DOWNLOAD OUR APP

Read latest news on your phone
app-store
The Week that Was on July 30, 2023
Jul 30, 2023

Zoawi Kut 2023 hawng

Aizawl : Ni hnih awh Zoawi Kut 2023 chu 27.07.2023 khan Dawrpui Multipurpose Hall-ah Art & Culture Minister R. Lalzirliana chuan khuallian niin a hawng. 
    Zoawi Kut hi North Eastern Council (NEC) bultum niin Art & Culture Department leh MZI Gen. Hqrs. tangkawpa buatsaih a ni a. Kut thupui hi "Unity through Music" (rimawi kaltlanga inpumkhatna) tih a ni.
    Zoawi Kut ni khatna ah hian Mizoram bakah Tripura, Meghalaya, Assam, Nagaland leh Arunachal Pradesh atangin zaithiam hrang hrang leh cultural troupe te telin zai leh lam ngaihthlak a thlirho a ni.

Y20 intawhkhawmna PUC-ah hmang

Aizawl : India in G-20 President hnihna a chelh mek laia programme-a  siam zinga thalai te tinzawna programme siam, Y20 Meet on Nationalism, Patriotism and Development, intawhkhawmna, Mizoram chhunga hetiang programme 5-na chu Pachhunga College University (PUC) ah Kuly 27, 2023  khan neih a ni. 
    He hun hi Sports & Youth Services enkawltu Minister Robert Romawia Royte’n khuallian niin a hmanpui a. SEDP hnuaia Sports & Youth Services Board Vice Chairman TC Pachhunga chu he hunah khualzahawm a ni.

Kayakalp-a pakhatna nih lawmmna nei

Aizawl : July 27, 2023 khan Saitual District Hospital chuan hospital fai avanga lawmman Kayakalp-a pakhatna an dawn lawmna an nei.
    Khuallian Saitual DC, Dr. Lalngura Tlau chuan Kayakalp Saitual District Hospital in a dawng chu ropui a tih thu a sawi a. Fai chu nunpui chi a ni a ti a, naupan lai atanga thisen a than hnan khawp a kan tuipui a ngai a ni, a ti. Saitual District Hospital chu CHC level a pakhatna annih piah lamah District level category a hlan kai anih hnuah pawh pakhatna an hauh theih ngei a duhsak thu a sawi.
    Saitual District Hospital hi District Hospital puitling anga Kayakalp-ah hian chhiar a la ni lo a, Community Health Centre Category ah awmin, kumin Kayakalp-ah hian CHC 11, Stage 3-Internal assessment, External assessment leh peer assessment ah te in el in lawmman hian pawisa fai cheng Nuaih 5, Trophy leh Citation a keng tel a, hemi bakah hian Saitual District Hospital hian eco friendly category ah cheng Nuaih 2 an dawng bawk a ni.

CM hovin Laldenga Centre leh AR insawn dan tur sawiho

Aizawl: Chief Minister Zoramthanga kaihhruaiin July 27 khan CM Conference Hall ah Laldenga Cultural Centre hna tan thuai dan tur leh Assam Rifle te Zokhawsang lama an insawn chhuahna tur thil pawimawh te relin an thukhawm.
    Meeting-ah hian Zokhawsang ram paltlanga loneitute kalkawng tur buatsaih tan a nih thu tarlan a ni a, AR rama mimal ram neite chungchang pawh chak taka hmalak chhunzawm zel a nih thu tarlan a ni bawk. Union Home Minister-in April ni 1, 2023-a a lung a lo phum tawh Laldenga Cultural Centre hna bul tan thuai a nih theih dan turte sawiho niin Central sawrkar thuneitute nena indawr zui zel dan turte an ngaihtuah a ni.

Minister hovin HF&W Department in Department hnathawh thenkhat thlirho

Aizawl : Health & Family Welfare Minister Dr R. Lalthangliana hovin July 26, 2023 khan SAD Conference Hall MINECO ah Health & Family Welfare Department hotute ten Department hnuaia hmasawnna ruhrel infrastructure sak mek an thlir ho.
    Health Minister Dr. R. Lalthangliana chuan hripui a kian hnu in Department in tan an khawh a, infrastructure lamah hma kan sawn a, building thenkhat sak zawh tawh niin a thenkhatte peihfel tep a ni a, a thei chin chin zo fel turin a chah. Dr. R. Lalthangliana chuan cheng vaibelchhe 103 senga sak Zoram Medical College Academic Building thar chu August ni 7 hawn a nih tur thu leh Chief Minister chu he building hawng tura sawm a nih tur thu a sawi.

Y-20 Meet Lalruatkima'n telpui

Aizawl : Minister Lalruatkima chuan July 26, 2023 khan Vanapa Hall-a Sports & Youth Services Department leh Mizo Zirlai Pawl tangkawpin thalaite tana Youth-20 Meet on Nationalism, Patriotism & Development an buatsaih chu khuallian niin a hmanpui.
    Thalai kalkhawm hmaah thuchah sawiin khuallian Lalruatkima chuan Y-20 meet thupui atana thlan “Nationalism, Patriotism & Development” chu Mizoram tan leh a chhunga cheng thalaite tan tha a tih thu leh thangtharte tan tunlai boruak nen inhmehna tak a nei ni a a hriatthu a sawi a. 

PM-DevINE 2023-24 hnuaia hmalakna tur sawiho

Aizawl : July 25, 2023 khan Zoramthanga, Chief Minister kaihhruaiin CMO Conference Hall-ah Prime Minister’s Development Initiative for North East Region (PM-DevINE) 2023-24 atana Mizorama hmalakna tur ruahmanna awm (proposal) te sawihona neih a ni.
    Lalmalsawma Pachuau, Secretary, Planning & Programme Implementation Department in sawi hawnna a neih hnuah proposal chhawpchhuah pariat te chu a thehluttu department te powerpoint presentation hmangin sawifiahna an nei a ni.
   

NGO-Coordination Committee in Governor kaltlangin prime Minister hnenah Manipur buaina chingfel turin ngenna siam

Aizawl : July 25 khan NGO Co-ordination Committee hruaitute chuan Raj Bhavan-ah Governor Dr Hari Babu Kambhampati an hmu a. Governor hnenah hian Prime Minister Narendra Modi hnena thawn tur lehkhathawn - Prayer for Restoration of Peace and Harmony in Manipur chu an thehlut. NGO-Coordination Lehkhathawn hi Union Home Minister hnenah copy thehluh a nih bakah Union Home Secretary pawh copy pek a ni bawk.

Zohnahthlakte thlavang hauhna kawng zawh

Aizawl : Central YMA leh All NGO CC chairman, R. Lalngheta chuan, "Sawrkar in Manipur a kan unaute buaina hi a chinfel thuai theih nan inpumkhatna tha tak nen tangrual ila, kan hnenah kan Pathian a awm a, anin min hruai anga hnehna kan chang ngei ang tih hi i ring tlat ang u," a ti.
    Manipur Zohnahthlakte thlavang hauhna kawng zawh July 25, 2023 a neihah thu sawiin, R. Lalngheta chuan, "Manipur kan unaute tawrhna chu a rapthlak a, a pawi kan tiin Mizo zawng zawngte kan rilru a na takzet a, kan thinlung a rum a ni," a ti.
    "Manipur sawrkar ten kan unaute a venghim zo lo a, an in leh lo leh an Biak In te halsaka nunna tam takin a tuar te, hmeichhe pawisawilo saruaka sawisak a thah zui anni te hi hriatthiam har kan ti takzet a ni," ti bawkin, "Mizo mipuiten enliam harsa kan ti a, kan hachang kan thial mek a, India Sawrkar hian a rang thei ang ber a he buaina hi a chinfel kan phut takzet a ni," a ti bawk.

Refresher Training Course

Aizawl : Rural Development Minister Lalruatkima chuan 25.06.2023 khan Block Development Officer-te tana ni li awh Refresher Training Course, SIRD&PR, Leitan a buatsaih chu khuallian niin a hawng a. BDO te chu training hlawkthlak tak an neih a duhsak thu leh mipui rawngbawltu hna thawk an nih hre rengin an thiamna chu ram in hmasawnna rahbi a rah theihna atan hman ngei tura a beisei thu a sawi.

C&I Minister leh BRO hotute inkawm

Aizawl : July 24 khan Commerce & Industries Minister Dr R. Lalthangliana, chuan a office chamber ah Project Pushpak Border Roads Organization (BRO) hotute a kawm.
    Meeting hi Minister Dr. R.Lalthangliana leh BRO Director General Rajeev Chaudhary te Delhi a an inkawmna bawhzuina a ni a. Project Pushpak hotute nen hian Tuipui 'D' Darzo kai lei dawh chungchang te, Thingsai - Pankhua inkalpawhna kawng laih dan chungchang te an sawi a, chak zawka hma lak dan tur te an sawiho a. Meeting ah hian BRO Pushpak Mizoram Chief Engineer SP Kolipey leh a thawhpuite an tel a ni.

Kaladan compensation chungchang rel

Aizawl :  Chief Minister Zoramthanga kaihhruaiin July 24, 2023 khan a pisaah Kaladan Multi Modal Transit Transports Project kawngpui compensation chungchang relin official pawimawhte an thukhawm.
    Meeting chuan he International Highway, India Act East hmalakna hnuaia thawh hi hawn a nih thuai theih nan zangnadawmna dawngtu tur dik takte hnena zangnadawmna pe chhuak thuai tura Ministry of Road Transport & Highway-a Chief Minister hminga DO lehkha ziah ni se an ti a. Ministry in hriat belh duh a neih apiangte pawh a ranglama hrilhhriat zel ni se an ti a ni.
    Kaladan Multi Modal Transit Transport Project kawngpui laih vanga zangnadawmna dawng thei tur finfiah hi chhungkaw 138 an awm mek a ni.

Y-20 Meet Dy. CM-in hmanpui

Aizawl : Deputy Chief Minister Tawnluia chuan 24.07.2023 khan Vanapa Hall-a Sports & Youth Services Department leh MZP tangkawpin thalaite tan a Youth-20 Meet on Nationalism, Patriotism & Development an buatsaih chu khuallian niin a hmanpui.
    Khuallian chuan Mizorama Y-20 puala thupui atana thlan “Nationalism, Patriotism & Development” chu tha a tih thu leh thangtharte tan pawha pawimawh tak nia a hriat thu a sawi. Thalaite’n hma an sawn a, kawng hrang hrangah an mamawh anga dawm kang a, an tan kawng zau zawk hawn sak chu Mizoram sawrkar in a ngaihpawimawh thu leh chumi atana hmalakna hrang hrang siam a nih thu Dy. Chief Minister chuan a sawi a.

MSSSB thiah leh thiah loh
Mizoram Subordinate Services Selection Board thiah tum hi eng nge i ngaihdan?
Thiah tha ka ti
Thiah kher tul ka ti lo
Ka hrethiam lo

Latest News & Chhiar Hlawh