The Week that Was on June 20, 2021

Admin - Jun 20, 2021

The Week that Was on June 20, 2021

DGAR leh Governor
Zirtawpni chawhnu khan Raj Bhavan-ah Governor P.S.Sreedharan Pillai leh Assam Rifles hotulu ber Lt Gen Pradeep Chandran Nair, AVSM, YSM, Director General, Assam Rifles te an inkawm.

OLYMPICS-ah Remsiami
Kumin Tokyo Olympics a India Hockey Team a khel tur final list June 17, 2021-a puanah Kolosib nula Lalremsiami a tel.

RT-PCR dahna tur
Health Minister Dr. R. Lalthangliana chuan Lunglei Civil Hospital compound-ah Laboratory building changtlung tak, RT-PCR khawl pawh dah tel theihna tur sak hna thawk turin hma lak tan a nih thu June 17, 2021 khan a sawi.

Cheng Vaibelchhe thum
Covid-19 hrileng avanga state in harsatna a tawh laia sawrkar hmalakna pui a, harsatna tawkte chhawmdawlna turin mimal, kohhran, NGO leh pawl hrang hrang dangte'n Chief Minister's Relief Fund for COVID-19 ah puihna an chhunglut tawh a. Sawrkar hnathawk inzawmkhawm pawl lian ber, Federation of Mizoram Government Employees & Workers (FMGE&W) chuan an member-te ni khat hlawh thawhkhawmin, June 17, 2021 khan CM Relief Fund-ah Rs. 3.00 crores an chhunglut a ni.

COVID-19 VACCINE
India ram pumah Covid-19 vaccine chu 16th January 2021-a pek tan a ni a, tunah hian Health Care workers, Frontline Workers, kum 45 leh a chunglam-te bakah kum 18 -44 inkar hnenah June 17, 2021 atang khan vaccine hi pek chhuanzawm a ni a, Aizawl khawpui chhungah chuan veng tinah District hotute leh LLTF te ruahmanna angin a tahtawla pek mek zel a ni a. Online registration hmanga vaccine lakna hmun pawh hawn zel a ni. District dangah pawh District hotute ruahmanna anga pek mek zel a ni.

Mask leh Infant Stimulation Chart
Social Welfare Minister Dr. K. Beichhua chuan June 17, 2021 khan a office chamber-ah Pradhan Mantri Matru Vandana Yojana (PMMVY) kaltlanga nu naupai leh naupawm te hman tur, Women & Child Development Department buatsaih "Naupai Tana Chaw leh Hrisel" lehkhabu, Mask leh Infant Stimulation Chart te a semchhuak tan.

CANCER tan DAMDAWI MAN TLAWM 
Principal Chief Executive Officer, Mizoram State Health Care Society chuan cancer enkawlna damdawi man tlawn thlanchhuah leh hemi kaihhnawih a Medical Reimbursement chungchangah thuchhuah a siam a, July, 2021 atanga hman tan tur a ni. Mizoram State Cancer Institute (MSCI) Indoor Pharmacy, Administrative Building, Zemabawk ah Cancer enkawlna damdawi man tlawm lei theih a ni tawh a. District Hospital leh damdawiin dangten an mamawh dan angin MSCI aṭangin an la chhawng thei bawk ang.

SEMCHHUAK
Covid-19 hrileng dona kawnga hmanraw pawimawh hrang hrang CSR kaltlanga Vision IAS Academy, New Delhi atanga Aizawl DC Office-in a dawn te chu June 16, 2021 khan Dr. Lalhriatzuali Ralte, DC, Aizawl chuan semchhuahna hun a pisa-ah a hmang a.

NISHTHA TELE-TRACK
COVID-19 hri kai zinga mahni in lama inenkawlte (home isolation) online hmanga vilna tur ‘Nishtha Teletrack’ application chu June 16, 2021 khan Health Minister Dr. R. Lalthangliana’n video conferencing kaltlangin a tlangzarh. ‘Nisha Teletrack’ hi mobile leh web-based application niin, thla 3 chhunga hman atan ruahman phawt a ni.

CM LEH CYMA
June 15, 2021, YMA Day khan Chief Minister Zoramthanga chuan Central YMA hruaitute a pisa ah kawmin, Myanmar ram atanga raltlante chhawmdawlna pek chungchang leh thu pawimawh dang an thlen te a sawipui.

COVID-19 HRI VEI DAM TAWHTE ENKAWL CHHUNZAWM
Health Department chuan natna benvawn nei Covid 19 hri vei, Covid-19 laka enkawl dam an nih a, enkawl dan tur thuchhuah June 15, 2021 khan a siam a, COVID-19 hri kai, Covid veite enkawlna hmun atanga ni 10 (sawm) hnua Exit Test tiha COVID-19 negative (hri vei tawh lo) tih hriat chian te chu, Discharge Protocol ding lai angin ni 7 (sarih) chhung uluk taka inkhung hrang zui tur an ni.

RATION BUHFAI
Mizoram Sawrkarin mipuite ration buhfai chanvo a tih tlem sak anga tun hnaia social media-a thu dik lo thehdarh chungchangah June 14, 2021 khan mipuiten thil awmzia  hriat fiahna a tlang zarh.

MOBILE AND INTERNET
Covid Task Force on mobile and internet services chuan Optical Fiber Cable (OFC) tichhe thin te lakah June 14, 2021 khan FIR an thehlut a. Mizoram chhung khaw hrang hranga khawtlang hruaitute leh mipuite pawh fibre cable pawimawhzia hriaa lo venpui tur leh dimdawi turin an ngen a ni.

CM leh Synod puipate inkawm
Chief Minister Pu Zoramthanga chu June 14, 2021 khan a pisa ah Synod puipa te nen inkawmin, thenawm state nena ramri buai chinfel thuai a nih theih nana hmalak leh India Danpui 8th Schedule-a Mizo tawng telh chungchangte an sawiho.

Share now