National Legislators' Conference hmasaber-ah Speaker

Aizawl : India rama a vawi khatna atan MIT-School of Government (SOG) buatsaih, National Legislators' Conference(NLC) hmasa ber chu June 15 atang khan Mumbai-ah tan a ni a. Conference hian ni thum a awh a ni.
    He hunah hian Lok Sabha Speaker lo ni tawh te, India ram state hrang hrang Assembly Speaker leh Council Chairman te, Central leh State hrang hrang sawrkar mi pawimawh an tel a. Mizoram atangin Assembly Speaker Lalrinliana Sailo pawh NLC hawnna ah hian a tel a ni.
    Conference ah hian India ram state hrang hrang leh Commonwealth ram atangin Assembly Speaker leh Chairman te, Legislators rualte leh official pawimawh thahnem tak sawm an ni a. Mizoram atangin Speaker Lalrinliana Sailo leh political party aiawh MLA 6 - K.T Rokhaw, Nihar Kanti Chakma, Er. H. Lalzirliana, Dr. K. Pachhunga, Dr. Vanlalthlana leh B.D Chakma te an tel a. Official aiawhin Lalhmahruaia Zote, Commissioner & Secretary leh P.B.Lianthangpuii Jt.Director, I&PR te bakah Assembly Secretariat atangin officer leh staff 4 an tel bawk a ni. 

Lengpui Airport chungchang ngaihtuah

Aizawl : Lengpui Airport inrelbawlna leh venhimna chungchanga thu pawimawh te ngaihtuahin June 14, 2023 khan Chief Minister Zoramthanga hovin meeting neih a ni.
    Meeting-ah hian kumin February ni 11 a Chief Minister kaihhruaina hnuaia meeting lo neih tawh leh April ni 14 a Ministry of Civil Aviation Secretary hova meeting lo neih tawh bawhzuina leh hmabak la awmte sawiho a ni a. Mizoram chhim lama Green Field Airport siam tur chungchanga hmalakna te, Tuirial Airfield siamthat leh hmun hrang hranga helipad te tihchangtlun chungchangte sawiho a ni bawk.

Tuirial-a tuikawng siam dan tur en

Aizawl : Environment, Forest & Climate Change Minister  T.J. Lalnuntluanga chuan June 14 khan Integrated Development of Wildlife Habitat (IDWH) hnuai atanga cheng Nuai 30 hmanga sak North Hlimen a Forest Rest House chu a hawng. Tuirial-a tuikawng siam dan tur an en nghal.
    EF&CC Minister T.J. Lalnuntluanga chuan sawrkar leh department hotute, khawtlang hruaitute thawhhona tha tak avanga North Hlimen khuaa Forest Rest House changtlung leh tha tak peihfel a ni ta chu lawmawm a tih thu a sawi a. Ram rawngbawlna a ni emaw, mahni hnathawhna kawng engkimah neitu thinlung pua thawh a nih chuan hmasawnna hi a tak a hmuh theih a ni thin a ti.

FCS & CA Minister-in Kolasib-a Office hotute kawm

Aizawl : June 14 khan Food, Civil Supplies & Consumer Affairs Department Minister K.Lalrinliana, Kolasib Assembly Constituency bialtu MLA chuan June 14 khan DRDO Conference Hall-ah Kolasib khaw chhung a Department Office hrang hrang a hotute a kawm.
    K.Lalrinliana chuan District tihhmasawnna hna tha tak a kalpui tur chuan Sawrkar hnathawkte inkarah inpawhna leh thawhhona tha a awm a pawimawh thu a sawi a. Hmasawnna inkhairual leh mumal zawk a awm theih nan inhmuhkhawmna hi buatsaih fo a tul thu leh hnathawhte inhriatpuitawn a pawimawh thu a sawi. Sawrkar hnathawkte chu mipui tan a rawngbawltu, kut hnathawktute leh khawsak harsa zawk te chawikanna tur a mawhphurhna pawimawh tak tak chelhtute an ni tih hre reng turin leh hmalakna rintlak chauh kalpui thin turin a chah.

North East NSS Festival 2023

Aizawl : India hmarchhak State NSS volunteer-te intawhkhawmna hun ‘North East NSS Festival 2023’ hawnna inkhawm chu Seminar Hall, Pachhunga University College-ah June 14 khan neih a ni a; Robert Romawia Royte, Minister of State, Sports & Youth Services Department chu khuallian a ni.
    Khuallian chuan NSS Volunteer-te chu Mizorama an cham chhungin nuam leh hlim taka hun hmang turin duhsakna a hlan a. North East-a college tha ber, India ram pumpuia 34th ranking hauhtu Pachhunga University College (PUC) ngeiin festival a thleng thei chu NSS Festival 2023 a tihlu leh zual a ni, a ti. India hmarchhak state-a NSS-ten intawhkhawmna hun tha tak an nei thei thin chu thil hlu tak a ni tiin State hrang hrang hnam ziarang inzirtawnna leh thiantha insiamtawnna hun atana hmang turin NSS Volunteer-te chu a chah.

Mizorama Meitei Welfare Hruaituten Governor kawm

Aizawl : June 14 khan Mizorama cheng Meitei Mipuite aiawhin an hruaitute chuan Raj Bhavan-ah Governor Dr Hari Babu Kambhampati an kawm.
    Mizoram Meitei Welfare Hotute hian Manipur state-ah a rang thei ang bera remna leh muanna a awm theih nan President of India hnenah ngenna an siam a. An ngenna hi Lehkha a ziakin Governor chu thehluh sak turin an ngen a ni.

CM-in MIZOFED Conference hmanpui

Aizawl : Mizoram State Cooperative Marketing & Consumers' Federation Ltd. (MIZOFED) chuan June 14 khan Synod Conference Centre, Sikulpuikawn Aizawl-ah Annual General Assembly vawi 25-na an hmang a; Chief Minister Zoramthanga chuan khuallian niin he hun hi a hmanpui.
    Chief Minister chuan MIZOFED chu hmasawnna atana cooperative society din pawimawhna leh tulna hmathlir nei chungin a remchan dan ang anga bultan a nih thu a sawi a. Pawl chungtlung zawkah insiamin kalphung felfai zawk nei a, hlawkna tam zawkte tel theia an awm chho ta chu lawmawm a tih thu a sawi. Chief Minister chuan cooperative movement hi ramin chak zawka hma a sawn theih nan a pawimawh thu sawiin, hmasawnna hna sawrkarin a ruahman leh a duan te chu a theihna chen chenah privatize zel tha a tih thu a sawi a ni.

World Blood Donor Day 2023 hmang

Aizawl : Mizoram State AIDS Control Society (MSACS) leh Association for Voluntary Blood Donation (AVBD) te buatsaihin June 14, World Blood Donor Day chu Dawrpui Multipurpose Hall-ah hman a ni a. Health Minister Dr. R. Lalthangliana chu khuallian a ni.
    Kum 2022 April - March 2023 inkar hian thisen unit 37419 Mizoram pumah pek a ni a. Mahni duhthu ngei a thisen pek (Voluntary Blood Donation) hi Unit 34252 a ni a. Individual donor in unit 10744 an pe bawk a ni. VBD % hi 91.54% a ni.
    Kum 2023 Annual Blood Donor Awards hi category hrang hranga thenin pawl hrang hrang te hnenah hlan a ni bawk.

Law Minister leh Chief Justice inkawm

Aizawl : Law & Judicial Minister T.J. Lalnuntluanga chuan June 13 khan Mizoram rawn tlawh Justice Sandeep Mehta, Chief Justice of Gauhati High Court chu Chief Justice Bungalow, Ainawn Veng-ah kawmin Mizorama Judiciary hmasawnna tur te a sawipui.
    Law & Judicial Minister chuan Champhaia District & Sessions Court Building din tur chu sak tan thuai a nih theih nan building plan duante a ranglama Gauhati High Court-in pawmpuina (approval) a pek theih nana tul te, ND&PS Special Court Champhai-a dah a nih theih nan leh ND&PS Special Judge Aizawl-a dah belh a nih theih nana hmalak tulte a sawipui a ni. 

Mitdel te hman tur Braille Texbook sem

Aizawl: June 13, 2023 khan Mizoram Board of School Education (MBSE), Chaltlang-ah MBSE leh Social Welfare & Tribal Affairs tangkawpte buatsaih High School-a mitdel zirlai naupangte hman tur Braille Textbook semna hun hman a ni.
    Hemi hunah hian MBSE Secretary Sarah Lalengzami chuan MBSE in mitdel zirlai naupangte tana braille textbook chungchanga hma a lo lak chhoh dan a a sawi a. MBSE-in Commissioner, Persons with Disabilities leh Mizoram Blind Society te nena inkawmhona an lo neih tawh thu te, National Institute for Empowerment of Persons with Visual Disabilities (NIEPVD), Dehradun an lo thawhpui tawh dan te bakah Pu JH Zoremthanga Chairman, MBSE-in NIEPVD, Dehradun a hmun ngeia a zuk tlawh thu te a sawi a ni.

CM leh CJ hovin High Court Building enfiah

Aizawl : Chief Minister Zoramthanga leh Justice Sandeep Mehta, Gauhati High Court Chief Justice hovin June 13 khan High Court building, MINECO a sak chu a hmunah a huhova enfiahna (joint inspection) an nei.
    Chief Minister chuan Gauhati High Court Chief Justice in Mizoram a rawn tlawh chu lawmawm tiin, High Court building thar chu hawn thuai a nih a tangkai taka hman a beisei thu a sawi a. State sawrkar atanga mamawh te a awm a nih chuan a inhawn reng thu a sawi. Law & Judicial Minister T.J Lalnuntluanga, Justice Michael Zothankhuma, Justice Marli Vankung, Chief Secretary Dr. Renu Sharma bakah state sawrkar leh judiciary a hotu dangte'n an tawiawm a ni.

Press Accreditation Card semchhuahna nei

Aizawl : June 13 khan I&PR Auditorium-ah ‘Press Accreditation Card’ semchhuahna hun hman a ni a, Information & Public Relations Minister Lalruatkima chu khuallian niin Mizoram Journalists' Association Gen. Hqrs. Office Bearer leh Executive Member-te hnenah ‘Press Accreditation Card’ thar a semchhuak a; Aizawl District huamchhunga Accredited Journalist-te Accreditation Card thar chu MJA President kutah a hlan nghal a ni.

UPSC exam hrang hranga tithate lawmpuina hlan

Aizawl : Higher & Technical Education Minister Dr. R Lalthangliana chuan June 13 khan MINECO-a a pisaah Mizoram Scholarship Board buatsaihin tun hnaia UPSC exam hrang hranga tithate lawmpuina hun hmanpuiin Incentive Cash Award pawisafai cheng nuaikhat theuh a hlan nghal a ni.
    H&TE Minister Dr. R Lalthangliana chuan UPSC exam buatsaiha tithate chu a lawmpui thu leh chhuanawm a tih thu a sawi a, an thlen chinah lungawi mai lovin a aia nasa zawka tang zel turin a fuih. Minister chuan a bikin UPSC Civil Service Exam 2022-a interview thleng pha mi 2-te chu tun kumah la tling rihlo mahse, beidawng lova tan la sauh sauh tura fuihin, engtik niah emaw chuan an tum ram an thleng ngei ang tiin duhsakna a hlan.

MSACS (Mobile ICTC) Motor thar 7 vailiam

Aizawl : Mizoram State AIDS Control Society (MSACS) buatsaihin June 13 khan Health Minister Dr. R. Lalthangliana chuan MINECO tualzawl atangin MSACS Mobile Integrated Counselling & Testing Centre (ICTC), hmun kilkhawr bera chengte tan pawha HIV AIDS dinhmun hriat zung zung theihna tur chu Mizoram District 7 tan a vailiam a. He hun hi MSACS Deputy Director Lalthakimi Sailo chuan a kaihruai a ni.

Mission Shakti khuhhawnna nei

Aizawl : June 12, 2023 khan Social Welfare & Tribal Affairs Minister Er. Lalrinawma chuan ATI Auditorium Aizawl-ah Mission Shakti khuhhawnna a nei.
    Er.Lalrinawma chuan thu sawiin hmeichhiate dinhmun chawikang tur hian a hmei a pa in kan pawimawh a ni,a ti a; an chanvo chang thei tur a dawmkan leh rahbi siamsak hi kan tih makmawh a ni, a ti bawk. Minister chuan mission Shakti pawh hian hmeichhiaten hleilenna an tawrh na lakah nasa takin venhimna leh chhawmdawlna a pe dawn a ni a ti. He program hlawhtlinna atan hian Department hruaitu leh Staff-te chu theihtawp chhuah turin a fuih bawk.