Shillong Group YMA ten NEIGRIHMS ah thisen pe

Aizawl : Shillong Group YMA huaihawtin, Shillong khawpui a Mizo thalaite'n 3.7.24 khan NEIGRIHMS ah thisen unit 60 an pe.

   Shillong Group YMA hruaitute hnen atanga ZALEN thudawn danin, Shillong Group YMA huaihawtna hnuaiah, blood donation camp hi neih niin, Shillong khawpui chhung a Mizo Kohhran hrang hrang thalai kalkhawm ten thisen unit 60 an pe a ni.

   Shillong Group YMA hruaitute chuan thisen an pek chu Mizoram atanga NEIGRIHMS pan, damlo thisen mamawhte tan a nih thu an sawi a, thisen mamawhna a sang hle thin niin an sawi.

Zemabawk-a thi te ralna K. Sapdanga'n hlan

Aizawl : Zemabawk High School veng a July 2, 2024-a leimin in a chhilh te ralna chu July 3, 2024 khan DM&R Minister K. Sapdanga Zemabawk-a Seventh Day Biak In-ah ralna nuai 4 theuh, a vaiin nuai 12 a hlan.

Ralna a hlan te hi :

1. Isaac Lalvenhima Chhangte, Kum 32

2. Lalrinthari, Kum 26

3. Abigail Lalchhanhimi, Kum 4

   Vanduaina tawk a boral ta Isaka nu leh pa F. Lalrokima leh Remruati te an insaseng hman avangin an him a, Isaka leh a nupui bakah an fanu a boral a ni.

Apex Bank-in Hlimen LC hnenah nuai 1 hlan

Aizawl : Hlimen khua Cylone Remal avanga in leh lo chhuahsan te inkhuarna tur hmun Hlimen khawtlangin an sak mek chu July 2, 2024 khan Mizoram Cooperative Apex Bank Ltd Chairman Lalnunsanga leh R Lalremsanga RCS, Cooperation Department te chuan tlawhin Apex Bank hian Rs. 1,00,000/- Local council hnenah tanpuina a hlan a ni.

   Relief camp, Central Workshop Hlimen a sak mekah hian leimin tuar chhungkaw 37-in an luahlut ang a, chhungkaw 21 luah belh theihna tur buatsaih leh mek a ni.

Criminal Law dan thar hnuaia FIR luhna hmasaber Champhai PS

Aizawl : Mizoram Police chuan Criminal Law thar hnuaia BNS-a hnuaiah First Information Report (FIR) an dawn hmasakber chu Champhai Police Station-ah a nih thu July 1, 2024 khan DGP Anik Shukla chuan a puang. CCTNS (Crime and Criminal Tracking Network & Systems) ah pawh ziahluh nghal a ni bawk.

   Champhai Police Station-a FIR lut hi ruk ruk case niin T. Lalkhawngaihi d/o Keichungnunga, Bethel Veng, Champhai chuan an thirchhia leh thil dang an dahkhawmna kudam atangin Dar quintal 1.5 chuang, cheng 119000 man chu rukchhuah a nih thu a FIR-ah hian a tarlang a ni.

Lunglei-ah Council of Ministers thutkhawm

Aizawl : July 2, 2024 Thawhlehni khan a vawikhatna atan Lunglei ah Council of Ministers thutkhawm neih a ni.

   Hriat theih chinah Council of Ministers thutkhawm/Cabinet meeting hi Aizawl tih loh Mizoram hmun dangah neih a la ni ngai lo a, tun hi a vawikhatna tur a ni.

   ZALEN thudawn danin, ZPM party inthlan manifesto ah district dang a Council of Ministers thutkhawm neih thin a tel a, chumi ang chuan an tihlawhtling ta a ni.

Assam Rifles sawnchhuah chungchang sawi

Aizawl : July 4, 2024 khan Chief Minister Lalduhoma hovin Minister, Assam Rifle hotute leh mizoram sawrkar mi pawimawh ten Zokhawsanga Assam Rifle sawn chungchang an sawiho.

   Chief Minister chuan June 20 a Union Home Minister Amit Shah ka kawm tumin amah zawkin a sawi chhuak a. "Aizawl khawpui laili atanga Zokhawsanga AR sawn chhuah hi thutlukna siam fel tawhsa a ni a, kan sawn ngei dawn a, hmalak tawh chin te enin August thlaa rawn zin ka tum a ni" tiin. Chuvangin hmalak tawh chin te leh hmabak awm te rang taka kan umzui a ngai a, Joint Meeting hi kan buatsaih ta a ni, a ti.

Naupang 11 Lung pawp hnawh sak

Aizawl : National Health Mission, Mizoram hnuaia Programme pakhat RBSK leh Ebenezer Medical Centre, Chawnpui, Aizawl te tangkawp in Mizoram-a a hmasa ber atan Naupang 11 te Lung Pawp hnawh a ni tih July 4, 2024 khan Damdawiin thuneitute chuan an sawi.

   Ebenezer Medical Centre, Chawnpui Aizawl ah Dr. Vanlalmalsawmdawngliana (Dr. Msa), Cardiologist leh a Team te hova Congenital Heart Disease Device Closure Camp neih niin, RBSK in a Mizoram chhunga veng leh khaw hrang hranga naupang lungpawp hnawh ngai an refer naupang 11 te lungpawp hlawhtling taka hnawhsak an ni. Naupang 11 te hi dam taka discharged vek tawh niin Naupang 11 te Lung pawp hnawhna man Hospital Bill hi RBSK, National Health Mission, Mizoram in a tum a ni. He Device Closure Camp hi India rama naupang lung enkawltu thiam hmingthang, Dr. Nageshwar Rao, Rainbow Hospital, Hyderabad chuan a rawn vil bawk.

Speaker hovin Media Workshop hmang

Aizawl : Ministry of Information & Broadcasting, Govt. of India leh Press Information Bureau, Aizawl tangkawpin an buatsaih dan bawhchhiate hremna dan thar pathum chungchanga Media Workshop chu July 3, 2024 khan Aijal Club-a neih chu Lalbiakzama, Speaker, Mizoram State Assembly chuan khuallian niin a hmanpui.

   Associate Prof. P. Lalremruati, Govt. Mizoram Law College chuan Criminal dan thar pathum Bharatiya Nyaya Sanhita (BNS) 2023, Bahratiya Nagarik Suraksha Sanhita (BNSS) 2023 leh Bharatiya Sakshya Adhiniyam (BSA) 2023 awmzia leh kalphungte kalkhawmte zirtirna a pe a ni.

   Workshop-ah hian MJA, Mizoram Law College, MZU IIMC zirlaite bakah sawmbikte an tel a ni.

7-Chakhei MDC Constituency inthlanah BJP tling

Aizawl ; July 3, 2024 khan Mara Autonomous District Council huam chhunga 7-Chakhei MDC Constituency a hmunruak hnawhkhahna tura inthlanna result tluang taka chhiar zawh a ni.

   Mizoram chuan 7-Chakhei MDC Constituency hmun ruak hnawhkhat turin June, 28, 2024 khan inthlanna a buatsaih a. He inthlannaah hian Voter 1875 awmin vote 1592 a tla a, 84.91 % ni in, Albert TT. Sachu, BJP chu thlan tlin a ni.

CM Relief Fund pe

Aizawl : July 2, 2024 khan Aizawl khawpui chhunga leimin tuarte chhanchhuah hnatlang mamawh lei nan Chief Minister Lalduhoma chuan CM Relief Fund hetiang hian pe:

1. Zemabawk - Rs. 30000

2. Zuangtui - Rs. 50000

3. Venglai - Rs. 5000 (Venglai hi PWD leh P&E in an buaipui)

4. Salem - Rs. 30000

5. Chawnpui - Rs. 10000

Ruihhlo Do meeting

Aizawl : Home Minister K.Sapdanga kaihhruaina hnuaiah July 1, 2024 khan DC Conference Hall, Lunglei-ah “Ruihhlo Do” chungchang meeting neih a ni.

   Ruihhlo Do Meeting-ah hian Excise Minister Lalnghinglova Hmar chuan sawrkar hotute, tlawmngai pawl leh Kohhran hruaitute nen a Ruihhlo do meeting neih a tulna chhan a sawi a, Ruihlho do hi thapui chhuah tak meuh meuh a beih a tul tawh a ti a, hmalakna hrang hrangte inhrilhhriat tawn theuh te pawh a tul a ni, a ti.

   Meeting-ah hian Lunglei Sub-Hqrs YMA hruaitute, kohhran hrang hrang hruaitute, MHIP, Police, Excise & Narcotics leh District Administration aiawha kalkhawm te chuan ruihhlo do kawng an hmalak tawhna leh harsatna an tawh hrang hrang te tarlangin, sawrkar tha tihchak tur leh puibawm tura an inpeih reng thu sawiin, tanrual a tul zia pawh an tarlang bawk a ni.

LMC Award 2024 Kick off hun hmang

Aizawl : July 1, 2024 khan Convention Hall, Convention Centre, Lungleiah LMC Award, 2024 for Cleanest Ward kick-off programme hman a ni a. Home Minister K.Sapdanga, UD&PA changtu ni bawk leh LAD minister C.Lalsawivunga te chuan khuallian leh khualzahawm niin programme an hmanpui.

   Zorinsanga Hmar, Executive Councillor chuan LMC Award 2024 for Best/ Cleanest Ward chungchang sawiin, LMC hian Lunglei khawpui sanitation hi a ngaihpawimawh ber te zing a mi a ni a. Mizoram State sawrkarin District leh Village level Fai inelna a buatsaih thin ang dungthulin Ward fai inelna hi buatsaih tum a ni a, Inel chhung hunbi hi kumin kumtluan a ni ang, a ti.

Project Intodelh inzirtirna tan inremna ziak

Aizawl : July 1, 2024 khan Mizoram Samagra Shiksha leh Tharthilthlentu (TiLi) te thawhdunna Pilot Project, ‘Project Intodelh inzirtirna’ atana chu I&PR Auditorium-ah an ziak a, School Education Minister Dr Vanlalthlana’n he hun hi a hman pui.

   Project Intodelh Inzirtirna atana thawhdunna turah hian Samagra Shiksha aiawhin Lalsangliana, SPD in hming a ziak a, TiLi aiawhin LTL Fela'n hming a ziak a ni. He Intodelhna Inzirtirna Project hi heng school sawmah te hian kalpui ani ang: Govt. KM High School, Govt. Central High School, Govt. KVM High School, Govt. JL High School, Govt. Hrangchhunga High School, Govt. Mizo Higher Secondary School, Govt. Chaltlang Higher Secondary School, Govt. Zemabawk Higher Secondary School, Govt. Republic Higher Secondary School, leh Govt. MICE, Aizawl.

Home Minister-in hmanpui

Aizawl : Dan bawhchhia te hremna dan thar pathum - Bharatiya Nyaya Sanhita (BNS), Bharatiya Nagarik Suraksha Sanhita (BNSS) leh Bharatiya Sakshya Adhiniyam (BSA) chu India ram pumah July 1, 2024 atang khan hman tan a ni a. Serchhip District ah Home Minister K. Sapdanga chuan heng dan thar hman tan hun puala function chu SP Conference Hall-a buatsaih chu khuallian niin a hmanpui a ni.

   July ni 1 atang hian Indian Penal Code, 1860 chu Bharatiya Nyaya Sanhita, 2023 chuan a thlak ta a, Code of Criminal Procedure, 1973 chu Bharatiya Nagarik Suraksha Sanhita, 2023 chuan a thlak a, Indian Evidence Act, 1872 chu Bharatiya Sakshya Adhiniyam, 2023 hian a thlak ta bawk a ni.