Tuifinriat sangha chi khat rep thahnem tak man

Aizawl: Champhai Police Special Task Force te chuan July 7, 2026 zan khan Silchar, Assam lam atanga rawn kal Balero Maxx atangin Manta Ray/Mobula samkhuih (gill plates) rep nia hriat Kg 210 vel chu an man.

  Champhai Police Special Task Force-te hian Champhai pan mek Bolero Maxx (AS-01-TC-8784) pakhat chu rinhlelh thilah an lo tiding a. He motor khalhtu Rajiv Hussein Laskar (26) leh Jinuk Uddin Laskar (30) te Lirthei hi dap a nih hnuah Manta Ray/Mobula samkhuih (gill plates) rep nia hriat, ip 9-a khung, kg 210 vela rit chu an hmu chhuak a ni. 

  Heng an thil mante hi international black-market-ah chuan ₹2.30 crore vel zeta hlu tura chhut a ni a, Mizoram chhunga hetiang thil man tam ber tum nia ngaih a ni.

MHIP Day ram pumah hmang

Aizawl;: Mizo Hmeichhe Insuihkhawm Pawl (MHIP) chuan July 6, 2026 khan branch an neihna hrangah an kum 52 tlin lawmna an nei a, Aizawl City area-a Golden Jubilee lawm thei hmasaber Tlangnuam Branch MHIP pawhin he ni pual hian an veng Community Hall-ah hun an hmang.

  Jubliee lawmnaah hian Aizawl South II MLA, an veng pa ni bawk Lalchhuanthanga chu Khuallian niin Jubilee Lungphun a hawng a, MHIP General Headquarters President, Lalliani chu Khualzahawm niin, Golden Jubille pual Souvenir chu Ward XIX Corporator, Dr. Lalmalsawma Nghaka chuan a tlangzarh a. Jubilee lawmna ruai kilho a ni bawk.

CADC CEM atan Nirupam Chakma la lut

Aizawl : Chakma Autonomous District Council sawmpakhatna (11th CADC) Chief Executive Member atan July 8, 2026 khan Nirupam Chakma chu Lawngtlai Bawrhsap Donny Lalruatsanga MCS in rinawmna thu tiam tirin a la lut.

  CEM thar chuan Chakma Autonomous District Council chak zawk, hausa zawk leh nung zawk din ngei a rin thu a sawi a. Duhthlanna pakhat, thiltum pakhat leh inpekna pakhat nen thawk ho ila District Council tha zawk, thangtharte tan hnutchhiah turin theihtawp a chhuah tur thu a sawi.

  Tun dinhmunah Chakma ADC ah hian seat 20 awmin BJP in MDC 10, ZPM in MDC 9 leh MNF in MDC 1 an nei mek a ni.

Bawlhhlawh sawngbawl dan zirtir

Aizawl: Aizawl Municipal Corporation (AMC) chuan AMC area-a Hotel leh Home Stay neitute pualin July 8, 2026 khan bawlhhlawh sawngbawlna dan thar Solid Waste Management Rules, 2026 hmelhriattirna, zirtirna leh waste generator te mawhphurhna hrilhfiahna hun AMC Auditorium-ah an buatsaih a. He hunah hian AMC area-a Hotel leh Home Stay neitu mi 152 an kal a ni. 

  AMC hotute chuan Bulk Waste Generator chuan dan tharin a phut angin an bawlhhlawh te an sawngbawl a tul tawh dawn tih an sawi a. Hemi hnuah hian Hotel leh Home Stay neitute nen sawi hona hun hman a ni. He dan thar ang hian bawlhhlawh thliar hrang tha lo te, a hmun loa bawlhhlawh paih te chungah na zawkin hremna pek theih a ni dawn a, zawm tha lo leh thu awih lo te chu man theih an ni tawh dawn bawk a ni.

ICT Minister hovin State-level Workshop nei

Aizawl: July 9, 2026 khan Mc Cable Hall, Aijal Club, Aizawl ah Information & Communication Technology (ICT) Department buatsaihin nikhat awh ‘State-Level Workshop on Strengthening Cyber Security Frameworks for State Data’ neih a ni a. 

  He hunah hian ICT Minister Dr. Vanlalthlana chuan Khuallian niin workshop hi an hmanpui a ni. Workshop ah hian Mizoram Sawrkar hnuaia department hrang hrang aiawh official thahnem tak an tel.

  He workshop-a tel te hian thupui pawimawh tak tak paruk an zirho a ni. Group 6-ah inthenin, sawi hona hun tha tak hman a ni a, chung sawihona te chu MeitY, Govt. of India hnenah thehluh leh a ni dawn a. State hrang hrang atanga feedback an hmuh atang hian Central sawrkarin Cyber Security Framework changtlung tak la siam tur a ni dawn a ni. 

Mizoram Police-in hmun nga-ah ruihhlo tam tham tak man

Aizawl : Mizoram Police chuan kar kalta chhung khan ruihhlo hmun nga ah an man.

  July 8, 2026 khan Saitual Police Special Team-te chuan Kualmawi Check Gate-ah lirthei endikin, TATA truck (AS01SC5973) pakhat chu an lo tiding a. Heroin ni ngeia hriat, gram 102 a rit, he lirthei chhunga thuhruk chu lirthei khalhtu Fulchand Ali Mondal (35), Dhubri District, Assam-a mi kut atang hian man a ni. Heng ruihhlo hi sahbawn bawm 9-ah pack niin, cheng nuai ₹20.40 vel man hu a chhut a ni. 

  July 7, 2026 zan khan, Zokhawthar atanga Aizawl pana tlan Tata Sumo pakhat chu lo dan a ni a. Motor an dapnaah hian heroin nia hriat, gram 26 a rit chu hnunglam thutna hnuai bel (pot) pakhata thuhruk chu hmuh a ni a, he thil hi Lalrinchhana (20) s/o Lalrinmawia, Khawmawi, Myanmar-a mi ta a ni.

  July 6, 2026 khan Zokhawthar Police-te chuan Zokhawthar atanga Aizawl pana tlan Maxi Cab Sumo pakhat chu lo tidingin, heroin nia hriat gram 48 chu motor-a chuang pakhat Thuanmawia (42) s/o Sunliana (L), Tshambhari Village, Falam District, Myanmar (P/A Tiau, Khawmawi, Myanmar) ipte (sling bag) atangin man a ni.

  July 6, 2026 vek khan Aizawl District Special Branch (DSB) leh 34 Assam Rifles- te chuan joint operation neiin, Lawipu, Aizawl-ah methamphetamine nia hriat, Kg 1.955 a rit, vaibelchhia ₹1.60 vel zeta hlu chu Marcus Lalvenpuia (19), Luimawi Village, Mamit District-a mi kut atangin an man. Aizawl Police Station- ah NDPS Act hnuaiah thubuai ziah luh nghal a ni a, chhui zui hna thawh mek a ni.

  July 5, 2026 zan khan Champhai Khankawn Police Check Gate-a thawktute chuan an tihdan pangngaiin tank lorry (AS-07-C-5431) pakhat an lo endik a, Myanmar atanga dan lova lakluh nia hriat kuhva ro (dry areca nuts) kg 2,960 a rit, ₹10.36 lakh vela hlu chu an man bawk a ni.

RD&AD Minister-in VB-G RAM G hawng

Aizawl: Mizoram sawrkar hnuaia Rural Development & Administrative Department (RD&AD) buatsaihin July 8, 2026 khan VIKSIT BHARAT - GUARANTEE FOR ROZGAR AND AJEEVIKA MISSION (GRAMIN): VB-G RAM G hawnna hun Vanapa Hall-ah neih a ni. He hun hi RD&AD Minister Prof. Lalnilawma chuan khuallian niin a hmanpui a, VB-G RAM G hawnna a nei nghal a ni.

  He scheme hi India rama thingtlang zawkte (rural area) hmasawnna tur atana duan niin, India Sawrkar chuan 11 May 2026 khan Viksit Bharat – Guarantee for Rozgar and Ajeevika Mission (Gramin) [VB–G RAM G] Act, 2025 chu ram pumah 1 July 2026 atanga hman ṭan turin a puang a ni.

  VB–G RAM G Act hman ni atang hian kum 2005 atanga hman Mahatma Gandhi National Rural Employment Guarantee Act (MGNREGA) chu hemi ni vek atang hian thiah (repeal) a ni thung. 

Agriculture & Farmers’ Welfare Department Review Meeting nei

Aizawl: July 8, 2026 khan Directorate of Agriculture & Farmers' Welfare Conference Hall-ah Agriculture & Farmers' Welfare Department hnuaia scheme hrang hrang hmalakna thlirletna hun ‘Review Meeting’ neih a ni a. He hun hi Agriculture & Farmers' Welfare Minister P.C. Vanlalruata chuan khuallian niin a hmanpui a ni.

  Review Meeting hi A&FW Department Secretary Ramdinliani chuan kaihruaiin, kum 2025-26 chhunga District Agriculture Officer te hmalaknahrang hrang bakah SAS, Hnahthial, Krishi Vigyan Kendra (KVK), Crop Production Programme, Price Support Scheme, Mizoram Agriculture Marketing Board (MAMB), Green-Ag leh TRIBES hnuaia hmalaknate a sawi.

Tourist Lodge, Chaltlang 4-Star aia hniam lo Hotel changtlung taka siamna tur inremna ziak

Aizawl: “Development of 4-Star or Higher Category Hotel at Tourist Lodge, Chaltlang, Aizawl, Mizoram on Design, Build, Finance, Maintain, Operate, Manage & Transfer (DBFMOMT) Basis” hnuaia Tourist Lodge, Chaltlang 4-Star aia hniam lo hotel dinna tur Concession Agreement chu July 7, 2026 khan Tourism Department, Government of Mizoram leh M/s Hotel Polo Towers Ltd., Shillong, Meghalaya-ten an ziak.

  Inremna ang chuan Hotel Polo Towers Ltd. hian kum 30 chhung atan DBFMOMT basis-in hna an thawk ang a, kum 10 dang tum hnih pawhsei theih a ni ang. He hotel-ah hian pindan 60 (pindan 40 danga tihlen belh theih) tal awm tura tih a ni a, darkar 24 inhawng, multi-cuisine coffee shop, specialty restaurant, lounge leh Executive Health Club (gym leh spa facility awmna) te nei ngei tura tih niin, 5-Star hotel-a hlan kai theih tura kalpui tur a ni. Inremna ziah atanga ni 45 chhungin a hmunhma hi Hotel Polo Towers Ltd. hnenah hian hlan tur a ni ang.