The Week that Was on June 23, 2024
![](https://zalen.s3.ap-south-1.amazonaws.com/images/news/1719051255_The%20Week%20that%20vwas%20logo%20tur.jpg)
Kuhva lakluh dahna Kudam thianfai turin Home Minister ngen
Aizawl : June 19, 2024 khan Hachhek Bial Kuhva Chingtu Pawl, Vairengte leh Bilkhawthlir Kuhva Chingtu Co-operative Society-te chuan Home Minister K Sapdanga hmuin, Joint Meeting-a an thurelte an thlen.
HM K.Sapdanga chuan tha taka lo dawngsawngin an harsatna leh an thu thlente chu theihtawpa hmalak a tum thu leh hmalak a tum dante lo hrilhin, HM chuan hmalak a tum thu leh hemi chungchang hi DC te pawh sawipui a tum thu a lo hrilh. HM hmalak tumnaah Kuhva Chingtuten lawmawm an ti hle.
Mizoram Police check gate-te tun aia rintlak zawka thuam turin an ngen a, Kuhva tawlhruk tihtawp a nih theih nan HM chu chak zawka hma la turin an ngen bawk.
PHE Minister sawipui
Aizawl : Aizawl khawpui veng laili ber, Dawrpui chhim lama cheng te chuan June 20, 2024 khanhun rei tak an vengin tui mamawh tawk an hmuh that loh chungchangah a changtu PHE Minister Prof. Lalnilawma chu a pisa ah an hmu a, an harsatna te hrilhin; a dawhkan atanga chinfel sak turin an ngen.
Dawrpui South Welfare hian PHE Minister hnena an lehkha thehluh ah Dawrpui chu sumdawnna hmunpui anih avangin a mi cheng te leh sumdawnna avanga mihring che vel ten tui an mamawhna a sang bik tih sawiin; an area a zonal tanky siamsak tur leh tui chu kar khatah vawi 1 tala sem thin nise an lehkha thehluh ah hian an tarlang.
Cricket khelhna ah boral
Aizawl : 1st Veteran Cricket tournament June 19, 2024 a khelh ah Lalbiakzuala (48) chu inning break laiin a boral.
ZALEN thudawn zing dar 9 atang khan Hunthar Veteran leh Sakawrpului Riders te Ramhlun Sports Complex ah an inkhel a, inning chawlh lai, an inkhel a thil pawimawhte an sawiho laiin Lalbiakzuala (Bza), Hunthar Veteran tan a khel hi a chau thut a, rang takin LRM Hospital panpui niin, damdawiin ah hian a boral zui a ni.
Ruang khuhna tur Puan hlan
Aizawl : 19.06.2024 khan Kuki Khanglai Lawmpi, Churachanpur, Manipur te chuan tunhnaia Mizorama thli leh ruah avanga nunna chan te ruang tuamna tur Puan / Kuki Shawl 30 an hlan. Central YMA kawl turin Puan/ Shawl 1 an pe bawk.
Heng thilpek te hi KKL aiawhin Kuki Welfare hruaituten an hlan a, Central YMA aiawhin Prof. Malsawmliana , General Secretary, Roneihthanga, Treasurer leh RL Zomawia CEC ten an dawng.
Zurui ten YMA hruaitu kutthlak vangin FIR thehlut
Aizawl : Ramhlun North Branch YMA vice president kut thlaktu zurui pathumte lakah June 17, 2024 khan FIR thehluh a nih angin police ten mi pathum an man.
Zurui pathum ten police hnena an address an sawi dan - Penticosthanga s/o Lalchhuana, Ramhlun North, Lalhmangaihsanga s/o Chanchinmawia, Ramhlun North (Khawlian khua Ramhlun North-a in luaha awm nia hriat) leh R. Lalengliana s/o Lallawmawma, Ramhlun Vengthar.
Heng mi pathumte lakah hian Ramhlun North YMA chuan Bawngkawn police station ah thubuai an thehlut a, Penticosthanga chu YMA member ni zel tlakah an ngai lo a, YMA membership fee a pek tawh pawh kir leh nise an ti.
Ramhlun North Branch YMA chuan an hruaitu tanpui a tumna lama kut tuar zui ve ta Lalduhzuala s/o K. Lalruata, N-Section chu chhuanawm an ti.
Horticulture Fair 2024 hawng
Aizawl : Horticulture Minister Prof. Lalnilawma chuan 19.06.2024 khan Aijal Club Park-ah Horticulture Fair 2024 chu a hawng. He Fair hian ni thum chhung a awh a ni. Thei, thlai, pangpar leh a kaihhnawih hrang hrang, processed food nen a vaiin Stall 202 an inpho a ni.
Minister Prof. Lalnilawma chuan Best Horticulture Farmer lawmman chu mi 11 hnenah a sem nghal a. Kuthnathawktu hlawhtling lawmman la zingah kum 60 chuang mi pahnih an awm chu fakawm a tih rualin thalaite tan chona lian tak a ni, a ti a. An zinga MCA zir zo hmeichhia in farming hna eizawnna atan a thlang a, hlawhtlinna tha tak a hmu chho chu chhuanawm a ti bawk a ni.
Smart City leh SIPMIU hmalakna tlawh
Aizawl : UD&PA Minister K. Sapdanga chuan 17.6.2024 khan Aizawl Smart City Ltd. Leh SIPMIU hnuaia hmalakna thenkhat a hmunah kalin a enfiah. Minister hian City Centre, Dawrpui te, Multipurpose Ground, High Field te, 37 MLD Water Treatment Plant, Setlak te, Solid Waste Management Centre, Luangmual, Plastic Waste Management Centre, Luangmual leh Tuivamit Playground te tlawhin, hnathawh dan chik takin a enfiah a ni.
City Centre, Dawrpui hi bungraw lakluhna duh angin a awlsam loh avangin hmalakna a chak theihloh thu thawktute'n an sawi a. Chutihrual chuan mipui mamawhna hria in, theihtawp chhuah a, mipuiin an chhawr thuai theih tura hma lak an tum thu an sawi.
Sawhthing leh flagship chungchang sawiho
Aizawl : June 17, 2024 khan Chief Minister Lalduhoma hovin a office-ah Sawhthing lei leh hralh leh a processing chungchang Minister leh official pawimawh te nen an sawiho.
He hunah hian Chief Minister chuan an flagship programme Thlai thar palite lei hi an tihlawhtling ngei dawn a. Tun atanga thla 6 velah heng thlaite hi a thar chho mai tawh dawn a ni. Chumi hrereng chuan tih tur awm apiang an lo tih ve a tul a, chak takin an inbuatsaih theuh dawn nia tiin mawhphurtute a chah a. Kuhva chingtute harsatna pawh thapui thawha kan bawhzui a tul a ti bawk.
I-Shuo University leh MZU inkawmna hmanpui
Aizawl : June 20, 2024 khan Mizoram sawrkar leh Mizoram University buatsaihin I-Shuo University, Taiwan leh Taiwan Experience Education Program kaltlangin Taiwan atanga mithiam lo kal te, MZU, International Affairs-a thawktute, leh Mizoram sawrkar hnuai a Rural Development Department, Planning & Programme Implementation Department, Horticulture Department leh Higher & Technical Education Department-a hotuten ram pahnih inkar a thawhhona tha zawk siamna tur ‘Dialogue on International Collaborations’ chu Conference Hall, Royale Lalawi Hotel, Khatla-ah an nei a. He hun ah hian K.Sapdanga, Home Minister chu khuallian a ni a, Prof. Lalnilawma, Minister of State for Rural Development chuan a telpui a ni.
Herhse thing 200 phun
Aizawl : Vawiin khan Tourism Department huaihawtin 'Green Mizoram Day' pualin Lengpui Airport kawng dungah June 20, 2024 khan thingphun hnatlang neih a ni a. Tourism Minister Lalrinpuii chuan Directorate of Tourism office kawt atangin thingphun hnatlanga kal te a vailiam.
Hnatlang nei turte fuihna thusawiin Minister Lalrinpuii chuan mitinte a tam thei ang bera thing phun turin a chah a, ram humhalh nan thingphun uar a tulzia a sawi bawk. Hnatlangah hian Mizoram State Tree 'HERHSE' thing 200 phun niin, a thing phun tur hi Environment Forests & Climate Change Department atanga dawn a ni.
RAMP Kick-off leh Facilitation Cell hawng
Aizawl June 19, 2024: Vawiin khan Chief Minister Lalduhoma chuan Raising and Accelerating MSME Performance (RAMP) Kick-off leh Facilitation Cell hawnna, Vanapa Hall a buatsaih chu a telpui.
Chief Minister chuan, covid19 hripui vang khan Industry ten harsatna an tawk nasa a, heng kan Industry te hian chak zawka hma an lo sawn leh theih nan Central sawrkar chuan RAMP hi a rawn duang a ni. State te chu keimahni mamawh ang zawnga guidelines duan min rawn phalsak a. Kan mamawh ang tak leh kan policy milin a kalpui dan tur kan duang a, a hming pawh hi MSME Elevate Mizoram (MEMiz) tiin kan vuah ta a ni. Industry neihsa leh ding chho zel tur ten tangkai taka an chhawr turin Facilitation Cell din a ni bawk a, kan lawm hle.
Latest News & Chhiar Hlawh
-
1m | Sep 07, 2024
-
2m | Sep 07, 2024
-
1m | Sep 07, 2024
-
1m | Sep 07, 2024
-
1m | Sep 06, 2024
-
1m | Sep 06, 2024
-
2m | Sep 06, 2024
-
3m | Sep 06, 2024
-
1m | Sep 06, 2024
-
1m | Sep 06, 2024
-
2m | Sep 06, 2024
-
1m | Sep 06, 2024
-
2m | Sep 05, 2024
-
1m | Sep 05, 2024
-
1m | Sep 05, 2024
-
1m | Sep 05, 2024
-
2m | Sep 05, 2024
-
1m | Sep 05, 2024
-
1m | Sep 05, 2024
-
1m | Sep 04, 2024