NE SPEAKER MEETING
June 11, 2021 khan ram chhung Hmarchhak Assembly Speaker ten virtual meeting an nei, he meeting ah hian Mizoram Legislative Assembly Speaker  Lalrinliana Sailo pawh a tel a ni. Meeting hi Arunachal Pradesh Legislative Assembly Speaker, Commonwealth Parliamentary Association (CPA) Zone-III Chairman nilai chuan a kaihruai a. Hmar chhak miten chi leh hnam avanga enhranna kan tawh thin chungchang leh chumi avanga harsatna thleng thinte sawiho a ni.

Inkhuahkhirh thlirho
June 11, 2021 khan SAD Conference Hall, MINECO ah Mizorama COVID-19 inkhuahkhirhna kalpui mek thlirho a ni a, Health & Family Welfare Minister Dr. R. Lalthangliana'n a kaihruai.

RAGT NEIH PHALNA PE
Mizoram Sawrkar chuan Lungleia John Williams Hospital leh Lawngtlaia Lairam Christian Medical Centre & Hospital te chu Rapid Antigen Test (RAgT) hmanga COVID-19 screening kalpui phalna a pe. June ni 4 khan John Williams Hospital chu RAgT hmanga screening neih phalna pek an ni a, LCMC&H tana phalna hi June ni 9-ah tihchhuah a ni thung. 

GREEN MIZORAM DAY
Rural Development, Land Revenue & Settlement leh Information & Public Relations changtu Minister Lalruatkima’n Green Mizoram Day, 2021 puala inkhawm tawi Mizoram College of Nursing (MCON), Falkawna neih chu June 11, 2021 khan a hmanpui. MCON hmun hmaah thing tiak an phun nghal a ni.

CM Relief Fund
June 10, 2021 khan Chief Minister’s Relief Fund (CMRF) hman dan tur ngaihtuahtu Committee on Utilization of Chief Minister’s Relief Fund for COVID-19 chu an Chairman Lalnunmawia Chuaungo, Chief Secretary hovin Chief Secretary’s Conference Hall, MINECO-ah an thukhawm a. Mizoram hmun hrang hranga De-addiction Centre leh Childcare Institution-te puihna tur Rs. 23,39,500 pek an remti. 

MBOCWWB thuchhuah
June 10, 2021 khan Secretary, Mizoram Building & Other Construction Workers’ Welfare Board (MBOCWWB) chuan thuchhuah siamin, LESDE hnuaia Mizoram Building & Other Construction Workers’ Welfare Board (MBOCWWB) chuan Covid -19 hrileng mek avanga hnathawktu in register-te harsatna chhawmdawl nan ‘Covid-19 Package’ thar a ruahman te tarlan a ni.
 
ZMC bawlhhlawh
Health Minister Dr. R. Lalthangliana hovin COVID-19 hri kaite enkawlna hmun Dedicated COVID Hospital (DCH) Zoram Medical College-a bawlhhlawh tawih theilo (plastic waste) senghawi dan tur ngaihtuahin june 9, 2021 khan sawrkar hotu pawimawhte an thukhawm.

CAU luangchhuak
College Of Veterinary Science & Animal Husbandry and Krishi Vigyan Kendra, Central Agriculture University, Selesih a thawktute chuan COVID-19 avanga harsatna tawkte puih nan an hlawh thawkhawm chu CM Relief Fund for COVID-19 ah leh farmer te hnenah June 9, 2021 khan tanpuina an pe.

MRB TEN BOXER tanpui
June 9, 2021 khan Mizoram Rural Bank chuan Lalrinsanga Tlau, WBC Youth Super Feather Weight Champion nilai leh Boxer NT Lalbiakkima te chu an kalzelna tura senso phuhruk nan sum fai Rs 50,000/- ve ve an hlan a. Boxer te hian MRB promotion sum hi MRB Chairman Shri V.Jaya Chandra hnen atangin an dawng a. He hun hi Sports Minister obert Romawia Royte chuan a Office Chamber-ah hman a ni.

AMC Area tan CMRF
Aizawl DC leh District Task Force on COVID-19 ni bawk chuan June 8, 2021 khan Aizawl District (AMC Area Zone I-X) huamchhunga Chief Minister’s Relief Fund for Covid-19 kaltlangin Covid-19 hrileng avanga chhungkaw harsate chhawmdawlna sem chhuah dan tura inkaihhruaina a tichhuak.

SMATEE 
Mizoram State quota professional course hrang hrang (JEE leh NEET in a huam ve lohte) zir tumte tan Mizoram State Medical and Technical Entrance Examination (SMATEE, 2021) Higher & Technical Education website https://dhte.mizoram.gov.in ah ni 8.6.2021 atanga form download-in fill up hunah Technical Wing, H&TE Office, Chaltlang Lily Veng ah date 21.6.2021 (Monday) atangin documents ngaite thiltel thlapin submit tur a nih thu thuchhuah siamin an tarlang. Submit hunah hian fee ngai zat pek nghal tur a ni a. Information Brochure pawh lakchhuah nghal tur a ni.

CHAWLHNA TUR 
Kolasib district chhung a Covid-19 hrileng darh zel tur ven nan state pawn atanga nitin mamawh phurtu lirthei te khaw daia an chawlhna tur ngaihtuahin National Highway paltlang khua Thingdawl, Bualpui, Kawnpui, Khamrang leh Bilkhawthlir VLTF hruaitute leh Zonal Executive Magistrate-ten DC Conference Hall, Kolasib-ah June 8, 2021 khan thutkhawmna an nei a, Dr.H.Lalthlangliana, Deputy Commissioner-in a kaihruai a ni.

VIDEO CLIP TUTORIAL 
7.6.2021 khan Mizoram Secondary School Teachers Association (MISSTA) te chuan Video clip tutorial an siam, clip 182 chu Mizoram chhung hmun hrang hranga zirlaiten an lo hman tangkai turin Minister hnenah an hlan a. Video clip te hi Class IX  Mathematics a ni.

MEETING NEI
June 7, 2021 khan Chief Secretary’s Conference Hall ah Chief Secretary  Lalnunmawia Chuaungo chuan COVID-19 hripui darh zel tur venna atana Sawrkarin inkharkhipna  thupek “Lockdown Order” a chhuah chungchangah Mizoram Kohhran Hruaitute Committee (MKHC), Joint NGO Coordination Committee, Mizoram Business Coordination Committee (MBCo-C) leh SEC Member te meeting a neihpui.

Hri kai damlote enkawl dan leh dinhmun thlirho
Health Minister hovin SAD Conference Hall, MINECO-ah mizorama COVID-19 hri kaite dinhmun leh anmahni enkawl dan kalpui mek chu June 7, 2021 khan thlirho a ni a. He hunah hian Medical Operational Team Chairman Dr ZR Thiamsanga, MLA, Health Secretary R. Lalramnghaka, health department hotu pawimawhte bakah ZMC a damlo enkawltu daktawrte, Indian Medical Association, Non-Government Hospital Association of Mizoram, Association of Physicians leh Aizawl Civil Hospital aiawhte an tel a ni.

Reenee him lo 
Covid-19 hripui leng laka invenna hmanraw pawimawh tak pakhat Hand Sanitizer chu India ramah a lem a darh nasa hle  a. Heng zingah hian Reenee chu a him lo tih an tarlang. Hemi chungchangah hian mipui te fimkhur tura hriattirna Lalsawma, Controlling & Licensing Authority Directorate of Health Services chuan hriattir June 11, 2021 khan thuchhuah siam a, - 80% Ethyl Alcohol emaw 75% Isopropyl Alcohol chiah hman tur a nih thu an tarlang.