Mizoram Police-in Meth. leh Heroin thahnem tak man

Aizawl : Mizoram Police leh an thawhpui te chuan tunkar kalta chhung khan hmun hrang hrang atangin Methamphetamine leh Heroin thahnem tak an man.

  Ni 21.07.2026 khan CID (SB) leh Kolasib DEF tangkawp chuan Khamrang khaw daia National Highway-ah ruihhlo vai beihpui an thlak a. Methamphetamine mum ni ngeia rin Kg 15 (mum nuai 15 vel), cheng nuai 1,200 (₹12 crore) man hu a ngaih an man. 

  July 22, 2026 khan Special Narcotics Police Station leh 34 Assam Rifles tangkawp chuan Khatla, Aizawl-ah Heroin gram 21.330 Khaini bur-a dah an man. A kaihhnawih-ah mi pakhat an man a, an thil man cheng nuai 16 man anga chhut a ni

  Sethlun, Lunglei-ah 21.07.2026 zan khan DSB Lunglei leh 92 Bn BSF Zotlang, Lunglei tangkawp chuan Heroin No. 4, hawng 6, gram 71.59 a rit, ₹14,31,800 man hu, mi pahnih kut atangin an man. Lunglei PS-ah thubuai ziah luh a ni. 

Mizorama zirlai ten Peaceful demonstration huaihawt

Aizawl: Pawl tanchhan nei lo, Mizorama zirlaite chuan Delhi-a an zirlaipui leh thalaipuiten lungawi lohna an lantir mek an thlawpzia lantir nan July 22, 2026 khan Aizawlah peaceful demonstration an huaihawt.

  Vana Pa Hall kawt, Aizawlah chawhma dar 10:00 atanga hun hman niin, Delh-a Jantar Mantar-a Cockroach Janata Party (CJP) leh All India Students Federation (AISF) te lungawi lohna kal mek leh anmahni thlawpa activist Sonam Wangchuk-a’n an thlâwpzia lantîrna a nih thu Mizoram zirlaite chuan ZALEN an hrilh.

  Nawrhna an huaihawt chhan ber hi May thlaa NEET exam zawhna put leh a kaihhnawih vang a ni a, Union Education Minister Dharmendra Pradhan-a chu he thila mawhphurhna laa bâng turin an phut a, zirlai thi te zangnadawmna pe turin leh tih luihnaa damdawi in-a dah Sonam Wangchuk chhuah turin an phut bawk.

Scooter-in CYMA president chesual

Aizawl : Central YMA President R.Lalngheta chu July 22, 2026 tlai a pisa kai haw lam Ngaizel pheiah a scooter khalhah chesualin a ban vei lam bul ball joint (ban inzawmna) a keh a, zanah zai nghal a ni.

  R.Lalngheta hi Central YMA Pisa a kai haw lam niin a chetsual hun hi tlai dar 3:15 vel niin an awmna, Hlimen Branch YMA secretary chuan ZALEN a hrilh. Trinity Hospital, Silaimualah enkawl a ni a, R.Lalngheta hi tun thla tir khan Trinity Hospital-ah vek hian a lung lam in-check-in a lo lut tawh bawk.

Rajya Sabha MP atan K. Laltluangkima la lut

Aizawl: July 20, 2026 khan Mizoram Rajya Sabha MP atana thlan tlin K. Laltluangkima chu Parliament-ah rinawmna thu tiam tirin Rajya Sabha MP atana lakluh a ni. 

  Tarlan tawh angin Rajya Sabha MP thlanna hi June ni 18 khan Aizawl-a Assembly Annexe ah neih niin ZPM Candidate K. Laltluangkima hian Vote 26 hmu in Rajya Sabha MP atan hian thlan tlin a ni.

DC hovin CYMA leh CYLA ten SIR 2026 sawiho

Aizawl : July 23, 2026 khan Lawngtlai Bawrhsap leh District Election Officer (DEO) nibawk Donny Lalruatsanga kaihhruaiin Special Intensive Revision (SIR) 2026 kalpui mekah Central YMA hruaitute nen inkawmna an nei a. Dr. Lorrain Lalpekliana Chinzah, Adviser to Chief Minister leh Lawngtlai East bialtu MLA nibawk chuan a telpui.

  Dr.Lorrain Lalpekliana Chinzah chuan 'Electoral Roll' felfai tak neih a nih theih nan a theihtawp chhuahtute fakawm a tih thu a tarlang a. Claims and Objection- kalpui mek a nih angin, fimkhur zual hun lai tak a ni tiin, mawhphurhna neite fimkhur zual turin a chah a. Central YMA leh Central YLA - ten SIR 2026 an ngaipawimawh chu fakawm a tih thu tarlangin, E/ Roll- a hming chuang theite chauh an chuan theih nan leh Electoral Roll dik, felfai tha leh rintlak a awm theih nan a theihtawp a chhuah tur thu sawiin, a bik takin Political Party te thahnem ngai taka lo tawiawm turin a sawm bawk.

State Education Ministers Conclave ah tel

Aizawl: July 23, 2026 khan Education Minister Dr. Vanlalthlana chuan Department of School Education & Literacy (DoSEL), Union Ministry of Education buatsaih, ni hnih chhung awh "Two-Day Conclave of State/UT Education Ministers on Review of Centrally Sponsored Schemes" New Delhi-a neihah a tel.

  He inhmuh khawmah hian DoSEL hnuaia Centrally Sponsored Scheme (CSS) pahnih, Samagra Shiksha leh PM POSHAN chungchanga hmalakna leh hmathlirte sawi ho a ni. 

SWW&CD leh SELCO Foundation ten MoU an ziak

Aizawl: Social Welfare, Women & Child Development Department leh SELCO Foundation ten Anganwadi Centre (AWC) 300-te service pekna leh an infrastructure tih chakna turin July 23, 2026 khan MoU (Memorandum of Understanding) an ziak. 

  He MoU ziahna hi Social Welfare, Women and Child Development Minister Lalrinpuii chuan khuallian niin hun a hmanpui. He inremna hi SWW&CD Commissioner & Secretary Lalzarmawii leh SELCO Foundation Senior Project Manager Lalnuntluanga ten an ziak a ni.

  SELCO Foundation nena an thawhhona hian Anganwadi Centre-te chu sustainable energy hmangin a tichak dawn a. Decentralised Renewable Energy (DRE) solution leh infrastructure development support hmangin Anganwadi Centre-te chu hmun tha zawk, hman tlak zawk leh energy hman dan tha zawk an nih theihna turin thawhhona hi kalpui tur a ni.

ACH-in Kayakalp Award 2025-2026-a pakhatna nih lawm

Aizawl: May 22, 2026 khan Aizawl Civil Hospital Conference Hall-ah Health and Family Welfare Minister Lalrinpuii chuan Aizawl Civil Hospital-in Kayakalp Award 2025-2026-a pakhatna lawmman an dawn lawmna chu khuallian niin a hmanpui.

  ‘Kayakalp’ hi Sanskrit tawng a ni a, Transformation / Rejuvenation’ tihna a ni. Sawrkar damdawi in fai tehna a ni a, Swachh Bharat Mission hnuaia Ministry of Health and Family Welfare buatsaih a ni. Aizawl Civil Hospital hian ‘District Hospital’ fai ber lawmman an dawng a, kum 2015 khan an lo dawng tawh bawk a ni. Kayakalp Award dawng tur hian damdawi in te hian Internal Assessment an tih hnuah Peer Assessment leh External Assessment te an paltlang a ngai a ni.

CM-in a department thar DP&AR review meeting neihpui

Aizawl : Chief Minister Lalduhoma chuan July 21, 2026 khan a office-ah a department DP&AR hmalakna enpuina (Review Meeting) a neipui.

  Department of Personel & Administrative Reforms hian General Service Wing, Administrative Reform Wing, Secretariat Service Wing, Civil Service Wing leh MPSC te an enkawl a, sawrkar hnathawk zawng zawngte viltu a ni. He hunah hian heng department peng hrang hrang te hma lak tawhna leh hmalak zel dan tur te sawiho a ni.

Traffic Sleeveless Jacket (Vest) hlan

Aizawl: Mizoram Cooperative Apex Bank Ltd. chuan Aizawl Traffic Police-te hnathawh an ngaihhlutzia lantir nan Apex Bank Head Office Conference Room-ah Traffic Sleeveless Jacket (Vest) 320; Rs 4,48,000/- man hlanna hun July 21, 2026 khan an hmang a. 

  He hunah hian Apex Bank Chairman Lalnunsanga, chuan Mizoram Cooperative Apex Bank Ltd. aiawhin Traffic SP C. Vanlalvena hnenah Traffic Sleeveless Jacket hi a hlan a ni.

Ruihhlo Do Core Committee thukhawm

Aizawl : Chief Minister Lalduhoma kaihhruaiin Mizoram State Core Committee on Ruihhlo Do te chu July 21, 2026 khan CM Conference Hall-ah an thukhawm a, an hmalakna hrang hrangte an thlirlet.

  He hunah hian Excise & Narcotics, Police Department, Social Welfare leh Central YMA atangin an hmalakna report ngaihthlak a ni a. Ruihhlo Do Core Committee sum hman tur chungchang pawh an sawi a ni.

  Chief Minister chuan ruihhlo dona kawnga hmalatu department leh tlawmngaipawlte chungah lawmthu a sawi a, tunah hian ruihhlote hi do rem vek lo mahila, kan hmalakna hi a sawt hle tih a hmuh theih a ni, a ti.

  Meeting-ah hian K. Sapdanga, Home Minister leh Lalnghinglova Hmar, Excise Minister bakah member te an kal tha hle.

Vanapa Hall & Park Architectural Design lawmman sem

Aizawl : July 20, 2026 khan I&PR Mini Theatre-ah Chief Minister Lalduhoma chuan Vanapa Hall & Park Architectural Design lawmman a dawngtute hnenah a hlan.

  Lawmman pakhatna dawngtu hi Catalyst Architecture Studio an ni a, Architectural Firm pathum (3) te hnenah Consolation Prize leh firm dang pahnih (2) hnenah Honorarium hlan an ni bawk.

Larsap-in MRB Annual Report 43-na a tlangzarh

Aizawl: Mizoram Larsap General (Dr) Vikay Kumar Singh chuan July 20, 2026 khan Financial year 2025-2026 chhunga Mizoram Rural Bank (MRB) hmalakna hrang hrang tarlanna 43rd Annual Report chu Lok Bhavan-ah a tlangzarh. 

  MRB Annual Report-in a tarlan dan chuan Financial Year 2025-2026 chhungin Mizoram Rural Bank chuan sum chevel, deposit leh loan pek chhuah cheng vaibelchhe 10,656.08 nei tlingin nikum aiin za zela 11.26 in a tam a, hmarchhak state Rural Bank zingah a tam ber. 

  Hlep (Net Profit) cheng vaibelchhe 152.27 hmuin, hmarchhak state Rural Bank zingah pahnihna a ni a. Bank Branch tin sum khawih zat Business per Branch (BpB) cheng vaibelchhe 100 aia tam nei thei India ram Rural Bank pali zingah telin, BpB cheng vaibelchhe 100.53 a nei tling a ni. 

  MRB hi Mizoram bank zingah loan pe chhuak hnem ber niin cheng vaibelchhe 4,129.98 a tling a, sum dahluh dawng tam ber dawttu niin cheng vaibelchhe 6,526.10 a tling pha bawk.