The Week That Was on July 25, 2021

Admin - Jul 24, 2021

The Week That Was on July 25, 2021

CMRF -ah chhunglut
COVID-19 hrileng mek laka mipui an him theih nan leh a tul apianga hman turin July 22, 2021 khan Synod Office Staff Welfare chuan Rs. 2,00,000/- an chhunglut. Heti hian COVID-19 dona atana sum la awm mek chu Rs. 3,90,08,208 a ni a. Nikum atanga lut tawh zawng zawng belhkhawm hi Rs. 29,21,22,678 niin, hman tawhna belhkhawm hi Rs. 25,31,14,470 a ni. 

Sample test runpui
July 22, 2021 khan SAD Conference Hall, MINECO ah Aizawl khawpui leh a chhehvel hmun thenkhata sample test runpui (mass testing) neih mek chungchang sawiho a ni a. Health & Family Welfare Minister Dr. R. Lalthangliana'n kaihruaiin, MOT Chairman Dr. ZR Thiamsanga, MLA, Aviation Principal Consultant Wing Commdr J. Lalhmingliana leh Health Secretary R. Lalramnghaka bakah Health Department hotute, leh ZMV hotute an tel a ni.

MP-in KAWM
Lok Sabha MP Pu C. Lalrosanga chuan July 22, 2021 khan Parliament Central Hall-ah Minister of State for External Affairs thar RK Ranjan Singh kawmin Myanmar atanga Mizorama raltlante tanpui dan chungchang a sawipui.

MAMIT DC-IN TLAWH
July 21, 2021 khan Dr. Lalrozama, IAS Mamit District Bawrhsap chuan Chuhvel khaw daia IR Camp leh Motor kawng laihte enfiahin a tlawh. Mamit DC hmalakna hnuaia kalkawng thar laih hi IR Camp thar sakna hmun Bilpadawp Tlang laih thlen a ni tawh a. JCB 2 leh Hitachi 1 hnathawka awm tawh sa bakah Mizoram Earthmovers Owners Union te'n an rawn tirh JCB - 2 te'n an awm chilh nghal bawk

Delta leh Eta Variant
Dr. Pachuau Lalmalsawma State Nodal Officer & Official Spokesperson on COVID-19 chuan COVID-19 hrik chhuak thar a awm leh awm loh finfiah tura Mizoram atanga COVID-19 positive te swab sample 100 Whole Genome Sequencing tura National Institute of Biomedical Genomics (NIBMG), Kalyani, West Bengal-a an thawn result niminah an hriat thu sawiin, sample 100 an thawn zinga 75 ah COVID-19 hrik thar chi thum hmuh a nih thu July 21, 2021 khan a puang.

SUPPLY CHAIN
AMC area huamchhunga sa, thei leh thlai ei tur an ruamhmanna chungchangah COVID-19 Fruit & Vegetable Supply Chain Committee chuan 21st July 21, 2021 khan sawrkarin lockdown a puan bawhzuiin Aizawl Municipal Area huam chhunga mipui ten sa, thei leh thlai lama eitur kan hmuh theih nan ruahmanna a siam.

Sample test runpui neihna hmun tlawh
Health Minister Dr. R. Lalthangliana leh I&PR Minister Pu Lalruatkima ten July 20, 2021 khan Aizawl khawpui leh a chhehvel veng/khua 6 a sample test runpui neihna hmun Tuirial, Bethlehem Vengthlang, Armed Veng South, Chhinga Veng, Saron Veng leh Electric Vengte an tlawh.

HMAN PUI
July 20, 2021 khan Pu Romawia Royte, Tourism Minister chuan International Conference on North East India Tourism, Tezpur University leh Finderbridge Tourism in an huaihawt chu khuallian niin video conference kaltlangin a hman pui.

SOP
Health & Family Welfare Department chuan July 19, 2021 khan thuchhuah siamin Mizoram State Entry Point ah COVID-19 test leh a kaihhnawih chungchanga a hnuaia a inkaihhruaina Standard Operating Procedure tarlan chu mipui hriat atan an puangzar.

Pathum tling
14 February, 2021 khan National Talent Search Examination, 2020 buatsaih a ni a, National Council of Educational Research and Training (NCERT), New Delhi-in 16 July, 2021 (Zirtawpni)-ah result tichhuakin, Mizoram atangin naupang 3 (pathum) an tling.
Lalkhawngaihi    Home Mission School 
Samuel C. Vanlalpeka    St. Pauls HSS
Simon Lalremsiama    St. Pauls HSS

International ONLINE WORKSHOP
July 20, 2021 khan InSPA, Mizoram leh Directorate of School Education tang dûn buatsaihin Mizoram chhunga Secondary School Teacher-te tân ni hnih awh tur 'International Online Workshop on Issues in School Psychology' sawihona neih tan a ni.

Governor lalut
July 19, 2021 tlai khan Dr Kambhampati Haribabu chu rinawmna thu tiam tir a nih hnuah Mizoram Governor 22-na atan lakluh a ni a. Aizawl khawpui huam chhungah Pathianni zing (18.07.2021) atanga Total Lockdown puan a nih leh tak avangin Governor thar lakluhna inkhawmah hian sawm bik mi tlem te chiah an tel a ni.

SAWIHO
July 19, 2021 khan SAD Conference Hall, MINECO ah July ni 24, 2021 thlenga AMC huamchhunga total lockdown leh Mizoram chhung hmun danga inkhuahkhirhna kalpui chhunga chetlak dan tur relho a ni a. He hun hi Health & Family Welfare Minister Dr. R. Lalthangliana'n kaihruaiin, I&PR Minister Lalruatkima, MOT Chairman Dr. ZR Thiamsanga, MLA, Pu Vanlalhlana, MLA, C. Lalmuanpuia, MLA, C. Lalsawivunga, MLA, AMC Mayor Lalrinenga Sailo, Chief Secretary Lalnunmawia Chuaungo bakah Health Department hotute, AMC hotute leh Aizawl City Local Council Association aiawhte an tel a ni.

Share now