Home atanga tlan chhuakin lirthei leh pawisa nuai chuang ru chhuak

Aizawl: June 09, 2026 khan Aizawl Observation Home, Durtlang North atangin mi paruk (6) an tlan chhuak a, tlan chhuakte hian lirthei, pawisa leh mobile phone bakah anmahni kaihhnawih case file-te an ru chhuak.

  Bawngkawn Police Station atanga ZALEN thudawn danin, tlanchhuak mi parukte hian Observation Home atang hian Eeco Van (MZ 01 Z 0778), Realme C61 mobile phone leh pawisa fai Rs 1,50,000/- vel an ru tel a, Hemi bakah hian anmahni thubuai ziahna 'case file' an ru chhuak tel bawk.

  Mizoram Child Protection Society enkawl lai Aizawl Oberservation Home atanga tlan chhuakte zingah hian May ni 26-a Chanmari Veng, Grand Hotel bula mi sawisak rawntu kum tling lo (juvenile) te pawh an tel niin police lam chuan an sawi.

Old Pension Scheme-a let leh duh ten leave la

Aizawl: Sawrkar hnathawk New Pension Scheme hmangtute chuan June 8, 2026 khan Old Pension Scheme a let leh phutin sawrkar kar nan a huhoin chawlh an la a, hei vang hian department thenkhatah hnathawh a kaihlak phah a, sawrkar damdawiin thenkhat OPD te pawh khar a ni.

  Mizoram Movement for Old Pension Scheme (MIMOPS)-in ngenna an siam angin New Pension Scheme hmangtu mi thahnem tak chuan NPS subscriber mi 12,000 vel te tana Old Pension Scheme (OPS) a let lehna turin sawrkar kar nan vawiin khan Mass Casual Leave an la a. MIMOPS hruaitute chuan an beisei aia tamin Leave hi an la tih an sawi.

UD&PA leh AMC Corporators ten zanriah eiho

Aizawl: UD&PA Minister K. Sapdanga hoin June 11, 2026 zan khan UD&PA Department official te leh AMC Corporators thlan tharte chuan Aizawl Sumtual-ah zanriah an ei hova, Aizawl khawpui enkawlna kawngah chak taka thawhho tlan zel an tum.

  Zanriah eiho pah hian khawpui enkawlna atana Swachh Bharat Mission 2.0 tangkai zawka hman dan tur leh AMC lam atanga Solid Waste Management Rules thar tha taka zawm a nih theih nana hma an lak tawh dan leh hma lak zel dan tur sawiho a ni a, Bawhhlawh reng reng chi li-ah thliar hran a ngaih tawh dawn avangin tha taka mipuite zitirna kalpui chhunzawm zel ni se an ti bawk.

NITI Aayog Governing Council-ah CM-in thu sawi

Aizawl: June 11, 2026 khan Rashtrapati Bhavan Cultural Centre, New Delhi-ah Prime Minister Narendra Modi kaihhruaiin NITI Aayog Governing Council vawi 11-na neih a ni a. He Council thupui atan hian Human Capital for Viksit Bharat tih chu hman a ni. Chief Minister Lalduhoma pawh telin, thusawina a nei.

   CM chuan Mizoramin Viksit Bharat tihlawhtling tura ke a penna tinte chu hriatna behchhan, mitin huapzo, remna leh muanna ngaihlutna leh environment humhalh duhna nen a kal a ni zel a. Prime Minister Narendra Modi, sorkar laipui leh NITI Aayog te thawhpuina hnuaiah Viksit Bharat 2047 hi tihhlawhtlin ngei an tum tlat a ni a ti.

JCI, NJB leh ICAR te nen thawhhona thuthlung an ziak

Aizawl: Agriculture & Farmers’ Welfare Minister PC Vanlalruata office Chamber-ah June 11, 2026 khan Agriculture & Farmers' Welfare Department chuan Jute Corporation of India, National Jute Board leh Indian Council of Agricultural Research - Central Research Institute for Jute and Allied Fibers (ICAR-CRIJAF) te nen thawhhona thuthlung (Memorandum of Understanding) an ziak.

EF&CC Minister hovin Green Mizoram Day 2026 lawmna hun hmang

Aizawl: June 11, 2026 khan Youth Recreation Centre, Falkland-ah Environment, Forest & Climate Change (EF&CC) changtu Minister Lalthansanga chuan khuallian niin Green Mizoram Day 2026 lawmna a hmanpui a. EF&CC Deptt. Principal Secretary Sudhir Kumar chu khualzahawm a ni.

  Minister hian Kangmei Pumpelh tha lawmman (Fire Prevention Award) - District inelna, Ram pum huap khaw inelna leh Aizawl district chhung khaw inelna a sem.

  Kumin Green Mizoram Day thupui(theme) chu “Thing hi rangkachak anga hlu, Nunna tinreng bul a ni.” (Trees are green gold, The roots of all life) tih a ni. Youth Recreation Centre huam chhungah Minister leh Official-ten thing tiak an phun bawk a ni.

Larsap-in Green Mizoram Day pualin thing tiak a phun

Aizawl : Mizoram Larsap, General (Dr) Vijay Kumar Singh, PVSM, AVSM, YSM (Retd) chuan June 11, 2026 khan Green Mizoram Day 2026 thingphun hnatlangpui hma hruaiin tukin khan Upper Lawn, Lok Bhavan-ah Mizoram State Tree 'Herhse' tiak a phun. Larsap hnung zui hian Governor's Secretariat-a thawktu ten thing tiak an phun a ni.

ONE Championship Winner leh Contract hlawh chhuaktu Nazareth Lalthazuala lawmpui

Aizawl: Sport and Youth Services (SYS) Minister Lalnghinglova Hmar chuan June 10, 2026 khan a Pisa-ah ONE Championship Winner leh contract hlawh chhuaktu Nazareth Lalthazuala lawmpuina hun a hmang.

  Nazareth Lalthazuala hi Phuaibuang khaw chhuak niin tunah hian Zemabawk East-ah a cheng mek a, a professional record-ah vawi riat chak tawhin vawi khat mah a la tlawm lo a ni. ONE Championship-ah hian tum thum inlan tawhin a la chak vek a ni.

Opium fluid vaibelchhe 2 chuang man hu man

Aizawl : Ni 09.06.2026 khan Saitual Police team-te chuan Keifang khaw daiah lirthei pakhat Manipur atanga Aizawl pan, Somraj (32) s/o Ramrakh Ram khalh chu an lo tiding a. Lirthei hi uluk taka enfiah a nih hnuah, a chhunga thuhruk, opium fluid ni ngeia hriat bawm 71 hmuhchhuah a ni.

  Heng ruihlo kaihhnawih-ah hian Somraj (36), s/o Ramrakh Ram, Jodhpur, Padiyal, Rajasthan leh Kailash (28), s/o Mohan Ram, Narsing Nagar, Dhawa-1, Jodhpur, Rajasthan te chu an man a. Heng ruihlo man hi Kg 45.871 a rit a niin, tualchhung rate-ah cheng vaibelchhe 2.29 zet man hu a chhut a ni.

No Official Vehicle Day bus service titawp

Aizawl : Transport Department chuan June ni 1, 2026 atanga No Official Vehicle Day-a sawrkar hnathawkte office kal lam leh haw lamin an hman theih tura MST Bus Service ruahmanna a lo siam tawh chu hmangtu (passengers) an awmloh avangin June 10, 2026 khan a sut.

  Nilaini (Wednesday) tin hi sawrkar lirthei tlanchhuah loh ni "No Official Vehicle Day" a hman mek a ni.

END-in heroin gram 99 man

Aizawl : June 10, 2026 khan Excise & Narcotics Enforcement staff te chuan Zotlang Champhai, Seventh Day Adventist motor workshop pengah Heroin 99 grams (hawng 8) an man a, phurh nana hman MZ 01/L-0335 an man a, hemi kaihhnawihah hian Ikbal Hussain (28), S/o Fakar Uddin, Karimganj, Assam nia inchhal chu an man nghal a ni. The Narcotics Drugs & Psychotropic Substances Act, 1985 thlawh chhanin thubuai siam nghal a ni.

X-Band Doppler Weather Radar Lungphum phum

Aizawl: Disaster Management & Rehabilitation (DM&R) Minister Prof. Lalnilawma chuan June 9, 2026 khan MINECO Conference Hall Number 1 ah Indian Meteorological Department (IMD), Ministry of Earth Sciences, Government of India buatsaih, ‘X-Band Doppler Weather Radar’ lungphum a phum.

  He radar hi North-east region-ah khaw chin hriatlawkna atana hman tur niin, khuarel chhiatna laka invenna kawngah te, kut hnathawk te leh thlawhnaa zin veivak te tana hman tangkai theih tur a ni. Doordarshan Campus Durtlang Aizawl-ah he khawl hi bun tur a ni.

Chief Minister-in a bial chhunga hmalakna te tlawh

Aizawl: Chief Minister Lalduhoma chuan June 9, 2026 khan a bial Serchhip a tlawh a, Artificial Limbs Manufacturing Corporation of India (ALIMCO) ten a mamawhtu mi 211 hnena an nitin hmanraw mamawh 1427 an semna a telpui.

  Deputy Commissioner leh NIC te tangkawpin an siam District Plan & Project Monitoring System thar a hawng a, Bawngchawm Paragliding Take-Off tlang panna kawngpui tihzauh leh PCC thar te, Zawlpui leh a chhehvel zau inkalpawhna kawngpui tihzau leh PCC tharte a hawng bawk a. Tlai lamah Serchhip bial MLA Cup Final Programme a hmanpui bawk a ni.

Mizoram CEO-in Press mite kawm

Aizawl: June 8, 2026 khan Aizawl Press Club-ah Mizoram Chief Electoral Officer Garima Gupta, IAS chuan MIzorama SIR 2026 kalpui dan chungchangah Press mite a kawm.

  Mizoram CEO chuan mipuite chu Special Intensive Revision chhung hian a hun takah leh dik takin Enumeration Form te buaipui theuh a, BLO leh election lama hnathawk dangte chu tha taka Io tawiawm turin a sawm a. Electoral Roll dik tak kan neih theih nan theihtawp chhuah tur leh Democracy chak zawk leh dik tak, electoral roll felfai neih nan a pawimawh tih hre thar turin a chah.

PBCR buatsaih cancer kaihhnawih zirhona hun a hmanpui

Aizawl: Population Based Cancer Registry Mizoram buatsaihin June 8, 2026 khan Workshop cum Re-Orientation on Cancer Registration and Data Quality chu McCabe Hall, Aijal Club ah hman a ni a, Health and Family Welfare Minister Lalrinpuii chuan khuallian niin hun a hmanpui a, Mizoram Population Based Cancer Registry Report (2018-2022) a tlangzarh nghal.

  PCBR report-in a tarlan danin Mizoram chu India ram pum puiah cancer a sang ber a. Kum 2003 – 2020 thlenga zirchiannaah cancer-a san lam a pan char char a, Mizo mipa te ah Pumpui Cancer an tam ber a, hmeichhia ah Chuap Cancer an tam ber a ni. 

Rajya Sabha MP inthlan chuh turten thu an tiam

Aizawl : June ni 18, 2026-a Rajya Sabha MP inthlan lo awm tur atana Mizoram atanga seat khat awm chuh tum candidate ten June 8, 2026 khan Returning Officer Zothansanga Ralte, Commissioner & Secretary, Mizoram Legislative Assembly hnenah India ram dânpui (Constitution) rinawm leh thuawih taka zawm tur leh, constitution in India ram thuneihna a pek leh inpumkhatna vawnghim turin thu an tiam.

  Nomination file hun khar a nih hnuah Rajya Sabha MP election candidate pahnihte hi Returning Officer hian pisa ah thu hi a tiam tir a, Mizo National Front (MNF) official candidate Zothansangi Hmar chuan thutiam a la hmasa a, Zoram People’s Movement (ZPM) official candidate K. Laltluangkiama’n thutiam hi a la chhunzawm ve nghal a ni.

AIR kum 90 tlin lawmna CM-in telpui

Aizawl : All India Radio Aizawl Station chuan June 8, 2026 khan All India Radio-in kum 90 a tlinna leh All India Radio Aizawl Station-in kum 60 a tlin lawmna an buatsaih chu Chief Minister Lalduhoma chuan a telpui. All India Radio Aizawl Station-ah Jubilee lungphun a hawng.

  CM hian Drama Studio-ah Interview tawi a nei zuiin, hla a thlang a, chumi zawhah a lawmna pui ber Vanapa Hall-a neihah khuallian niin a tel chhunzawm nghal a ni.

  AIR hi British sawrkar khan April ni 1, 1930 ah Indian State Broadcasting Service tiin hma thar an la a. Kum 1936 June ni 8-ah All India Radio tiin a hming an thlak a ni.

  Kum 1957 khan a official hming atan Akashvani (Voice from the sky) tia thlak a ni a. Tunah hian khawvela Radio Network lian ber, tawng hrang hranga thupuang darh tam ber a ni. Kum 1957, Akashvani tia a hming an thlak kum, April ni 1-ah khan Gauhati atangin Mizo Programme tihchhuah tan a ni a. Kum 1966 July ni 31 khan 150 Watt Transmitter hmang Aizawl Radio Station chu a ding tan a ni.

Media & Communication Conference ah tel

Aizawl: Ni khat awh Election Commision of India (ECI) Media & Communication Conference, India International Institute of Democracy and Election Management (IIIDEM), New Delhi-in a June 12, 2026-a buatsaih ah Joint CEO Ethel Rothangpuii hoin Mizoram State leh District Media Nodal Officers te an tel.

  Special Intensive Revision (SIR) chu India ram State 16 leh UT 3-ah kalpui mek a ni a. Enumeration Phase a awm mek state te zingah Mizoram chuan Digitisation ah hma hruaiin 68.05% zawh tawh a ni a. Anmahni hnaih bertu Manipur chuan 27.11% zo tawhin pathumna Odisha chuan 17.58% an zo tawh a ni.