Myanmar sipaite thlawhnain hruai haw

Aizawl: January 2, 2024 khan Arakan Army nen an indona avanga Mizorama tlanchhia Myanmar sipai 151-te chu Lengpui tumhmun atangin Myanmar thlawhna hmangin an ramah phurh haw an ni.

   December 29, 2023-a Arakan Army nen an inkahna avanga Lawngtlai district-a Tuisentlanga lut Myanmar sipai 151-te hi Myanmar thlawhna hmangin tum hnih thiarin, a tum khat nan sipai 84 phurh chhuah an ni a, a tum hnihnaah sipai 67 chu phurh chhuah leh an ni.

   Myanmar sipaite hian ralthuam chi hrang hrang rifle 93, pistol 17, Rocket Propelled Grenade (RPG) pali, mortar pali, Medium Machine Gun (MMG) pahnih, Light Machine Gun (LMG) panga, sniper rifle pali leh hand grenade 374 te an luhpui a ni.

In khat a cheng unau an boral

Aizawl : Durtlang a khawsa mipa kum 44 leh kum 48 mi, unau piang hmun, In khat a khawsa te chu ni khat thil thu ah natna vangin an boral.

   A u zawk Lalrammawia (48) chu January 2 khan vuiliam a ni a, a nau zawk Lalrinmawia (44) chu January 3, 2024 chawhnu dar 1 ah vui a ni.

Aizawl kawtchhuah-ah thlai thar Wholesale Market 4 din tum

Aizawl : January 3, 2024 khan Agriculture Minister PC Vanlalruata hovin Agriculture Department hotute chuan kum 2023-24 chhunga Scheme hrang hrang hmanga hmasawnna hnathawh an kalpui dan tur sawiho hun an hmang. Agriculture minister hian Aizawl kawtchhuah-ah Wholesale Market pali (4) din a nih tur thu a sawi.

   Agriculture Minister chuan Agriculture Department-a thawktu te kumthar 2024 chibai bukin kut hnathawktute hmakhua ngaia theihtawp chhuah turin a sawm. Minister hian Agriculture Marketing lamah nasa taka hmalak a ngaih thu leh hemi ti hlawhtling tur hian a tul anga hmalak a nih tur thu a sawi bawk.

Tetea’n gold la Jeremy-a a lawmpui

Aizawl : National Weightlifting Championship 2023-2024 neih meka Mizoram tana goal medal latu, Jeremy Lalrinnunga chu Nilaini khan sports minister-in a lawmpui a. Rit chawi chak chuan inhliam avanga inbuatsaihna tha a nei thei lo chunga gold medal a la chu a lawmawm zual bik thu a sawi.

   Ainawn Veng tlangval hian Itanagar, Arunachal Pradesh-a December 28 atanga Indian Weightlifting Federation (IWLF) buatsaih National Weightlifting Championship 2023-2024-ah hian Senior (Men) kg 67 huangah Pathianni khan gold hi a la a ni.

   Arunachal Pradesh khawpuia intihsiaknaah hian Mizoram atangin rit chawi chak 15 leh official pathum an kal a ni.

CM-in India leh Burma ramri chungchang PM sawipui

Aizawl : January 4, 2024 khan Chief Minister Lalduhoma chuan Chief Minister a nih hnua a vawikhat nan Prime Minister Narendra Modi chu a chenna inah a hmu a. India leh Burma ramri chungchang a sawipui.

   Chief Minister hian, "India leh Burma ramri tuna kan hman mek hi a nghawng tur mipuite rawn lova British sawrkarin a siam kha a ni a, keini zofate tan chuan barhluih ramri, kan ram leh hnam min thendarhtu a ni ta a. Chuvang chuan vawiin thlengin pawm harsa kan ti em em a, rorelna pakhat hnuaia awm hi kan duh ber zawk a ni. Tuna raltlana lo chhuk (refugee) te pawh hi kan tan hnam hrang an ni lova kan unau, kan thisen zawmpui te an ni, chuvangin tha tak leh duat taka lo tuamhlawm hi kan duh a ni," a ti.

PHE Minister hovin department hmalakna sawiho

Aizawl : January 4, 2024 khan PHE Minister Prof. Lalnilawma hovin a Office chamber-ah PHE Department hnuaia Senior Officer, Superintendenting Engineer leh a chunglamte meeting neih a ni.

   PHE Minister Prof. Lalnilawma chuan PHED Officer-te hnen atangin Department hnathawh dan leh hmalak mekte uluk taka ngaihthlain hmalak zel dan turte a sawipui a. Meeting-ah hian khawpui leh thingtlanga tuilak dinhmunte zirchian a ni a. Jal Jeevan Mission (JJM) leh SBMG hnuaia hmalak tawhna hrang hrang leh hmachhawp awm mekte uluk taka sawiho niin, hmalak zel dan turte pawh ruahman a ni bawk.

CYMA leh Excise Minister inkawm

Aizawl : Lalnghinglova Hmar, Minister of State, Excise and Narcotics Department leh Central YMA hruaitute chu January 4 khan MINECO-a a office chamber-ah an inhmukhawm a, ruihhlo do chungchanga hmalak dan tur an sawiho.

   Excise and Narcotics Dept. Minister chuan Mizoram ah ruihhlo chu nasa zawka do ngai, thalaiten kan thihpui nasat, a la dam a ten kan tahpui bawk a nih thu a sawi a. Ruihtheihthil chi hrang hrang, a bikin heroin do na kawngah chak zawka hmalak a ngai tih a sawi.

   Minister chuan Central YMA leh mipuite thlawpna nena tanghovin hlawhtling taka ruihhlo do an kalpui theih a beisei thu a sawi bawk.

Union Home Minister-in Mynamar refugee te thawn haw an nih loh tur thu hrilh

Aizawl : January 4, 2024 khan Chief Minister Lalduhoma chuan Union Home Minister Amit Shah chu a pisaah a hmu a. Thil pawimawh hrang hrangte an sawi dun. Amit Shah hian Myanmar ram a ralmuan hma chuan Myanmar refugee te thawn haw an tum lo tih a lo hrilh.

   An inkawmnaah hian kum 2019 a Mizoram sawrkarin Household Registration Bill a lo pass tawh, India President in tun thlenga a la pawm loh chungchang an sawi dun a. He bill-a siam that ngai awm te an siam that fel hnuah a thara thehluh leh turin a lo hrilh a ni.

   Union Home Minister in Myanmar raltlante an ram a ralmuan hma loh chuan thawnkir an tum lo tih Chief Minister a hrilh hnu hian hemi chungchanga hmalak zui zel dan tur hi Chief Minister hian Union Home Secretary Ajay Kumar Bhalla a sawipui leh nghal a ni.

Health Minister CHA tlawh

Aizawl : Health Minister Lalrinpuii chuan January 4 khan Civil Hospital Aizawl tlawhin thawktute kawmin hmalaknate a enfiah. Minister hi Dr. Lalmalsawmi Sailo, Director, DHME leh Dr. Zoramthanga, Sr. Medical Superintendent, Civil Hospital Aizawl leh Staff te'n an lo dawngsawng a ni.

   Health Minister Lalrinpuii chuan Damdawiina thawktute chu mipuite tana thawk an nihnate hre reng tur leh an tana theihtawp chhuah turin a chah a. Hriselna kawnga hmasawnna tur leh tihchangtlun ngaite pawh theihtawp chhuaha bawhzui zel tum a ni, a ti a. Doctor-ten a hnena an thlen harsatna leh Hospital tihchangtlun nana mamawh an neihte chu theihtawp chhuaha lo bawhzui a tum thu a sawi bawk.

UD&PA Minister hovin sawiho

Aizawl : January 4, 2024 khan UD&PA Minister K. Sapdanga hovin UD&PA Conference Hall, MINECO-ah Champhai Master Plan leh Aizawl Sustainable Urban Transport Project (ASUTP) chungchanga hmalakna leh hmachhawpte sawiho a ni.

   UD&PA Minister K. Sapdanga chuan Champhai Master Plan hnuaia hmalakna leh ruahmanna siamte chu tha a tih thu sawiin, a hma thei ang bera pawma hmalak a nih theih nana tanlak tlan a tul a ni, a ti a. Master Plan hnuaiah Champhai ti Champhai tu Leilet zawl humhalh chung zela hmalak a pawimawh thu tarlangin, felfai taka Ring Road bakah hmasawnna ruhrel dang, nakin zela siam theihna tur ruahmanna tha tak siam fel a ni chu lawmawm a tih thu a sawi bawk a. Aizawl Sustainable Urban Transport Project (ASUTP) hnuaia project hrang hrangte chu chhawrnahawm tak tur a nih thu sawiin, a tul angte zirchianga hmalak theihna tur angte pawh inrawnkhawma sawiho leh tum a nih thu a sawi bawk.