National Importance-ah ASI-in puang

Aizawl : Government of India hnuaia Ministry of Culture (Archaeological Survey of India) chuan thuchhuah siamin Lianpui khua, Champhai district-a Lungphun ropui chu Archaeological Survey of India (ASI) chuan National Importance atan a puang a, July 16, 2025 zan khan an khaw hruaitute an rawn hrilh.

  Central sawrkar chuan a hmun hma atanga ruahman siamah hian dodalna engmah a hmuh loh avangin sub-section (3) of section 4 of the Ancient Monuments and Archaeological Sites and Remains Act, 1958 (24 of 1958)-in thuneihna a pek angin heng Lungphun ropui leh a chhehvel te chu national importance-ah a puang ta a ni.

Tualthattu a puh man

Aizawl : Vanlalhnuna (51) Bawngkawn thihna chungchangah July 16, 2025 zan khan police-ah FIR thehluh a ni a, pawi khawihtu nia puh man nghal a ni.

  ZALEN thudawn danin, Vanlalhnuna h/o Lalremmawii (L) chu nizan dar 6:30 bawr vel khan an chenna in, Bawngkawnah hliam tuara hmuh a ni a, a hnu dar 7-ah a boral zui a ni.

  He thihna chungchangah hian kut inthlakna a thleng nia hriat a nih avangin Bawngkawn police station-ah FIR thehluh a ni a, police te pawhin thu zawhfiah an neih hnuah Felix Lalthansanga (25), Vaivakawn leh Cindy Zoramchhani (21) te chu Bawngkawnah hian an man a, Felixa hian boral ta hi kut a thlak ngei tih police te a hrilh a, Cindy-i chuan engmah a hriat loh thu police te a hrilh thung.

Assam-ah Mizo pali man an ni

Aizawl : Assam (Sonapur) police chuan July 15, 2024 Thawhlehni khan dan loa pawisa khelhna nia hriat, Guwahati khaw daia Club Nirvana an luhchhuah a, Mizo pali an man.

  Assam Tribune in a tarlan danin, Assam Police-te'n Mizo pali an mante hi; Lalchhanhima Sailo (35), Lalfakawma Ralte (28), Lalrinngheta (35) leh Joseph Lalparmawia (28) te an ni a, Aizawl mi vek an ni. Heng mite hi police te kutah awmin, thil awmdan police ten an chhuizui mek.

Manipur Group YMA in tanpuina hlan

Aizawl : July 15,2025 (Thawhlehni) tlai khan Manipur Group YMA hruaituten tunhnaia khuarel chhiatna hrang hrang tuarte tanpuinan Central YMA ah Rs. 2,09,920/- an hlan. Central YMA aiawhin President Lalhmachhuana leh OB dang ten an lo dawng sawng a. Manipur Group hi an President Khaiminlal leh hruaitu dang te an ni.

  Central YMA hian ruahsur nasa avanga nunna chan leh in leh lo chhiate hnenah tunhnai khan tanpuina Rs.13,07,000/- an lo sem chhuak tawh bawk.

  Central YMA hian ruihhlo do pawl CADS tanpuina atan Tlangnuam Branch YMA hnen atangin Rs.5,000/- an dawng bawk.

Sawrkar hnathawk MR bill

Aizawl : 1.4.2025 -14. 7.2025 inkar a sawrkar hnathawk, Non. Empaneled Hospital a admit MR bill neite chuan mahni department-ah bill theh luh theih a ni tih July 14, 2025 khan sawrkar chuan thuchhuah a siam.

  Review Committee on MUHCS in a rel angin Mizoram Universal Healthcare Scheme hman tan ni, 1st April, 2025 atanga Sawrkar hnathawkte leh an chhungte (dependent family member), empaneled Hospital ni lova lo inenkawl tawh te medical reimbursement bill chu mahni thawhna Department-ah MR Bill form pangngai hmangin thehluh theih a ni.

  A chunga sawi tak ‘medical reimbursement bill thehluh theih’ tih hian 1st April 2025 atanga he thuchhuah ni thlenga damlote inenkawlna senso a huam ang. Hemi hnu-ah erawh chuan empanelled hospital ni lova in admit te chu empaneled hospital atanga Doctor in a refer na emaw, Sawrkar hnathawkte leh an chhungte damlo an in-admit atanga darkar 48 chhungin Mizoram State Healthcare Society-ah phalna an lak hnu-ah chauh medical reimbursement bill hi ngaihtuah theih a ni ang.

VSP leh Excise te thawkho zel dawn

Aizawl: Excise & Narcotics Department minister Lalnghinglova Hmar hovin July 17, 2025 khan Excise & Narcotics Department hotute leh Vaivakawn Siamtha Pawl hotute an thukhawm a, Vaivakawn veng chhunga ruihhlo ngai pungkhawm nasa thin then thianghlim dan tur ruahmanna an siam.

  Vaivakawn Siamtha Pawl report dan in ruihhlo ngaite hi an punkhawm tam lai chuan mi 200 chuang tling thinin khawlai hmun ualau tak taka inchiu te an awm fo avangin nunau tan a him lova, rûkruk leh inrawk pungin Biak In, Anganwadi, YMA Property House bakah mimal in engemaw zat rawk a ni tawh a ni. Pawl hrang hrangin eitur an pe thin chuan ruihhlo ngai pungkhawm a tih tam phah tih sawiin, eitur pe tur chuan hriattir hmasa thin turin VSP chuan thuchhuah an siam tih an sawi bawk.

  Thukhawm chuan Excise & Narctics Department leh Vaivakawn Siamtha Pawl te chu thawhho nise tiin an rel a. Hmalakna hmasa atan Excise Minister chuan VSP hnenah pawisa fai cheng sing hnih a pe a ni.

Mizo tawnga buatsaih Pawl 12 zirlaibu tlangzarh

Aizawl : School Education Department minister Dr. Vanlalthlana, Minister, chuan July 17, 2025 khan Mizoram Board of School Education Building thar hawnna hun hmanpuiin, Pawl 12 zirlaibu Physics, Chemistry, Biology leh Mathematics, mizo tawnga buatsaih chu a tlangzarh nghal bawk.

  Education Minister Dr. Vanlalthlana chuan Mizoram Board of School Education building thar luah theih a sak zawh a ni chu lawmawm a tih thu a sawi. New Education Policy 2020-in a beisei anga zirlaibu engemaw zah mizo tawng a buatsaih a nih tawh bakah vawiina Pawl 12 Science leh Mathematics zirlaibu hman tur, mizo tawnga buatsaih, tlangzarh lehna chuan Mizoram chhunga zirnain hmasawnna a hmuh phah ngei a beisei thu a sawi bawk.

Swachh Survekshan State Award dawng

Aizawl : Ministry of Housing and Urban Affairs (MoHUA) buatsaih India ram puma khawpui fai inelna, Swachh Survekshan Award 2024-2025 chu July 17, 2025 khan New Delhi-a Vigyan Bhawan-ah sem niin, Lunglei chuan State Award pakhat, Mizoram khawpuite zinga faina kawnga hma hun eng ber lawmman, 'Promising Swachh Shehar Award' a dawng.

  Lawmman hi Mizoram sawrkara Urban Development & Poverty Alleviation (UD&PA) Minister K. Sapdanga hovin, Lunglei Municipal Council (LMC)-a Vice Chairman K. Lalrinawma leh Executive Councillor Lalhruaitluangi Sailo te, UD&PA Secretary Lalmalsawma Pachuau leh Director Jacob Lalawmpuia te'n Union Minister of Housing & Urban Affairs Manohar Lal kut atangin an dawng a ni.

Journalist boral te Ex-Gracia hlan

Aizawl : Information & Public Relation, Printing and Stationary Department Minister Dr. Vanlalthlana chuan I&PR Conference Hall, Lianchhiari Run, Aizawl-ah, July 16, 2025 khan nikum leh kumina Mizoram Journalist Association (MJA) member boral ta te pualin lusun chhungte hnenah Sawrkar ralna thilpek (Ex-gratia ) a hlan.

Vawiina MJA member boral, an puala sunna hun hman takte hi:

1.  Lalhmingmawia Pachuau, Pasaltha Daily Chanchinbu Editor, 21-11-2024 a boral ta te,

2.  Johan Lalhmunmawia, News Stringer, DDK, Lunglei, 02-12-2024 a boral ta te,

3.  H. Lalngaihawma, Hnehtu Daily Newspaper Editor, Aizawl, 23-03-2025 a boral ta te leh

4.  T.C. Lalmuankima, Correspondent, RNU, AIR, 23-12-2024 a boral tate an ni a.

  Sawrkar chuan accredited Journalist boralte chu Rs. 150000 leh non-accredited Journalist boralte chu cheng Rs. 100000/-in a ral thin a ni.

Bazarpui dinhmun thlirho

Aizawl : Commerce & Industries Department Minister F. Rodingliana hovin July 14, 2025 khan a Office Chamber-ah Department thuneituten Aizawl Bazarpui ti a hriat, Aizawl City Centre leh Aizawl City Centre Annexe Building sak mek dinhmun ennawnin an thukhawm.

  He thutkhawmah hian Bazar building thiah hmaa seat nei, bazar building sak zawh a nih huna seat pek leh tura inremna a siam pui mi 1300 chuang te chungchang ngaihtuah a ni a. Heng mite chungchang hi endik leh vek tura tih niin Sawkar dan dinglai angin heng bazar seat-te hi midang kuta hlanchhawn emaw hralhchhawn khap tlat a ni tih tarlan a ni a.

  Bazar seat changtu zinga hralh chhawng emaw inhlanchhawng man chhuah an awm a nih chuan an allotment cancel ni se tia rel a ni a. Dawr luahman ennawn bakah dawr luahtuten security deposit an dah a tul tur thu sawi a ni bawk.

CS leh ACM te thukhawm

Aizawl : Chief Secretary cum Chief Vigilance Officer Khilli Ram Meena hovin Mizoram Anti-Corruption Bureau hotute chu Chief Secretary Conference Hall, MINECO-ah July 14, 2025 kha an thukhawm a, Mizorama ACB hnathawh kal mekte leh tun hnaia ACB hmasawnna leh hmalakna hrang hrangte an sawi ho.

  Khilli Ram Meena, Chief Secretary cum Chief Vigilance Officer chuan ACB Staff-te hnathawh chu fakawm a tih thu leh a thlawp tlat thu sawiin, ?an la thar zel turin a fuih a, ram dan leh dunte uluk taka zir chianga, corruption dona kawnga theihtawp chhuah zui zel turin a chah a ni. 

  Lalbiakkila, Sr SP ACB report pek danin tun dinhmunah Mizoram ACB-te hian Case chhui lai (investigation) 12 leh Preliminary enquiry tih mek 13 an nei a, kum 2025 bikah hian regular case 4 chhui zo tawhin Preliminary enquiry chhui zawh tawh 7 an nei tawh bawk a ni.

Chief Minister-in Prime Minister hmu

Aizawl : July 15, 2025 khan Chief Minister Pu Lalduhoma chuan Prime Minister Narendra Modi chu a chenna in, Delhi ah a hmu a, inkawmna hun tha tak an nei.

  Thenzawl Peace City Project chungchang te, Aizawl to Thenzawl kawngpui National Highway a siam chungchang te, Handholding Policy hmalakna chungchang te an sawidun a. Tunhnaia Chin Hills, Myanmar-a buaina in Mizoram a nghawng dan chungchangte pawh an sawi bawk. 

  Chief Minister hian Prime Minister chu Bairabi - Sairang Rel kawng thar leh Sairang Railway Station thar hawn sak turin a sawm a. Prime Minister chuan a hmun ngeiah, hun remchanga rawn hawn a tum tur thu a lo hrilh.