The Week that Was on June 16, 2024
![](https://zalen.s3.ap-south-1.amazonaws.com/images/news/1718445847_The%20Week%20that%20vwas%20logo%20tur.jpg)
Two Wheeler hmanga tawhruk Nuai 70 chuang man Heroin man
Aizawl : Special Narcotics Police Station, CID Crime leh 2nd Assam Rifles tang dun chuan June 12, 2024 khan heroin Kg 2.340 (Sahbawn bawm 200/ hawng 200), Rs. 70,20,000/- man chu Saitual Quarry bulah Ginsiankhawmmung kum 31 s/o Lianchin (L) Bulfek, Myanmar nia inchhal hnen atangin an man.
Ginsiankhawmmung leh a phurhna lirthei pawh man tel nghal a ni a, India rama luh phalna (valid documents) a nei lo a, ruihhlo kengtu bakah hian a thurualpui nia hriat Lalthansanga kum 39 s/o Lalrinliana Sailo, Bethlehem Vengthlang, Aizawl pawh man tel nghal a ni.
CYMA-in Top -10 te lawmpuina hun a hmang
Aizawl June 12, 2024 : Vawiin chawhnu khan Central YMA chuan kumin a MBSE hnuaia HSLC leh HSSLC Exam- a Top-10 a Mizo tling te lawmpuina leh fuihna hun an hmang.
He hun hi Prof. Lalnuntluanga, Vice President in a kaihruai a, Prof. Malsawmliana, General Secretary in Report leh inhmelhriattirna hun a hmang.
Lawmpuina an pek te hi HSLC Top- 10 a tling Mizo 13, HSSLC (Arts)- 14, HSSLC ( Sc)-9 leh HSSLC (Com)-11 an ni a, an vaiin 47 an ni. Lawmpui a thuziak leh Rs.3,000/- theuh an hlan.
Pawisa pek duh loh avangin Pistol-in kap || Kah lai hre mumal lo
Aizawl : June 12, 2024 khan Dawrpui, Aizawl-a Mosque bul dawrah dawr nghaktu kah a ni a, a kaptu hi Police ten an man nghal.
Aizawl Police Station atanga ZALEN thudawn danin pistol-a mi kaptu hi Lalnunsanga (32) s/o Hrangthuama (L), Armed Veng South nia inchhal a ni a, police ten an man lai pawh hian a rui niin an sawi a, pistol hian dawr nghaktu ke zungpui-ah a kap a ni.
Mi kaptu hi No. 4 khawih thin a ni a, a rui chak chuan dawr nghaktu hi pawisa a dil a, mahse, dawr nghaktu hian a pek duh loh avangin rikrap nan hian silai hi a hmet puak a, a ke zungpuiah-ah a fuh ta niin an sawi a, a kaptu hian a kah dan a hre mumal lo niin a sawi.
Myanmar sipai ten Run lei an bomb chhia
Aizawl : Myanmar sipaiten Run lei an bomb chhiat avangin Mizoram-ah khawchhak thil a lut mumal thei lo.
ZALEN thudawn danin, inkalpawhna atana tangkai taka hman Run lei hi June 9, 2024, Pathianni zing khan Myanmar sipaiten an bomb chhia a, hei hian inkalpawhna kawngah nghawng a nei mek a ni.
Run lei zawh theih a nih loh avang hian khaw chhak atanga Mizoram a bungraw rawn lutah nghawng a nei chho mek nia hriat niin, bungrua a to phah dawn bakah, bungraw rawn lut pawh a tlem phah chho chho ngei tura ngaih a ni.
Leimin-a boral Matthew-a vui
Aizawl : Aibawk leimin in a hnawl, a nupui nen a nunna chan Matthew Lalchhanhima (34) ruang chu hmuh a nih tak loh avangin June 10, 2024 khan vui a ni.
May ni 28, 2024 zinga an kawmchhak leimin in a hnawl vangin Mathew-a te nupa hi an boral a, a nupui ruang hmuh a nih hnu-ah theihtawp chhuahin Matthew-a ruang hi zawn zui ni mah se, hmuh a nih tak loh avangin 10.6.24 chawhnu dar 1:00 ah vui a ni.
Matthew-a nupui Vanlalruali chu May ni 31, 2024 khan Hortoki ram, Tlawng luiah a ruang hmuh a lo ni tawh.
CM Lalduhoma hnenah Honorary 7 Dan (Black Belt) hlan
Aizawl : June 13, 2024 khan Mizoram Amatuer Taekwondo Association, World Pro Taekwondo Headquarters leh World Taekwondo Headquarters, Kukkiwon te tangkawp chuan Chief Minister Lalduhoma hnenah Honorary 7 Dan (Black Belt) leh Certificate of appreciation an hlan.
Tuna Chief Minister hnena Belt an hlan hi India rama Dan sang ber a ni a, Grand Master Prof. Hee Do Kim chuan Certificate hlanin Belt hi a hrentir a ni.
He belt hlannaah hian Grand Master, Prof. Hee Do Kim, 9th Dan, Grand Master Lee Jae Ku, International Master 8th Dan, South Korea te, Prof. Rualkhuma Colney, President, MATA leh a thawhpuite an tel a ni.
Apex Bank General Assembly hmanpui
Aizawl : Mizoram Cooperative Apex Bank Ltd. chuan 12.06.2024 khan Vanapa Hall ah Annual General Assembly vawi 29 na an hmang a. Cooperation Minister P.C. Vanlalruata chuan khuallian niin a hmanpui.
Vawiin MCAB inkhawmpui ah hian Cooperative Society thawk tha te hnenah leh Branch thawk tha te hnenah lawmman sem a ni a. Shareholder te hnenah Share Dividend (an bank account ah) pek an ni bawk. He MCB inkhawmpui hawnna inkhawm hi an Chairman Pu Lalnunsanga'n an kaihruai a, chawhnu lamah rorel inkhawm neih chhunzawm a ni.
MCAB hnuaiah hian branch 27 a awm a. ATM 34 (mobile ATM telin) an nei mek bawk. A vaiin thawktu mi 165 an awm a ni.
Khaw 11 TB Free Village ah puang
Aizawl : Serchhip District chhunga khaw 11 - Bawktlang, Piler, Hmuntha, Buangpui, Zote South, Sialhau, Khawbel, Neihloh, Thinglian,Vanchengte leh Hmunzawl te chu TB Free Village-a puan an ni a.
June 12, 2024 khan a lawmna hun Serchhip DC Conference Hall ah buatsaih niin Serchhip DC leh District TB Committee Chairman ni bawk David Lalthantluanga, IAS chu khuallian a ni.
TB Mukht Gram Panchayat Bronze medal dawngtu khaw 11aiawh Village Council member-te hnenah DC leh Sr.CMO ten medal hi an hlan a ni.
Civil Services Foundation Training ATI-ah hawng
Aizawl : June 11, 2024 khan ATI Traning Hall-ah Foundation Training for Combined Civil Services Probationer, 2023 Batch hawnna neih a ni a. He hun hi DP&AR Minister K.Sapdanga, Home Minister ni bawk chuan Khuallian niin a hawng a ni.
Tuntum hian, MCS 10, MIS 5 leh MF&AS 12 ten Foundation Training hi an neiho dawn a. A vawikhatna atan trainee te hi ATI Hostel-ah an training chhung an awm nghal dawn a ni.
Combined Services a tel service 4 aiawh in an pawl hruaitute'n officer thar te fuihna thu an sawi a. MCSA aiawhin President V. Lalengmawia, MPSA aiawhin President Zosangliana, MISA aiawhin President Malsawmsanga leh MFASA aiawhin Vice President Laldinpuia ten officer thar te tana thu an sawi a ni.
Green Mizoram Day 2024 hmang
Aizawl : Mizoram pumpuiah Green Mizoram Day chu ‘I nunna atan thing phun rawh’ (Plant Trees for your Life) tih thupui hmangin June 11, 2024 khan hman a ni a, A hmanna pui ber chu AH & Vety minister C. Lalsawivunga hovin Multipurpose Cultural Complex Auditorium, Berawtlang-ah hman a ni.
Assembly Speaker Lalbiakzama pawhin he hun hi hman puiin, he ni denchhen hian Zokhawsang, Assam Rifles Complex-ah thing phunna hun 'Ceremonial Planting' an hmang bawk a ni.
Green Mizoram Day hmannaah hian lawman chi thum semchhuah a ni a, khual lian chuan Kangmei ven kawnga ti tha zual, district pathum hnenah lawmman a sem a, chungte chu-
1-na - Kolasib District
2-na - Lawngtlai District
3-na - Mamit District te an ni.
Aizawl District chhunga kangmei veng tha khuate -
1-na - Lamchhip
2-na - Kepran
3-na - Seling te an ni.
Green Mizoram Day-a thing phun hna thawk tha hnena lawmman mi 3 hnena pek hi a ni
1. PC Malsawma, Dinthar Veng, West Phaileng
2. PC Lalrinzuala, Maite
3. H. Zakunga, Sihphir Venghlun te an ni.
CM leh Air Force hotute inkawm
Aizawl : June 11, 2024 khan Chief Minister Pu Lalduhoma chuan a office ah Air Vice Marshall HA Rather, VM, VSM, Air Defence Commander leh a thawhpuite a kawm a. Mizorama Indian Air Force ten hmalakna leh hmachhawp an neih hrang hrang te a sawipui.
Chief Minister hi TBC Lalvenchhunga, Adviser to CM leh Vanlaldina Fanai, Commissioner & Secretary to Chief Minister ten an tawiawm a ni.
Green Mizoram Day pualin Governor-in Herhse tiak phun
Aizawl, the 11th June 2024: Kumin Green Mizoram Day 2024 puala state pum huapa hnatlangah Governor Dr. Hari Babu Kambhampati leh Lady Governor Dr Jayashree Kambhampati te pawh tel ve in June 11, 2024 khan Circular Lawn, Raj Bhavan-ah Herhse tiak an phun a ni.
Governor secretary leh official dangte pawhin Green Mizoram Day pual hian Raj Bhavan huam chhungah thing tiak chi hrang hrang an phun bawk a ni.
Green Mizoram Day hi June 11, 1999 atanga hman tan a ni a, kum tin June 11-ah hman chhunzawm a ni.
Special Blind School matric pass tharte lawmpuina hmanpui
Aizawl : June 10, 2024 khan Special Blind School, Durtlang Venglai chuan an zirlai pathumten matric exam a hlawhtlinna an chan vek avangin lawmpuina programme an hmang a, School Education Department Minister Dr Vanlalthlana chuan Khuallian niin he hun hi a hmanpui.
Special Blind School hi kum 2001-a din niin zirlai 32 chuan he school atang hian zir chhuak tawh a, mi 19 chuan sawrkar hna nghet an thawk tawh a ni. Engtik lai pawhin mit lama harsatna tawkte tan he school-a zir turin a enkawltute biak pawh theih reng a ni.
CM hovin Inter Departmental Meeting nei
Aizawl : Chief Minister Lalduhoma hovin Minister te, Advisers to CM te leh Mizoram sawrkara Jt. Director chin chunglam zawng zawng leh DC leh SP zawng zawng te telna Inter Departmental Meeting chu June 10, 2024 khan Dawrpui Multi Purpose Hall ah neih a ni.
He hunah hian Home Minister K. Sapdanga leh Minister dang te leh Adviser to CM ten thusawina hun an hmang a. Chumi hnuah official kal khawm te nen hian inkawmhona an nei zui a ni.
Inkawm khawmna hi Pratap Chhetri, Deputy Director, I&PR chuan a kaihruai a, kal khawmte lawmna thu Dr. Renu Sharma, IAS, Chief Secretary chuan a sawi a. Sawrkar thar duhdan leh hmalakna te, a ruahmanna tlangpui te a sawi a. Sawrkar hnathawk kal tura beisei te tha taka an kal avangin lawmthu a sawi a ni.
Latest News & Chhiar Hlawh
-
1m | Sep 07, 2024
-
2m | Sep 07, 2024
-
1m | Sep 07, 2024
-
1m | Sep 07, 2024
-
1m | Sep 06, 2024
-
1m | Sep 06, 2024
-
2m | Sep 06, 2024
-
3m | Sep 06, 2024
-
1m | Sep 06, 2024
-
1m | Sep 06, 2024
-
2m | Sep 06, 2024
-
1m | Sep 06, 2024
-
2m | Sep 05, 2024
-
1m | Sep 05, 2024
-
1m | Sep 05, 2024
-
1m | Sep 05, 2024
-
2m | Sep 05, 2024
-
1m | Sep 05, 2024
-
1m | Sep 05, 2024
-
1m | Sep 04, 2024