NIRF-2023 College Ranking-ah PUC chu 34na a ni

Aizawl : June ni 5, 2023 khan Union Education Minister of State Dr Rajkumar Ranjan Singh chuan NIRF Ranking -2023 a tlangzarh a. Ram puma College tha tehna NIRF Ranking ah hian College Category-ah Pachhunga University College chu 34-na a ni.
    NIRF Ranking hi Sawrkar Laipui Education Ministry siam a ni a. Kum 2015 khan he ranking hi tihchhuah tan niin tun hi a vawi riatna a ni. Kumin hian India ram puma college 2746 an tel a, kum kalta aiin 474 in an pung. North East bikah chuan college 162 an tel a. College tha zual top 100 zingah North East atangin Pachhunga University College chauh hi an tel pha a ni.

WED 2023 lawmna hun hman

Aizawl : June 5 khan Mizoram Pollution Control Board (MPCB) buatsaihin Dawrpui Multipurpose Centre-ah World Environment Day (WED) 2023 lawmna hun hman a ni. EF&CC Department Conservator of Forest (CC) Lalrammawii Sailo (IFS),  chuan khuallian niin a hmanpui a ni.
    World Environment Day -ah hian Beat Plastic Pollution tih theme chu a vawi hnihna atan hmanna a ni a, hman nawn ngai tawh lo tura plastic bawlhhlawh tihtlem hi chu tum ber tawh tur a nih thu khuallian chuan a sawi a, kan chhehvela cheng ramsate leh luia cheng nungchate pawhin tuarin an thih phah nasa hle a, mihringte thlengin kan hriselna a tichhia a, kan thihpui nasa tawh hle a ni tiin a sawi.

Manipur raltlante buaipuitu tur te thukhawm

Aizawl : Manipur buai vanga sahimna zawnga Mizorama rawn lut te enkawl dan tur ngaihtuah tura sawrkarin a ruat “High-Level Committee on Internally Displaced Persons of Manipur in Mizoram” chu June 5 khan an chairman Lalchamliana, Home Minister hovin an thukhawm.
    Meetingah hian member te an kal tha hle a, Sawrkar department hrang hrang ten hma an lo lak tawh dan te an report a, Central YMA, MKHC leh MJA aiawh te pawhin hma an lo lak tawh dan te tarlang bawkin hmalak chhunzawm zel dan tur rawtna tha tak tak sawiho a ni. Meeting hian resolution siamin “kan unau Manipur atanga raltlan te hian ei leh bar leh tawmhulna ah harsatna an neih lohna turin theihtawpa tanpui zel nise” an ti a. Raltlan rawn lut te chhinchhhiahna mumal leh felfai taka siam turin data tha neih ngai an ti a. ICT Department lamin Management Information System (MIS) lo buatsaih se tih a ni a. 

Best RRR Centre lawmman hlan

Aizawl : June 5 khan Aizawl Municipal Corporation Auditorium-ah Ward tina Reduce, Reuse and Recycle Centre (RRR Centre) kalpui tha te hnenah Sumfai lawmman leh chawimawina thuziak hlan an ni.
    Meri Life, Mera Swachh Shehar Campaign, 2023 (Ka Chenna, Ka khawpui Faina atana Beihpui, 2023) hnuaiah May ni 20, 2023 khan Municipal Ward tinah RRR Centre hawn a ni a. Heng RRR Centre-ah te hian thuamhnaw hlui, pheikhawk hlui, lehkhabu hlui, plastic bottle ruak, naupang toys hlui te lakkhawm a ni. Heng thil hlui lakkhawmte hi a tangkaina dang atana hmannawn leh tur a ni ang.

Sihphir-ah Agriculture hnathawh te hawng

Aizawl : Chief Minister Zoramthanga chuan June 5, 2023 khan Sihphir leh Sihphir Venghlun huamchhunga Agriculture Department hmalakna a siam kilometer 16.58 a thui Agriculture Link Road 8 bakah tuikhuah 39 te chu a hawng.
    Zoramthanga chuan kuthnathawktute tana hmasawnna hnathawh hrang hrang hawn theih a ni ta chu lawmawm a tih thu a sawi. Kuthnathawktute hmasawnna tura Agriculture Minister leh a thawhpuite hmalakna chu fakawm a tih thu a sawi bawk. Mizoram chu ram leilung tha, thlai engkim that duhna ram a ni, Chief Minister chuan a ti a. Thlai thar phurhchhuahna kawnga kuthnathawktute harsatna tawh chu sawrkarin a hriatpui thu leh awlsam zawka thlai thar an phurhchhuah theihna tur kawng siam chu sawrkarin a ngaipawimawh a, hma a la zel dawn tih a sawi bawk.

Hnahthial-a sawrkar hmunhma enfiah

Aizawl : Chief Minister Zoramthanga chuan June ni 6, 2023 khan Hnahthial ah kalin, Deputy Commissioner office Complex sak hna thawh mek leh PWD Complex a circuit house sakna ruahman te a hmunah tlawhin a enfiah.
    Zoramthanga chuan Hnahthial khawpui chu district headquarter entawntlak taka siam tum a nih thu a sawi. District thar puan a nih hnu ah sawrkar chuan DC office dinna tur district thar pathum tan Rs. 10 crores theuh sum dah a nih thu leh, theihtawp a harsatna hrang hrang kara hma lak a nih zel thu a sawi. District thar pathuma hmalakna te a enpui dan leh a daihzai zawnga DC hmunhma chu office pakhat aia tam te'n an hman tangkai tura ruahman a tul thu te a sawi.

Tamdil Wetland 'Interpretation Centre & Herbarium' hawng

Aizawl : June 6 khan Environment, Forest & Climate Change Minister TJ Lalnuntluanga chuan 'Tamdil Wetland Interpretation Centre & Herbarium', Tamdil, Saitual District a mi chu a hawng.
    Minister chuan zirlaite leh research-ti turte tana tangkai tak tur 'Interpretation Centre & Herbarium' hawn a ni thei chu lawmawm a tih thu a sawi a, hetiang hawng thei tura thawktute in pekna leh thawhrimna chu fakawm tiin an hnathawh chu Mizo mipuite tan chhinchhiah tlak tak a ni, a ti.

Chhim lam Airport hmun tur enfiah

Aizawl :  Mizoram chhim lam tana air connectivity tih hmasawnna tura hmalakna pawimawh tak, thlawhtheihna tumhmun sakna hmun tura thlan (identify) enfiahna ‘Aerial Survey’ chu June 7, 2023 khan Vuakmual, Lunglei District-ah neih a ni.
    Helicopter-a Aerial Survey neih hi Kawmzawl Helipad, Lunglei atanga thlawk chhuak in, Agriculture Minister C. Lalrinsanga, Rajya Sabha MP K. Vanlalvena, Lunglei HPC Vice Chairman Lawmawma Tochhawng, leh I&PR Department, MJA Lunglei leh party hruaitu an tel a ni.

MzSRLM Annual Action Plan 2023-24 Roll Out Workshop khar

Aizawl : Rural Development Minister Lalruatkima chuan July 7 2023 khan Mizoram State Rural Livelihoods Mission (MzSRLM) ‘Annual Action Plan 2023-24 Roll Out Workshop’ kharna chu Assembly Annexe Conference Hall-ah a hmanpui.
    Lalruatkima chuan MzSRLM hmalakna tur zirhona ‘Annual Action Plan Rollout Workshop’ hun tha tak hman theih a ni chu lawmawm a tih thu a sawi a. MzSRLM kaltlanga thingtlang lama harsa zawk ten eizawnna ngelnghet an nei thei chu lawmawm a tih thu sawi bawkin, thawktu te inpekna chu a chhuanawm a ni, a ti. Self Help Group (SHG) te hmasawnna sawrkarin a ngaihpawimawh thu sawiin, MzSRLM leh scheme dang NREGS leh SPMRM te nen ‘convergence’ kalpui mek a ni, a ti a.

Foundational Literacy & Numeracy (FLN) Rally nei

Aizawl : June 7 khan NIPUN Bharat Mission buatsaihin Foundational Literacy & Numeracy (FLN) Rally Aizawl khawpui chhung Joint YMA field Vaivakawn, Bawngkawn PS & MS II, leh College Veng field ah te buatsaih a ni.
    Zirna kalphung thar New Education Policy (NEP) -2020 hnuaiah Sorkar Laipuiin zirna kawnga hmasawnna atana a duan,  naupang kum 3-9 inkara in a ziak, chhiar leh chhiarkawp te awmze nei zawka an zir thiam theih nana hmalakna Foundational Literacy & Numeracy (FLN) Rally neih a ni. FLN hi NIPUM Bharat Mission hnuaia hmalakna a ni.

Jordan Centre tihchangtlun dan tur rel

Aizawl : Social Welfare Minister Er. Lalrinawma hoin Social Rehabilitation Board Meeting chu June 7, 2023 khan SAD Conference Hall, MINECO ah neih ani.
    Meeting-ah hian Jordon Centre tih changtlun zel dan tur leh hma lak zel dantur chungchang sawi ho na neiin Jordon Centre-ah mipa bik awmna tur khum 100 atanga 200 in kar siam belh turin ruahmanna siam a ni a, hemi rual hian he hmun a awm te an thlarau nun thlenga kaihruai tu tur an awm theih nana hma lak turin leh, Jordan centre atanga an chhuah hnuah pawh a an mahni pual a eizawnna kawng zawh theih tura inzirtirna neih dan ruahmanna siam a niin Skill training nasa taka kalpui tur a ruahman a ni.

National Seminar on India and G20 nei

Aizawl : June 8 khan EF&CC Minister T.J Lalnuntluanga chuan Department of Political Science buatsaih, nihnih awh tur National Seminar on India and G20: Setting a Global Agenda chu a hawnna a hmanpui.
    T.J Lalnuntluanga chuan Mizoram Peace Accord chu kum 1986 ah neih niin, he remna avang hian Mizoram University a piang a, Mizoram University hi tunhnai a National Institutional Ranking Framework (NIRF) 2023 in a tarlan danin University tha 76th niin, North Eastern States-ah University tha 2-na a ni a ti a. Mizoram University-a Department of Political Science in G20 denchhena Seminar a neih chu lawmawm a tih thu a sawi.

Governor-in PUC hlawhtlinna lawmpui

Aizawl : Pachhunga University College (PUC) chuan June 8 khan kumin NIRF Ranking a India ram pum huapa college tha ber 34-na nihna a hauh avangin lawmna hun a huaihawt a. NIRF Ranking 34th lawmna denchhen hian ni 2 awh tur, International Symposium on " Sustaining Nature & Tribal Worldview: An ecocritical approach to Literature" a buatsaih. He hun hi Governor Dr Hari Babu Kambhampati, Chief Rector, MZU ni bawk chuan khuallian niin a hmanpui.

Social Media a thuthar thehdartute tan Workshop buatsaih

Aizawl : Information & Public Relations Department leh Information & Communication Technology Department tangkawp chuan June 8 khan I&PR Auditorium, Treasury Square ah social media kaltlanga thuthar thehdarhtu te pualin “Media Workshop for Youtubers & Related Media” an buatsaih.
    He workshop hi DIPR Minister Lalruatkima’n khuallian niin a hawng a ni. Workshop-ah hian Mizo Youtubers’ Association aiawhte leh Youtuber dangte bakah Political party hrang hranga Media Cell aiawh te, Tlawmngai pawl hrang hranga media lam buaipuitute an tel a ni.