Zochachhuah ah Meth tam tham tak an man

Aizawl: June 30, 2026 zan khan Zochachhuah hmun ah Assam Rifle ten an thu dawn bawhzuiin Methamphetamine tablets 16000 an man a, a neitu nia rin mi pahnih an man tel bawk.

  Ruihhlo neitu a rin pahnih te hi U Sen Dui (55) S/o Sanumong Hmawngbuchhuah leh Mong Puru (51) S/o Chowlangong, Kyay Khaik, Myanmar te an ni a, heng mi pahnih te thuneitute hnenah hlan nghal an ni.

Zorinpui-ah Vaibelchhe 5.4 man hu Meth man

Aizawl: Mizoram Police, Assam Rifles leh Special Bureau Chawngte te chuan June 30 khan Zorinpui, Lawngtlai district huamchhunga Hmawngbuchhuah-ah Methamphetamin tablet Kg 1.8 a rit cheng vaibelchhe 5.4 man a chhut chu an man. 

  Heng team te hian an thudawn bawhzuiin an rinhleh In pakhat chu an dap a, Meth Kg 1.8 a rit leh mobile phone pahnih leh a neitu mi pahnih te man a ni a, heng an man zinga pakhat hi Myanmar khua leh tui niin an thil man hlut zawng hi cheng vaibelchhe 5.4 man niin chhut a ni.

Nuai 100 chuang man Heroin man

Aizawl: Mizoram Police leh Assam Rifles tangdun te chuan an thudawn bawhzuiin Seling Check Post-ah Bawngkawn Police Station te hmalakna in June 29, 2026 khan Heroin No 4 tam tham tak an man.

  An mi man hi Chandel district, Manipur lam mi niin a kut atangin Heroin No. 4 hawng 14, cheng vaibelchhe 1.13 (Nuai 113) man a chhut leh mobile phone pakhat an man.

Single-use plastic hman loh dan tur ngaihtuah

Aizawl : Serchhip District Bawrhsap Paul L. Khuma hova June 29, 2026-a thukhawm chuan Serchhip District chhunga khual zinte tlawh zin (Tourist Site) hmun pali – Vety Farm Dilpui, Vantawng Khawhthla, Tuirihiau leh Golf Course & Resort hmunahtea tawihthei lo Plastic Bawlhhlawh (Single-use) hman khapna dan leh hmalak zui dan tura ruahmanna ‘Action Plan’ chungchang sawi ho a ni.

  heng hmun pali - Vety Farm Dilpui, Vantawng Khawhthla, Tuirihiau leh Golf Course & Resort te chu Single-Use Plastics Free Zone-a puan a nih tur thu te, dan kenkawh dan turte leh dan bawhchhetute hremna tur chungchangte, mipuite’n an hriattur tarlanna (hoarding) siam dan tur te, July thla chhunga bawhzui nghal tura rel a ni.

Sawrkar leh Toyota te'n Mitdel te tana thawdunna tur thuthlung ziak

Aizawl: Minister Lalrinpuii hovin July 2, 2026 khan SAD Conference Hall, MINECO-ah, Social Welfare, Women & Child Development Department leh Toyota Kirloskar Motor-te chuan, Mizorama mitdel ten zirna kawnga hma an sawn theihna tura thawhdunna thuthlung (MOU) an ziak a. 

  MOU hi Mizoram sawrkar aiawhin Lalzarmawii, Commissioner&Secretary, SW, W&CD leh Toyota Kirloskar Motor aiawhin Ramesh Rao, Vice President- External Affairs&CSR te chuan an sign a ni.

IMPCC Meeting hmanpui

Aizawl: IPRP&S Minister B Lalchhanzova chuan June 2, 2026 khan I&PR Conference Hall, Lianchhiari Run-ah Press Information Bureau (PIB), Ministry of Information & Broadcasting, Government of India buatsaihin Inter-Media Publicity Coordination Commitee (IMPCC) Meeting a hmanpui.

  He meeting-ah hian DDK, AIR, I&PR, SPMU, IOCL, National Tobacco Control Programme, MSME, CGST, FCI, Census Operation hotute an tel. I&PR Director leh IMPCC Co-Chairperson K. Vanlalsangi’n kalkhawmte lawmna thu a sawi a, Joint Director Mina Zoliani Joute chuan meeting hi kaihruaiin, PIB Aizawl Head of Office Dr. Rajeev Lourembam chuan lawmthu sawiin he meeting hi a khar a ni.

ACB Mizoram Annual Report hmasaber tlangzarh

Aizawl: Chief Minister Lalduhoma chuan July 2, 2026 khan CM Conference Hall-ah Anti-Corruption Bureau (ACB), Mizoram Annual Report hmasaber, ACB Annual Report 2025-26 a tlangzarh.

  Kum 2025-2026 chhung khan ACB Mizoram chuan eirukna kaihhnawihah Complaint chi hrang hrang 17 a dawng a. Chung zinga 15 ah te chuan Preliminary Enquiry neiin regular case 6 a ziaklut a. Kum 2025-2026 chhung khan Preliminary Enquiry hrim hrim hi (kum hmasa lama mite pawh telin) 14 an ti zo a, Regular Case 7 an chingfel hman a. Kum 16 chhung (2010-2026) khan ACB Mizoramin Corruption Case chi hrang hrang 35-a Chargesheet atangin corruption-a inhnamhnawih mi 112 lai chu Special Court, PC Act chuan thiamloh chantirin hremna a pe a ni.

Transport Minister-in MizoTaxi App tlangzarh

Aizawl: July 1, 2026 khan MizoTaxi App tlangzarhna hun, Transport Department-a Directorate Conference Hall-ah neih a ni a. He hun hi Transport Department changtu Minister Pu Vanlalhlana chuan khuallian niin a hmanpui.

  STA Secretary leh Transport Director ni bawk Er. R. Lalrammawia chuan he Mizotaxi app hi mi eizawnna nek chep tura duan a ni lova, mipuiten sawrkar rate dik tak hmanga awlsam zawka taxi an hman theihna tur kailawn a ni, a ti a. Platform fee atana 6% an lak chungchang chu sawi zauvin, a tlem berah cheng 5 leh a tam berah cheng 10 lak a nih dawn thu leh he fee hi Mizotaxi app inrelbawlna (self-sustenance) senso phuhrutu tura ruahman a nih thu sawiin sawrkar sum tuakna hmanrua a nih loh thu a sawi bawk.

Excise Minister leh Narcotics Control Bureau hotute inkawm

Aizawl: Lalnghinglova Hmar, Minister of State (i/c), Excise & Narcotics Department leh Anurag Garg, IPS, Director General, Narcotics Control Bureau te chu July 1, 2026 khan New Delhi-a Director General office-ah an inkawm a, Mizorama ruihhlo do kawnga hmalakna kal mek leh hmachhawp hrang hrangte an sawidun.

  Meeting-ah hian ruihhlo do kawnga tangkai tak, sawrkar hnathawk leh informer te cash award dawn thin, NCB a awm mek chungchang pawh sawiho a ni bawk.

Pulse Polio Programme hawng

Aizawl: July 1, 2026 khan Directorate of Health Services, MINECO-ah National Immunisation Day 2026 Pulse Polio Programme chu Health & Family Welfare Minister Lalrinpuii chuan khuallian niin a hawng a ni.

  Polio hi India ram bikah kum 2011 khan hmuh hnuhnun ber a ni tawh a, ram ṭhenawm- Myanmar, Bangladesh, leh Afghanistan-ah te hri a la len avangin inven fimkhur la mamawh reng a ni. India ramah June 28 hi National Immunisation Day (Pulse Polio Day) atan hman thin niin, kuminah hian Mizoram district 11-ah hman a ni a. Kumina target chu naupang 102,830 niin, an pual hian immunization booth 1,430 neih a ni.

Larsap-in Remna Ni Ruby Jubilee puala hun hman a telpui

Aizawl: Remna Ni kum 40 tlin lawmna Ruby Jubilee puala Zoram Research Foundation leh Aijal Club tangkawp buatsaih, "From the Frontlines of '66 to 40 Years of Peace" tih thupui hmanga hun hman chu June 30, 2026 khan Mizoram Larsap General (Dr) Vijay Kumar Singhchuan BSI Hall, Khatla, Aizawlah Khuallian niin a telpui a, "The Case Study of the Enduring Legacy of the Mizo Peace Accord" tih project a tlangzarh nghal bawk. 

  Remna Ni Ruby Jubilee pual hian StratNewsGlobal siam "Mizo Peace Accord Documentary Series" tih chu thlir ho a ni a. Nitin A. Gokhale, Veteran Journalist, Conflict Reporter and Strategic Analyst kawmna ngaihthlak a ni a Sanjoy Hazarika, Author & Filmmaker-in thu a sawi bawk.

  "Frontlines of the Past : Conversation with Veteran Press Corp" tih thupui hmanga hun hman a ni bawk a, he hunah hian C. Lalrosanga, IIS (Retd.), MP (Lok Sabha) hlui leh Director General of Doordarshan hlui ni bawk te I&PR Director hlui L.R. Sailo te, AIR Announcer & Newsreader hlui Lalramliani Hnamte leh Mizo Aw Editor hlui D.R. Zirliana ten hun an hmang a ni.

ICT Minister hovin National Statistics Day hmang

Aizawl: Information & Communication Technology (ICT) Department Minister Dr Vanlalthlana chuan June 29, 2026 khan Directorate of Economics & Statistics Conference Hall-ah 20th National Statistics Day chu khuallian niin a hmanpui a. Kumin National Statistics Day thupui (theme) chu “Unlocking the potential of Administrative Data” tih a ni.

  Minister hian ICT leh Directorate of Economics & Statistics thawk duna an siam, Mizoram Civil Registration System (CRS) Portal a tlangzarh nghal a. CRS hi Mizoram puma piang leh thi chhinchhiahna tura siam a ni a, Central Sawrkar CRS Portal nena inchawmtawn thei tura duan niin, MeitY Empanelled CSP hnuaiah Cloud leiin he Portal hi siam a ni.