MLA pathum workshop-ah tel

Aizawl : January 23 - 24, 2023 chhunga neih National Workshop for State Legislators on State Finances, Constitution Club of India, Rafi Marg, New Delhi- ah MLA pathum te Dr. Vanlaltanpuia, Chairman, Mizoram Youth Commission, Er. H. Lalzirliana, Vice Chairman, Roads and Infrastructure Development Board, leh Dr. Vanlalthlana te an tel.
    He Workshop hi PRS Legislative Research te buatsaih niin, tun tumah hian India ram State hrang hrang te sum leh pai dinhmun dik tak zirchianna te, Covid 19 Pandemic in Indian Economy a nghawng dan kimchang leh he hun harsa atanga hmasawn tura India in than a tum dan leh chona hrang hrang a hmachhawn mek te, hriselna lama hmasawn ngaihna te, Budget documents zirchianna hun atan hman a ni. 

CM hovin Chapchar Kut Organising committee thukhawm

Aizawl: Chapchar Kut Organizing Committee chu 23.01.2023 khan an Chairman Chief Minister  Zoramthanga hovin kumin March ni 3 a Chapchar Kut lawm dan turin relin an thukhawm. 
    Kum hnih chhung hripui leng avanga Chapchar Kut hman dan thin pangngaia hman theih loh hnuah kumin chu boruak a ziaawm tak avangin a hmaa lo tih thin angin huam zau taka hman ni leh se tih a ni a. He thutkhawmah hian district tin leh state pawna Chapchar Kut lawmna pual sum hman tur chungchang te sawiho a ni. Co-Chairman Art & Culture Minister R. Lalzirliana pawh a tel a ni.

Rualbanlo te tana thawktha te chawimawi

Aizawl : Rualbanlote dawm kan kawnga thawk tha te chawimawina "State Award for the Welfare of Persons with Disabilities" hlanna 23.01.2023 khan CM Conference Hall-ah buatsaih a ni a. Chief Minister  Zoramthanga chuan he chawimawina hi Chhingpuii leh Commissioner Lalkiamlova te hnenah a hlan a. 
    He state award hi vawikhat an pekna niin Office of the Commisioner for Persons with Disabilities leh Rural Bank tangkawpin an buatsaih a ni. Chief Minister chuan chawimawina dawngtute leh a buatsaihtute chungah lawmthu a sawi.

Incident Response System training

Aizawl: January 24, 2023 khan Aizawl District Disaster Management Authority (ADDMA) chuan Aizawl District Disaster Management Authority hnuaia Incident Response System (IRS) team member te tan training a buatsaih a. 
    He training ah hian Aizawl District hnuaia sawrkar department hrang hrang leh NGO hruaitu, chhiatrupna a thlen palha chhanchhuah leh tanpui hna thawk tur a che chhuak turte an kal khawm a ni.

PUC buatsaih Research Enclave 2023 hawng

Aizawl: Higher & Technical Education Minister Dr. R. Lalthangliana chuan January 24, 2023 khan Pachhunga University College Research Conclave 2023 chu PUC Seminar Hall-ah a hawng.
    Khuallian Dr. R. Lalthangliana chuan PUC in Reseach Conclave 2023 ropui tak mai a buatsaih a vangin lawmthu a sawi a. Tun dinhmuna research scholars 61 an nei thei leh thlatin International Research paper publish thei institution a nih avangin leh kum 6 kalta chhunga journal leh lehkhabu publication 750 chuang an nei thei chuhlawhtlinna ropui tak a tling a ni a ti a. PUC hian undergraduate course subject chi hrang hrang 23 zirna neiin, heng bakah post graduate zirna Mizo, Philosophy, Life Science, Geophysics Department a nei hi hmasawnna nasa tak a ni a ti bawk.

I&PR Minister hovin MJA ten thingpui inho

Aizawl  : I&PR Minister Lalruatkima chuan January 24, 2023 khan a Pisa MINECO ah MJA member te chu a office ah lengah sawmin thingpui a inpui. 
    Lalruatkima chuan MJA leh thu thar thehdarhtuten sawrkar an tawiawmnaah leh thawhhonaah lawmthu a sawi a. Mipui thlan tlin sawrkar chu sawisel ngam loh a nih a rem lova, Sawrkar tan inenletna tak tak a ni thei, tih Minister chuan a sawi a. Sawiselna chu dengkhawng tak tak ni lovin sawrkar insiamthatna tur atana constructive criticism ni zawk se, insiamthatna tura insawiselna hi mi tute pawhin kan tangkaipui a ni, a ti. Hemi kawngah hian chanchinbu Editor te kamchhuak Editorial chu hmanraw pawimawh tak a nih thu a sawi bawk.

Animal Welfare Board minister thar hovin thukhawm

Aizawl: January 24, 2023 khan AH & Vety Minister Er.Lalrinawma office ah State Animal Welfare Board an thukhawm.
    Chairman Er. Lalrinawma chuan Meeting hun tha tak an nei thei chu lawmawm a tih thu sawiin Pathian thil siamte chunga ngilnei leh zawldawh taka awm chu kan mawh phurna a ni a ti.

Inner Line Permit (ILP) Portal hawng

Aizawl: Home Minister Pu Lalchamliana chuan January 24, 2023 khan Secretariat Conference Hall, MINECO-ah online ILP portal thar “Revised Online Inner Line Permit (ILP) Portal Phase-I” a tlangzarh. 
    He ILP portal Phase-I kaltlang hian online ilp.mizoram.gov.in/ in Temporary ILP, Temporary Stay Permit leh ILP Exemption Certificate dil theih a ni ang a, Home department official ten an pawm hnuah online hmanga fee pekin permit hi a download chhunzawm theih nghal dawn a ni.

National Tourism Day lawm

Aizawl: January 25, 2023 khan Mizoram Tourism Department bultumin an Directorate tualzawlah National Tourism Day hman a ni a. Tourism Minister Robert Romawia Royte chu khuallian a ni.
    Robert Romawia Royte chuan National Tourism Day pualin mipui te chibai a buk a, India ram chhung leh pawn hmun hrang hranga cheng zin mite Mizoram tlawh turin a sawm. Mizoram chu ram nuam, mawi leh muanawm, zin miten an hmuh chak leh tlawh chak ram a ni a, Mizoram sawrkar leh mipuite pawhin khualzin mite tan englai pawhin a inhawng reng a, amaherawh chu a tlawh chak tute leh tlawh tura te inkara suihzawmtu kan la nei tha tawk lo, a ti. 

National Girl Child Day 2023 kharna nei

Aizawl: Social Welfare and Tribal Affairs Minister Er.Lalrinawma chuan National Girl Child Day kharna inkhawm January 24-a Tourist Lodge, Chaltlanga neih chu khuallian niin a hmanpui.
    Er. Lalrinawma chuan Mizo nunphungah hmeichhiate dinhmun pawimawhzia a sawi a. Chhungkaw tin, khawtlang leh veng tinah Hmeichhiate mawhphurna a sang hle a ni, a ti. Hmeichhia te chu tuna an thlen chinah duhtawk mai loa theitawp chhuah zel turin a fuih a, Sawrkar Laipui leh Mizoram Sawrkar pawhin hmeichhia te chanvo humhim leh vawn dik hi a ngaipawimawh thin hle a ni, a ti bawk.

Governor hovin National Voters Day, 2023 hmang

Aizawl: January 25 khan Assembly Conference Hall-ah Office of Chief Electoral Officer, Mizoram chuan National Voters’ Day vawi - 13-na puala inkhawm a buatsaih a, Governor Hari Babu Kambhampati chuan khuallian niin a hmanpui.
    Kumin National Voters’ Day ah hian thupui atan, ‘Nothing like voting, I vote for sure’ ( Vote thlak hi a pawimawh takzet a; vote thlak ngei ka tum) tih hman a ni. Governor Hari Babu Kambhampati chuan NVD 2023 pual hun pawimawh takah a tel thei chu lawmawm a tih thu a sawi a. Inthlan Mizoramin a lo hmachhawn tawhah te hlawhtlinna langsar tak a awm a, heng hlawhtlinna te hi state dang te entawn mek a ni a, a chhuanawm hle a ni, a ti.

Mizo nurse Japan-a thawk tur thlah

Aizawl: January 25 khan Mizo ṭhalai Japan rama Nurse hnathawk tur mi 14 te chu NSDC-I tumsaka Delhi-a Japanese tawng thla 9 chhung zir turin Lalchhandama Ralte, Minister, Labour, Employment, Skill Development & Entrepreneurship Department chuan a vai liam.
    Japan leh India sawrkarin thawhhona thuthlung an siam angin Japan rama Nursing Care hna thawk tur thawn luh hna hi National Skill Development Council-International (NSDC-I) chuan a kalpui a, India rama a pilot programme atan Nurse 50 thawn luh phawt a tum a ni. LESDE Department hmalaknain Mizo thalai Nurse hna thawk tur a tum khat nan mi 6 kaltir tawh niin, a tum hnih nan mi 14 kal tir leh an ni.

Pilot Survey of Adopted Village & School bul tanna hun hmang

Aizawl: Tourism MinisterRobert Romawia Royte chuan January 25 khan Hmuifang Tourist Resort Conference Hall-ah Govt. Aizawl College Pilot Survey of Adopted Village & School bul tanna inkhawm a hmanpui.
    Robert Romawia chuan National Tourism Day a nih angin kalkhawm te National Tourism Day chibai a buk a. Khawvel ram changkang leh zirna in tha ten an lo tih thin anga GAC-in Hmuifang khawtlang tana extended service an nei chu tha a tiin fakawm a tih thu a sawi a. Adopted Village Hmuifang khua leh GAC te chuan an MoU ziah anga tihlawhtlingtu ni ve ve turin a duhsakna a hlan a ni.

Republic Day vawi 74-na Governor hovin hmang

Aizawl: India ram Danpui hman tanna ni, Republic Day chu India ram hmundang te rualin January 26, 2023 khan Mizoram hmun hrang hrangah lawm a ni a. Hrileng a kian hnuah tun tum hi kumdanga hman thin anga pangai taka hman leh a ni. 
    Mizoram chhunga Republic Day vawi 74-na lawmna programme lian ber chu tukin zing dar 8 khan Sipai Lammualah neih a ni. He hunah hian Governor Hari Babu Kambhampati chuan India Hnam Puanzar pawtparhin Parade contingent 26 ten Hnam Puanzar zahna chibai an buk chu a chhanglet a. Hemi hnu hian Republic Day puala thuchah a sawi chhunzawm nghal a ni.