DOWNLOAD OUR APP

Read latest news on your phone
app-store
The Week that was on July 16, 2023
Jul 16, 2023

ASUTP hmalakna CM hrilh

Aizawl : 13.07.2023 khan Chief Minister Zoramthanga chu a pisa ah Aizawl Sustainable Urban Transport Project (ASUTP) chungchanga hmalakna leh dinhmun te sawipuiin Mizoram State Planning Board Vice-Chairman H. Rammawi, UDPA officials leh ASUTP consultant Mott Macdonald Private Ltd. mithiam te'n hmu in an inkawm.
    Mott Macdonald Pvt. Ltd. te chuan kum 2022 January thla atanga ASUTP atana Mizorama hma an lak tan hnua an thlen chin te sawiiin Chief Minister hi an hmalakna an sawipui a. He Project hnuaiah hian Aizawl leh a chhehvel tan Comprehensive Mobility Plan (CMP) chu Project Management Unit (PMU), UD&PA Deptt. kaihhruaiin Project Planning, Design and Management Consultant (PPDMC) – Mott MacDonald Pvt. Ltd. chuan an buatsaih mek thu an hrilh. 
    An project zingah hian ropeway/ cable car service te, City Bus Service tihhmasawn leh maxi-cab, bus leh truck tana terminal siam te, Multi-Level Off-street Motor Vehicle Parking (car parking chhawng), khawpui chhunga mipui chet vel awlsamna turin khawpui chhung a lift leh Escalator dah te leh Aizawl tlak lama Aizawl Bypass Road siam thar tur zuk pawh dan turte a tel a ni.

Rajya Sabha MP-in UCC duhlohna thlen

Aizawl : Rajya Sabha MP K.Vanlalvena chuan July 13, 2023 khan 22nd Law Commission of India hnenah tunlai Uniform Civil Code hman tumna awm mek dodalna thu a thehlut.
    Vena chuan Law Commission Member Secretary Khetrabasi Biswal hnenah lehkha thehlutin Mizoram chu British kuta a luh hmain kum tam tak mahnia ro inrel thin a nih thu te; British awpna hnuaia kum 57 chhung a awm lai pawhin India rama a tel ngai loh thu te; leh British lak atanga India Independence sual lai zawng zawng pawhin Mizoram chu India ah a tel ve loh thu a tarlang a ni. 
    Vena chuan India ramah Uniform Civil Code hman a nih chuan article 371(G) a khawih pawi theih tur thu leh chutah chuan Mizote humhimna hrang hrang - ram neitu nihna te; Mizo sakhua leh vantlang nun te; Mizo hnam dan leh culture humhimna chungchang te a inziah thu a tarlang a. UCC hian heng Mizo hnam himna dan te hi a tihchhiat theih dawn avangin na taka a dodal thu leh North East tribal hnam hrang hrangte tan pawm theih a nih loh thu a tarlang nghal bawk a ni.

CM leh IFAD hotute inkawm

Aizawl : July ni 13, 2023 khan Chief Minister Zoramthanga chu a pisa ah IFAD (International Fund for Agricultural Development) hotu pahnih Ulac Demirag, Country Director leh Piyusg Kanal Country Programme Analyst te chuan hmu in Mizorama agriculture tihhmasawnna chungchang an sawiho.
    IFAD bultumin tunah hian FOCUS Project chu Agriculture Department nen thawk hovin kalpui mek a ni a. IFAD hotute chuan Chief Minister hnenah hian sawrkar nen thawhhona tha ta an neih zel an beisei thu sawiin, tuna project kal mek ah harsatna an tawh thenkhat te an sawipui bawk a. Chief Minister chuan sawrkarin theihtawp a chhuahpui tur thu a sawi.

Thlavang hauhna, tawrhpuina leh sunna hun hmang

Aizawl : July 12 chhung dar 12:00 khan ZO Reunification Organisation (ZORO) bultumin Aizawl-ah Manipur tualchhung buai avanga kan unaute harsatna tawk mek thlavang hauhna, tawrhpuina leh nunna chan te sunna hun hman a ni. 
    He huna thusawitu ZORO President R. Sangkawia chuan, “Meitei te hian kawng hrang hrangin Zofate hi an phiar ru a, Meitei te hi an sawrkar nen tangkawpin kan unau Zofate hi an bei a ni. Manipur tualchhung buaina hian thla hnih a pel tawh a, heti chunga India Prime Minister a ngawi reng hi kan hrethiam lo hle a ni. India sawrkar hian Zofate hi India ah min ngai lo nge tih hi ZORO zawhna a ni. Chhungkaw pa ber chuan an fate chu a ngaihsak a ni ngai a, Zofate hi India hian min ngaihsak lo niin kan hria a ni,” a ti.
    F. Ngurbiakfela Vice President kaihhruaina in Manipur-a an unau nunna chan te sunna hun hman a ni a. kalkhawm te hian Genreal Secretary L. Ramdinliana Renthlei kaihruaina-in Resolution pathum an pass a ni.

Aizawl College Boys & Women hostel hawng

Aizawl : Higher & Technical Education Minister Dr. R. Lalthangliana chuan July 12 khan Govt. Aizawl College Mualpui Campus-ah RUSA 2.0 hnuaia cheng 1,60,00,000/- senga sak zawh tak Boys’ & Women’s Hostel Extension building a hawng.
    Khuallian H&TE Minister Dr. R. Lalthangliana chuan Govt. College zingah kumin B.A. Result Arts Stream-ah Govt. Aizawl College chu pass percentage nei tha ber a nih vangin a lawmpui thu a sawi a. Student Enrolment sang ber pahnihna an nih avang leh Campus tha tak an nei chho mek avangin a lawmpui thu a sawi bawk. NAAC Accreditation-ah Mizoram chu rampumah Higher Education Institutions-ah pakhatna a hauh thei chu a lawmawmin a chhuanawm hle a ti.
    Sorkar laipuiin Zirna tihhmasawn nan ruahhmanna tharte a rawn siam reng avangin tuna Mizorama zirna insang neihchhun MZU pawh research tan bik chauh hman thuai a nih hmel avangin Mizoramin ‘State University’ a neih a ngai dawn tih a sawi bawk. 

Aizawl-ah EVM Demonstration Centre hawng

Aizawl : MLA General Election, 2023 inbuatsaihna atan July 12 khan DC Office, Aizawl ah Lalnunfela Chawngthu, Election Officer, Aizawl chuan EVM Demonstration Centre a hawng.
    EVM hman dan inzirtirna leh inhrilhfiahna (Awareness) turin he EVM Demonstration Centre hi siam a ni a. A duh apiang ten he Centre ah hian vote an thlak chhin thei dawn a, EVM hman dan te leh vote thlak dan te hrechiang turin mipuite he Centre hi rawn tlawh turin sawm an ni.

PUC ah leihnuai chanchin zirna hun hawng

Aizawl: Home Minister Lalchamliana, Disaster Management & Rehabilitation enkawltu ni bawk chuan July 12 khan Pachhunga University College ah leihnuai chanchin chungchang leh heng kaihhnawih thiamna thar te hman tangkai dan zirhona International Workshop on Geodynamics and Advances in Geophysical Methods for Exploration and Geohazards tih chu a hawng. 
    Ni hnih awh workshop hi Department of Geology & Geophysics, PUC leg Department of Geology, Govt. Zirtiri Residential Science College tangkawpte buatsaih a ni.

RD hnuaia Scheme te chak zawka kalpui dan tur sawiho

Aizawl : July 12 khan Rural Department hnuaia scheme pawimawh tak tak kalpui dan thlirho na leh chak zawk kalpui dan tur sawihona neih a nia. Rural Development Minister Lalruatkima chuan he hun hi a hmanpui a ni.
    Lalruatkima chuan Rural Development Department chu thingtlang mipui te chawikanna atana department pawimawh ber leh thingtlang mite ta deuh bik a ni tih a sawi a. Rural Development a thawk te chu officer lian zawk atang hnahniam zawk thawktu thleng a hawihawm, dawrnuam leh thingtlangmite tana dawr nuam ni chhunzawm turin a chah a. BDO te pawh an bialtu MLA te nen inlaichinna tha nei turin a chah tel bawk.

Union Minister-in Mizoram tan intodelh tura tan lak a harsat ring lo

Aizawl : Union Minister of State for Agriculture & Farmers' Welfare Shobha Karandlaje chuan July 12 khan College of Veterinary Sciences & Animal Husbandry, Selesih-ah Bio Safety Level-II Laboratory (BSL-II) leh Mushroom Spawn (Seed) Production Unit a hawng.
    Union Minister of State Shobha Karandlaje chuan, "Mizoram sawrkarin a lo mikhual danah lawmawm a tih thu a sawi a. Prime Minister Narendra Modi a'n loneitute/kuthnathawktute hmasawnna tur scheme tam tak ruahman a nih thu a sawi a. Sawrkar hmalakna avangin khawvelah thlai chi hrang hrang engemawzat leh bawnghnute thawnchhuak tam ber kan ni a. India ram chhunga chengte ei leh bar hnianghnar taka kan la intodelh thei lo thin hi kan vei em em a ni," a ti. Mizoram chu mihring cheng an tlem avangin ei leh bara intodelh tura tan lak a harsat loh a rin thu a sawi.

LMC Councillor ten ATI-ah training nei

Aizawl : Lunglei Municipal hmasa bera Councillor-te chuan an bialchhung a hnemhnan zawk leh hmasawnna chak zawk an thlen theih nan, July 11 atang khan anmahni hmalaknain ni 3 chhung Administrative Training Institute (ATI), Aizawl-ah ‘Capacity Building & Training’ an nei.
    Training-ah hian Sawrkar inrelbawl dan te, anmahni mimal hmasawnna tur te, mipui vantlang tana zau zawka rawng an bawl theihna tura topics pawimawh tak tak bilh luh a ni. Lunglei Municipal Councillors thlan tharte hi July 14, 2023, Zirtawpni thleng khan sawrkar kalphung leh inrelbawl dan zirin ATI hmunah riah chilhin an training a ni.

DIET Lunglei Academic Building thar hawng

Aizawl : July 11, 2023 khan School Education Department changtu Minister Lalchhandama Ralte chuan Samagra Shiksha 2020-21 fund cheng nuai 327.432 senga sak DIET Lunglei Academic Building thar a hawng.
    Lalchhandama Ralte chuan Mizoramah zirna a hmasawn zel theihna turin School Education Department chuan nasa takin tan a lak mek zel thu sawiin National Education Policy (NEP), 2020 in a duang angin school a zirna chu a bulthut atanga siam that hna tawh mek zel a ni a, SCERT hmalaknain elementary education tih hmasawnna turin Early Childhood Care and Education (ECCE) lamah theihtawp chhuah niin textbook leh syllabus te pawh siam that mek anih thu a sawi a. Zirlai thangthar te pawhin Mizo hnam ziarang leh kan history te tun aia an lo hmelhriat zawk theihnan School Textbook-te pawh siam rem chhoh mek zel anih thu a sawi bawk.

Zokhawsanga AR ram chhunga kawng hman dan turah inremna ziak

Aizawl : Commissioner & Secretary, Home Department kaihhruaina hnuaiah 10.07.2023 khan a pisa ah Assam Rifles, Bn. Hqrs Zokhawsang ram thenawma lo neitute tunhnaia AR lamin an ram kaltlang an phal loh chungchang sawihona neih a, inremna pawh ziah a ni.
    Commissioner & Secretary, Home Department-in lo neitute hnenah thil kalphung leh nih dante leh Home Department in AR insawnna tur chungchanga hma a lak dante kalkhawm hnenah a sawi a. Lo neitute hnen atangin harsatna an tawh hrang hrang chungchang ngaihthlak a ni bawk.
    Sawihona neih a nih hnuah a hetiang hian inremna pali an siam a ni.

Super IAS Screening test nei

Mizoram Youth Commission (MYC) buatsaih, Super IAS programme hnuaia full sponsore hmu tur thlanna Screening Test Exam chu vawiin July 10, 2023 (Thawhtanni) khan Mizoram hmun hrang hranga centre 5 leh Delhi Centre-ah tluang taka neih a ni. Super IAS full sponsorship programme atan hian Mizoram atangin mi 342 te chuan hming an thehlut a, vawiina exam bei zawng zawng zat hi 188 an ni.

MSSSB thiah leh thiah loh
Mizoram Subordinate Services Selection Board thiah tum hi eng nge i ngaihdan?
Thiah tha ka ti
Thiah kher tul ka ti lo
Ka hrethiam lo

Latest News & Chhiar Hlawh