The Week that was on July 14, 2024
![](https://zalen.s3.ap-south-1.amazonaws.com/images/news/1720863737_The%20Week%20that%20vwas%20logo%20tur.jpg)
Rev. Dr. Lalchungnunga vui liam a ni
Aizawl : Pathian rawngbawltu ropui, a hun zawng zawng Pathian tana hlantu, Rev Dr Lalchungnunga (91) chu July 8, 2024 khan vui liam a ni.
Mission for Christ dintu leh President ni bawk Rev Dr Lalchungnunga hi July 7, 2024 chawhma lam khan a boral a, tlaivarpui niin, July 8, 2024 khan a chenna Durtlang, Hermon Venga Mission for Christ hmunpuiah vui a ni.
Jail tang tlanchhuak man
Aizawl : July ni 6, 2024-a Serchhip District jail atanga tlan chhuak Myanmar mi 2 a pakhat zawk Lalnunnema (31) s/o Lalkima (L), Thántlang, Myanmar chu July 8 khan Serchhip hmar chhak lama awm, Vanchengte kham hnuaiah hliam na tak tuarin hmuh a ni a.
Serchhip police ten Vancheng khaw mi tlawmngaite puihna lak chhuah a nih hnu ah Civil Hospital, Aizawl panpui a ni.
Lalnunema hi a thianpa Lalchhanhima nen June ni 7 khan AK 47 silai tam tham tak nen man an ni.
Aikal la ten hna an zawm
Aizawl : July 10, 2024 atang khan sawrkar hnathawk aikal la tam tak ten Mizoram sawrkar thuchhuak angin an hna an zawm mek nia thudawn a ni.
Sawrkar department hrang hrangah aikal la mi 3,365 an awm a, chung zinga tam tak chuan sawrkar thuchhuak angin an hna an zawm mek. Aikal late chu July ni 19, 2024 ral hma a mahni hna zawm lote chu dan loa chawl ah ngaih an ni dawn a, an chungah disciplinary action lak tur a ni.
Naupang chhawr luih a awm leh awm loh enfiah
Aizawl : Serchhip DC kaihhruainaa din District Task Force on Child and Adolescent Labour chuan July 11, 2024 khan Serchhip khawpui chhung hmun hrang hrang tlawhin dan kalha naupang chhawr luih - child labour a awm leh awm loh an enfiah.
Fehchhuak zingah hian Serchhip Sub Headquarters YMA hruaitute, police te, I&PR te leh Serchhip District Child Protection Officer leh a staff te an tel a ni.
Pu Buanga (J.H. Lorrain) lehkhabu pali hlan
Aizawl : INTACH Mizoram Chapter chuan Pu Buanga (J.H. Lorrain) lehkha leh sulhnu pawimawhte chu bu pali ah siamin, Mizoram Sawrkar leh Kohhran leh Zirna in archive/ library a dah turin July 11, 2024 khan heng lehkhabu te hi an hlan a. Art & Culture Minister C. Lalsawivunga hovin a pisa ah lehkhabu hlanna hi hman a ni.
Heng lehkhabute pali te hi Mizoram State Archive, Tribal Research Institute, Mizo Language Development Board, Mizoram Legislative Assembly, Mizoram University Library, Synod Archive, Baptist Church leh Aizawl Theological College-te hnenah hlan a ni.
Zakapa Fanai nun behchanna siam docu drama film tlangzarh
Aizawl : Social Welfare & Tribal Affairs, Women and Child Development enkawltu Minister Lalrinpuii’n July 11, 2024 khan Vaivakawn Cultural Centre Auditorium ah Mizo lal huaisen Zakapa Fanai nun behchanna docu drama film siam chu a tlangzarh.
He film hi Directorate of Social Welfare & Tribal Affairs hnuaia awm State Tribal Resource & Training Centre (TRI) tanpuina a siam a ni. Lal Zakapa nun, a chanchin leh hmeichhia te tana Kumpinu Sawrkar a do dang tlangpui tlangpui chu Padma Shri Prof. RL Thanmawia chuan a sawi a. Film siam dan leh chan dan tlangpui chu he film siamtu TC Vanlalzauva, Orientation Media chuan a sawi bawk a ni.
MFM-in Cyclone Remal tanpuina an hlan
Aizawl : 10.7.2024 khan Mission Foundation Movement te chuan Hlimen-a Cyclone Remal-in in leh lo a tihchhiat chhungkua 21 te chu Relief Camp a insakna atan bungrua leh ei tur an pe a. Adviser to Chief Minister TBC Lalvenchhunga leh AMC Corporator Dr. C. Malsawmtluangi ten an telpui a ni.
He relief fund hi North Eastern Development Finance Corporation Ltd (NEDFi) ten an CSR fund MFM kaltlang an pek a ni a. Shuttering board - 142, Rangva bundle 90, etc. leh eitur Buhfai bag 40, Dal bag 40, Alu bag 40 leh thildang a mamawhtu chhungkua te an hlan.
Green-Ag hmalakna enpui
Aizawl : July 10, 2024 khan Agriculture Minister pisaah Global Environment Facility kaltlang a Green-Ag cum Green Landscape Information Platform (GLIP) hnuai a hmalakna enhona hun hman niin Lunglei leh Mamit district chhung a khaw 38-a hnathawhna tur hmanrua semchhuah nghal a ni. Agriculture Minister PC Vanlalruata chuan he hun hi hmanpui.
Green-Ag hi Mizoramah hian Lunglei leh Mamit district-a khaw 38-ah hmalakna kalpui mek niin kum 2027 thleng awh tur a ruahman a ni. Kuthnathawktuten ramngaw tichereu lo zawng a eizawnna ngelnghet an neih theih nan ruahmanna siam thin a ni.
North Eastern Region Power Minister Conference
Aizawl : July Ni 9, 2024 khan India Hmarchhak bial-a Power Minister-te intawhkhawmna North Eastern Region Power Minister Conference chu Union Power Minister Manohar Lal Khattar ho in Guwahati-ah neih a ni a. P&E Minister F. Rodingliana pawh telin, Mizoram in kawlphetha a intodelh tura a hmalakna kawnga mamawhte leh harsatna te a thlen.
Union Power Minister chuan Central Scheme kalpui mek NERPSIP leh RDSS hnathawh mek te a hun taka zo turin a chah a, AT&C loss tam lutuk tihtlem nan Smart Metering Project kalpui thuai turin a chah bawk.
CM-in DoNER Minister hmu
Aizawl : July 9, 2024 khan Chief Minister Lalduhoma chuan DoNER Minister Jyotiraditya Scindia chu a office ah a hmu a, thu pawimawh tak tak an sawidun.
North Eastern Council thuneihna tihpun chungchang te leh project hrang hrang chungchang te an sawi a. Jyotiraditya Scindia hian DoNER hnuaia project te enfiah turin Mizoram a lo tlawh vat tur thu a lo hrilh a, Kaladan Multi-Modal Transit Transports Project pawh a hmunah ngei a tlawh a tum tih a lo sawi a ni.
PAC Member te leh chanchinbumite inkawm
Aizawl : July 9, 2023 khan Mizoram Legislative Assembly-a Public Account Committee chuan chanchinthat lalkawhmtute an kawm a, PAC dinhmun leh hnathawh dan te an sawifiah.
PAC Chairman Lalchhandama Ralte, Leader of Opposition chuan PAC bakah Legialative Assembly hnuaia Committee pawimawh hrang hrang te dinhmun a sawi a, a khat tawpa committee nei reng thin an nih thu leh PAC phei chu kartina thukhawm thin an nih thu a sawi.
Union Health Minister leh Chief Minister inkawm
Aizawl : July 9, 2024 zan khan Chief Minister Lalduhoma chuan Union Health Minister JP Nadda chu a chenna inah a hmu a, inkawmna hun tha tak an nei.
ZMC tihchangtlunna tur sum leh pai tanpuina, Chief Minister Delhi a zin hmasak tuma an lo sawidun tawh chu an sawichhuak leh a, Union Health Minister hian tihfel vat a lo tiam a. ZMC a Critical Care Block din chungchangte pawh sawi dunin Health Minister hian an lo zirchian tur thu leh chanchin a hriattir leh vat tur thu a lo hrilh. Chief Minister hi PWD Minister Vanlalhlana chuan a tawiawm a ni.
CM leh PWD Minister in Nitin Gadkari hmu
Aizawl : Vawiin tlai lam khan Chief Minister Lalduhoma leh PWD Minister Vanlalhlana chuan July 8, 2024 khan Minister of Road, Transport and Highways Nitin Gadkari chu a chenna inah an hmu a, inkawmhona hun an nei.
Nitin Gadkari hian a Ministry hnuaia official pawimawhte lo ko khawmin, Mizorama project hrang hrangte leh harsatna awm mek te an sawi hova. Pu Nitin Gadkari hian, "Forest Clearance hi kan mutan ber a nia, Mizorama hna kan thawh mai theih loh thin chhan lian ber chu Forest Clearance fel lo hi a ni" tiin a lo hrilh a ni.
Chief Minister hian NHIDCL siam retaining wall chim nasa lutuk chu a thlalak nen Nitin Gadkari hi a hmuhtir hlawm a. Enfiah nghal a lo tiam a ni.
Taiwan Expo 2024-ah Lalduhoma khuallian
Aizawl : July 8, 2024 khan Bharat Mandapam, Pragati Maidan, New Delhi-ah Taiwan External Trade Development Council, India bultumin Taiwan Expo, 2024 India neih a ni a. Chief Minister Lalduhoma chuan khuallian niin a hmanpui.
Chief Minister chuan India Taiwan Labour Mobility Agreement buaipui mek chu Mizo thalai tam takten an chhawr tangkai a beisei tlat thu te, Mizoram University leh Taiwan ram University pahnih ten MoU an ziak chu tha a tih thu sawiin, Mizo thalaite skill development lama kaihruai turin Taiwan Technology Company leh University te chu a sawm bawk. He Expo ah hian Taiwan Company 120 chuang an tel a ni.
Chief of Army Staff-in CM tukthuan eiah sawm
Aizawl : Chief of Army Staff, General Upendra Dwivedi sawmna angin Chief Minister Lalduhoma leh Chief of Army Staff, General Upendra Dwivedi te chuan Chief of Army Staff chenna inah July 8 khan Tukthuan an eidun a, inkawmna hun tha tak an nei.
Mizo Scouts Battalion din chungchang te, Assam Rifles sawn chhuah chungchang leh Mizorama Sainik School tihhmasawn dan tur te an sawidun a ni. Indian Army a sipai hotu lian tak tak te an tel bawk.
Latest News & Chhiar Hlawh
-
1m | Sep 07, 2024
-
2m | Sep 07, 2024
-
1m | Sep 07, 2024
-
1m | Sep 07, 2024
-
1m | Sep 06, 2024
-
1m | Sep 06, 2024
-
2m | Sep 06, 2024
-
3m | Sep 06, 2024
-
1m | Sep 06, 2024
-
1m | Sep 06, 2024
-
2m | Sep 06, 2024
-
1m | Sep 06, 2024
-
2m | Sep 05, 2024
-
1m | Sep 05, 2024
-
1m | Sep 05, 2024
-
1m | Sep 05, 2024
-
2m | Sep 05, 2024
-
1m | Sep 05, 2024
-
1m | Sep 05, 2024
-
1m | Sep 04, 2024