizawl : India ram hmun dangte rualin January 25 khan Mizoram hmun hrang hrangah ‘Nothing Like Voting, I Vote for Sure (Vote thlak tluk a awm lo, Vote thlak ngei ka tum e) tih thupui hmangin National Voters’ Day (NVD) - 2024' pual hun hman niin, NVD pual thutiam sawi rual a ni.

   National Voters’ Day pual hian Mizoram District hrang hranga Sawrkar Pisa, Zirna In leh State pawna Mizoram House-ah te hun hman niin, National Voters’ Day chungchang leh vote thlak pawimawhnate inhrilhhriat a ni a. He ni pual hian National Voters’ Day thutiam ‘Voter’s Pledge’ sawi rual a ni bawk.

Infiamna pawl te leh CM inkawm

Aizawl : January 24, 2024khan Chief Minister Lalduhoma chuan a Pisa-ah Mizoram State Sports Council, United Sports Association of Mizoram leh Mizoram Olympic Association hruaitute a kawm a. An mamawh a hnena an thlen.

   Chief Minister hian, Sports Minister fel tak an neih avangin harsatna te hi ani'n tha takin a bawhzui thei ang tih a hriat thu a lo hrilh. Amah kaltlanga engkim tih zel a duh thu leh Central Scheme hmanga infiamna hmunhma siam belh theih chi a awm chuan chak taka bawhzui an tum thu leh Sports Policy leh inrelbawlna dan tihdanglam deuh an duh te hi a tul ang zela hmalak theih a ni, a ti a. MSSC leh MOA hmunhma tur an dil pawh, hmun remchang lo melha a hnena thlen leh turin a chah a ni.

Meghalaya State Day lawmna hmanpui

Aizawl : Pathianni kalta khan Mizoram Legislative Assembly Speaker Lalbiakzama chuan Development Commissioner & Principal Secretary, Government of Meghalaya Sampath Kumar sawmna angin Dr. A.P.J Abdul Kalam Road, New Delhi-ah Meghalaya State Day lawmna a hmanpui.

   He hun tel te chuan Speaker hnenah hian Mizoram hnathawh that leh hmalakna te an lo hrilh a. Mizoram chu hmarchhak State-te inunau tawnna kawnga a pawimawh thu leh inlungrualna kawnga sulsutu a nih thute an sawiin, Mizoram chu Internally Displaced Persons-te chhawmdawl kawnga hna ropui tak thawktu ni a an hriat thu an sawi bawk.

   Speaker hi Minister pathum F. Rodingliana, B. Lalchhanzova leh Lalnghinglova Hmar te'n an tawiawm a ni.

Plastic Waste Management Centre tlawh

Aizawl : January 22, 2024: khan Chief Minister Lalduhoma chuan Luangmual Industrial Growth Centre-a AMC hnuaia Plastic Waste Management Centre sak mek a tlawh.

   Chief Minister hian, he waste management centre sak mek chinchang kimchang a hnena ziaka thlen turin thawktute hi a chah a. Plastic bawlhhlawhte kan ngah zel a, a chinralna lam mumal neih thuai kan mamawh avangin tha taka sak puitlin vat a tul thu a chah a ni.

Delhi Pastor bial hawng

Aizawl : Synod Inkhawmpui 2023-in a rêl angin Delhi Pastor Bial thar chu January 21, 2024 (Pathianni) ah hawn a ni a. Bial thar hawng tur hian Synod O.M.-in a ruat angin Rev. R. Vanlalnghaka, Synod Moderator leh amah tawiawmtu Rev. PC Pachhunga, Synod Finance Officer te an kal a ni.

   Delhi Pastor Bialah hian Delhi Kohhran, West Delhi Kohhran & Dehradun Kohhran te an awm a. North Delhi lamah zirlai rualte leh hnathawka awmte tan Inkhawmna hmun a awm bawk.

   Bial thar hawn Inkhawm banah hian Special Bial Inkhawmpui neih zui nghal a ni a. Inkhawm zawng zawngte pualin Bial thar hawn lawmna ruai theh zui nghal a ni.

Buhfai phur chesual-ah pakhat boral

Aizawl : January 23, 2024 tlai dar 5:00 vel khan Chamring khaw tan tirhah buhfai phur truck a che sual (accident) a, he truck a chuang Lalfamkima (24), Lengpui chu a thi.

   Famkima hi an chetsualnaah han truck hian a delh a, zanin dar 6:30 vel khan lakchhuah a ni a, postmortem turin ZMC-ah hruai a ni a, driver erawh hi chu ngaihtuahawm a ni lo a, Truck-in a delh In neitu Remthangi pawh hi ngaihtuahawm a ni lo.

Lungchhuan PES kangral

Aizawl : January 22, 2024 zan dar 8 bawr vel khan Presbyterian English School (PES) Lungchhuan chu bungraw engmah chuh hman lohin a kang.

   ZALEN thudawn danin, PES, Lungchhuan hi Kg 1 atanga class VIII thleng zirna niin, nizan a school kan chhan hi hriat mai theih a la ni lo a, VC huaihawtin khawtlang hnatlang an ko a, bungraw kang senghawi hna thawh a ni.

Youtuber pahnih pawisa chawitir

Aizawl : Deputy Conservation of Forest chuan January 22, 2024 khan thuchhuah siamin Wildlife (Protection) Act. 1972 (Nungchate huhalhna Dan) Section 9 bawhchhia a thang chi hrang hranga Savate leh Nungcha dang tam tak tihlimtu leh an chet dan video Youtube channel-a upload tu mi pahnih te chu sum chawitir an nih thu an tarlang.

   Heng sum an chawitir te hi Vanengmawia s/o Dotawna, Lungmawi, Hnahthial district leh PC Malsawmzuala s/o PC Ramsanga, South Vanlaiphai, Hnahthial district te chu EF&CC department hnathawktu ten manin heng mi pahnih te hi Wildlife (Protection) Act, 1972 hnuaiah pawisa chawi tira hrem an ni.

   Youtube Channel-a an thangkam dan leh nungcha chi hrang hrang an tihhlumna video pawh delete tir an ni a, an thangkamna hmanrua te pawh man san an ni bawk. Vanengmawia hi Rs. 5,000/- chawitir a ni a, PC Malsawmzuala hi an chhungkaw khawsak dinhmun enin Rs. 4,000/- chawitir a ni thung.