DOWNLOAD OUR APP

Read latest news on your phone
app-store
The Week that was on June 25, 2023
Jun 25, 2023

Mizoram Police leh MSACS-in Ruihhlo ngaite pualin inkawmhona buatsaih

Aizawl : Mizoram Police leh Mizoram State AIDS Control Society(MSACS) tangkawp chuan June 23, 2023 khan Aizawl SP Conference Hall ah Ruihhlo bansan tawh te leh ruihhlo ngaite pualin inkawmhona hun ‘Interactive Session with People who Injected Drugs (PWID)’ an buatsaih.
    Lalhuliana Fanai, IPS, DIGP (CID) chuan Police hna chu dan leh thupek kenkawh bakah khawtlang nun siamthat kawngah khawtlang hmalakna te puibawm a thei anga thawhpui a nih thu a sawi a. Programme pawh chutiang lam hawi a an bautsaih a nih thu sawiin June ni 26 khawvel pum huapa Ruihhlo Dona Ni (International Day Against Drug Abuse and Illicit Trafficking) a nih angin, chumi denchenin he programme hi buatsaih anih thu a sawi lang bawk.

Tourism-in Central hotute dawr

Aizawl : New Delhi-a cham mek Tourism Minister Robert Romawia Royte chuan June 22 khan Union Finance Secretary Dr. T.V. Somanathan chu a pisaah kawmin Manipur buaina vanga an sahimna zawnga Mizorama raltlante dinhmun leh mamawhte a sawipui. 
    Minister hian Nodal Ministry ber Home Ministry Secretary, Ajay Kumar Bhalla leh Additional Secretary pahnihte a sawipui tawh tih sawiin, Home Ministry-in state ramri kana raltlante enkawlna turin scheme hranpa a neih loh avangin Finance Ministry chu ngaihhnathiamna Home Ministry-hnenah pe vat turin a ngen a. Union Finance Secretary chuan Mizorama Raltlan awm mekte puihna tur sum pek phalna chu Home Ministry-in an rawn rawt angin pek nghal a nih tur thu in Tourism Minister hi a thlah a ni.

Mizoram Legislative Assembly Golden Jubilee khar

Aizawl : Mizoram Legislative Assembly chuan kum 50 an tlin (Golden Jubilee) lawmna kharna chu June 21, 2023 khan Assembly Conference Hall, Annexe building-ah an hmang a. Speaker Lalrinliana Sailo bakah Deputy Chief Minister Tawnluia, Minister-te, MLA-te leh Former Legislators’ Association of Mizoram (FLAM) member-te an tel a ni.
    Kumkhat chhung awh MLA Golden Jubilee kharna inkhawmah hian Deputy Chief Minister Tawnluia chuan ram hruaitu hmasaten bul an lo tan tawhna chu fakin, an kawng tuaihnum sa vawng nung zel tur leh an thawhrimnate chu hre reng turin vawiina roreltu (legislator) te chu a chah a. Mipuite pawhin rorel tura an thlantlinte chu dik tak leh rinawm taka hna an thawh theih nan thawhpui thiam turin a ngen a, Assembly nihphung leh state dangte laka Mizoram tihmingthatu Member-te inthunun theihna leh dawhtheihna chu chhawm nun zel a nih theih nan duhsakna a hlan.

Chief Secretary leh ESIC hotute meeting

Aizawl : Ni 21.6.2023 (Nilaini) khan Chief Secretary Dr. Renu Sharma, IAS, kaihhruaina in Chief Secretary Conference hall-ah Mizoram Employees’ State Insurance Society (MESIS) meeting neih a ni.
    ESI Scheme hi private hnuaia thawkte hamthatna atan India Sawrkarin kum 1948 khan a din a, he scheme hnuaia inziak lutte leh an chhungten damlohna, naupai leh nau neih chungchangah te, hnathawhna avanga ramtuileilohna leh thihna hial tawh thlenga hamthatna an dawn theihna atana duan a ni. Heng hmuna thawk, thla khata cheng 21,000/- aia tam lo hlawhte chuan ESI Act hnuaiah hian hamthatna hrang hrang an dawng thei a ni.

Zirlai raltlante admission chungchang sawiho

Aizawl : June 21 khan Dr. R.Lalthangliana, Health & Family Welfare leh Higher & Technical Education Department changtu chuan Manipur buaina avanga zirlai raltlante admission chungchang meeting a neihpui. 
    Meeting ah hian Mizoram mi Manipur-a lehkhazir te leh Manipur-a Zohnahthlak zirlai raltlanten Mizorama zirna an chhunzawm theih dan tur te sawi ho a ni a, Health Department, Higher & Technical Education Department, MZU official te leh MZP hruaitute an tel a ni.
    Meeting-ah hian MZP lam atanga zirlai raltlante chungchang report ngaihthlak niin, line hrang hrang zir zirlai 600 chuang an awm thu tarlan a ni.

9th International Yoga Day RG lawm

Aizawl : June 21 2023 khan Rajiv Gandhi Stadium, Mualpuiah 9th International Yoga Day chu khawvel hmun hrang hrang te rualin hman a ni a. He hun hi Governor Dr Hari Babu Kambhampati leh Lady Governor Dr Jayashree Kambhampati te chuan an hmanpui a ni. 
    Kumina International Yoga Day atana thupui chu, “Yoga for Vasudhaiva Kutumbakam (Khawvel inpumkhatna atan Yoga),” tih a ni. Mizoramah pawh he ni hi Hospital leh hmun thenkhatah te hman a ni.

Minister hovin ran chungchang sawiho

Aizawl : Mizoram State Animal Welfare Board (MSAWB) chu June 20 khan an Chairman Er. Lalrinawma, AH & Vety Minister hovin S.A.D Conference Hall, MINECO-ah thutkhawmna an nei.
    Chairman Er. Lalrinawma chuan Mizorama ran vulhte bakah state pawn atang ran lakluh te pawh duat taka enkawl an nih na tur atan Mizoram State Animal Welfare Board chuan nasa takin hma a lak thin thu tarlangin uar zawka hmalak zel anih tur thu a sawi bawk.
    Ui inthlahpuntir leh zawrh chungchangah 'The Prevention of Cruelty to Animals (Dog Breeding and Marketing) Rule 2017" chu khauhzawk a kalpui a, ui inthlahpuntir duh bik te tan State Animal Welfare Board-ah registration- ti ngei turin hmalak nise an ti a. Ran leh ran, ran leh mihring in kara buaina lo thleng thin ah a tul ang a hmalak a nih theih nan AH&Vety Department chu inkaihruana lo siam tur a tih an ni.

Mizoram Raj Bhavan-ah West Bengal State din champha phak lawm

Aizawl : June 20, 2023 khan Durbar Hall, Raj Bhavan-ah West Bengal State din champha phak lawmna hun Governor Dr. Hari Babu Kambhampati chuan a buatsaih a ni. 
    He hun hi Ek Bharat Shreshtha Bharat hnuaia hmalakna niin Ministry Of Home Affairs chuan state tina Raj Bhavan te chu state day a piangah lawmna siam turin a lo hriattir tawh anga kalpui a ni. India rama State upa West Bengal hi June 20, 1947 a Bengal Legislative Council thukhawmin thutlukna a siam angin a piang a ni.

Deputy Chief Minister in Smart Parking sakna tur lungphum a phum

Aizawl: Mizoram Deputy Chief Minister Tawnluia chuan June 20 khan Dinthar Veng-ah Smart Parking sakna tur lungphum a phum. He hunah hian I&PR Minister Lalruatkima, bialtu MLA ni bawk chu khualzahawm a ni.
    Tawnluia chuan Aizawl Smart City project hnuaia hmalakna pawimawh tak pakhat ‘Construction of on road smart parking’ sakna tur bultan nan lungphum phum a ni ta chu a lawmawm, a ti a. Aizawl khawpuiin a mamawh parking tha tak, Mizoram Secretariat bulhnaiah leh Ebenezer Hospital bul maiah dah a ni tur chu tangkai taka hman theih hun tur project puitlin hun tur chu nghahhlelhawm a gtih thu a sawi.

Mizoram leh Manipur Chief Minister te inkawm

Aizawl : Pathianni kalta chhun khan Chief Minister Zoramthanga chuan Manipur Chief Minister Biren Singh-a chuan tunlai Manipur buaina boruak chungchangah a rawn bia.
    Manipur Chief Minister chuan buaina nasa tak awm ah boruak tha zawk siam turin Mizoram sawrkar hotute leh sawrkar laipui te nen hma lak ho tul a tih thu hrilhin, Mizoram Chief Minister chu a rawn sawm a; ani pawhin tha a tihpui thu hrilhin, Mizoram sawrkar chuan a tih theih a tam lo a, chutihrual chuan theihtawp a chhuah tur thu a hrilh a. Boruak muanawm zawk a awm thuai a duhsak thu a hrilh a ni.
    Mizorama Meitei engemawzat awmte harsatna tawklo a an awm chu Manipur CM chuan lawmawm a tih thu sawiin, Manipur boruak avanga Mizoramah hnam leh hnam inkar buaina a chhuahloh zui zel a, thlamuang taka an awm zel a beisei thu a hrilh. CM Zoramthanga chuan Mizorama Meitei awmte chungchangah chuan ngaihtuahawm engmah a awmloh thu hrilh.

Swachh Bharat Mission (Urban) 2.0

Aizawl : June 23 khan MRB Conference Hall, MINECO-ah Ministry of Housing & Urban Affairs hmalaknain, Swachh Bharat Mission (Urban) 2.0 chak zawk leh hlawhtling zawka kalpui a nih theih nan Administrative Staff College of India (ASCI) atanga Resource persons- Dr. Pratibha Ganesan leh Devika Ganesan te nen ‘Consultative Workshop on Human Resource Management for Effective Implementation of SBM(U) 2.0’ neih a ni.
    Workshop hi Malsawmzuala, Joint Director, UD&PA in a kaihruai a, UD&PA Director H. Lianzela’n Swachh Bharat Mission (Urban) hmachhawp leh hmathlir te sawiin, Solid Waste Management Centre leh Used Water Management kalpui dan te a hman ve ngawt theih loh thu te sawi langin, Mizoram-ah chuan decentralized solid & used water management kalpui tum a nih thu a sawi lang bawk.

CM-in Hnahthial ah PWD Division Office hawng

Aizawl : Chief Minister Zoramthanga chuan vawiin khan Hnahthial ah PWD Division Office, Executive Engineer thuthmun tur chu a hawng a. Bialtu MLA Dr. R. Lalthangliana, Health Minister chu khualzahawm a ni.
    Chief Minister hian PWD IB thin, tuna EE office ni taah chuan division thar hawnna lungphun khuhhawnna neiin, Hnahthial Electric Veng Community Hall ah inkhawmna neih chhunzawm a ni. Zoramthanga chuan district a lo phuisui zawk theihna tura hlawhtling taka hmalakna chu lawmawm a tih thu sawiin, mipui mamawhna leh mipui rawngbawl kawngah hmasawnna nasa zawk a thlen ngei a beisei thu a sawi.

India leh Myanmar Border Fencing
India leh Myanmar ramri hung tum chungchang hi eng nge i ngaihdan?
Hung hi tha ka ti lo
Hung se ka ti
Ngaihdan ka nei lo

Latest News & Chhiar Hlawh