CMRF thawh thumna
Covid-19 hrileng dona kal zela inkharkhip vanga chhuanchham (destitute) chhungkua hnenah June 23, 2021 atangin Chief Minister’s Relief Fund thawhthumna chu Aizawl Deputy Commissioner, Chairman, District Task Force on COVID-19 chuan a semchhuak.
Aizawl District huam chhunga cheng chhungkaw 3075 hnenah a thawh khatnaah sem tawh niin, chhungkaw 3063 hnenah thawh hnihna sem a ni tawh aa thawh thumnaah hian chhungkaw 4489 te hnenah semchhuah leh tan a ni.

Central Jail tlawh
June 24, 2021khan R.Vanrengpuia, Additional Deputy Commissioner, Aizawl District, Incident Commander leh Chief Medical Officer, Aizawl East leh Aizawl West aiawh te chuan Central Jail leh District jail te an tlawh a. Tunlai hripui leng meka jail lamin an harsatna tawhte ahmunah an enpui bakah COVID-19 veite inkhunghran theihna tur an hmunhma neih angte an enfel pui nghal.

H&FW thuchhuah
Health & Family Welfare Secretary chuan June 24, 2021 khan thuchhuah siamin 'CCC-a awm BPL chhungkuate chu chaw ei man awl tir (exempt) an nih tur thu a tarlang. BPL chhungkua ni lote chuan mahni chaw ei man pek tawh tur a ni. Khawsak dinhmun harsa te chuan Officer-in-Charge kaltlangin bialtu Chief Medical Officer hnenah ei man chawilo turin dilna an siam theih tur thu an tarlang bawk. 

BUHFAI PE
Mizoram Legislative Assembly Speaker Lalrinliana Sailo chuan a bial 8th Chalfilh A/C huam chhunga khaw hrang hrangte tan buhfai bag truck trip hnih June 24, 2021 khan a pe. Speaker hian hripuiin a tuam mek TNT tan Ningni khan khan Buhfai bag engemawzah a hlan bawk ani.

DC-in SEM
June 22, 2021 khan Aizawl DC leh NGO Samarpann, Mumbai te thawhhona kaltlangin Bawngkawn Containment Zone-a cheng chhungkaw 50 hnenah leh Electric Veng Containment Zone-a cheng chhungkaw 100 te hnenah Buhfai, Tel, Dal, Alu leh a dang te sem chhuah a ni a. DC Office atangin Asst. Commissioner Priyank Kishore leh DMC Laltinkimi ten LLTF te kutah an hlan a ni.

HM leh jail tang
June 23, 2021 khan Home Minister Lalchamliana hovin a office-ah tunhnaia Central Jail a Covid-19 vei mi 105 hmuh belh an nih chungchang sawi ho a ni a. He hunah hian Covid -19 hrileng avanga Central Jail inenkawlna a buai loh dan tur te leh jail tang te himna tur te sawiho a ni.

STATE HEALTH SOCIETY
Mizoram State Health Society Executive Committee vawi 25-na chu June 23, 2021 khan Secretariat  Conference Hall, MINECO ah neih a ni a. Meeting hi Health Secretary R. Lalramnghaka IAS chuan chairman niin a kaihruai a ni.

AGRICULTURE hmalakna enpui
Aizawl, the 23rd June 2021 : Vawiin khan Agriculture Minister Pu C Lalrinsanga chuan June 23, 2021 khan Agriculture Research Farm, Neihbawi, Sihphir-a Agriculture Department hmalakna hrang hrang te a hmunah a enpui a. OP-12 Bio Fertiliser Production Unit building sak mek leh Bio Pesticide Laboratory bunna atan building sak mek te a tlawh.

LALREMSIAMI hnenah RS 25,00,000/-
Tokyo Olympics ‘20 July 23 - 8 August 2021 chhunga neih turah Lalremsiami Kolasib nula, Hockey Squad-a tel tura thlan tawh chu Mizoram Sorkar chuan Sports & Youth Services Department kaltlangin Lalremsiami hi Rs 25,00,000 (cheng nuai sawmhnih panga) a pe dawn tih June 23, 2021 khan puan a ni. 

LEGISLATIVE BODY
June 22, 2021 khan Lok Sabha Speaker Om Birla hoin India rama Dan siamtu pawl (Legislative Body) hrang hrangten video conference kaltlangin meeting an nei a. Mizoram atangin Er. Lalrinawma, Deputy Speaker hovin Mizoram Legislative Assembly-a Officer pawimawh ten Assembly Secretariat Committee Room atangin meeting ah hian an tel a ni.

H&TE Minister-in seat siam belh turin ngen
Higher & Technical Education Minister Dr. R. Lalthangliana chuan June 22, 2021 khan Mizoram University Vice-Chancellor leh Mizoram chhunga College hrang hrang Principalte hnenah lehkha thawnin kum 2021-2022 academic session atan seat siam belh turin a ngen.

ROAD CUTTING PERMIT KHAR DAWN HNAI
Public Worls Department chuan June 22, 2021 khan thuchhuah siamin, fur ruahtui tlak a hnaih avangin Aizawl Road North Division, PWD leh Aizawl Road South Division, PWD hnuaia Road Cutting Permit chu July ni 1, 2021 atang khar ni tawh dawn tih Sr. Executive Engineer, PWD Pu Lalchhuana leh Executive Engineer, PWD Pu R.Lalbiaksangi chuan mipui an hriattir.

TNT-ah Nuai 3
Committee on Utilization of Chief Minister's Relief Fund for COVID-19 ruahmanna in Thutak Nunpuitu Team (TNT), Zuangtui, Aizawl a COVID-19 hri avanga harsatna tawh mek chhawk zangkhai nan June 21, 2021 khan CM Relief Fund for COVID-19 atangin Rs. 3,00,000 (cheng nuai thum) pek a ni.

TUI CONNECTION
Public Health Enginnering Department (PHE) chuan June 21, 2021 khan thuchhuah siamin, hripui leng karah hun pangngai angin tui bill pekna (counter) hawn a remchang loh thu an tarlang a. Tui bill pek a khaihlak a rem si loh avangin Online hmanga tui bill pek dan pawh tui hmangtu (consumer) te hriatthiam awl turin inzirtirna neih chhoh mek a nih thu leh dan anga thla thum chhung tui bill pe remchang thei lo pawh ni se an connection titawp(disconnect) rih lo turin hma an lak mek thu an tarlang.