CMRF-ah Ayush Doctors ten chhunglut
COVID-19 hrileng mek laka mipui an him theih nan leh a tul apianga hman turin mimal, pawl leh kohhran atanga tanpuina Chief Minister's Relief Fund for COVID-19 ah dawn thin a ni a. July 8, 2021 khan Mizoram Ayush Doctors’ Association te chuan Chief Minister's Relief Fund for Covid-19 ah hian Rs. 1,20,000/- (Nuai khat sing hnih) an chhunglut a ni.

MEETING ON ASF
AH & Vety Minister Dr. K.Beichhua kaihhruai Consultative Committee Meeting on African Swine Fever chu SAD Conference Hall, MINECO-ah July 8, 2021 khan neih a ni a. Meeting-ah hian member MLA, Er. H.Lalzirliana, Dr. K.Pachhunga, Lalduhoma, K.T Rokhaw bakah sawmbik C.Lalmuanpuia te an tel a ni.

Key Population
July 8, 2021 khan Health Minister Dr R.Lalthang-liana chuan PWNM, MISNOPP, MDUF leh YWCA te buatsaih “Covid Relief for Key Population” hawnna programme Positive Women Network of Mizoram (PWNM) office, Aizawl-ah a hmanpui.

Tanpuina pe
Rev. Lalsangkima, Presbyterian Church of Korea chuan COVID-19 hrileng laka invenhimna tur Korean Facemask- KF94 (1500 nos.) chu a tul anga hman turin July 7, 2021 khan CM Relief atan a hlan a. Additional Chief Secretary JC Ramthanga'n a lo dawng a ni.

COVID-19 sawiho
July 7, 2021 khan Health Minister Dr. R. Lalthang-liana hovin SAD Conference Hall, MINECO-ah Mizorama COVID-19 hri hri leng mek chung-changa thil pawimawh chi hrang hrang sawiho a ni a. He hunah hian Medical Operational Team Chairman Dr. ZR Thiamsanga, MLA, Health Secretary R. Lalramnghaka, Health department hotu pawimawhte bakah National Health Mission hotute, DP&AR leh Finance Department hotute, ZMC a damlo enkawltu daktawrte, Indian Medical Association, Non-Government Hospital Association of Mizoram, Association of Physicians leh Aizawl Civil Hospital aiawhte an tel.

ASF-a DC thuchhuah
Aizawl District huam chhungah vawk natna hri hlauhawm tak African Swine Fever (ASF) a leng mek tih Aizawl DC chuan July 7, 2021 khan thuchhuah a siam. Hri hi heng veng/khua bakah a chhehvel leh district pumpuiah pawh leng thei reng dinhmunah a ding mek avangin, Section 144 of CrPC 1973 in thuneihna a pek angin, District Magistrate, Aizawl District, chuan Infected Area-a puan veng leh khua huamchhung a mi vawkte chu hralh emaw, talh emaw, phurhchhuah leh lakluh emaw khap tlat a ni.

PHE NGENNA
Superintending Engineer, PHE Department, Aizawl WATSAN Circle chuan Dihmunzawla Tlawng lui pump-na khawl pakhat nasa taka tui put ral thin chu July ni 13 atanga July ni 17 chhungin khawl thar a thlak dawn tih mipui te hriattur thuchhuah July 6, 2021 khan a siam. Hemi hun chhunga tuisem a khaihlak theih dawn avangin mipui te hriatthiamna a ngen a ni.

TNT Mass Exit Testing
State Field Laboratory Unit, IDSP, Health & Family Welfare Department chuan nimin July ni 4, 2021 khan TNT, Muanna Veng, Zuangtui-ah mass testing an nei

RAWTNA THEHLUT
July 5, 2021 khan Covid-19 hripui leng avanga school hawn theih a nih loh chhunga zirna kalpui dan tur rawtna leh kaihhruaina siamtu Committee-ten an rawtna School Education Minister Lalchhandama Ralte hnenah an thehlut.

RAgT TI THEI PRIVATE HOSPITAL 2 TELH BELH
Aizawl, the 5th July 2021 : Private Hospital a COVID-19 test, Rapid Antigen Test (RAgT) ti thei zingah Sawrkar in Nazareth Hopsital, Ramhlun North, Aizawl leh D.M. Hospital Venthlang, Champhai te chu RAgT test theihna phalna a pe a. Hemi chungchanga hriattirna hi Health & Family Welfare Department in June ni 28 khan an tichhuak a ni.

NAUPAI VACCINATION
Ministry of Health and Family Welfare, MoHFW, Govt. of India chuan naupai (raipuar) mek te Covid-19 vaccine pek theih tawh a ni tih 2.7.2021(Friday)-a a rawn puan tawh chu Mizoramah ngei pawh a taka hman thuai a nih theih nan chak taka hmalak mek a ni, hemi atan hian Inrinni leh Pathianni pawh chawl lovin orientation/training pek a ni.