END ten hmun hnih-ah Methamphetamine man

Aizawl : Excise & Narcotics Department leh Assam Rifles thawkho chuan July 23, 2025 (Nilaini) zan khan Zote - Bulfek kawng pui, Champhai District-ah Methamphetamine Kg 1 & gram 110 (Tablet 10,100) leh a neitu nia puh - Lalfakawma (27) s/o Biakzauva (L), Dampui, Myanmar, tuna Champhai Kanan venga khawsa mek nia inchhal chu an man.

  Excise & Narcotics Department leh Assam Rifles thawkdun chuan July 24, 2025 zing khan Tuikhuahtlang, Aizawl-ah Methamphetamine Kg 1 & gram 972 (Tablet 20,000) leh a neitu nia puh mi pathum - Taj Uddin (22) s/o Azizur Rahman, Jurbari, Patharkandi PS, Karimganj, Assam; Mahub Hussain (21) s/o Abdul Salam, Purachandpur, Patharkandi PS, Karimganj, Assam leh Halal Uddin (21) s/o Babul Miah, Dharmanagar, Tripura-a khawsa nia inchhalte chu an man. Methamphetamine phurhna atana an hman car, Wagon R, Regn No. MZ01 V-3492 pawh hrensak nghal an ni.

NE Band Competition-ah Mizoram pakhatna

Aizawl : July 23, 2025 khan NCC North Eastern Region Directorate-in Republic Day Camp 2026, New Delhi-a North East aiawha kal tur thlanna atan NCC group wise band competition chu Assam State, Digboi-ah a buatsaih a ni a, Mizoram band party te chu pakhatna an ni. 

  He intihsiaknaah NCC group hrang hrang atangin band party pasarih - Assam atangin pali, Nagaland, Mizoram leh Tripura atangin pakhat theuh an tel a ni.

  Mizoram atanga kal Govt. School pipe band te hi 20 Mizoram Bn NCC hminga kalin, Silchar Group aiawhin an tel a. Band thiam ber lawmman pakhatna an la a ni. Mizoram band party ah hian Govt Mizo High School naupang leh Govt. Mizo Higher Secondary School naupang te an tel a ni. 

Tui tla zawng heart attack vangin thi

Aizawl : Thawhtanni-a Tiau luia tla Myanmar lam mi Khaideuhtung chu July 22, 2025 khan Tlangsam, Champhai District khawtlang chuan an zawng a, tui tla zawnga thawk chhuak zinga mi Lalhmunsiama, kum 60 mi chu tlai 5 vel khan a chau thut a. Tlangsam Health & Welness centre panpui nghal niin Med Aim Hospital panpui leh a nih hnuah a thi zui a.

  Doctor-te chuan Heart attack avanga thi a nih thu an sawi. A ruang hi tlaivarpui niin Kuly 23, 2025 vuiliam a ni.

JCB operator-in nunna a chan

Aizawl: Zothanpuia (32), Bung Bangla-a cheng, Bairabi khua chu 22.7.25 chawhma dar 10 vel khan JCB-a chetsualna avangin a thi.

  Zonuntluanga hi JCB operator a ni a, Muanna Veng huam chhung Laipuitlang Thlamual bulah hna a thawk a, kopanga hna a thawklai a chesual a ni. A chetsualna hmun hi a sang ang reng a, a chetsualna hmunah hian a hliam tuar loin a thi nghal a ni.

  Zonuntluanga ruang hi Bung Bangla-a an chenna inah lak a ni.

YouTuber pakhat lakah FIR thehlut

Aizawl : Mizoram State Commission for Protection of Child Rights (MSCPCR) chuan July 21, 2025 khan Aizawl Police Station OC Lalnunmawia hnenah YouTuber, Michael Siakeng NicholasS lakah FIR an thehlut. 

  MSCPCR chuan Zirtawpni (18.07.2025) khan YouTube Channel neitu pali (4) te chu naupang pakhat harsatna tawk chu a nihna chhuichhuah theihna tura video an YouTube Channel-a an upload avangin a ko a. 

  A chhan leh avang sawi lova he huna in lan lo - Michael Siakeng NicholasS lakah hian BNS Section 206 - Absconding to avoid service of summons or other proceeding behchhanin FIR hi Commission aiawhin Darthakunga, Member, MSCPCR chuan a thehlut a ni.

CM-in Trauma Care facility hawng

Aizawl: July 24, 2025 khan Chief Minister Lalduhoma chuan Civil Hospital, Aizawl Trauma Care Facility thar a hawng.

  Civil Hospital Aizawl Trauma centre hi a sakna tur ram chungchangah buaina a awm avang leh Covid 19 avangin sak mai lohvin a awm a, kum 2022, Febuary khan sak tan a ni a, vawiinah hawn a ni ta a ni.

  A building sakna sum hi central atangin Rs 121.50 lakh dawn a ni a, state sum Rs 450.00 lakh pek belh a ni. A buildingah hian Reception leh triaging area, Treatment area, Observation room, imaging room (Xray/CTsacan) Minor OT/Resucsitation room leh doctor/Staff room te a awm a, a chunglama zawm theih tura duan a ni.

AR ram advisory committee thukhawm

Aizawl: Assam Rifles ram chhuahsan hman zui dan tur ngaihtuahtu Advisory Committee te chu July 24, 2025 khan an Chairman Lalduhoma, Chief Minister hovin an thukhawm.

  Meeting-ah hian Mizoram Synod atanga lehkha hmuh te, AR ram chhunga mimal ram nei court thubuaia lut mek (pending case) chungchang te, AMC, GPC Mizoram State Assembly, Health, P&E leh PHE Department atanga dilna lo lutte an pharh a ni.

  Aizawl Civil Hospital Complex tihzauh nana Aizawl Police Station awmna hi hman a nih theih nan AR ram chhuahsanah hian Aizawl Police Station hi dah ni se tia Health Department dilna chu a thuphunga pawm (in principle) a ni a, zirchianna neih zui tur a ni.

  PHE lamin tui dahkhawlna, hmun pathuma siam an dilna pawh, an siam dan tur design te hriatsak hmasak ni se an ti bawk.

  Committee hian chhuahlam pangah hian kawngpui sial thain a hria a. PWD lamin an lo enfiah ang a, mimal leh pawl hmunhma a khawih theihte zirchian a ni bawk ang.

Damdawi in tha tehnaah PHC pali tling thar

Aizawl : India rama sawrkar damdawi in tha bik tehnaah Mizoram chhunga Primary Health Centre pali – South Vanlaiphai PHC, Sairang PHC, Bunghmun South PHC, leh Kawrtethawveng PHC te chu July 24, 2025 khan an tel thar.

  India rama sawrkar damdawi in ?ha bik tehna, National Quality Assurance Standards (NQAS)-ah South Vanlaiphai PHC, Sairang PHC, Bunghmun South PHC, leh Kawrtethawveng PHC te chu an tling thar a, a tehnaah 93.07%, 94.64%, 93.21% leh 92.44% te an hmu. PHC zingah NQAS National Certificate hmu hi 26 an awm ta a ni.

  Heti hian Mizoram chhunga Sawrkar damdawi in 36 te chu NQAS national certificate nei tawh an ni a. Tunah hian sawrkar damdawi in 21-in state level certificate nei tawhin national certificate result nghak mek 4 an awm bawk a ni.

Lalrintluanga Sailo, MLA vuiliam

Aizawl : July 21, 2025-a thi Dampa Bialtu MLA Lalrintluanga Sailo vuina chu July 23, 2025 khan a chenna in, Luangmual-ah neih a ni a, official programme-ah House Leader Lalduhoma, Chief Minister chuan thlahna thu a sawi a, sawrkarin a theih apianga a tih tur thu a sawi.

  Lalduhoma chuan, House leader a nihna leh an party aiawha ding a nih thu a sawi a. Mizoramin sitting MLA hi mi 10 kan chan tawh niin ka hria a. Vawiina kan vui mek Lalrintluanga Sailo hi legislator tha, debater ropui tak a ni. Ka nau a ni a, a hmingin kan ko mai, Pu kan belh ngai lo. Kan nupa hi u angin min en a, kan ngaina em em a ni. 1993 a Bilkhawthlir biala ka zuk din khan ka campaign Chairman a ni tluan zak a, kan riak dun zel thin. Tunah kan han MLA dun a, Session-a kan han che vel te hi mi inhal tak emaw min ti mai thei. Mahse a ni lo, kan innel em em zawk a ni, a ti.

  "Assembly Session-a a thusawi hnuhnung te ka thlirlet a, ka lung a leng hle a, lawmthu sawiin a thu hnuhnung te kha a khar a ni". A nupui fanaute lo thlaphang lo ula, thian tha tam tak in nei tih hria ang che u. Sawrkar pawhin a tih theih apiang a ti dawn a ni," a ti bawk.

NHIDCL Managing Director-in Executive Director thar ruat

Aizawl : July 22, 2025 tlai khan Lok Sabha MP Richard Vanlalhmangaiha chuan National Highways and Infrastructure Development Corporation Limited (NHIDCL) Managing Director Dr. Krishan Kumar chu a office-ah a kawm a, Mizoram-a NHIDCL kawng siam chungchanga harsatna an tawh dan te a sawipui.

  NHIDCL Managing Director hian kawng chhia chu pawi a tih thu sawiin Technical Director Amarendra Kumar pawh an hnathawhna hmuna hna chak zawk leh tluang zawk a an thawh theih nan a enpui tura Mizoram lama a tirh nghal thu Richard a hi a lo hrilh bawk a ni.

  Dr. Krishan Kumar chuan Mizoram Chief Minister Lalduhoma ngen angin Mizoram enkawltu Executive Director pawh a thar Adelbert Susungi an ruat nghal thu a lo sawi bawk a, he kawng siam nan hian Cheng Vaibelchhe 50 sanction a nih tawh thu sawiin fur avanga an thawh chak theih loh thu te leh Sairang-Kawnpui inkar pawh thlakhat chhunga thawh zawh an tum thu a lo hrilh bawk a ni.

CM-in Mizo DiasporaHub portal hawng

Aizawl : July 21, 2025 khan RB McCabe Hall, Aijal Club-ah Chief Minister Lalduhoma chuan Mizo Diaspora Cell ten LushAITech nena tangkawpa an siam khawvel hmun hrang hranga cheng Mizote inthlunkhawmna tur internet portal thar Mizo DiasporaHub a hawng.

  Diaspora Cell hi kum 2024 June ni 11-a din tan a ni a. A tir lamah kha chuan ram pawna harsatna tawk te chhanchhuah kha an hna hmasa a ni.

  Mizo DiasporaHub-ah hian welfare/association tan registration an hawng mek a, he mi zawh hian mimal registration an hawng leh ang. He portal hmang hian miin a va vahchhuahna hnai vaia Mizo Welfare lo awm te awlsam takin a hre thei dawn a, an inkhawmna hmun te, an pawl hruaitute contact pawh a hre thei ang. Tin, AI hmanga thuam a ni a, zawhna pawh zawh theih a ni. Enge maw rikrum thila thu inthawnna tur SOS chenin dah a ni. Portal hi LushAITech ten an siam niin an enkawl chhunzawm dawn a, a tul angin tihchangtlun chhoh zel a tum a ni.