The Week that Was on June 2, 2024
![](https://zalen.s3.ap-south-1.amazonaws.com/images/news/1717237841_The%20Week%20that%20vwas%20logo%20tur.jpg)
Electric bana lawn laiin current man vangin thi
Aizawl : Saihmingthanga Sailo (38) Lunglei Zohnuai chu May 30, 2024 chawhma dar 11:15 vel khan Current man avangin a boral.
Saihmingthanga hi Electric Department in regular Helper anga an rawih niin vawiin hian Khawiva kawngah Electric line chhia siam turin a thiante nen an kal a, Thirbana a lawn chu Current a lo kal avangin Current hian manin a tla thla a, rang takin Christian Hospital Serkawn panpui nghal nimah se, a nunna chhan hman a ni lo a ni. Saihmingthanga hian a nupui leh a fate 4 la naupang te te kalsanin a ruang hi May 31, 2024 khan vui a ni.
Tlawng-in a nut ber tum leh a len ber tum a tawng
Aizawl : Aizawl chawmtu tlawng lui chuan May 28, 2024 khan a nut ber tum leh a len ber tum a tawng a, tui lian hian khawl leh a kaihhnawih te a tihchhiat bakah tunah hian Tlawng lui hi pump tlak a ni lo.
ZALEN thudawn danin Tlawng lui len lai ber khan a hmaa pump house-a 2017-a an chhinchhiahna chu meter 1.5 zeta sangin a khum a, hei hian pump house-ah harsatna a thlen phah nasa hle tih a sawi.
Tlawng lui hi tun dinhmuna a nu hle a, a hmaa an chhinchhiah-a a nut ber tum chuan, Nephelometric Turbidity unit (NTU)-ah 1080 a ni a, May 29, 2024 tlai dar 4-ah khan tui nut zawng hi NTU-ah 1610 a ni.
MNF President Zoramthanga'n chhiat tawhna hmun tlawh
Aizawl : MNF President Zoramthanga chuan May 29, 2024 khan Cyclone Remal vanga chhiatna thlenna hmun thenkhat a tlawh a, vanduaina tawkte a tawrhpui thu sawiin, chhanchhuah hna thawktute chhuanawm a tih thu a sawi.
Zoramthanga leh amah tawiawmtu Thorang Bialtu MLA Er. Rohmingliana te hian Central YMA bultuma chhanchhuah hna thawktuten a tul apianga an hman turin tangkafai tanpuina leh mithi tuamna puan Central YMA hruaitute kutah an hlan a. Chhiatna thlenna hmun a tlawhnaah hian Zoramthanga hi MNF National Core Committee member F. Aithanga leh party hruaitu dangten an tawiawm a ni.
11th LADC-a Executive Member tharte lalut
Aizawl : 11th Lai Autonomous District Council (LADC)-a Chief Executive Member C. Lalmuanthanga'n Executive Member atana a rawt, Mizoram Governor-in May 27, 2024-a a pawmpui tak MDC pakua te chu May 30 khan LADC Hall, Lawngtlaiah Lawngtlai District Bawrhsap Pu Cheemala Siva Gopal Reddy chuan rinawmna thu tiamtirin LADC Executive Member atan a la lut.
LADC-a United Legislature Party (ULP) sawrkar, Chief Executive Member C. Lalmuanthanga kaihhruaia Executive Member atana lak luh takte hi Lungtian bialtu MDC Pu Sanghuliana Mualchin, Vathuampui bialtu MDC C. Rongura, Sekulh bialtu MDC Lallawmsanga Apetow, Lawngtlai Bazar bialtu MDC Lalropuia Chinzah, Chawngte 'P' bialtu MDC Andrew Laltlanzara, Bualpui 'NG' East bialtu MDC L. Daniala, Sangau South bialtu MDC JB Vanhoy, Lawngtlai College Veng bialtu MDC C. Hrangthianga leh Diltlang South bialtu MDC HC Lalthawmliana te an ni.
ICJS chungchangah State Apex Committee an thukhawm
Aizawl : May 30, 2024 khan Chief Secretary Conference Hall-ah State Apex Committee (SAC) chuan Chief Secretary, Dr. Renu Sharma kaihhruaiin Inter-Operable Criminal Justice System (ICJS) chungchangah thutkhawmna an nei.
ICJS (Inter-operable Criminal Justice System) hi Cabinet Committee on Economic Affairs (CCEA) in November 2015 khan a pawmpui niin a thil tum ber chu heng ICJS hnuaia banpui hrang hrang - Police, Prisons, Prosecution leh Forensics te inkara data leh information awlsam leh felfai zawk pekchhuah a nih theih nana Cloud service hmanga platform khat hman theih tura duan hi a ni.
Cyclone Remal chungchangah CS hovin meeting nei
Aizawl : May 30, 2024 khan Cyclone Remal avanga chhiatna thleng chungchangah Chief Secretary Conference Room, MINECO, Khatla-ah Coordination Meeting neih a ni a, Chief Secretary Dr. Renu Sharma chu chairman a ni.
He hunah hian Cyclone Remal avanga chhiatna thleng hrang hrang chungchangah Disaster Management and Rehabilitation (DM&R) Department atangin report kimchang tak pek a ni a, Department Secretary ten an department hmalakna leh harsatna te an sawi bawk.
Chairman Dr. Renu Sharma chuan department hrang hrang hruaitute fakin an thawk tha a, an thawk rang a tih thu a sawi a, dinhmun hre chianga mahni chanpual chin vil tha turin a fuih a ni. Chhiatna thlen leh hun atana kal dan tur mumal tak (Standard Operating Procedure) nei theuh turin hruaitute a chah.
Chief Minister-in chhiatna thlenna hmun tlawh
Aizawl : Chief Minister Lalduhoma chuan May 28, 2024 khan Melthum-a chhiatna thlenna hmun leh Kanan veng thlanmual te a tlawh.
Melthum Presbyterian Kohhran Hall-a Post Mortem Examination tih mek ruang lakchhuah tawh 12 te chu Home Minister nen puanin an tuam a, ruang lakchhuah tawh zinga Mizo pariat te chu K. Sapdanga hian sawrkar ralna (ex gratia), a hmahruai atan Rs. 200,000 theuh a hlan a ni. Mitthi te aiawh hian Melthum Local Council Chairman Saihmingliana'n a dawng a ni. Chief Minister hian Melthum YMA hruaitute hnenah thingpui lumna tur Rs. 50000 a hlan bawk.
Melthuma chhiatna hmunhma a tlawh hnu hian Chief Minister hian Kanan Veng thlanmual lam a pan leh a. Thlanmuan min senghawia hnatlang te thingpui lum nan Rs. 50000 a hlan leh a ni. Kanan Veng thlanmual minah hian thlan 51 vel a chhia niin an sawi a, a theih ang angin official leh mi tlawmngaiten a senghawi hna an thawk a ni.
Vaibelchhe 15 ruahman a nih thu sawi
Aizawl : Chief Minister Lalduhoma chuan Cyclone Remal avanga Mizoram chhunga chhiat tawkte tan zangnadawmna cheng vaibelchhe 15 pek chhuah tur a ruahman a, chhiat tawk chhungte hian nuaih 4 theuh dawng tura ruahman a ni bawk tih May 28, 2024 khan a puang.
Rel kawng siamna hmanrua uluk zawla vil dan tur rel
Aizawl : May 27, 2027 khan DC Conference Hall, Kolasib-ah John LT Sanga, Deputy Commissioner hovin Kolasib district chhung a North East Frontier Railways hmalakna enletna leh harsatna an tawhte sawi hona hun neih a ni.
Thutkhawmnaah hian rel kawng siamna hmanrua tum engemaw zah a bo tawh avangin Bairabi PS ah FIR 10 leh Kawnpui PS ah FIR 17 thehluh a nih tawh thu leh bungraw bo te hmuh let a nih theih nan theihtawp chhuah a nih thu tarlan a ni a.
July 2024 chhung a Hortoki thleng rel luh tir tur a NEFR te hmakakna chu lawmawm an tih thu sawiin relin a paltlang tur khaw mipuite pawh lo inhmakhua lawk a pawimawh thu sawi a ni. Thutkhawmnaah hian rel kawng siamna bungrua dahthatna rintlak ruahman dan tur leh a vil turin khawtual mi rintlak dah ngei a nih theih dan tur te rel a ni bawk.
MBSE Class 10 & 12 Exam Topper-te Raj Bhavan-ah chawimawi
Aizawl : May 27, 2024 khan Governor Dr. Hari Babu Kambhampati chuan High School Leaving Certificate leh Higher Secondary School Leaving Certificate Examination 2024-a pakhatnate leh an nu leh pate chu Raj Bhavan a lengah a sawm a. Governor chuan HSLC-a pakhatna leh HSSLC arts, commerce leh science stream-a pakhatnate hnenah chawimawina thuziak leh lawmpuina sum fai a hlan a ni.
Governor Dr. Hari Babu Kambhampati chuan zirlai titha te hi a mal te tein a kawm a. Lehkha zir chhunzawm an tum dante zawtin, hna leh eizawnna chungchangte a sawipui a ni. Governor chuan zirlai tithazual te chu a lawmpui tih a sawi a, an thiamnate chu an hmalam huna hna tha tak leh eizawnna ngelnghet tak an neih theih nana hmang turin a fuih bawk a ni.
Latest News & Chhiar Hlawh
-
1m | Sep 07, 2024
-
2m | Sep 07, 2024
-
1m | Sep 07, 2024
-
1m | Sep 07, 2024
-
1m | Sep 06, 2024
-
1m | Sep 06, 2024
-
2m | Sep 06, 2024
-
3m | Sep 06, 2024
-
1m | Sep 06, 2024
-
1m | Sep 06, 2024
-
2m | Sep 06, 2024
-
1m | Sep 06, 2024
-
2m | Sep 05, 2024
-
1m | Sep 05, 2024
-
1m | Sep 05, 2024
-
1m | Sep 05, 2024
-
2m | Sep 05, 2024
-
1m | Sep 05, 2024
-
1m | Sep 05, 2024
-
1m | Sep 04, 2024