Remna Ni photo exhibition

Aizawl : Remna ni champha vawi-37 na puala Information & Public Relations Department buatsaih photo exhibition Vanapa Hall-a neih chu June 29 khan I & PR Minister Lalruatkima’n a hawng.
    Photo exhibition hawnna inkhawmah hian Minister Lalruatkima chuan Remna Ni puala photo exhibition buatsaih a ni chu lawmawm a tih thu a sawi a. Mizoram chu kum tam tak a buai hnu ah June ni 30, 1986 khan sawrkar laipui leh hnam pasalthate zarah remna thuthlung ziah a nih tak thu tarlangin remna leh muanna nghahlelh em em chu neih a ni ta a ni, a ti. Kum 20 chuang rambuai ni thin kha remna leh muanna vawnghim tha ber a ni ta chu mipuite zar a ni, a ti a. Sawrkarin mawhphurna keng mahse mipui thawhpuina tel lo chuan remna tluantling neih theih a nih loh thu a sawi.

Unity Mall sakna tur thlithlai

Aizawl : June 29 khan Chief Minister Zoramthanga hovin Tourism Minister Robert Romawia Royte leh sawrkar department hotu pawimawh thenkhat leh khawtlang hruaitute chuan Zuangtui a FCS&CA godown ah kalin, Unity Mall sakna atana a remchan theih dan tur an thlithlai.
    "Unity Mall" chungchang hi kumin February thla khan union budget session ah Union Finance Minister chuan sawiin, tourism leh mahni kutkawih a eizawngte hmasawnna tur atan leh inpumkhatna atan state tin te an capital ah din tum tura tih an nih thu a lo sawi tawh a. Unity Mall hi state tin te an state nihna leh ziarang phochhuak tha thei ber tur thil siamchhuah/tharchhuah (One district, One Product) te, GI product te leh handicraft thilte chawilar nan a tih niin, mall tinah hian mahni state mai bakah ram chhung state dangte thilsiamchhuah theuh pawh pholan ve tur a ni a. Sawrkar laipui chuan a sakna tur cheng vaibelchhe 120 chuang a dah a ni.

Kayakalp Award Sem chhuak

Aizawl : Health Minister Dr R.Lalthangliana hovin June 28 khan Taxation Conference Hall, Aizawla programme buatsaihah Kayakalp Award sem a ni. He hunah hian Dr. ZR Thiamsanga, MLA & Vice Chairman, H&FW Board chu khual zahawm a ni bawk.
    Dr R Lalthangliana chuan Kayakalp Award dawngtute a lawmpui thu sawiin Mizoram chuan hriselna leh thianghlimna kawngah hma kan sawn zel a ni, a ti. NITI Aayog in tehna a siam Health Index ah India rama state te ho zingah Mizoram chu 2017-18 atanga vawiin thlengin pakhatna a la ni, Minister chuan a ti a. COVID hripui avanga kum 3 dawn lai sawrkarin hma a la mumal thei lo chung pawhin hmasawnna hmuh theih tam tak a thleng zel a ti a, hmasawnna ruhrel din kawnga sawrkar hmalakna hrang hrang te a sawi lang a ni.

Remna Ni 2023 Quiz Competition

Aizawl: June 27,2023 zan khan School Education Minister Lalchhandama Ralte hovin Ignite Studio-ah Remna Ni 2023 lawmna atana buatsaih State Level High School Quiz Competition neih a ni a, District tin atangin District Level High School Quiz Competition-a pakhatna theuhte an tel.
    School Education Minister chuan he hunah hian thusawiin  Remna Ni chu Mizoram tan Ni chhuanawm leh hriatreng tlak a ni tih sawiin ram buai tia hriat hlawh chu khawvela phochhuah tham remna tluantling nei a lo ni ta a, remna ziah tawh zawng zawnga khawvela hlawhtling ber tih theih a ni a ti.

Health Minister hovin raltlan chungchang sawiho

Aizawl: Health & Family Welfare Minister Dr. R. Lalthangliana hovin June 28, 2023 khan Manipur tualchhung buaina avanga Mizorama Zohnahthlak raltlante chungchang meeting neih a ni a. 
    Meeting ah hian Central YMA hnuaia raltlan buaipuitu Sub-Committee te leh Covid-19 hripui len nasat laia din Committee on Psychological & Social Guidance te an tel a ni. Health Minister chuan hmanni lawka raltlan camp a tlawhnaa Manipura kan Mizo unau buaina tawk te thil tawn rapthlak takin an rilru lamah nghawng a neih nasat dan tur te sawi. CYMA in raltlan a bawihsawm dan chu ropui a tih thu a tarlang bawk. CYMA chuan raltlan camp-a awmten harsatna an tawh te an tarlang a. Committee on Psychological & Social Guidance lam pawhin raltan te tan thawh an inhuam thu an sawi bawk a ni.

Ceremonial tree planting hun hmang

Aizawl : Kum 1986-a Mizo National Front (MNF) leh sawrkar laipuiin remna thuthlung an ziah vawi 37-na pualin vawiin khan MINECO-a Open Gym bulah ceremonial tree planting (thingtiak phun) hun hman a ni a. He hunah hian Chief Minister Zoramthanga chu khuallian a ni.
    Chief Minister chuan kum 1986-a MNF leh sawrkar laipuiin remna thuthlung (peace accord) an lo ziah chuan Mizoram-ah remna leh muanna tluantling a thlen thu sawiin Mizorama kum 20 chuang buaina chu a reh thei ta a ni a ti. Rambuai lai chuan Mizoram chu manganna raltitna authawm in a luahkhat thin thu sawiin India hmarchhak mai nilo, Asia khawmualpuia chhim-chhak (South-east Asia) a ram ralmuanglo ber a ni hial a ni a ti.

National Statistics Day vawi 17 na hmang

Aizawl : Directorate of Economics & Statistics chuan June 28 khan ‘National Statistics Day’ vawi 17-na chu Economics & Statistics Conference Hall-ah an hmang a, Planning and Programme Implementation Department Secretary Lalmalsawma Pachuau chuan khuallian niin a hmanpui.
    Khuallian chuan ramin hmasawnna tha leh dik a neih theih nan ‘statistic data’ felfai tak a ngai a, Mizoramin data rintlak a neih theihna tura thahnem ngai taka thawk thin Economics & Statistics Department te chhuanawm a tih thu a sawi. Economics & Statistics Department-ten Naupiang leh mitthi chungchangah nitin data khawn theih a ni chu fakawm tiin state dang tam takin an tih theih loh a ni a, a lawmawm hle a ti.

Maumual Development Committee thukhawm

Aizawl : MNF Returnees te Maumual, Chaltlang rama chenna in ngaihsak tura din “Maumual Development Committee for MNF Returnees” chu an Chairman Lalruatkima hovin a pisa ah June 27 khan thukhawmna an nei.
    Lalruatkima chuan kum 1986-a India sawrkar leh Mizo National Front ten inremna thuthlung an ziah hnua hnam pasaltha rawn hawte pualin Maumual ram hi theh a nih thu a sawi a. A hmun hi khang hun lai kha chuan hla deuh leh thlaler deuh anga a lan avangin chenna in sa duh pawh an awm mang lo niin a lang a, tunah erawh chuan chutiang a ni tawh lova, hmun tha leh rem tak a lo ni tawh a ti. Sawrkarin Ex-MNA te in leh lo ngaihtuahsak hi a ngaihpawimawh avangin theihtawp chhuahin hmalak reng a nih thu tarlangin House Site Plan kum 1987 a siam tawh chu uluk leh tunlai thiamna changkang zawk hmanga House Site Plan hi siam that a ni, a ti.

LMC Board of Councillors Meeting hmasa ber nei

Aizawl : Lunglei Municipal Council (LMC) Board of Councillors Meeting hmasa ber chu June 27 chawhma dar 11:00 khan BoC Meeting Hall LMC Office ah neih a ni a, BoC Meeting hmasa ber hi Lawmawma Tochhawng MLA, HPC Vice Chairman in a telpui.
    LMC Board of Councillors Meeting hi LMC Chairman Lalzuithanga'n a kaihruaia meeting-ah hian kum 2023 atanga 2024 chhunga LMC hmalakna tur engemawzat Councillors thukhawm te hian an pawm a ni. LMC BoC Meeting chuan Lungleia Solid Waste Management Centre UD & PA Department enkawl chu a nih tur anga kalpui a la nihloh bakah Solid Waste Management Centre pakhat ringawt chu hun lo kal zel turah Lunglei khawpui tan a tawk dawn lo tiin Lunglei khawpui chhung hmun pali, Lunglei East, West, South leh North ah te Solid Waste Management Centre changtlung zawk din tura hmalak nise an ti.

School building thar hawng

Aizawl : June 26 khan Information & Public Relations Minister bialtu MLA ni bawk Lalruatkima chuan Govt. Gairigaon Primary School building zauhna MLA Fund cheng 6,49,000 seng a sak chu a hawng a, Govt. Dinthar High School-a tlawh nghal bawk.
    I&PR Minister chuan Govt. Gairigaon Primary School building zauh sak thar hawnna inkhawmah thu sawiin, Local Council leh NGO-te thahnem ngaihna leh inpekna zarah school building tha tak Dinthar veng in an nei thei chu lawmawm a tih thu tarlangin, MLA Fund hmanna ah chuan a lungawi thlak hle a ni, a ti. Mizoramah tawng pathum-English, Hindi leh Mizo tawng a zirna sikul a tam lo hle a, Gairigaon School-in tawng chi thum a naupang an zirtir thin chu ropui tiin, Primary School chu naupang tan tawng zir leh thiam awlsam hun lai tak anih avangin he school atang a zirchhuakte tan a hlawkthlak in, naupangte an vanneih bik hle a ni, a ti.

Dr. Thangtea'n LMC Office tlawh

Aizawl : Health & Family Welfare Minister Dr R. Lalthangliana chuan June 26 khan Lunglei Municipal Council (LMC) Office, Convention Centre tlawhin LMC Councillor-te leh official-te inkawmhona hun a hmanpui a ni.
    Minister hi Lunglei HPC Vice Chairman Lawmawma Tochhang, Additional DC Donny Lalruatsanga leh official dangten tawiawmin LMC Chairman Lalzuithanga, CEO H. Lalhmingthanga leh Councillor dangten an lo dawngsawng a ni.

One Day Media Workshop 'Vartalap' hmang

Aizawl : June 26 khan Aijal Club-ah Press Information Bureau, Ministry of information and broadcasting buatsaih, One Day Media Workshop 'Vartalap' hman a ni.
    He workshop-ah hian India in kum kaw kalta chhunga Seva, Sushasan leh Garib Kalyan a kawng hrang hrang a hmasawnna a hmuh te leh Schemes pawimawh tak tak te photo exhibition leh Paper Presentation hmanga pho chhuah leh sawiho a ni.
    Dr. ZR Thiamsanga, MLA, Chairman, Health and Family Welfare Board, Mizoram chuan Prime Minister Narendra Modi hnuaia India in hmasawnna a hmuh te chu a fakawm takzet a ni, a ti a, kum kaw chhung lekin India chu khawvela ram economy lian 5-na a ni pha ta a ni, a ti. Program-ah hian Department tam zawk hnathawh pho chhuah nilo mahse an hnathawh rah chhuah mekte hmuh theih turin a awm a ni, a ti. Tunhnaia Mizoram in a India a tehna hrang hrang a pakhatna a hauh na te a sawilang bawk.

Aizawl-ah Ruihhlo Do kawngzawh nei

Aizawl : June 26 kha United Nations hriatpuia khawvel pum huap ruihhlo dona ni "International Day Against Drug Abuse and Illicit Trafficking" vawi 34-na a ni a. Hemi denchhen hian Aizawl District Police buatsaihin tukin khan Millennium Centre, Dawrpui atanga Aizawl SP Office, Treasury Square thleng kawngzawh (rally/walkathon) a ni. He hunah hian Modern English School naupangte leh Aizawl DEF hnuaia thawkte bakah Aizawl Traffic Police te an tel a ni.

Dy. CM hovin International Day Against Drug Abuse and Illicit Trafficking ni hmang

Aizawl : International Day Against Drug Abuse and Illicit Trafficking ni pualin June 26 khan Vanapa Hall-ah hun hman a ni a, Mizoram Deputy Chief Minister Tawnluia chu khuallian niin Er. Lalrinawma, Minister Social Welfare & Tribal Affairs Department chu khual zahawm a ni.
     Kuminah hian “Mihring ngaihven hmasak: Thinhrikna leh thliarhranna tih tawp a, invenna tihchak” tih chu thupui atan hman a ni.