NEC-in Mizoram tan cheng Vaibelchhe 20.17 pechhuak

Aizawl : Ministry of Development of North Eastern Region (MDoNER) hnuaia awm North Eastern Council (NEC) chuan May-June 2026 chhung khan Mizoram tana hmasawnna ruhrel siamna atan Cheng vaibelchhe 20.17 a rawn pe. Heng zinga vaibelchhe 13.68 hi Schemes of NEC (SoNEC) atanga pek niin vaibelchhe 6.50 chu North East Special Infrastructure Development Scheme (NESIDS–Roads) atangin a nih thu June 16, 2026-a sawrkar thuchhuak chuan a tarlang.

  May-June, 2026 khan NEC hian agencies hrang hrang universities, technical institutes, NGO, Society etc hnenah NE hmasawnna tur hian vaibelchhe 18.93 a pechhuak bawk. Mizoram-a Sikpui Ruoi Festival-2025 hmanna te, Mizoram Challenge 2025 hmanna te leh Foundation for Drug-Free Mizoram ten Anti-Drugs Campaign an kalpuina te pawh heng fund-ah hian a tel a ni

Hlimen Local Council-in bawlhlawh paih ruk tum cheng 5,000/- chawi tir

Aizawl: Hlimen Local Council chuan July 14, 2026 khan Kapdaia Section, Bawngin mual kawngah bawlhlawh paih ruk tum an man a, cheng 5,000 an chawi tir.

  Local Council thuchhuah tarlan danin, motor registration number MZ 01 AB 7506 chuan bawlhlawh a rawn phur a, Bawngin Mual kawngah paih ruk a tum lai man a ni.

  AMC Solid Waste Management Bye-laws Rule 4.1–4.3 angin cheng 5,000 chawitir a ni a. Seizure memo pek niin, pawisa chu Aizawl Municipal Corporation (AMC) hnenah pe turin an tih thu an tarlang.

PUC-in thisen unit 158 pe-in bul an tan

Aizawl: Pachhunga University College NSS unit chuan July 14, 2026 khan Civil Hospital, Aizawl tan thisen unit 158 an pe.

  Blood donation camp hi Association for Voluntary Blood Donation ngenna anga huaihawt a ni a; PUC Seminar Hall-ah buatsaih niin, Aizawl Civil Hospital Blood Centre-a thawkte'n kal chilhin thisen an la a, zirlai mipa 103 leh hmeichhia 55 ten thisen an pe a ni.

  MZU hnuaia college-te'n July 10, 2026 khan academic session 2026-27 atan class an tan a, Aizawl Civil Hospital Blood Centre-in thisen an mamawhna a san avangin, Association for Voluntary Blood Donation (AVBD) ngenna angin PUC hian blood donation camp an buatsaih nghal a ni.

Chawnpui-ah phalna nei lova sak In pathum tichhia

Aizawl : Chawnpui huam chhung, Ebenezer Hopital piah kawng chhak lam chu a neitu lam leh a luahtu lam te chu hun engmaw chen court in an thubuai ngaihtuah hnuah July 13, 2026 khan District Court thupek anga tih chhiat a ni.

  Order-a tihchhuah-ah District Court chuan, he hmun atanga chhuak tura khingtu (Decree Holder) hi helai hmuna building leh thil dang dinglai te tihchhiah phalsak a ni a, July 13, 2026-ah Superintendant of Police, Aizawl leh Officer-In-Charge, Vaivakawn Police te chu Decree holder hi tawimawm turin a ti a, Executive Magistrate, Aizawl chu he lai hmuna In ding te tihchhiat a nih dan July 15, 2026 hma-a hriattir turin a ti a. Deputy Commissioner Aizawl District chu July 13, 2026-a thil thleng hi lo buaipui turin a hriattir bawk a ni.

B. Lalchhanzova hovin NABARD Foundation Day vawi 45-na hman a ni

Aizawl : Food, Civil Supplies leh Consumer Affairs Minister B. Lalchhanzova, Hon’ble Minister of chuan July 16, 2026 khan NABARD, Mizoram Regional Office-in a din champhai 45-na 'Foundation Day' chu Conference Hall, NABARD RO MINECO, Khatla, Aizawl-ah lawmna hun a hmanpui.

  He hunah hian NABARD hnuaia puihna dawngtu Farmer Producer Organisation (FPO)-te thil siamchhuah pholanna exhibition buatsaih a ni a, Mizorama NABARD-in a inrawlhna hmanga loneitu pawl leh thingtlang lama hmalakna hrang hrangte hlawhtlinna tarlanna a ni.

  NABARD hi agriculture leh thingtlang hmasawnna (rural development) atana development financial institution sang ber (apex) atana kum 1982 khan din a ni.

Israel Embassy atangin Water Resources Specialist ten Mizoram rawn tlawh

Aizawl: Public Health Engineering Department (PHED) Minister Prof. Lalnilawma’n Mizoram tlawh tura a sawm angin Israel Embassy-a International Development Co-operation (MASHAV) Senior Water Resources Specialist Shri Neeraj Gahlawat leh Partnership and Operations Head Shri Arpit KP-te chuan July 15, 2026 khan Mizoram an rawn tlawh.

  Israel Embassy aṭanga lo zinte hi PHED Engineer-ten an lo dawngsawng a, Aizawl Water Supply Scheme en turin Tlawng lui lamah hruai an ni. A hmunah hian tui supply hnathawh kalphung leh harsatna hrang hrangte an enpui a, fur laia tui lian nasa leh tui chim chin sang lutuk te, tui nu (turbidity) sang lutuk te, ṭhal laia tui kam nasa leh silt deposit (siltation) chungchangte sawiho a ni.

P&E Minister hovin power supply tha zawka pek dan tur sawiho

Aizawl : 15.07.2026 (Nilaini) khan P&E Minister F Rodingliana chuan a Office Chamber-ah Aizawl Power Circle hnuaia Sub-Division pakua a thawktu JE chin chunglamte nen Aizawl khawpui chhunga power supply tha zawka pek dan tur inrawnkhawmna hun an hmang.

  He hunah hian division hrang hrang a thawktuten an harsatna hrang hrangte leh a siamthat dan tur bakah an area theuhva power supply khaihlak loa pek theihna tura rawtna hrang hrang an neih te thlenin sawiho a ni.

  Hetiang inrawnkhawmna hi thlaruk danah neih thin rel a ni a, he huna tel thawktute pawhin lawmthu sawiin hetiang hun hi la buatsaih a nih ngai loh thu tarlangin, Aizawl khawpui chhunga power supply tha zawk pek kawngah awmzia thui tak a nei ngei ang tih an sawi a ni.

Electoral Roll Observer for SIR, 2026 V. Lalsangliana, IAS hovin meeting

Aizawl; Aizawl DC Pisapui Hall-ah Aizawl District tana Electoral Roll for SIR, 2026 observer tana ECI in a ruat V. Lalsangliana, IAS, Commissioner & Secretary, PWD leh UD&PA hovin July 15, 2026 khan SIR, 2026 buaipuitu official te, tlawmngai pawl aiawh te leh Political Party aiawh ten meeting an nei a. 

  Er. Lalhriatpuia, IAS, DEO leh bawrhsap ni bawk chuan Aizawl District chhunga SIR, 2026 hmalak tawhna leh hmachhawp hrang hrangte report a pe. Meeting-ah hian DEO, Dy. DEO, EROs, AEROs, SP aiawh, Political Party aiawh te leh Tlawmngai pawl hrang hrang aiawh te an tel a ni.

Document dik lo hmanga Family Pension la te bansan turin ngen

Aizawl: Finance Department chuan dan dik lo va Family Pension laten an Pension Payment Order sorkara pe kir tura hmalakna bultanna Statewide Kick-off Programme on 'Sensitization of Voluntary Surrender of Pension Payment Order (PPO)', chu July 15, 2026 khan Assembly Annex Conference Hall-ah an buatsaih.

  Chief Minister Lalduhoma, Finance Minister ni bawk chuan a hmanpui. Chief Minister hian Mizoram sawrkar hnuaia document dik lo hmanga Family Pension la mek zawng zawngte chu ngaihhnathiamna hun hawn July ni 1 atanga September ni 30, 2026 chhunga anmahni duh thu ngeia bansan (surrender) turin a ngen.

  Tunah hian Mizoram sawrkar hnuaiah pension benefit dawngtu hi mi 39,954 an awm mek a, heng zingah hian superannuation pension la mek 22,139 leh Family pension la mek mi 11,194 an awm a. Pension chi dang latu Centralised Pension Processing Centre (CPPC) kal tlanga la 5629, Voluntary 594, VRS 289, Invalid 69 leh Compulsory mi 40 te an awm a ni.

‘Sports School’ a siam dan tur sawiho

Aizawl: School Education Minister Dr. Vanlalthlana leh Sport Minister leh Dawrpui Vengthar bialtu ni bawk Lalnghinglova Hmar te chuan July 14, 2026 khan Govt. Dawrpui Vengthar Middle School chu tun aia tangkai zawk leh tha zawka hman a nih theih nan ‘Sport School’ a siam theih dan tur a hmunah enfiahin sawi hona an nei. 

  Govt. Dawrpui Vengthar Middle School-ah hian tun academic session-ah zirlai 23 an awm a, Pawl 5-ah zirlai pathum, pawl-6 leh pawl-7 ah zirlai pasarih ve ve leh pawl 8-ah zirlai paruk an awm a ni.

  Sawihona hunah hian Sub-Divisional Education Officer (SDEO) Carolyn Rinthanpuii, Govt. Dawrpui Vengthar Middle School zirtirtute leh Dawrpui Vengthar YMA leh Local Council hruaitute an tel a ni.

Asian Development Bank Inception Mission nei

Aizawl: July 13, 2026 khan ni thum awh Asian Development Bank (ADB) Inception Mission Mizoram chu SAD Conference Hall-2, MINECO-ah Finance Secretary Ramchuana kaihhruaina hnuaiah neih tan a ni. 

  Meeting ah hian Finance Department hotute bakah, Health & Family Welfare Department, Women & Child Development lehMizoram University aṭangin official ten hun an hmang a. 

  ADB hnuaia Mizoram in loan a puk tur - Loan 4718-IND: Supporting Public Health Care System Strengthening to Achieve Universal Health Care for Mizoram Program pualin he Inception Mission hi neih a ni a. ADB aṭanga loan puk tur zat hi $108,000,000 ($108 Million dollars) a ni.

Thingtlang high school-te internet pek nan inremna ziak

Aizawl: School Education Minister Dr. Vanlalthlana kaihhruaina hnuaiah July 13, 2026 khan School Education Department leh Bharat Sanchar Nigam Limited (BSNL) te chuan Mizoram thingtlang (rural area)-a High School-te high-speed internet pekna tur Memorandum of Understanding (MoU) an ziak. He inremna hi kum 5 chhung awh tur a ni.

  He thawhona thuthlung hi School Education Department aiawhin Commissioner & Secretary K. Lalthawmmawia, Additional Secretary Zothantluangi leh State Project Director C. Lalthanzira ten hming an ziak a. BSNL aiawhin General Manager BP Meena leh Deputy General Manager Biakthianghlima Chenkual-ten hming an ziak a ni.

  He MoU-in a tum ber chu sawrkar laipui ruahmanna, Amended Bharatnet Program (ABP) hnuaia Digital Bharat Nidhi (DBN) incentive scheme kal tlanga thingtlang high school-te Fibre-Technology-To-Home (FTTH) hmanga internet chak zawk pek a ni.

Nihawi tel khaw hrang hranga thawn chhuah tur vailiam

Aizawl: Khawzawl district chhunga loneituten Nihawi tel an her chhuah khaw hrang hranga thawn chhuah tur chu District Agriculture Office tual atangin Khawzawl Bawrhsap K. Vanlalthiana chuan July 13, 2026 khan a vailiam.

  Kum 2025-26 chhung khan Khawzawl District ah Nihawi (Variety KBSH 90) chin a ni a. Nihawi hi zau (Cluster) 6 - Rabung, Sialhawk, Biate, Khawzawl, Khawhai leh Kawlkulh ah te chin niin loneitu 120 in Tin 98 hmunah nihawi hi an ching a, DAO hmalaknain tel herna khawl hi Khawzawl, Rabung leh Sialhawk-ah te bun a ni a, tel 2000 litre her chhuah a ni a, purity (firna) hi 99.9% a ni. 

Chief Minister-in Zo Fair (Aadhi Bazar) hawng

Aizawl : Chief Minister Lalduhoma chuan July 13, 2026 khan Dawrpui Multipurpose Hall-ah Tribal Cooperative Marketing Development Federation of India (TRIFED), Ministry of Tribal Affairs, Government of India leh Mizoram sawrkar Cooperation Department tangkawpte buatsaih Hapta khat awh Zo fair (Aadhi Bazaar) a hawng.

  He Bazarah hian hmarchhak state hrang hrang atanga lo kal stall 13 leh Mizoram atanga tel stall 12, an vaiin stall 25 an awm a. Heng zingah hian Tribal Food Cuisine Stall pahnih an tel a, a dang chu kuta tah textiles te, Mau atanga siam thilte, ei tur lam leh Natural produce zawrhna stall-te an ni a. Kar kalta chhung khan he Bazar hi kalpui a ni.