Current mumal loh vangin P&E hotute hmu

Aizawl : July ni 25, 2024 khan MPCC Treasurer Dr. Lalmalsawma Nghaka leh MPCC hruaitu thenkhatte chuan tunlaia Mizoram hmun hrang hranga êng hmuh that tawk loh avangin Power & Electricity Dept Chief Engineer an hmu.

   Dr. Lalmalsawma Nghaka hian tun fur khaw chhiat laia thli leh ruah avangin electric line a tih chhiat avanga theihtawp chhuaha a siam that hna thawk a, êng neih theih nana thih ngam lu pu a, electric bana lawna siam that hna thawktu P&E Dept a thawktute chungah lawmthu a sawi bawk.

Khualzin tangkhangte ei tur pe

Aizawl : Leimin vanga kawng laka tangkhang khualzinte July 25, 2024 khan Keifang Venglai YMA ten ei leh in tur an pe.

   ZALEN thudawn danin, khualzinte tangkhangna hmun hi Keifang atanga km 9 bawr velah a ni a, Thawhlehni (23.7.24) tlai atang khan leimin vangin khualzin thahnemtak an tangkhang a ni.

   Khualzin thenkhatte chu Keifang lamah letin, khawchhungah an riak a, a tam zawk erawh an chuanna lirtheiah an riak, chung mite chu Keifang Venglai branch YMA ten ei leh in tur a hmunah kalchilhin an pe a ni.

Chhiatna tuarte chhawmdawlna hlan

Aizawl : Mizoram Assembly Speaker Lalbiakzama chuan July 22 khan a office chamber-ah a bial Chalfilh Assembly Constituency huamchhunga Cyclone Remal avanga chhiatna tuarte hnenah chhawmdawlna a hlan.

   Chhawmdawlna hi Formosa Foundation kaltlanga hlan a ni a. He Hygiene Pack-ah hian nitin mamawh tlachawp chi 7 dahkhawm a ni. FORMOSA Foundation atangin Chairman Jonathan Lalremruata leh Clinton Sherwood, Partner-te an tel bawk.

MZP Meeting-in July 31 thleng hun pe

Aizawl : Mizo Zirlai Pawl (MZP) General Headquarters, Aizawl Executive Committee meeting vawi 632 na chu July 23, 2024 khan MZP Conference Hall-ah neih a ni a. Zirlaibu a thlawna sem tur la sem zawh loh chungchang an sawi a, July 31, 2024 ral hma ngeia a dawng tur ten an dawng lo a nih chuan hmalak an tum.

   June 3, 2024 (Thawhtanni)-a MZP Executive committee meeting-in hmalak nise tia a lo rel tawh angin Meeting chuan July 31, 2024 (Nilaini) ral hma ngeia zirlaite chanvo a thlawna lehkhabu dawn tur an la dawng kimlo a nih chuan na taka hmalak nise tiin a rel a ni.

Cabinet Minister te hman tur Gas bur hlan

Aizawl : Chief General Manager, LPG, Indian Oil AOD, State Office DP Vidyarthy chuan Chief Minister Lalduhoma chu a office ah Gas bur thar (composite cylinder) July 25, 2024 khan a hlan. Heng bur a hlan te hi cabinet Ministers te hman tur niin Chief Minister leh Supply Minister hnenah hian an hman tur bik an lo pe tawh a ni.

   Chief Minister chuan hun engemaw chen hman lohva awm tawh Mualkhang Gas Bottling Plant siam tharna tur leh Oil Depot thar siamna tura an hmalakna te avangin lawmthu a lo hrilh a. Oil Depot chu Mizoram mipuiten an nghakhlel tawh a, chak takin hma la a, puih an ngaihna apianga pui turin kan inpeih reng tih a hrilh.

Lok Sabha MP-in Aviation Minister hmu

Aizawl : Lok Sabha MP Richard Vanlalhmangaiha chuan 25.07.2024 khan Delhi ah Civil Aviation Minister Ram Mohan Naidu Kinjarapu chu a office ah a hmu a, Mizoram chhim lama Airport siam dan tur a sawipui.

   Richard Vanlalhmangaiha chuan Mizoramah Airport pakhat chiah a awm avanga indaih lohna a nasat thu leh Mizoram hmun hrang hrang atanga a panna kawnga harsatna an tawh nasat thu a sawi a. Mizoram chhim lama Airport siam chu a tul thu leh a hmunhma pawh engemaw chen hmalakna a awm tawh tih a hrilh a. Civil Aviation Minister hian a hmunhma a ngaihpawimawh thu sawiin, Airport hmun tur hi a awm thei a nih dawn chuan hmalak a inhuam thu a sawi.

K.Sapdanga hovin JICA leh NDMA ten Mizoram dinhmun sawiho

Aizawl : Japan International Corporation Agency (JICA) leh National Disaster Management Authority (NDMA) lam mithiam ten Mizoram rawn tlawhin, chhiatrupna thleng palh thei lakah Mizoram dinhmun an rawn zir chiang dawn a.

   25.07.2024 khan Disaster Management & Rehabilitation Department Minister K.Sapdanga chu a office-ah kawmin, JICA leh India hmarchhak-a State te nen kum 2026 thleng a thawh ho dan turte an sawiho a ni.

   JICA te hian Mizoram leh India hmarchhak state ten khuarel chhiatna hrang hrang an tawrhna a lo ziaawm theih nan technical support a pe dawn a ni.

Community Radio Station 500 na hawng

Aizawl : July 25, 2024 khan IIMC Aizawl, MZU Campus-a India rama Community Radio Station 500 na chu Union Minister of Information & Broadcasting Ashwini Vaishnaw chuan online in Delhi atangin a rawn hawng a. A hawnna programme hi Chief Minister Lalduhoma chuan a office atangin a lo zawm.

   Community Radio station hi ram bial zim deuh zawk, 12-15 km radius huam thei FM radio a ni a, non-profit organisation/institutions, KVKs, NGOs, registered society leh Charitable Trust ang chi ten an dil thei a. A senso hi Cheng nuai 10-15 vel a ni thin. IIMC Aizawl channel hi FM 90.0 a ni.

Bio Medical Waste Treatment Plant hawng

Aizawl : Aizawl Smart City Ltd hmalakna zinga project pakhat Common Bio Medical Waste Treatment Plant, Turial chu UD&PA Minister K. Sapdanga'n July 24, 2024 khan a hawng.

   Khawl hmanga damdawiin bawlhhlawh sawngbawl a nih dan tur enchhinna (demonstration) neih nghal a ni. He project hi Aizawl Municipal Corporation Solid Waste Management Centre, Tuirial area chhunga sak niin Mizoram Pollution Control Board te nena hmalakna a ni.

   Common Bio Medical Waste Treatment Plant hi damdawiin mai bakah clinic leh healthcare facility te medical waste sawngbawlna hmun a ni a, Mizoramah hetiang Treatment Plant neih hmasak ber tur a ni. Plant hian district panga - Aizawl, Kolasib, Mamit, Serchhip leh Saitual district-te a huam ang.

CM hovin Mizoram State Board for Wildlife thukhawm

Aizawl : Mizoram State Board for Wildlife (SBWL) chu an chairman Chief Minister Lalduhoma hovin July 24 khan a vawi 10 nan an thukhawm

   Meeting hian Standing Committee of State Board of Wildlife din chungchang te, Aizawl Zoological Park luh man tihsan ve tawh thu te, wildlife victims te ex-gratia tihsan chungchang te, kum 2021 a Sai-in a tihhlum Hnianghniangi compensation dilna te, Zorinpui - Longmasu inkara kawngpui thar (NH 502A) laih tura ruahman leh Sairang -Tuipuibari inkar kawngpuia leihlawn dawhthat ngai pahnihte recommendation chungchang te, Phawngpui National Park leh Ngengpui Wildlife Sanctuary enkawl zel dan tur chungchang te an sawi.

MCCS Probationers, 2023 batch te training zo

Aizawl : July 23, 2024 khan Mizoram Combined Civil Services, 2023 batch te tana mandatory foundation training chu zawh fel niin ATI, MINECO-ah training kharna hun hi hman nghal a ni.

   Mizoram Combined Civil Services, 2023 te tana mandatory foundation training hi June ni 10, 2024 atang khan neih niin he training hi MCS, MF&AS leh MIS probationary officers te tana buatsaih a ni.

   Training hi MCS probationary officers ho tana pawh sei niin an ni hian training hi August ni 6, 2024 thlengin an chhunzawm ang.

Ruihhlo Do Monitoring Apps tlangzarh

Aizawl : Working Committee on Ruihhlo Do, 2023 in ruahmanna a lo siam tawh angin Video/Reels Competition on Drug Prevention result puan leh lawmman sem leh Monitoring Apps epi.info for Ruihhlo Do tlangzarhna hun chu July 23, 2024 khan SAD Conference Hall, MINECO ah neih a ni.

   Nikum atang khan Working Committee on Ruihhlo Do hnuaiah hian Sub-committee on Social Media chu a din a, anni hmalakna hian school zirlaite (Class 9 – Class 12) zingah leh College zirlaite zingah ruihhlo laka invenna atan Video/Clips Competition chu buatsaih a ni a. Hemi category pahnih atang hian clip 22 a lut a ni.

Governor-in RIPANS Hospital sak thar leh Campus tlawh

Aizawl : Governor Dr Hari Babu Kambhampati chuan chuan July 22, 2024 khan Regional Institute of Paramedical and Nursing Sciences (RIPANS) a tlawh.

   Governor hi Dr Sanjay D Sawant, Director leh a thawhpuiten lo dawngsangin, khum 100 awmna RIPANS Hospital sak thar chhunga section hrang hrang leh ward te an entir a. RIPANS faculty te chuan kumin kum tawp lamah hospital hi a hman tan thei dawn tih Governor hi an lo hrilh. A panna kawngpui siam tha turin MPWD hnenah ngenna an siam tawh thu leh Power supply leh tui supply-na atana PHED leh P&E Department-te puihna an mamawh thu an sawi bawk.

   RIPANS hi kum 1995-96-a NEC hnuaiah din a ni a. 1st April 2007 khan Ministry of H&FW-ah sawn leh a ni a, tunah chuan, Ministry of H&FW, Government of India in a enkawl bik institute awmchhun a ni ta a ni.

Horticulture Department in lawmman pakhatna dawng

Aizawl : Ni 20.7.24-22.7.24 chhunga Pragati Maidan, New Delhi-a International Agriculture & Horti Expo, 2024 neihah Mizoram Horticulture Department chuan July 22, 2024 khan lawmman pakhatna an dawng.

   He expo-ah hian Horticulture Department hian Mizoram chhunga thei leh thlai hrang hrang bakah thlai leh thei atanga thil siam chhuahte kengin an pho chhuak a, mipuiin an hlut hle a ni. Horticulture Department hi expo a tel ho zingah horticulture lam thil nei tha ber a thlan niin lawmman pakhatna an dawng a ni.

Chapchar Kut 2024 Post Souvenir

Aizawl : July 22, 2024 khan Chief Minister Lalduhoma, Chapchar Kut 2024 Organising Chairman ni bawk chuan CM Conference Hall-ah Chapchar Kut 2024 Post Souvenir a tlangzarh.

   Editorial Board member Lalsangzuala chuan Post Souvenir an buatsaih dan report a pe a. Kumin Chapchar Kut thupui kha 'Zo nun ze mawi - tlawmngaihna' anih angin hemi lam hawi thupui hrang hrang Mizo tawnga ziak 13 leh Sap tawnga ziak 4, thlalak te leh report te a awm a, phek 180 a chhah niin Bu 2500 siam a ni.